وساروا وركبوا السياره. ومن عقب مانزلوا شموخ. سي ار حب انه يفتح الموضوع مع خواته ولكنه ماعرف كيف يبدأ
سويره كانت قاعده جددام ويزوي ورى..!
وعقبالمعاناه سي ار فتح الموضوع
سي ار: سويره
سويره: شوه؟
سي ار: شرايج باهل الشبلي هاك اليوم يوم يونا..!
يزوي من سمعت هالمرهس نقزت وتحرك شي باداخلها.
سويره: زينين وعاديين ليش؟
سي ار: يعني ارتحتي لهم؟
سويره: مم عادي..
سي ار:: طيب حبيبتي بالبركه ان شاء الله ...نحن ردنيا على الجماعه ان موافقين على الشبلي وفي اي يوم راح ايوون ويطلبون شوفتج..
هني. الكل سكت.
سويره: ( وهيه منصدمه حدها): كيف وشلون يعني؟
يزوي: ( وبدت تعصب): وانتوا يعني من كيفكم تردون ع الخلق وتعطون الجواب؟
سي ار: يزوي لاتصارخين وثانيا نحن شاورناج ياسويره اكثر عن مره
سويره وهيه صاده صوب اخوها ومعصبه: ولكني ماقلت اني موافقه شلون يعني بتسوونها سالفة غصب؟
يزوي: هاللي قاصر والله زواج بالغصب بعد
سي ار هني مارام ايود عمره وصرخ فيهن: انتن ماتستحت ترمسن اخوكن العود بهالطريقه؟ عيب عليكن ولمن لسانكن شوي لا احين اردكم البيت.!
البنات سكتوا ولكن متحرقصين
سويره تهز رريلوها ويزوي تتأفف.
يزوي: يعني بالعقل شلون تردون عليهم وسويره هب موافقه؟
سي ار: سويره بتوافق لان ماراح نلقى حد احسن عن الشبلي
يزوي: سويره مابتوافق وهيه قايله لكم .
سي ار: يزوي قبضي لسانج .. والموضوع يخص مستقبل اختج كبري عقلج شوي
سويره وسط هذا كله ساكته ومعصبه ومب عارفه شو تقول
يزوي (وبنبره حاده تدل على العناد ): سويره هب موافقه وسير قول حق ربيعك يدور وحده ثانيه.
وسي ار من سمع هالرمسه ضرب بررريك . وووقف وصد صوب يزوي وهو معصب حده ونفسه في خشمه واطلق كلمه. او جمله هددت مستقبل يزوي بشكل مباشر.
سي ار: يزوي
ويزوي ساكته واطالعه بنظرات العناد
سي ار: تشوفين هالجامعه لي كل يوم افرج فيها؟ تراج بتتحرمينها بسبة تفكيرج البايخ ولسانج الطويل تفهمين. وانا لاقلت كلمه تعرفيني ما ارد اثنيها.. سمعتيني ولا لا؟
يزوي ساكته وماترد ماتوقعت اخوها جذا يرد عليه
رد سي ار وصرخ فيها: سمعتيني ولا ل؟تبيني ا ارد افهمج كلامي؟
يزوي( وبدت الدمعه تحوم في عينها وقالت): سمعتها.!
وكمل سي ار الطريج لين وصلت الكليه ونزلت يزوي وكل الهم في صدرها..!
سويره وسط هذا كله ضايعه. مب قادره تستوعب شلون هذا كله صار وشلون الموافقه انعطت دون ماترد عليم.. راسها عورها. تسمع تهديد اخوها من صوب. وعصبيته من صوب..
سويره: معقوله تحرمون يزوي من دراستها بسبة زواجي؟
سي ار: هيه نعم لانه انتن تدلعتن وايد وماعرفتوا شلون الواحد يوم يقولكم لا
سويره: سي ار حرام عليك بس هذا مستقبل وهذي حياه شلون تتخذ قرار مثل هذا
سي ار( وهو بعده معصب): سويره عطينا الريال كلمه وماراح نرجع فيها. وموافقتج اعتبر خذيتها منج الحين ولا ترا والله وهاي حلفه يزوي تطلع من الكليه وانتي من الدوااوم وقعدوا جابلوا بعض عدل مدل ذيج الساعه...!
سويره: مب قادره ترد ع اخوها من الغصه. معقوله الموضوع يوصل لدرجة الحرمان.؟ طيب انا براييني لكن يزوي. ودراستها\ مستقبلها؟. يالله يااااربي.. يالله يااربي..
ويمر الوقت وسي ار بدأ يهدا. بدا يخف السرعه. تلوم بالي سواه في خواته. طلع من طوره وماتصرف صح. وقام يهدد.! عل وعسى هالاسلوب ينفع معاهم دامالطيب مانفع.!
وصل شركة ابوه وقبل لا تنزل سويره.
وهيه في وسط الدهشه من الرمسه اللي سمعتها من اخوها..!
فتحت الباب
سي ار: سويره
سويره كانت ناويه تنزل من زقرها وقفت تتريا شو بيقول
سي ار: انا اسف.!
نزلت سويره وسكرت الباب في ويه اخوها دون ماتنطلق بكلمه...!
من الدهشه من الصدمه من اللي مب قادره تصدقه.!
يزوي تنحرم من دراستها. الا هالشي.
طول ماهي في الدوام تفكر شو تسوي؟
توافق وتضمن مستقبل اختها. ولا ترفض وتعاند ويخسرون هم الثنتين
كل الامور ضدهم
سويره مب زعلانه لانها بتعرس كثر مب زعلانه ع طريقة اخوها في تعامله معاهن..!
عقب تفكير عميق. توصلت سويره لحل. توصلت لقرار نهائي.
اتصلت ع اخوها
سويره: سي ار
سي ار: هلأ؟
سويره: انا موافقه
سي ار من سمع هالكلمه من اخته ارتاح ولكنه في نفس الوقت اللوم لاعب لعبته فيه
سي ار: اختي انا اسف والله اسف بس كل اللي ابيه والله مصلحتكم وانتوا خواتي وادرى فيني
سويره: ادري.. بس انا وافقت بشرط
سي ار: وشو هالشرط
سويره: ان الزواج والملجه يكون بعد ماتخلص يزوي من الكليه وتتخرج.!.!
....!!!...( يعني بعد سنه ونص...!)
[ غريب يازمن على وين بتودينا...]
