سمحووووووولي ع التأخير
هذا الجزء ما قبل الاخير استمتعوا احباب قلبي !!!
ام خالد ( تنادي منيره بعصبيه ) : منيره , منيره , منيروووه ويهد ..
منيره (17 سنه ثانويه عامه مغروره ومتكبره ): اوووف خير شو هناك شو فيج تصارخين سمعتي الفريج كله ...
ام خالد : انتي ويهج جذي تردي علي ,, انا امج مب ربيعتج ولا اختج ..
منيره : انزين شو تبين خلصيني انا مب متفيجة لج احينه ؟؟
ام خالد ( خلاص طفرت منها ومن اسلوبها وعصبت من الخاطر): عسى السانج القص ,, عنبوه السان مصريه جيه انا ما احيدني مصريه عشان انتي اطلعين جذي بس اقولج ذلفي من ويهي مابى اشوف رقعت ويهج ...
منيره ( وهي رايحه غرفتها ): احسن بعد بفتك منج وبرتاح من قبالج ....
مزنه كانت يالسه ف غرفتها وامل نايمه وهي مب عارفه شو تسوي وملانه قامت وشغلت ال UAE fm واول ما شغلتها طلعت اغنيه عبدالمجيد عسى ربي وتذكرت خالد ويلست تسمعها ,,
عسى ربي يخليك لعيونـي,, وعسـى ربـي يخلـيني لعيونك
حبيبي دنيته صعبه بدونـي,, ولاشـي دنيتـي تسـوى بدونك
انـا مغـرم يا غالي فيك ,, وادعـــي ربــي يـخلـيـك
اذا عني بعد يجـن جنوني,, لانـك صـرت اغلى من عيـوني
عسى ربي يهنيني بغرامك ,, ولا يحـرمـني مـن رقة كلامـك
يا اغـلى انسان انـا عندي,, يا حـزني وفـرحـتي وسعـدي
اخاف الناس عنك يبعدونـي،، حبيبي صرت اغلى من عيونـي
حبيبي فيك راضاني زمـاني,, وغـيرك ما يطاوعـني حنـاني
سكـن حبـك ف وجــداني,, وتـعـوض فـيـك حـرماني
غرامك غير احساسي ولوني ,, حبيب الروح يا اغلى من عيوني
واول ما خلصت ما قدرت تنام من دون ما تسمع صوت خالد خذت التيلفون واتصلت فيه ,,,
مزنه (بحب): هلا حبي ,,
خالد : هلا حياتي شحالج ؟
مزنه : بخير وانت حبيبي ؟
خالد ( بقلق): بخير ,, شفيج مزنه صوتج مب طبيعي صاير شي؟؟
مزنه (تبى تخوفه ) : اممم يعني مب مهم
خالد : قولي شو صاير ولا تخوفيني
مزنه : هو مب شي يخوف اطمن
خالد ( وقلبه يدق بسرعه ) : مزنووه حبيبي لا تخوفيني قولي والله قلبي يدق ويقول ضربخ ضربخ سمعي ( يحط التيلفون ع قلبه )
مزنه (تضحك بدون صوت ع الصامت ) : حبيبي لا تحاتى ما صاير شي ,, بس السالفه وما فيها اني انا اشتقتلك
خالد (ضحك من سمعها جذي تقول ): تشتاقلج العافيه حبي وانا بعد اشتقتلج ,, تعرفين طيحتي قلبي من مكانه هو احينه متعلق بحبل شرياني .
مزنه : هههههههه حبل شريانك حلوووه هاي
وطول الليل يلسوا يرمسوا بعض وكانهم اول مره يتكلموا ومب صاير عليهم 3 سنوات متزوجين <<<<<< بس تعرفون حلو لو كان عندكم شخص تحبه صج وحتى لو مر عليكم مب ثلاث سنوات لو العمر كله وانتو بعدكم متعلقين ف بعض وحبكم يزيد.........
ف اليوم الثاني الصباح و ف بيت ابو عادل , عبيد اول واحد كان ناش ويالس يتريق , امه من شافته ما صدقت ..
عبيد (يقوم يبوس راسها ): صباح الخير امي ..
ام عادل (مستغربه ) : صباح النور عبيد ,, غريبه منورنا من الصبح ..
عبيد : شسوي قلت اصبح عليج اول واحد واستبشر بشوفتج يالغالية ..
ام عادل : لو اني مب مصدقتنك بس الله يهديك وينور لك حياتك ويعطيك ع قد نيتك
عبيد: امين ,,, الله دعوه حلوه من الصبح ومن فم الغاليه امي عيل صارت حياتي كلها نور ف نور وانتي بعد موجوده ف حياتي اكيد النور ما يضاهي نورج يا احلى ام ف الدنيا ,,
تسمعه مروى وهي نازله من الدرج وتنصدم : منو هذا الي يرمس عبيد ..
عبيد : ليش مب عايبنج ,, والناس تصبح اول وبعدين تسولف
مروى : اووه صح ,, (تبوس راس امها ) صباح الخير ع الحلوه , سمحيلي اميه بس ما كنت مصدقه الي اسمعه
ام عادل (تبتسم ) : بصراحه انتوا عليكم حركات ,, يا بنتي خليه اذا كان بيعقل لا تقوليله شي لا يقلب علينا مره ثانيه ..
مروى : انزين بنخليه وبنشوف شو اخرتها معاه
عبيد : لا حوووول .. شوف حسد بني ادم
مروى : لا انا حواء ... هههههههههه
ام عادل : يا الله بس لا يكثر ويلسوا تريقوا
مرام كعادتها تحب تقوم الصبح تصلي وتيلس عند الدريشه وتسمع صوت العصافير وتتخيل اشياء حلوه , ومن ناحيه ثانيه مرام تعرف انها لو قالت تبى تروح المكان الي خاطرها فيه لا امها ولا ابوها بيرفضولها طلب بس هي من عادتها انها ما تحب تطلع أي مكان وحتى ما فكرت انها تطلع واذا طلعت بتروح عند اختها مزنه ساعتين وترجع الكل حاول انه يغير من طبعها بس هي رافضه هالشي ومستحيل انها تتغير ,,,,
تفتح مروى الباب بكل هدوء تام وتمشي بخطوات خفيفه وبدون صوت وقفت ورا مرام وهي مب حاسه انه احد واقف وراها ومروى تسمع كل كلمه تقولها وتتامل ملامحها الي تبين انها طفله صغيره وبريئه واشعة الشمس مخلي ويهها يشع نور مثل الملاك , واصلا مرام بنت حلوه وجمالها جمال رباني واحلى وحده ف خواتها حتى مزنه ومروى حلوات بس مب مثل جمال مرام وبعدين تفتح مرام عيونها وتشوف مروى وراها وتنهدت مرام وتغيرت تعابير ويهها ,,,,,
مرام (قلبها يدق بسرعه وخايفه ) : بسم الله خرعتيني ..
مروى (تضحك عليها ) : شفيج مرووومه اخترعتي ...
مرام : ما سمعتج وانتي تدخلين , حشى دراكولا مب مروى
مروى : عينج يا الله دراكولا ,, الا بسالج سؤال وجاوبيني بصراحه ؟؟
مرام : سالي وبجاوبج بصراحه ..
مروى( تطالعها بنص عين ): انتي صج عايبتنج الحاله الي انتي فيها .
مرام : مروى ليش تسالين ؟ وبعدين انا ما شكيت لج الحال
مروى : جاوبيني بصراحه ابى اعرف انا اختج ومن حقي اعرف
مرام تحاول باي طريقه انها ما تجاوب مروى بس مروى تعيد نفس السؤال كل ما تغير الموضوع وتمن ع هالحال نص ساعه تقريبا ,, واخر شي مروى عصبت ع مرام
مروى ( بعصبيه ): انتي شفيج جذي ليش ما تصارحيني ولين متى بتمين جذي هذي مب حاله , لا تكتمين ف قلبج تراه مب زين قولي الي ف خاطرج فتحيلي قلبج لو مره وحده .
مرام ( ومصره ع كلامها ): مروى انا قلتلج ما فيني شي وحالتي جذي عايبتني وما ف خاطري شي كل شي ابيه عندي
مروى تطلع من غرفتها وهي معصبه وبدون ما ترد ع كلامها وامها شافت مروى معصبه حتى ما قالت انها طالعه لبست عباتها وشيلتها وركبت سيارتها وراحت بسرعه تطلع امها تركض وراها بس ما لحقت عليها , وتروح بعدين عند مرام عشان تسالها بس مرام كانت ف الغرفه ومقفله ع نفسها ولا ترد ,, وامها عيزت من كثر ما تدق الباب وتناديها ,, سمعها عادل وقام من سباته العميق وبدون ما يتغسل طلع يشوف شو الي مستوي ,,,,, سمعوا هذي قالت يتغسل وهو يسمع امه تصارخ والله هبله اقولج كملي احسن وخلينا من هبالج ,,,
عادل ( بقلق ) : خير امي شو صاير شفيج ؟؟
ام عادل ( والخوف مسيطر عليها ) : ما دري شو صاير بين خواتك وانا خايفه عليهن
عادل : جيه بلاهن شو مستوي
ام عادل : والله مادري , اختك مروى طلعت بسرعه من البيت وهي مب من عادتها ومرام وما ترد علي مادري شو ستوالها
عادل ( يحاول يهديها ويطمنها ): انت هدي اعصابج احينه ومب زين الي تسوينه بنفسج , روحي ارتاحي وانا بتصرف ,,
ام عادل ف البدايه ما رضت تروح بس عادل كان يحاول بأي طريقه عشان يهديها وبالغصب رضت تروح ترتاح وعادل بدوره وهو عارف انه المفروض ما يدخل بينهم ,بس عشان يرضي امه ويريحها يلس يدق الباب ع مرام وهي نفس الشي ما ترد , زاد صوت الضربات ع الباب ,,
مرام ( من ورا الباب اطمن عادل ): عادل خلاص انا مافيني شي بس انت روح شوف مروى ..
عادل ( بقهر ) : شوووووه ,, وليش ما تردين ع امج اذا ما فيج شي
وشو فيها مروى ؟؟؟؟؟؟؟؟
مرام : خلاص عادل ما صاير شي وانا بعدين بروح عند امي
عادل انقهر من اسلوب مرام البارد وهو يعرف طبع مرام انها كتومه ومستحيل تقول الي ف قلبها ولا شو صاير معاها , رجع عادل غرفته ولا كانه صاير شي ف البدايه قال بيروح ياخذله دوووش ( يتسبح ,, اونه اطورت العزبه دووش ) بس بعدين من شاف السرير ع طول غمض عيونه وهو واقف ومشى وطاح فوقه وناااااااااااااااااااااااام ونسى يروح يطمن امه , وام عادل حليلها ع اعصابها تبى تعرف شو مستوي ع بناتها وبعد ساعه تنزل مرام م غرفتها و ف الصاله تشوف امها مضايقه ,, تروح مرام ع طول تحضنها وتبوسها وتتأسف لها وتراضيها , المهم رضت عليها وصفت القلوب ......
ابو عادل وهو يالس ف المكتب شاف مروى شكلها متغير وصايره حمره ومب مركزه ابدا معاه ,
ابو عادل ( بكل هدوء ) : شفتي كيف مات ؟؟
مروى ( بدون ما تنتبه ع ابوها وكلامه ) : هاااه , هيه حلو ..
ابو عادل ( يضحك ): حتى وهو ميت تقولي حلو ؟؟
مروى : هاه شو هذا الي ميت وحلو منو مات ؟؟
ابو عادل : خير بنتي شو فيج ؟
مروى : لا ابد ابوي ما فيني بس راسي معورني شوي ..
ويقاطع كلامهم دق الباب ,,,
السكرتيره: طال عمرك فيه راجل عاوز يشوفك ؟
ابو عادل : خليه يتفضل
السكرتيره : حاضر ..
مروى ( توقف ) : عيل ابوي انا بروح مكتبي , تامرني ع حايه
ابو عادل : سلامتج , وانا اقول احسن لو تردي البيت ترتاحي
مروى : لا عادي ابوي ما يحتاي .
وبعدها يدق عليهم الباب ويدخل واحد طويل وسيم مترتب وشكله يطيح الطير من السما>>> مزيون يا ويلي .. وع طول عينه اطيح ع مروى الي كانت واقفه ومذهوله منه بس بعدين تدارك نفسها وتنزل راسها وتطلع ..
الشخص: السلام عليك الوالد
ابو عادل : وعليكم السلام , هلا الشيخ تفضل استريح
الشخص : دام فضلك , انا سيف بن طلال وابوي مطرشني عندك
ابو عادل : وانا اقول الشكل مب غريب علي , شحالك وشحال ابوك
سيف : الحمدالله يسرك الحال
مروى يالسه ف مكتبها وناسيه العالم كله وكل تفكيرها بالشخص الي دخل ع ابوها كان شكله غير وحلو مره حتى لحيته المبهدله طالعه حلوه عليه ف خاطرها تقول ,, الله جان زين لو انا اكون عنده يا حظ الي ما خذتنه , وليش بعد يمكن يكون ما متزوج لا والله ما متزوج وياي عند ابوي اكيد متزوج ويبى يبني بيت ولا اصلا شو يايبنه ولا يمكن هو احد موكلنه عشان يسويله شي مب لازم يكون متزوج ,, ويقطع حبل افكارها ضربات دق خفيفه ع الباب ...
مروى ( برقه ): تفضل
سيف انصدم من شافها مب كان متوقع انها بتكون هي ونربط السانه مب عرف شو يقول
مروى ( تحاول تمسك نفسها ): هلا اخوي امر؟
سيف : ما يامر عليج عدو , ابو عادل طرشني صوبج وقالي اني انا بتعامل معاج انتي ..
مروى ( ف خاطرها الله يا بوي اول مره اطرشلي واحد غرشوب )<<<< شوف تفكير البنات
وبدا سيف يخبرها بالي هو يبيه وكيف يبى يسويه ومروى مب منتبه حقه وما فهمت ولا كلمه منه وكانت ف عالم ثاني وما انتبهت الا من قال انه هو يبى البيت عشان يتزوج ,,,, انصدمت مروى يتزوج يعني هو خاطب ولا مالج ع وحده شو هالحظ الردي ..
سيف كان ف البدايه مب مركز ع مروى انها ابدا مب منتبه لكلامه وحق افكاره كانت تطالع ايده وهي تتحرك ,,
سيف ( ابتسم ابتسامه خبلت مروى ): فهمتي احينه كيف ؟
مروى : هاااه ؟؟ هيه فهمت اكيد , انت ولا يهمك بسويلك كل الي تبيه
سيف( يطالعها وهي منحرجه منه ومب عارفه كيف تتكلم وعشان يحرجها اكثر ): نشف ريجي ممكن كوب ماي
مروى ( بخجل ): اوووه اسفه نسيت ,
من بعد ما طلع سيف من عندها , مروى حطت راسها ع الطاوله وغمضت عيونها تبى تحفظ صورته ف ذاكرتها لانه هو مرحله وبتعدي ,,
سيف راكب ف سيارته ويتذكر شكل مروى الي خبلته من اول نظره وطبعا سيف ما عرف انها هي بنت ابو عادل وهي ما خبرته وسيف ما اهتم اهم شي انه عرف اسمها وحس انه كل ما ذكر اسمها قلبه يدق بسرعه <<<<<<< الله يعين حب من اول نظره ...
عبيد كان مار بسيارته من عند الشركه ويصادف سيارة سيف واقفه ف المواقف , وقف عداله ونزل من السياره , سيف مب منتبه له لانه كان سارح ف خياله ف مروى ,,,
عبيد ( يدق الدريشه ): هلا بالطيب ..
سيف (ينزل من السياره ع طول ): هلا بك والله شحالك الشيخ
عبيد : يسرك الحال من صوبك ؟؟
سيف : الحمدالله ما شكي باس , شو تسو هنيه لا يكون تبى تبنى بيت انت بعد
عبيد : شو ابني بيت وانا عندي حق الخساير ..
سيف : عيل شو تسو هنيه ؟
عبيد : هاي شركة ابوي وقلت امر اسلم عليه
سيف شافها فرصه حلوه عشان يعرف عن مروى ومنو تكون
سيف ( بخبث ) : تصدق عند ابوك وحده اسمها مروى ومب فاهمه الشغل موووليه
عبيد ( مستغرب ) : افااا , لا تقول , الي انا اعرفه كل الي يشتغلون عند ابوي فاهمين شغلهم واكثرهم مروى
سيف : لا ما اظني انا ارمسها وهي مب مركزه عندي بصراحه مب واثق منها
عبيد اول مره يسمع واحد ما يمدح شغل مروى ولا الكل يقول انه شغلها مضبوط : سيف انت متأكد انك تتكلم عن مروى
سيف : هيه عيل انا عند منو كنت ولا كم مروى عندكم ف الشركه
عبيد: عندنا مروى وحده بس اقولك لا يغرك الشكل تراها احسن وحده تشتغل عند ابوي وابوي واايد يمدحها وبتشوف الشغل كيف بيطلع بعدين .
سيف ما وصل حق الي يباه وعبيد ما خبره منو تكون مروى وصح انه هو كان يلمحله عشان يعرف منو مروى بس عبيد ما عطاه فرصه .
راح سيف ف دربه ودخل عبيد عند ابوه وسلم عليه ورجع البيت وحط راسه ونام ...
عادل كان توه مخلص متسبح ومتجهز عشان يطلع عند ربعه خذ محفظته وسويج السياره ( المفتاح ) وعند الدرج يرن تيلفونه وشاف الرقم وتغيرت تعابير ويه ,,,
عادل (بحزم) : نعم
الشخص :عادل
عادل : هيه نعم امر الطيب
الشخص : معاك عبدالعزيز مسئولك ف الدوام وتغير جدولك وعندك رحلة الى بريطانيا بعد ثلاث ساعات ونحتاجك تكون هنيه باسرع وقت
عادل ( بصدمه ): ثلاث ساعات ؟؟ بس انا ما اقدر احينه وانا احينه مب ف بوظبي عشان تقولي ف ثلاث ساعات
عبدالعزيز (باصرار) : تصرف المهم اشوفك عندي ف المطار ..
عادل عصب من اسلوب عبدالعزيز وهو يكلمه بس شو يسوي هذا شغله ولازم عليه يروح , راح عادل عند امه عشان يخبرها ومن سمعته جذي يقول تفاجئة وتمت تصيح ع راسه وهو يحاول يهديها بس ما يفيد بعدين باس راسها وطلع عنها لانه لو يلس يهديها ما بيخلص ولا بيروح الدوام . جهز شنطته ع السريع ولبس بدلته وطلع وهو ف الدرب اتصل ف ابوه وخبره وخبر باقي اخوانه , وهو اول مره يروح الدوام ولا يشوفهم ,,, الله يعينه راحت عليه الخطبه وكان ما باقي شي عليها الا أربعة ايام . مرام كانت ف المحاضره وما قدرت ترد على عادل وهو يتصل فيها وقالت من تخلص بتتصل فيه .
طلعت مرام من المحاضره وع طول خذت التيلفون واتصلت ف عادل .
مرام : هلا عويدل ازيك
عادل : كويس وانتي ازيك كويسه ؟؟
مرام : كويسه يا خوي ... هااه فينك انت دل وقتي ؟؟
عادل : مرام فديتج انا رايح الداوم وبتم هناك اسبوع وبرجع
مرام ( بحزن ): ليش ؟؟ انت من كم يوم بس رديت والمفروض تكون ف اجازه احينه ..
عادل : شسوي تغير جدولي , المهم ديري بالج
خلصت المكالمه وكان عادل مهموم ومب من عادته انه يروح وهو ب هالحاله كان وده لو انه عبدالعزيز يقوله انه هذا مقلب من مقالبه الي تعود يسويه حقهم ايام الاجازات بس طلع كله صج صح انه تاخر نص ساعه وخذله هواش من عبدالعزيز بس ما اهتم حق كلامه وكانه ما يسمعه شو يقول عاطنه الاذن الصمه .......
ف البيت ام عادل تصيح ع روحة عادل المفاجئة وابو عادل يهديها ويحاول يسكتها ويقولها :
انه هذا شغله وما يقدر يسوي شي وصياحج هذا ما بيغير شي وانتي المفروض تكوني متعوده ع سفراته ..
بس لا حياه لمن تنادي مب راضيه تسكت <<<<<<< الي يسمعها هو رايح الحرب ......
مرام كانت ف غرفتها يالسه بروحها ودخل عليها عبيد من دون ما يستاذن ,,
عبيد (بهمس) : مرام بقولج شي
مرام ( اطالعه ومستغربه ) : قول
عبيد هو يروح يطالع اذا احد كان عند الباب ويقفل الباب بالمفتاح
مرام ( حيرانه ) : عبيد شو تسو انت
عبيد ( ونبرة صوته منخفضه عشان محد يسمعه ): بخبرج شي خطير بس اباج ما تفتني مثل عادتج الفتانه
مرام ( عصبت بس ف نفس الوقت كانت مستغربه من اسلوبه وحركاته اول مره تشوف عبيد ب هالحالة مختبص ومتبهدل : عبيدوه قول شفيك حيرتني
عبيد : اوعديني اول مراموه ما تخبرين
مرام : اوعدك ما اخبر يا الله قول
عبيد ( بتردد ): انزين سمعي ,,, مرامووه انا امممم متزوج
مرام تضحك من الخاطر : تتمصخر صح , تراني مافيني ع مصخرتك
عبيد ( بحزم واصرار وثقه ) : اقولج متزوج شو اتمصخر , والله العظيم ما اتمصخر , انتي ما لاحظتي طلعاتي وما ارد الا ف وقت متاخر
مرام ( منصدمه ) : انا مب مصدقه بس شحقه ليش بالسر ؟؟
عبيد : يعني انتي تعرفين انهم ما بيخلوني اتزوج قبل عادل وانا خبرت ابوي بس هو رفض وانا بصراحه كنت مستعيل وما بغيت اسوي شي حرام وخذيتها بالحلال ,,
مرام ما صدقت الي تسمعه من عبيد وكان شبه مستحيل وعبيد طلع متزوج وبالسر صدمه كبيره ولو امه وابوه يعرفون عبيد راح فيها بيذبحه ابوه ,,, مرام احتفظت بسر اخوها ولا خبرت لانه مب من عادتها اذا احد قالها سر تخبر حتى لو كان كبير وخطير ولانه عبيد قالها انه هو بيخبرهم بس ف الوقت المناسب ...
مروى ما كلمت مرام يومين وكل ما تحاول مرام تكلمها مروى تصد عنها ولا تعطيها فرصه وتتجاهلها , ومرام تعصب لانه ما تعودت هالجفاف كله منها وانها ولا مره احد عاملها بنفس هالاسلوب ..
ام عادل يالسه ف الصاله ويلست عندها مرام وكانت ساكته جاتهم سونيا وعطت ام عادل بطاقة دعوه ام عادل استغربت وسالتها من عند منو وخبرتها سونيا ....
ام عادل (باعجاب) : الله شوفي شحلاتها البطاقة شكلها حلو وراقي
مرام : وايد حلوه ؟ بس منو هذول اميه
ام عادل خبرتها منو وانهم ناس طيبين وما في احسن منهم وقالتها انها لازم تروح معاها عشان الكل يشوفها وما ترضى تسمع منها كلمة لا مرام ما عرفت شو تقول وما قدرت تقول لا و هي وعدتها من قبل انها بتسوي أي شي تبغيه من عندها ,,,
وف نفس اليوم مروى وكسرت كل الحواجز الي بينها وبين مرام وراحت عندها تطلب منها انها تروح معاها السوق مرام فالبدايه ما صدقت انه مروى ردت تكلمها بس انها تروح السوق مستحيل ومروى تعمدت انها تخبرها قدام امها عشان تخليها تروح ......
وبالغصب مرام راحت السوق معاها وطول الدرب ساكتين وما يتكلمن
مرام كسرت الصمت الي بينهم : مروى كيف الداوم معاج
مروى طالعت مرام وابتسمت : الدوام حلو بس لو ما هذا فيه اوووف
مرام ( استغربت ): هذاك فيه ومنو هذا ؟؟
مروى : فيه واحد يبيني اصمم له بيت بس مطفربي مره يقولي ع ذوقي ومن اسوي ع ذوقي يغير فيه اشياء وايد
مرام : انزين خليه يصمم حق عمره اذا مب عايبنه
مروى : بغيت اقوله ( بتافف وقهر ) بس ااااخ ما قدرت الملعون حلو
مرام : لا تكوني تحبيه
مروى ( تطالعها و عيونها تلمع مثل النجوم ) شو احبه تخبلتي انتيه
مرام : ها ها ها علينا هالحركات , شوفي شكلج صرتي نفس الطماطه يا الله اعترفي بسرعه
وبعدين مروى خبرتها كل شي عنه وشو استوالهم ومرام حست انه مروى صج تحبه وتموت فيه ,,,
وصلوا السوق وكان زحمه بشكل فظيع ومرام كانت مستحيه ومب عارفه كيف تمشي وعيونها ف الارض ومروى تضحك عليها
مروى : الله شوفي مرام هالبدله وايد حلوه تعالي ,
مرام تمشي وراها وكل ما تسالها مروى عن شي مرام تقول مادري ولا ما اعرف وهي تعصب منها وتطفر ,, ومن مكان لمكان ومن محل لمحل ,
مرام ( بتعب ) : مروى خلاص , تعبت ابى ايلس
مروى ( بتافف) : اوووف جني امشي مع عيوز
وراحن يلسن ف الكوفي ومرام من التعب مب قادرة تحرك ريولها
مرام : بروح البيت وبحط ريولي ف ماي بارد
مروى (تتمصخر ) : تراج عيوز يدوه
والطاوله الي عدالهم كان يالسين فيها اثنين واحد منهم يطالعهن ويتغزل والثاني ولا مسويلهن اعتبار ,,
سلطان : شوف محمد القمر الي هناك
محمد : مب متفيج انا , شوف بروحك قمرك
سلطان : يا ريال اقولك شوف لا يفوتك ولا تصير اهبل
محمد : خلني اهبل ولا طفربي اسكت عني
سلطان ما سكت عن محمد ويلس محتشر ع راسه عشان يشوف مرام , طفر محمد والتفت عشان يشوفها واول ما شافها ما صدق عيونه كان جمالها اخاذ اسرته ع طول عيونها المحمره عاطنها جمال فظيع وخدودها الحمر من التعب الي يبين انهن طبيعيات وملامحها الحلوه وابتسامتها البريئه كل شي كان فيها حلو سبحان من كملها
سلطان ( يلوح بايده ) : لا الريال شكله راح فيها محمد يالاخو ايييييييه نحن هنا
محمد يركز ع حركة سلطان : هااااه , شفيك
سلطان : وين رحت , وين وصلت
محمد : ما يخصك ,
محمد تاثر ف مرام وايد , كان يسولف مع سلطان بس عقله واذنه ف الطاوله الي عداله يحاول يعرف شو اسم مرام , وعرف عنها اشياء بسيطه سطحيه خلته صج يعجب فيها اكثر وبعدين سمع مروى تناديها باسمها وما صدق من الله وع طول وقف وحرك الكرسي بقوة استغرب سلطان من حركت محمد : خير محمد شو صار ؟؟
محمد : ماشي بس تذكرت شي
مرام ومروى من الحركه الي سواها محمد التفتن وطالعنه مستغربات شفيه بس بعدين قالن اكيد سو الحركه هذي عشان يطالعنه ويلفت انتباهن ولانه الشباب يسون أي شي عشان البنت تشوفهم
قامن وقالن بياخذن اخر لفه وبعدين بيرجعن البيت , سلطان المغازلجي عرف انه محمد اعجب ف مرام ف قاله يقوم يمشي معاه بس عكس اتجاهن عشان يلتقوا فيهن الوجه بالوجه ومثل ما توقع سلطان التقى فيهن , ومرام شافت محمد واول مره تحط عينها ف عين واحد غريب ومن شافته وقفت وما قدرت تتحرك مروى التفت ع مرام وشافت شكلها تغير وصار ويها فيه الوان قوس قزح
مروى ( بقلق): مرام شفيج
مرام ( وتتنفس بصعوبه ): قلبي
مروى ( خافت ): شفيه قلبج قولي
وتمسكها من ايدها وتخليها تيلس ع اقرب كرسي : مرام شفيج لا تخوفيني
مرام : قلبي يدق بسرعه
كلام مرام خوفها اكثر خلتها وراحت تشتريلها ماي ومحمد كان يراقبها من بعيد لبعيد ومرام مب شايله نفسها وتحس انه الدنيا تدور فيها اول مره تحس ب هلاحساس رجعت مروى وعطتها تشرب وخلتها تهدى شوي ,, دقايق الا ومرام ترجع طبيعيه ولا كانه صار شي
مروى ( باهتمام ):مروومه كيف تحسين عسى اهون عن قبل
مرام : الحمدالله احسن
مروى : خير شصار فيج قولي ؟؟
مرام : مادري بس انتي لا تحاتين خلاص احينه ما فيني شي , خلينا نروح البيت انا تعبت
مروى : اوكي يالله قومي
طلعن من السوق ومحمد طلع وراهن وقف لما شافهن يركبن السيارة وحس بضيقه وكان حاس انه مرام قدره ولازم تكون له مب لغيره ..
وصلن البيت وع طول مرام طلعت غرفتها ودخلت الحمام تتسبح عشان يروح التعب ,,, وف الحمام تذكرت الشخص الي وقف قدامها وبكل ثقه وهيبه , بس بعدين قالت انه شي سخيف تفكر فيه وهي بس شافته مره وحده اكيد هو من النوع الصايع الي يغري البنات بنظراته واسلوبه ,,,,,,,,,,,,
وف مواقف جامعة الامارات وف وقت متاخر محمد يالس ومسدح الكرسي ومغمض عيونه ويسمع عيضه ويفكر ف مرام وكيف يقدر يوصلها وتذكر عيونها وهي تشوفه وتعابير ويههاا الي تغيرت حس انها هي حست فيه مثل ما هو حس فيها ....
الساعة 5 الفجر عبيد اول واحد صاحي وصار يقوم كل مره نفس الوقت ومحد يعرف السبب الا مرام ( عبيد صار يشتغل الصباح وبعدها يكمل دراسته الظهر ومن يخلص يروح عند حرمته ويرجع اخر الليل ومرات ما يرجع البيت يعني عايش حياته ) المهم نرجع لمحور حديثنا ,,,,,
ابو عادل : عبيد انت شو سالفتك صرت متغير هالايام
عبيد : ليش انا مب عايبنك ابوي صاير جذي
ابو عادل : لا عايبني ماشاءالله عليك , بس ما تقولي انت وين تروح من الصبح وما ترد الا اخر الليل
عبيد : ما اروح مكان اتمشى عند ربعي
ابو عادل ( بحزم ): عبيد قولي شو صاير عندك ؟؟
عبيد ( قام من مكانه ): ما صاير شي ابوي ( يبوسه ع راسه ) انا بروح تامرني ع حايه ..
ابو عادل : الله معاك ويحفظك من كل شر
ويطلع عبيد من البيت وخذ نفس كبير وقال الحمدالله عدت ع خير ولا شوي وابوي بيفتحلي تحقيق وما بخلص الي من يوصل حق الي هو يبغيه ....
الكل راح ع شغله وام عادل تلف ف البيت بروحها بدون ونيس وما عندها غير انها تناقر سونيا ام اللسان ..
