لاتعتذر مال الهجر منك تبرير
صدّك بليا ذمب والله ظليمه
مصارلي بعد يفوق اي تصوير
تجددت كل الجروح السليمه
بعدك لعبي هاجسي والتفاكير
وقلبن جريح وروح صب مهيمه
مغير اسلي خاطري بالمشاوير
اروح وارجع والهواجس مقيمه
ياحبي يالي بين بيض الغنادير
لك في عروش القلب قدر وقيمه
ان كان صدّك ماخذك عني لغير
روح ولو انه الخساير وخيمه
وإن كنها عني خذتك المقادير
فالعوه عند المقدره فيه شيمه
يامرحبا والحب كله معاذير
تشفعلك ايام الغرام القديمه
يوم الهوى لازارني منك عصير
اضم في صدري من اجلك نسيمه
واليوم اصبر خاطر الوجد تصبير
واقول صدك عقب وصلك جريمه
ولاجاك مني ياهوى البال تقصير
مواقفي وياك والله عظيمه
صخرت لك مشاعر الشوق تصخير
ونطرتك بحب تقفاه ديمه
ضلّلتك بجفني وصارت مسافير
يوم الغلا بين النديم ونديمه
واليوم ماتنفع كثير المحاذير
تفاغمت بين النفوس الحشيمه
عسى سنينك روض عشب ونواوير
محدن لنفسه يرتضي بالهزيمه
اما تخاويني على الشر والخير
ولا السلامه منك راس الغنيم
وسلامتكم
