[خذ] °•.♥.•° من ثيابك ومن عطرك شوي[واعمل]°•.♥.•°عليه كفاني في المماتي

[][تراتيل أنثى][]

الصراحه الروايه رووعه

وبعدني ما وصلتكم بقرا وبرد عليج

هـع اشك ان في اخوان يحبون خواتهم هالقد ههههه

مبدعه ربيعج يالغاليه

جزيتِ الجنه ع هالجهود اللي تقدمينها للمنتدى .

لي عوده عسب اكمل الروايـه .

 

[رَحِيْلُ الْودّ]

\
/
\
سعيد وسلطان وحمد وفاضل يالسين يلعبون ورقه حذال يدتهم
راشد وعبدالله نفذو خطتهم وغافلوهم وسارو يلعبون بالدراجاات
عمهم هادف سار يرقد .. متعود يوطي راسه
والبنات يالسات يهذربن عند التلفزيوون
حصه ترمس فاخره وتتخبرها عن الجامعه لان هاي اول سنه لفاخره فالجامعه
ميره مجابله عيالها .. حريم سلطان وحمد يسولفون عن اليهاال
فطوم وشموه يحاول يغافلون العنود عسب يسيروون قفص الحماام .. يحبن هالسوالف
شما : ميثووه انزين بعطيج حلاوه بس لا تين ورانا
العنود : ما ابا
فطوم : العنود سمعي الرمسه لا تغدين بزيه
العنود : ما يخصنيه حتى انا ابا اسير وياكم
فاخره: فطووم شلي ختج وياج
فطوم : تراها وشايه عسب جي ما نبا نشلها
العنود : خلاص ما برمس بس بسير وياكم
حصه : انا بعد ابا اسير
شما : لاحول شوفن فخوور وحصووه انتن بتزخن عنوده لان هي ما كانت تعرف وبسبتكن عرفت
فاخره : انزين بخليها ويااي
حصه : احيد رشود يقول سو قفص عوود وغيرو البقعه
شما : ما عليج انا وفطووم ندل البقعه
وسارن البنات ( حصه وفاخره والعنود وشما وفاطمه)
شما وفطوم يمشن جدامهن اونهن عاد هن لي يدلن البقعه
وحصه وفاخره يمشن وراهن وميودين ميثا
تمن يمشن ويمشن وبعدين لقو راشد وعبدالله صوب الدراجات
شمووه : ما يخصنيه ابا العب دراجاات
فطووم : وانا بعد
حصه : بسرعه وراهم قبل لا يشردوون
راشد : عبوود شافنا الساحرات
عبدالله : منو يدووه
راشد : لا شوف وراك شله البنات
وصلن البنات عند راشد وعبدالله
راشد : حرام عليكن نحن ما صدقنا نغافل يدوه سيرو خلاف بلعبكن
حصه : لا بنسير ويااكم
عبدالله : ما عندنا بنات يسوقن دراجات
شما : رشوود حرام بس دووره وحده عقب ردنيه
حصه : راشد شيء 4 دراجات
عبدالله : وحده ما تشتغل
حصه : انزين وحده لكم انتو الاثنين وثنتين لنا نحن
عبدالله : ما يخصنا نحن ينا قبلكم
راشد : انا عندي فكره
عبدالله : قول
راشد : انا وعبوود وحصوه بنركب فالدراجات وبنسوي سباق ولي يخسر يخلي حد من البنات
حصه : اوكيه موافقه
فطووم : انزين ليش ما تخلونيه انا بدال حصوه
راشد : لانها اكبر وحده فيكم
فاخره : خلاص موافقين
اول جوله خسرت حصه وعطت الدراجه فاخره
ثاني مره خسرت فاخره وعطوها شما
بس شما فازت عليهم .. اول واحد وصل عبدالله وبعده شما ورشود كان اخر واحد
وعطا دراجته فاطمه ..
شما : فطووم ما اوصيج نبا نظهر الاولاد من العبه
فطوم : افا عليج تراني قدها
عبدالله : بنشووف
العنود : متى بي دوري
شما : تعالي بركبج وراي انتي ما ترومين تسوقين
اول ما عطا راشد الاشاره شما طارت عنهم وراها عبدالله وفطووم لي مسويه عمرها شيء مارمت تلحق عليهم كانت بطيئه
رشوود والبنات خاسو من الضحك عليها .. وطبعن هي لي خسرت
\
/
\
سعيد وحمد سايرن صوب قفص الحمام
سعيد : حمد شو رايك بالزوج الشماسي
حمد: ما شاء الله .. هذا لي قلت لي بتشارك فيه المزااد الياي
سعيد : هيه هو .. حتى بشل بونفيخه
وتمو يسولفوون عن الحماام وشو بيسون يوم بيسروا المزااد
\
/
\

حصه : شمووه نسينا نتصل ع ميثا ووديمه
شما : هيه صدقج .. خلنا نسير عند يدووه عسب نتصل من عندها
فطوم : منو ميثا ووديمه
شما : اربيعاتنا فالمدرسه
فاخره : ميثووه لي شفتها ويااج فالكوفي
حصه : هيه هي ..
فاخره : ما شاء الله عليها يوم ريتها ما بغيت اشل عيني عنها
حصه : هيه فديتها رحيمه ظاهره على اربيعتها
شما : مدااح عمره .. قلنا ربيعتج الرحيمه هب انتي
حصه : انزين كل لي يشوفنا يتحرانا نقرب لبعض يقول نتشابه
شما : هذا لنكن دووم ربااعه
تمو يسولفون لين ما وصلو صوب العيووز
حصه : يدووه فديتج وين تيلفونج
يدووه : مدري وينه هني بتلاقينه مفروور
حصه : دوم تضيعينه
يدووه : فاضل كان يعابله مدري وين حطه
يلسن يدوورنه البناات
فطوم : حصووه لقيته
شما : هاتيه فديتج نبا ندق حق البنياات
شما تشوف الرصيد
شما : يدووه ماشيء رصيد خلص رصيدج .. كله مطرش مسجاات ع تيلفوونه
يدووه : مسود الويه .. وين سار هالفضيل بهزبه .. وتمت تتحرطم ما بقالها شيء فالرصيد
حصه : الحين كيف بدق حق البناات
شما : بسير ايب تيلفوون رشود
وشافو سعيد وحمد يمشوون جان تزقر ع سعيد
شما : سعيد .. سعيد
سعيد : لبيه.. هلا بعيون سعيد
شما استحت لان قالها هالكلام جداام الكل .. جداام حصه ورشوود عادي متعودين لكن جداام بنات عمها وحمد ولد عمهم خلاها تقفط
سعيد : شمووه فديتج تعالي
شما تمشي صوب سعيد وحمد وهي مستحيه شوي
سعيد : عيون سعيد
شما : ابا تيلفونك شوي
سعيد : تبين تتصلين حق منو
شما : برمس ودووم وحصه تبا ترمس ميثووه .. فاضل خلص رصيد يدووه
سعيد : ان شاء الله .. رمسي لين ما تبين .. (وهو يعطي شما التيلفون )
ويوم سارت شما
حمد : ترااك واايد مبزنها
سعيد : كيف مبزنها
حمد : اشوفك تنعتها بعيون سعيد .. حرمتك هاي هب ختك
سعيد : فديتها بالحيل احبها .. وانا يوم اعاملها اعاملها بلا حسيه .. ما احس بعمريه
حمد : ربي يخليكم لبعض
شما عند البناات
0 : وصلت عيون سعيد
شما : فطيم يوزي عنيه
فاطمه : شعليج يدلعونج هب نحن محد يسوي لنا سالفه
شما : اخيرليه اسكت عنج ..
شما : يلا دقي ع ميثووه عسب نرمسهم ونرد التيلفوون
حصه : هاتي قبل بنطرش لها مسج عسب تعرف ان برمسها اعرفها ما ترد ع ارقاام غريبه
يلسن البنات يرمسن اربيعاتهن عقب ردن تيلفون اخوهن
/
\
/
سعيد .. هل بعده يحب ميره بنت عمه والا نساها بمجرد زواجها ؟؟
حصه .. ليش ما اداني حرمه عمها ؟؟
شما .. بتم بزيه ع سعيد ويدتها ؟؟
راشد .. ما همه غير الطلعات وماله حاايه في حد ..
\
/
\
اتمنى هالجزء يعيبكم

 

[أبو سلطااان]

متابع ....

 

[حشيمة القلب]

حلووو الصراحه هالبارت


بس بامانه دمعت اعيوني ع شما يوم اتصيح

وعيبني رشود يوم حس باخته



واكيد سعيد نسى ميره مايحبها شرات قبل


ميثووه بتغير حياته هع


نتريى البارت الياي ^^

 

[دانة غزر]

قصه غاااااااااااااااويه


نتريا يديدج مشكوره الغااااااااليه

 

[كيـِـآטּ]

شما : يلا دقي ع ميثووه عسب نرمسهم ونرد التيلفوون
حصه : هاتي قبل بنطرش لها مسج عسب تعرف ان برمسها اعرفها ما ترد ع ارقاام غريبه
يلسن البنات يرمسن اربيعاتهن عقب ردن تيلفون اخوهن

اتمنى هالجزء يعيبكم

يا سلام أكيد سعيد بيدق حق ميثا أو ميثا بتدق حق سعيد

متابعة غاليتي... وسلمت يمناكِ..​

 

[♦L♦]

هذا البارت ناااااااااايس
.
والله بأمانة القصة مميزة جدا جدا
.
ليش ماتطبعوها في كتاب ~_^
.
القصة تستحق الوسام بكل جدارة ^_^
.
الف شكر أختي الكبيرة رحيل الود
.
الله يعطيج الصحة والعافية
.
شكرا

 

[واثقة الخطى]

نترياااااااااااااااااااااااااااااااااا الياي فيني فضووووووووووول...^^

 

[][تراتيل أنثى][]

\
/
\
الجزء الرابع

ع الساعه 10 فليل قررو يردوون بيوتهم لان العيوز احتشرت مافيها ع اليلسه فالمزرعه
عبدالله بغا يرجع عند قوم عمه لان كتبه عند رشود
ابوه اعترض بس فالاخر خلاه ع اساس ايب كتبه ويرجع البيت
في بيت المرحوم
في الصاله الساعه 12 فليل
حصووه مدمنه افلام هنديه وعندها كمن شريط فيدو هب شايفتهن وتبا تشوفهن ومخليه شمووه تيلس وياها غصب لانها تخااف .. شما ما اداني الهنود ويالسه اطالع وفيها رقااد وكل ما تنوود تبا ترقد توعيها حصه وتمو ع هالحال حول الساعه
رشود وعبدالله وسعيد كانو يالسين فالخيمة خاري وحدرو عليهم الصاله
سعيد شاف شمووه وكسرت خاطره سعيد : شميم سيري ارقدي دام الرقااد فعيونج
شما : حصوه ما تخلينيه تبا تشوف الفلم
حصه : سعيد ما بقى شيء عن يخلص الفلم جان بتيلس فياايه برايها شميم
سعيد : لا انا بسير ارقد عسب انش حق صلاه اليمعه
راشد وعبدالله : نحن بعد بنسير نرقد
شما : خلاص بستحملج
سعيد سار فوق
وعبدالله وراشد رجعو ظهرو خاري .. شكلهم ناوين ع شيء
عبدالله : متاكد ان هذا بيفصل الكهرباء لي فالصاله بس ..اخااف نسكرها عن يدووه وتنش تهاازب
راشد : هيه متاكد بيتنا واعرف
عبدالله : انزين يلا افصله
شوي والا يسمعون صريخ حصووه وشما
راشد انطر من الضحك
عبدالله : خلاص رد الكهرباء مافينا ع الفضايح
راشد : خلهن يتادبن شوي
عبدالله : انزين يدووه بتنش
راشد : هيه صدقت نردها قبل لا تنش يدووه
ردو الكهربا وحدروا الصاله وكنهم هب مسوي شيء ويشوفو حصووه لاويه ع شما
راشد : فضحتونا بلاكن تصارخن
حصه : تسكرت عنا الكهرباء
راشد : شقى تسكرت اشوف الليتات والعاات
حصه : والله تسكرت وتشغلت
راشد : سبحاان الله
عبدالله ميود عمره بس في اخر لحظه نقع من الضحك
شما : والله انتو الاثنين لي سكرتوها .. بسير اخبر عليكم سعيد
راشد : شموه تعالي وين تبين نسولف وياكم
حصه: هذي سوالف بغيت اموت من الزيغه
شما : يالله خربتو عليها الرقص والغنا لي فالفلم
سعيد يطالعهم من فوق وهو يتبسم
سعيد : راشد وعبدالله تعالو اباكم
عبدالله : انا ما يخصنيه افكاار رشود
راشد : ما عليك يالهرم يوم وقت الهزااب عقيت كل شيء علي
عبدالله : لا افا عليك انا ويااك فالحلوه والمره
راشد : عيل لا تقول ما يخصنيه
عبدالله : ان شاء الله
شما : دوااكم .. سعيد ما اوصيك لا تقصر فيهم
سعيد: افا عليج .. بخلي العقااال يلعب ع ظهوورهم
راشد يطالع شما بنضره جنه يقولها دوااج عندي
شما : لا اطالعنيه جي .. ازيغ من عيونج
راشد : ادري غيرانه لان عيوني احلا عن عيونج
حصه: انت اخر وااحد يرمس عن عيون شما .. بس خلها تجحلهن بطيح من طولك
راشد وهو يضحك : شما سيري تجحلي ابا اطيح من طولي
شما : ما ابا اخااف عليهن من الحسد
عبدالله من سمع رمست حصه بلا حسيه يلس يطاالع عيون شما سعيد : ايه انتو ما سمعتو اقولكم تعالو ابااكم
راشد اير ايد عبدالله ويسيروا يرقو الدري
شما : يلا فكينا تابعي الفلم مالج ابا اسير ارقد
حصه: شمووه حرام عليكم خلونيه اطاالع ع راحتيه
شما : انزين طالعي محد يودج
في حجره سعيد
سعيد : اشو بلاكم ع البنياات
راشد : مدري احس بوانااسه يوم اغايضهن خص شمووه استانس يوم تعصب
سعيد : حراام عليكم لو شفتوهم شقى يناقزن من الزيغه
راشد : حصه يمكن زاغت بس شما اشك انها تزيغ
عبدالله : سعيد انا ما يخصنيه رشود شلنيه ويااه
سعيد : ادري ان هاي سواالف رشود
راشد : عبدالله انا يوعاان انت يوعاان
عبدالله : هيه يوعاان
سعيد : انتو شو ما تشبعوون والاكل لي كلتو وين رااح
راشد : عاد تصدق يا سعيد احس انيه هب ماكل من سنه
عبدالله : كل هذا يووع
سعيد : سيرو بتلاقو تحت عند شمووه حلاوه وشبس .. وان ما طااعت تعطيكم وهذا شيء اكيد خلو حصووه تسوي لكم أي شي ع السريع ورقدو لان يدووه بتوعيكم حق صلاه الفير
راشد : انا ما ابا مذلت شما
عبدالله : بنطلب لنا أي شيء من برعه .. حصووه روحها ميته من الزيغه بعد تباها تسير المطبخ .. والمطبخ خاري وتسوي لنا اكل
سعيد : سو لي يريحكم انا برقد
نزلو راشد وعبدالله واشكالهم مجرمين ..راشد : شمووه شو عندج من العيشه
شما : بس باقي ام اند امز كيسه عووده بس اباها حق ربيعاتي
راشد : ربعبج احمار
شما : رشوود بلاك علي
راشد : نحن بنمووت من اليوع وانتي تقولين ربيعاتي
شما : انزين شو تبوون انا بسوي لكم
راشد : اصلن انتي شو تعرفين تسوين ..
شما : بيض فالماي واندومي
عبدالله ضحك عليها يوم سمعها تقول بيض فالمااي
شما : انت بلاك تضحك
عبدالله : ماشيء بس بتسوي لنا اندومي
راشد : لا لا احسن نطلب من خااري
حصووه مندمجه فالفلم بس سمعتهم وقالت : طلبو لي ويااكم
راشد : خلج فاللي انتي فيه
عبدالله : يلا شو تبون بنطلب
راشد : انا ابا زنجر
حصه : وانا شراتك
عبدالله : شمووه شو تبين
شما : كروسون جبن
راشد : هاي كافتريا ما يبيعوون كروسوون جبن .. يبيعوونه فالمخبز هب الكافتريا
شما : انزين هاتولي شرااتكم
طلبو وراح راشد وعبدالله خاري يرقبوونه عسب ما يدق الجرس
يابو الطلب ويلسو ياكلو وحصووه مندمجه وميوده السندويجه من ساعه بس ما كلت شيء
راشد بعد ما خلص ماكل
راشد : بعدنيه يوعاان
عبدالله : هب من شيء من المراابع لي ربعنااه
شما : جيه كنتو تربعوون
عبدالله : نلعب كوره
شما : هيه
شما : رشوود تبا اندومي بسويلك
راشد : انزين سوي
شما : انزين تعال ويااي ازيغ اروح روحي
راشد : انزين بني ويااج
حصه : براايكم بسير ارقد الفلم خلص
شما وراشد سارو المطبخ وعبدالله سار وياهم ما حب ييلس روحه
في المطبخ
شما : ايلسو ع الطاوله ولا تسوون حشره عسب اعرف اركز
راشد : جيه نحن فالمدرسه تبين تركزين
شما : يووم حد يرمس ارتبك وما اعرف شو اسوي
عبدالله : خلاص بنسكت
شما : انزين بي نكهة تبوون الاندومي
عبدالله : ابا بنكهة الخضاار
راشد : انا ابا بالديااي
شما : يعني اسوي مرتين
راشد : سوي شو ورااج
شما : انزين
ويلست تسوي
شما : عبدالله تبا احط لك خضره فالاندومي
عبدالله : طعمه حلو
شما : هيه حلو بالخضره
راشد : انا بعد ابا خضره
شما : ترااك قلت بالديااي
راشد : انزين حطي فيها خضره
شما : ان شاء الله
خلصت الاندومي وحطت جداام كل واحد منهم حصن اندومي وقالت
شما : يلا تاكلوونه كله هب بس اتعبونيه
راشد : انزين بناكل يوعانين
عبدالله : افا عليج بنخلصه
شما : يلا ترانيه اشوفكم
خلصو الصحوون
عبدالله : الصراحة طعمه فنان .. تسليمن
راشد : يقص عليج اصلن هب حلو بس كلنا من اليوع
شما : الجذب ظاهر من عينك .. يوم بتقوليه اسويلك ما بسويلك .. خله يتم في فؤادك
راشد : افا عليج والله اسولف عليج
شما : يلا سير اطلبلي جلكسي
عبدالله : الدكاان خلاص سكر .. باجر بناخذلج
شما : اوكيه باجر من تنشون تيبون لي جلكسي
راشد : ان شاء الله ( اونه ياخذها ع قد عقلها )
وسارو يرقدوون
\
/
\
في حجرة سعيد الساعه 2 ونص الفير وهب ياينه رقاااد
ويالس يرمس اربيعه حمداان فالتيلفوون
سعيد : حمداان دخيلك بسك هذره ابا ارقد ماشيء باقي كمن ساعه وياذن الفير
حمدان : انا لي ما عنديه سالفه يالس اسولف ويااك والا انت هب ويه سواالف
سعيد : حمدان فديت خشمك عن تزعل منيه باجر بشوفك وسولف ع راااحتك
حمدان : باجر.. انت ما تحس ياخي متوله عليك اليوم ما ريتك ساير المزرعه .. والله لو ان اهلك هب عندك كنت ياينك
سعيد : جان يت
حمدان : وتبانيه أي بليا عزيمه
سعيد: حمداان تعرف من شفت اليوم
حمدان : من
سعيد : ريت ميره
حمدان : ميره بنت عمك ما غيرها
سعيد : هيه ميره
حمدان : مسكين حالك .. وشو سويت
سعيد: ما سويت شيء .. اكبر طااف .. زعلانه وعند اهلها واحتماال تطلق
حمدان : خلاص غايته لو تطلقت خذها
سعيد : والله ما خذتها .. حتى لو انيه امووت فيها بس ما خذتها .. دامها بدت علي الغريب اشو ابا فيها
شوي ويصيح تيلفوون سعيد ياينه مسج ..
سعيد : حمداان صبر شوي بشوف منو متفيج مطرشليه مسج الحين
فتح المسج ومكتووب
حصووه ابا ارمسج عادي ادق الحين .. ميثا
سعيد انصدم وفج عيونه مستغرب من لي قرااه كيف ميثا اطرش له مسج
رجع يرمس حمداان
سعيد : حمدان بعدين برمسك
حمدان : ما يخصنيه ابا اعرف شو صاار
سعيد : حمداان دخيلك ابا ارقد بخبرك باجر كل لي تبا تعرفه
حمدان : انزين السموحة منك يلا ارقد ... نووم العوافي
سعيد : ربي يعافيك .. يلا تغطى عدل وارقد
حمدان : ان شاء الله ماماتي
سكر عن حمداان ورجع يطاالع المسج
تذكر يووم شما تقوله بندق حق ربايعنا معقوله دقن حق ميثا
وكتب هالمسج وطرشه
السموحة ما ارووم ارمسج باجر بدقلج
ع اساس انه حصه
شوي وتتصل ميثووه .. سعيد تم ميود التيلفوون وهب عارف شو يسوي لين ما سكت التيلفوون .. بس ما مضت دقيقه ورجع يصيح
سعيد يقول في خاطره ( ياربي شو اسوي الحين .. برد عليها ولي يصير يصير )رد عليها
ميثا : حصووه يا مسودت الويه جيه ما تبين تردين علي .. عقب يوم بتعرفين قولي جيه ما خبرتنيه
سعيد ساكت وما رمس
ميثا : جيه صااخه
سعيد : ال سموحة ختيه .. حصووه راقده
ميثا تمت منصدمه عقب رمست
ميثا : هذا هب تيلفون فخوور
سعيد : لا هب تيلفونها
ميثا : السموحة منك
سعيد: بالحل
وسكرت عنه

ميثا تمت تلووم عمرها وتقوول كيف انا ما تخبرت حصوه تيلفون منو هذا
ومنو هذا لي رد علي .. بس حصووه قالتليه انهم بيباتون فالمزرعه وقووم عمهم بيباتون ويااهم ..
\
/
\​

 

[][تراتيل أنثى][]

\
/
\
الساعه 11 الصبح
يدووه : شميم سيري وعيهم ما باقي شيء ع الصلاه ع ما يتسبحون ويتزهبون للصلاه بيكون اذن
شما : ان شاء الله يدووه
يدووه : فديت بنتيه انا .. يلا سيري فديتج وتعالي تريقي .
شما : انزين
يدووه : لو ما نشو بيهم انا بالعصا
شما : عيل اختصري السالفه وسيري لهم
يدووه : يا مسودة الويه .. سيري يوم اامر عليج
شما : ان شاء الله .. ان شاء الله
\
/
وسارت شما فوق و صوب حجرة رشوود .. عدلت وقايتها تدري عبدالله راقد ويمكن هو لي يفج الباب .. يلست ادق الباب وادق ومحد يرد عليها .. وتحااول تفتحه بس مسكرينه بالمفتاح ..
شما : ان ما فتحتو يدووه بتيكم بالعصا
ثار رشوود وفتح الباب
رشود : شو تبين يالعيوز
شما : اوعيكم للصلاه
رشود : خلاص يلا الحين بني
وسارت عند حجرة سعيد .. دقت الباب بس ما تسمع حس سعيد .. ويوم فجت الباب انفج ... تشوف محد ع الشبريه .. وتسمع صوت الماي فالحمام قالت اكيد يتسبح .. سارت عند باب الحماام
شما : سعيد
سعيد : هلا شموه
شما : يلا خلص بسرعه يدووه محتشره
سعيد : يلا بسبح وبنزل .. خليهم يحطوون فحم
شما : ان شاء الله
\
/
راحت تبا تنزل تحت بس تذكرت ان رشود رقاده ثجيل وما ينش بسرعه قالت ارجع لهم اخير ... دقت الباب محد رد عليها فتحته
لقت رشوود بعده رااقد .. بس عبدالله هب موجود فالحجره .. وسارت صوب رشود .. وتهز له جتفه شما : رشود نش .. يلا عسب تاخذليه جلكسي
رشود رااقد ولا جنه يسمعها
شما : رشود نش والله ان يدووه قالت لو ما نشو بيهم بالعصا .. عاد ما تهون علي يدووه تضربك
رشود : انزين بنش ..
شما :انزين يلا ثوور اشوفك راقد
رشود : يلا .. اقول شميم
شما : قول
رشود : سيري عند كارلا وهاتي كندورتين من كناديري .. وحده لي والثانيه لعبدالله
شما : جيه اشتغل عندك انا
رشود : ترى ماشيء جلكسي
شما : انت تعرف نقطة ظعفي عسب جي ذالنيه
رشود : فديت شمووه انا ..
شما : بسير بس هب عشان سواد عيونك .. عسب الجلكسي
\
/
وسارت شما تحت عقب ما تاكدت ان راشد نش
حصووه يالسه ترمس ميثا فالتيلفون
حصه : ميثوه وربي ما اعرف شو السالفه
ميثا : انا بس ابا اعرف انتي امبارحه رمستنيه من تيلفون منو
حصه : ليش
حصه: اول خبرينيه عسب اخبرج
حصه : تيلفون خويه سعيد
ميثا : وما لقتي غير تيلفون خوج سعيد .. كنت اتحسبه تيلفون فخوور .. وبعدين انتي قلتيليه بتباتون فالمزرعه جيه رديتو
حصه : ميثا .. شوي شوي علي .. وفهمينيه شو السالفه
ميثا : ماشيء امس فليل بغيت ارمسج لان ما ارووم اصبر احس بتخبل لو خابرتج .. ودقيت ع التيلفون ورد علي خوج
حصه : والله .. وشو صاار
ميثا : والله انيه بستخف منج ..
حصه : انزين قولي شو كنتي تبين تقولين لي وما رمتي تصبرين ودقيتي ع سعيد
\
/
وفي هاللحظه سعيد كان نازل من فوق وسمعها يوم تطريه تاكد ان لي ترمسها ميثا
سعيد : حصووه تعالي اباج في سالفه
حصه : ميثووه صبري شوي بشوف شو يبا سعيد .. والا اقولج رمسي شمووه شوي
شما يلست ترمس ميثووه
وحصه سارت عند سعيد
حصه : هلا سعيد .. بغيت حايه
سعيد : لا بس بغيت ارويج المسج لي طرشته اربيعتج
حصه: اشوف
سعيد يرويها المسج ويقول
سعيد : وبعدين افتحي الرسايل المرسله وشوفي شو طرشت لها
حصه يالسه اطاالع وتقول في خاطرها ( امووت واعرف شو كانت تبا )
سعيد : خلصتي
حصه : هيه
سعيد : وماشيء واتصلت وتهازب اونه حصووه جي ما تبين تردين علي
حصه : وانت شو سويت
سعيد : قلت لها انج راقده .. تتحرى التيلفون تيلفون فاخره
حصه : هيه .. اشوفها داقه تهاازب
سعيد : بلاها تهاازب
حصه : لان ما خبرتها ان تيلفونك وتتحرى تيلفون فخوور وانها وياي عسب جي اتصلت
سعيد : هيه
حصه : انزين بسير ارمسها واشوف بلاها
سعيد : براايج
سارت ترمس اربيعتها
وتحدر كارلا الصاله وياها الكنادير يوم شافها سعيد
سعيد : كارلا وين الدخون
كارلا : لا باباه .. الحين في خلاص
سعيد : انزين سيري هاتيه
كارلا : شمووه تعالي شيل كندوره .. انا في جيب دخون
شما : اخر زمن البشاكير .. ياامرون علينا
يدووه : شميم .. سيري وصلي الكنادير لخوج
شما : يدوه لا تخلينها تتبطر علي
يدووه : مربتنج هاي .. ويانا من 7 سنين
شما : ان شاء الله
\
/
تاخذ الكنادير وهي معصبه وصلت عند حجرة راشد .. تفج الباب بقو وتحدر الحجرة تفر الكنادير ع الشبريه وتشوف حد يالسه ع التواليت وحاط الفوطه ع راسه وينشف شعره تسير وتمط الفوده وهي تقول ..
شما : رشود يالسبال مره ثانيه يوم تبا حايه تسير رووحك .. صدقت عمرك دووم اسويلك لي تبااه
ويوم تشوف منو يالس ع التواليت ظهر عبود هب رشوود .. تقفطت وما عرفت شو تسوي .. تسحبت وظهرت من الحجره
\
/
حصووه بعد ما ظهرت روحها خبرتها ميثا ليش كانت تباها فليل
حصه : ميثا في ذمتج
ميثا : جيه اتحسبنيه جذابه
حصه : مسرع ما شافج وخطبج .. ما مدالج تيلسن يومين ..
ميثا : يمكن كان يبانيه من زمان
حصه : انزين وانتي شو رايج ..
ميثا :ما اعرف بفكر وبصلي الاستخااره
حصه : انزين هب تعرسين وتنسينيه شرات ما اتفقنا
ميثا : ان شاء الله .. الحين من وين بظويلج ريل .. انا كنت اتحسبج انتي لي بتعرسين قبلي وبتضويليه ريل
حصه : عاد انتي لي انخطبتي قبلي .. وبتيوزينيه اخو ريلج ..
ميثا : اخوه يااهل .. كبر سيف خويه
حصه : عيل خليه لج .. امحق اتفااق .. ما منج فايده
\
/​

 

[][تراتيل أنثى][]

\
/
شموه يالسه ادخن سعيد ويحدر راشد وعبدالله من فوق
راشد : مره وحده دخنيني
سعيد : اول شيء خلها تخلصنيه عقب دوورك
شما : انا مستويه بشكارتكم هب ختكم
راشد : افا عليج ياشمشم من قال
شما : انت لا تغير الموضوع بتيب الجلكسي لي عليك .. ترانيه اعرف كم حسابك
راشد : أي حسااب
شما : ترى كل ما اخدمك في حايه يتسجل ع حسابك جلكسي .. عاد ع حسب الخدمه لو كانت عوده والا صغيره
راشد وهو يضحك : وكم حسابي
شما : سعيد تبا ادخن الغتره
سعيد : هيه دخنيها
وداخن غترته
شما : خلاص دوور رشود
يجرب صوبها راشد
شما : انت ربي يسلمك حسابك 9 جلكسي واثنين برنجز
راشد : وشعنه برنجز
شما : بس خاطريه فيه
راشد : هيه
شما : بسك دخوون .. خلاص خلصت
راشد : جيه هو ع كيفج ..
شما : اندوك المدخن وسير دخن عبدالله وولا تنسى الجلكسي
راشد يالس يدخن عبدالله ويقلد شما
راشد : انت يا عبود عليك 20 جلكسي وخمس برنجز
عبدالله : لو تبا الدكان كله فالك طيب
راشد : مسود الويه .. لا ما ابا الدكان ابا تعزمنيه في الخاروف الذهبي .. ادريبك لو من الدكان بتاخذه وبتقول ع حساب راشد
\
/
يدوه : تعالو كلو لكم لقمه قبل لا ياذن
سعيد : ان شاء الله
عبدالله : اووه يدوه هني ما سلمنا عليها
ويسير عبدالله وراشد يسلمون ع يدتهم وبعد ما باسوها ع راسها
راشد : انا بيلس حذالج وما بتحرك من محلي ( وييلس حذالها )
عبدالله : انا بعد بيلس عندج
عبدالله وراشد يلسو وخلو يدتهم فالوسط وييلسو يسولفون عليها ويتبزوون وراشد يغايض شما
راشد : يدووه ما احب هالعيشه ابا جلكسي بدل لا تتريق بلاليط تاكل كون فلكس
شما : سعيد شوف رشود يغايضنيه
راشد : سعيد شوف رشود يغايضنيه ( وهو يحيس ثمه )
شما : قومو عن يدووه ابا ايلس عندها
راشد : ما يخصنيه انا يت قبلج
سعيد: راشد يوز عنها
راشد : يدووه ابا اسير بيت اربيعتيا
شما خلاص ويها حمر وبغت تصيح .. جان تشل بعمرها وتسير عنهم فوق
سعيد : راشد كم مره بقولك يووز من هالمعاند
راشد : والله ما اتحسبها بتباغم .. بس اسولف
سعيد : وسوالفك ماصخه شرى ويهك
يدوه : سعيد سير شوف شمووه اشو بلاها
\
/
\
في اليوم الثاني
في مدرسه مريجب الثانويه
المعلمة تغير الاماكن ويلست شما حذال بنت اسمها سلامة .. البنات لي متغيضه ولي تتحرطم ما تبا تغير محلها الا شما كان عادي عندها تحطها وين ما تبا لان ما تعرف أي حد فالصف وعادي عندها تيلس عند ااي حد شما : انتي شو اسمج
البنت : اسميه سلامة
شما : عاشت الاسامي
البنت : عاشت اياامج
شما : انا ما قد شفتج فالمدرسه
البنت : انا يديده اول سنه ادرس هني .. وما اعرف حد
شما : هيه .. يعني ما عندج ربع
البنت : لا روحي
شما : داامج خاويتي شما ما بتمين رووحج
البنت تبسمت
شما : شكلج هاديه ومب مال حشره وازعااج
البنت : هب جي .. بس ما اعرف حد عسب اشاغب ويااه
المعلمة : شما اخرسي متفتحيش بؤك بكلمة .. انتبهي لدرس
شما : ابله اتخبرها اشو اسمها
المعلمة : وعرفتي ايه اسمها
شما : هيه اسمها سلامة
المعلمة : انتبهي لشرح وفي الفسحة ابي تكلمي برحتك
شما : سلامة اتابعين مبارياات العين
البنت : يعني مب واايد
شما : انزين اليوم مباارات العين مع تروساسانا الصيني في كااس اسياء للانديه
البنت : شو قلتي اسمه
شما : تروساسانا
البنت : كيف رمتي تحفظينه
شما : ليش
البنت : صعب وبعدين يوم تقولين اسم النادي تذكرنيه بالكروسوماات لي في الاحيااء
شما : انزين .. اليوم شوفي المبااراه
البنت : ان ما نسيت ان شاء الله
المعلمة : يا شما حتى البنت الي لسا جايه جديد مسلمتش منك
شما : ابله لا .. يالسه اتخبرها جان ناقصنها كتب عسب نسير نيب لها من الاداره
المعلمة : اومي اوفي اخر الصف
شما : ابله ليش
المعلمة : علشان متتكلميش تاني
شما : خلاص ابله اخر مره بنطم وما برمس
المعلمة : اومي ومش عوزه كلام تاني
شما : ان شاء الله
وتسير توقف اخر الصف ​

\
/
\
الساعه 5 العصر .. كان وقت مباارات العين
وديمة متصله حق شمووه .. هاي ثالث مره تصل ومحد يشله وقبل لا تسكر شلته يدووه
وديمة : السلام عليكم
يدوه : وعليكم السلام والرحمه
وديمة : شحالج يدووه ربج الا بخير
يدوه : الحمدالله بخير .. ومن صوبج يالغاليه
وديمة : الحمدلله بخير
يدوه : وامج اشو حالهاا
وديمة : بخير تسلم عليج
يدوه : ردي عليها السلام
وديمة : سلامن يبلغ
يدوه : ويا مرحبا من انتي الغاليه
وديمة : يدووه انا وديمه
يدوه : السموحة منج نسيتج
وديمة : مسموحة وبالحل
يدوه : انتي تبين شمووه
وديمة : هيه
يدوه : شمووه راقده .. بغيتيها في حايه ضروريه
وديمة : بغيت اخبرها مبارااة العين بدت
يدوه : بدت المبااراه
وديمة : هيه بدت
يدوه : محد هني عسب يشليه التيلفيزيوون .. برايج الغاليه يوم بنش من الرقاد بخلها تسوي لج
وديمة : ان شاء الله .. يلا فداعه الله
يدوه / في داعة الرحمان
ومن سكرت يدووه يلست تزااقر ع كارلا وخلتها تير توعي شموه من الرقااد
وتنزل شمووه وشكلها تعباانه شما : ها يدووه بغتي حايه
يدوه : تعالي الغاليه شغلي هالتيلفيزيون اربيعتج وديمة متصله وتقول المبااراه بدت
شما : وليش محد وعاني .. كارلا انا مب قايلتلج توعينيه الساعه 4
كارلا : شمووه انا نسيت في واااجد كوااي .. انا في سوي كوااي
شما : انزين سوي لنا فراااخ ..
كارلا : انزين
وتسير شمووه تحط ع المبااراه
شما : يدووه بسير اصلي وبي بسرعه
يدوه : مسوده الويه راقده عن الصلاه
شما : ترى محد وعاني
يدوه : انزين سيري
شما : ان شاء الله
وتسير تصلي وترجع وتيلس تسولف ويا يدووه بس يدووه مندمج من الخاطر .. واي حد عنده الكوره تشجعه
يدوه : ايوه .. هيه شوت شوت هالكوره ويب لنا هدف
شما : يدووه هذا هب فريقنا
يدوه : هايلا العنجريز
شما : هيه .. نحن فريقنا لي لابسين ابيض وعليه شخط عيناوي
يدوه : هيه
شما : وين رشود وسعيد
يدوه : من صلو العصر ظهرو خاري ..
شما : ما قالولج وين بيسيرون
يدوه : رشود قال بيسير عند عبدالله يشوف المباراة .. وسعيد بعد سار عند ربعه
\
/
\
شما .. ليش تحب سواالف الكووره ؟؟
ميثه .. اخيرا قالت لي تبااه حق حصه ..
سعيد .. بعده يفكر في ميثا والا نساها ؟؟
راشد .. ليش هب مهتم للدراسه ولا جنه ثانويه عامة ؟؟
\
/
\​

 

[رَحِيْلُ الْودّ]

تراتيل آنثى ،’
ماقصرتي الساع !
بياض ويه
مرة عليش ومرة عليه ،’

ني ابطيت ع الاعضاء ومهوب قصدي ياغير التلوين ياخذ له وقت ،’

اشكرش الشيخة ولا هان قدرش

بهديش وحدة من خوات سمحة خخخ​

 

[حشيمة القلب]

حلوو البارت


بس حرام ميثا انخطبت وسعيد يباها

ماله حظ اسعيد حليله


شموه تحب الكوره لان عشان فريقهم يلعب خخخخخ

بس صج عاد شموه مصختها حتى فالمدارس ماتيوز من الهذره هههههههههههه


واقول بعد سعيد يفكر بميثا


يلا فديتج نتريى البارت الياي ^^


يعطيج الف عافيه

 

[راعي صوغة]

يااااااااااربييييييييييه,, غرااام القصه والله


نترقب القصه,,


تعالي كل يوم

 

[غروگ و غيروگ]

ما شاء الله الشيخة

القصة ترتووووب

متابع

 

[][تراتيل أنثى][]

\
/
\
الجزء الخااامس ​

بعد كمن اسبوع ​

حصه وشما يسولفن في الصاله
حصه : شموه علووم الدراسه
شما : زينه
حصه : انزين اتخبرج شخباار وديمة
شما : الحمدلله عرفتها ع اربيعتيا سلامة
حصه : من سلامة
شما : البنت ليديده لي يت صفنا
ويحدر عليهم رشوود
راشد : باركولي
شما : مبروووووووك بس ع شو
راشد : خذت الليسن
حصه : مبرووك .. يلا عاد نتريا العزيمة
شما : وعبدالله شو سوى
راشد : هذا شيطااان .. خذااه من اول ترااي هب انا 3 مرات ارسب
حصه : مب من شيء عميه مقبضنه الموتر وهو ما عنده ليسن
راشد : هيه .. احيد مره راكب ويااه فليل ودعمنا دراام الزبااله
شما : جيه ما تشوفون
راشد : كان يسولف وهب مركز
حصه : خلاص برمس سعيد يظهر لك موتر
راشد : اخيرا بفتك من عبدالخاالق .. والله انيه اتفشل يوم يشلنيه المدرسه
شما : رشود .. انا اول وحده تركب ويااك .. دخيلك حوطنيه فالحااره يوم تاخذ الموتر
راشد : افا عليج .. بعد بوصلج المدرسه .. حصوه تبنيه اوديج الجامعه
حصه : لا انا هب بايعه روحي اركب ويااك .. توك ماخذ الليسن .. ما اضمنك
راشد : طع هااي .. انتي الخسراانه .. صح شميم
شمه : هيه هي الخسراانه
\
/
\
في فترة امتحانات نص السنه
في جامعه الامارات
ميثا : ما يخصنيه بتين بيتنا يعني بتين
حصه : ميثووه بلاج ما ارووم ايج اليوم .. ما خبرت يدووه
ميثا : انا برمسها وبقولها
حصه : انزين انتي تعالي بيتنا
ميثا : منو اخر مره ياينج
حصه : ان شاء الله .. خلاص برمس يدووه وبخبرج
ميثا : انزين هاتي شميم ويااج
حصه : اكيد بتيي عشان وديمة وشيخة
ميثا : مشكله يوم يتولفن
حصه : انزين ليش ما نتولف في بيتنا
ميثا : حصووه لا ترفعين ضغطي كم مره بقولج نحن ياينكم اخر مره
حصه : انزين انزين .. ما حبج يوم تعصبين
ميثا : شو
حصه : خلاص والله بنيج
ميثا : حصووه ما يخصنيه تعالي قبل لا تبتدي امتحانات شمووه ودووم
حصه : خلاص برمس سعيد ويدووه
\
/
\
في بيت ميثا
من بعد صلاة العصر شاله خواتها وديمة وشيخة المطبخ .. اونهن بيخدمن حق ربيعاتهن يوم بين وياهن البيت
شيخة : سيف دخيلك انقذني .. ما احب اسير المطبخ
سيف : ليش شويخ
شيخة : بين ربيعات ميثا وديمه وميثا تبانا غصب نساعدها .. وانا ما ابا
سيف : مافيها شيء تعلمي
شيخة : سواف اقولك مافيا .. بنسير انا ويااك نلعب سوني ..
سيف : اوكيه بقول انيه مب فاهم مسأله في الرياضيات واباج تفهمنيه لان علي امتحاان
شيخة : من فلاحتيا فالرياضياات
سيف : الا جي عسب ما تساعديهن
شيخة : اوكيه خلاص انا بسير عندهن اونيه بساعد .. وانت احتشر اونك تبانيه افهمك
سيف : خلاص تم
\
/
\
في المطبخ
توها شيخه تحدر المطبخ
ميثا : كل هالوقت تصلين
شيخة : تبنيه اصلي أي كلام
وديمة : خلاص بسكن هذره وتعالي ساعدينا
شيخة : انزين شو اسوي
ميثا : هالدونات مخلصتنه غمسيه فالكاكاو
شيخة : أي كاكاو
وديمة : فجي الثلاجة وظهري النوتيلا ويلسي غمسيه .. ولا تيلسي تحشرينا لان نعرف انج تعرفين بس تستهبلين
شيخة : انزين اربيعاتي والا اربيعاتكن .. انا شعنه اساعدكم
ميثا : عسب نخلص بسرعه
وديمة : ميثووه نسيت اخبرج
ميثا : خير
وديمة : عزمت سلامة بعد
ميثا : يحليها وقالت بتي
وديمة : هيه .. ووصفتها البيت
شيخه يالسه ترقب سواالف بس سيف ساار يلعب كووره ونسى سالفة شيخة ... وشويخ تتريا متى بي يخبرهم عسب تسير وما تساعدهم ...
\
/
\
في بيت المرحووم
يحدر عليهم احمد وعنده اخوانه الصغاار حميد وعفراء
شما : احمدووه بلاك
حصه : احمد وين امك
احمد : اميه بتسير الصالون.. ابويه بيرجع باجر من السفر ومطرشتنا بيتكم .. تقول درسونا وخلو عفراء وياكم
شما : نحن بنظهر ما بنتم فالبيت
حصه : ما عليه شيء وقت .. احمد عليك واايد واجباات
احمد : انا اعرف ادرس روحي درسو حموود
حصه : ما عليه انا بدرس حميد
شما : انا بشل عفااري بخليها عندي ​

(ملاحظه : احمد عمره 12 سنه وفي صف سادس ولد خالتهم وبيتهم مجاابل بيت قووم سعيد .. وحميد عمره 6سنوات وفي صف اول وعفراء عمرها 4 سنواات )​

حصه شوي وتستخف من حميد .. يكتب كلمتين ويسير يلعب ويرجع يكمل ..
حصه : حميد ان ما يت تكمل الواجب بخبر عليك سعيد .. ترااه عصبي
حميد : سعيد مب عصبي
حصه : يعصب ع الاطفال لي ما يحلوون الواجب
حميد : خلاص بي احل
حصه : يلا تعال حل جان تبا تسير ويانا
حميد : وين بتسيروون ؟؟
حصه : بيت اربيعتيا
تظهر يدووه من حجرتها ..
يدووه : انا اقوول كل هالحشره .. اكيد عيال نوره عدنا
حميد : يدووه انتي ما تعرفين اسمها ماما مب نوره
يدووه : نسيت السموحة منك الشيخ حميد
أي احمد ويسلم ع يدووه
احمد : شحالك يدووه
يدوه : بخير يوليدي ... امك وينها ما يت ويااكم
احمد : اميه سارت الصالون
يدووه : اكيد ابوك ياي وسارت تتصبغ فالصالون
احمد ( يضحك) : لا يدووه هي سارت تتحنا
يدووه : ومتى بيوصل ابوك
احمد : بااجر .. اليوم رمسنااه
يدوه : ربي يخليه لكم
ينزل راشد من فوق وهو شال عفراء
راشد : دخيلكم ما خلتنيه اعرف ادرس
حصه : مخلينها عند شميم
راشد : فرتها عندي وسارت تتسبح .. وانا ما ارووم عليها
حصه : فديتها .. انزين يودها شوي .. مابقى شيء واخلص مدرسه حميد
راشد : عطيتها ورقة وقلم عسب تخربش خربشت في كتبيه
وتمو ع هالحال ..
ع المغرب تزهبو عسب يسيروون بيت ميثا .. وحصه قررت تشل عيال خالتها وياهم ..
في الموتر
احمد : انا مع منو بيلس
حصه : عند اخوهم سيف
احمد : لو خليتنونيه فالبيت اخير .. بلعب عند ربعي
حصه : لا .. خالو مخلتنكم امانه عندي ما ارووم اهدك روحك فالبيت .. وراشد محد فالبيت .. ويدووه بتصلي العشاء وبترقد ..
احمد: انزين .. بس ياخوفي اتم عند عبدالخالق
شما : احمدووه عشاني .. وبعدين تبانا نسير عند العرب بليا رياال
احمد : عن الخريط .. ما كنتو تعرفون ان بني بيتكم ..
شما : احمدووه نحن بغصب اقنعنا سعيد .. لو خلينااك فالبيت بيهزبنا ..
احمد : خلاص بتصبر.. بس اميه ما تعرف
حصه : عادي يوم بتتصل بترد عليها كارلا وبتخبرها
شما : انا اتوقع ان بنسير وبرد وهي بعدها
حصه : احمد انا اول ما بشوف ميثا بخبرها اطرشلك سيف
احمد : ان شاء الله
\
/
\
حمدان وسعيد.. في كارفوور
حمدان : سعيد دخيلك وراهن ابغي ارقمها
سعيد : شو تبا في بنات الخلق .. يوز عن هالسواالف
حمدان : سعيد .. والله انها رحيمه ..
سعيد : يالله تسير لها وتقفطك
حمدان : ولو خليتها تاخذ الرقم شو بسوى
سعيد : بعشيك ع حسابي
حمدان : انزين بطلب عشا غالي
سعيد : يصير خير
وتمو يمشوون ورى البناات وحمدان يتجرأ ويتلصق فيهن لكن سعيد يخووز عنه بعيد ..
سعيد : حمدان خلاص تعبت من كثر المشي .. والبنت هب عاطتنك ويه
حمدان : سعيد
سعيد من غير نفس : نعم
حمدان : اسمع .. ما يكون اسميه حمدان ان ما خليتها تتصليه الليله ..
سعيد : وكل البنات لي ترمسهن ما مازرات عينك بعد تبا زوود
حمدان : هذي شيفتها عايبتنيه
سعيد : انت يوم بتعرس شو بتسوى ..
حمدان: سؤاال واايد صعب بفكر(( وينتبه ع البنات انهن يبن يروحن )) سعيد بسيرن عنا وراهن
والبنات ظهرن وقدهن واصاات عن الباركناات .. ويسير حمدان يربع وراهن والبنت تركب موترهم ويزخ حمدان الباب ويقول
حمدان : دخيلج خذي الرقم
البنت : انت ما تستحى ..
حمدان : لا تفهمينيه غلط بس
البنت : بس شو
حمدان: اربيعي قالي لو انج دقيتليه بيعشيني .. وان ما دقتي انا بعشيه .. واخر الشهر وما عندي بيزاات
البنت تمت فاجه ثمها ومب مستوعبه
حمدان : ها الشيخه شو قلتي
البنت ساكته
حمدان : اهون عليج .. اتم بليا عشا
البنت : ما عليه بدق عسب تتعشا وبسكر .. بش شرط انك ما ترجع ادق
حمدان : ان شاء الله .. (( ويعطيها الورقه لي فيها الرقم ))
\
/
\​

 

[][تراتيل أنثى][]

\​

​

/
\
عند البناات الساعه 9 المسا
ميثا : حصووه حرام عليج .. امره ما يلستو تبوون تسيروون
حصه : يدووه روحها وقالت ما بترقد وبتيلس ترقبنا
ميثا: دوومج تتعذرين
ويظهرن كلهن عند الباب عسب يوادعن شما وحصه .. ويهبط نيساان
سلامة : غربل الله بليسه فشلنيه
شما : منو هذا
وديمة : جيه هب دريولكم
سلامة : لا هذا خويه مطر
حصه كانت ميوده عفراء وحميد .. بس عفرووه تفججت من ايدها وسارت تربع خاري البيت
حصه ارتبكت وما عرفت شو تسوي وتمت اتلفت ادور حواليها ع احمد او حتى الدريول عسب يسير ايب اليااهل بس ما لقت حد
البناات تمن محتشراات
ينزل مطر من موتره ويسير يربع خااري عسب يلحق ع البنت الصغيره .. رام ايودها وشلها دااخل
يت سلامة وشلتها عنه وسارت تعطيها حصه
وفي هالوقت يظهر احمد وسيف من الميلس ع صوت الحشره لي سمعوها
سلمو ع الرياال ويا الدريول وشل البنات ووسلامة ركبت ويا خويها وسارو عن العرب
موتر قوم حصووه كان قبل موتر مطر
مطر انتبه ع رقم الموتر وتم منصدم (( معقوله .. معقوله البنت لي شفتها فالجمعيه تظهر تعرف ختيه ... صدق الدنيا صغيره ))
مطر : سلامة
سلامة : نعم ياخوي
مطر : من متى تعرفين هالبناات
سلامة : هيلا اربيعاتي لي فالمدرسه اليديده .. بناات طيبات وحبوباات
مطر : ولي سيراتهم جدامنا .. تعرفينهم ..
سلامة : هيه .. هيلا قووم شمووه وهلها
مطر : هيه
(( ملاحظه : مطر عمره 25 ويدرس في بريطانيا .. ويوم شاف حصه فالجمعيه كان توه راد من بريطانيا عنده اجاازة .. والحين هو عنده اجازة شهر بياجز عندهم عسب يعيد ويااهم في العيد العود ))
\
/
\
في الصالة :: الساعه جريب العشر
راشد : يدووه دامج تبين ترقدين برايج
يدووه : لا فديتج ما فيا رقااد
راشد : يدووه اشوف النوم ف عيونج .. احيدج من تصلين العشا ترقدين .. برايهن البناات .. انا بتريااهن
يدووه : لا ما عليه ما برقد بيلس ارقبهن ..
يدووه : راشد فديتك ازقر ع كارلا عسب توطي العشا بنتعشا ربااعه
وفي هالوقت يهبطن البنات وياهن احمد
حصه + شما +احمد: السلام عليكم
راشد ويدووه : وعليكم السلام والرحمه
حصه تنزل عفراء لانها كانت شالتها .. وعفاري ركيض صوب راشد
راشد : عفاري بقولج شيء
عفاري : اعم ( اونه نعم )
راشد: عفاري انتي مب حلوه
عفاري : حووه ( يعني حلوه .. جي يرمسون اليهاال )
راشد : ما حلوه
عفاري : حوووووه
راشد : لو كنتي حلوه بتعطينيه بوسه وبتسون لي حبيبي ( يعني تلوي عليه )
عفاري تقوم تلوي ع راشد وتبوسه
راشد: الحين عفاري حلوه
تستانس عفاري عاد قالو عنها حلوه
أي حميد ويمط شعر عفاري .. ويشتغل الونان
\
/
\
سعيد : اشوفها ما اتصلت .. يابوك يعت ابا اتعشا
حمدان : تصبر لين الساعه 11 لو ما اتصلت خلاص انا بعشيك
سعيد : وانا بمووت من اليوع .. وتبانيه ارقب ساعه كامل .. انا اقولك اياها البنت هب متصله
حمدان : لا بتتصل
سعيد : انزين قوم نتعشا ..
حمدان : ما اتصلت
سعيد : برايها ما لنا حايه ابها ..
حمدان : سعيد .. شوف هالحرمات .. شورايك وراهن
سعيد : بتسو لنا فلم هندي لو ما طااعت تاخذ الرقم بتربع وراها شرات قبل شوي
حمدان منطر من الضحك
حمدان : خلاص توبه انت محد يشلك ويااه .. ما تعرف غير مكانين العزبه والمزرعه .. طلعات وسوالف الشباب ما عندك .. امره غادي شيبه
سعيد : اخيرليه عن سوالفك البطاله
وسارو يتعشو .. وخلاف حمدان وصل سعيد بيتهم وسار هو بعد بيتهم
سعيد توه حادر البيت ما مداله يدخل داخل بعد يمشي فالحوي
ويشوف موتر حمدان يرجع صوب بيتهم
يوقف حمدان موتره وينزل يبرع صوب سعيد
سعيد: حمدان بلاك
حمدان : اتصلت
سعيد : جذووب
حمدان ميود التيلفون وهو يصيح
شوف هالرقم غريب الحين برد عليها جدامك
حمدان : الو .. مرحبا ملاين ولا يسدن في ذمتيه
البنت: متصله بس عسب ربيعك يعشيك
حمدان: خلاص انا لي عشيته وطارن البيزتين لي عندي .. وباجر ما عندي حق بتروول
البنت: انزين السموحة منك بسكر
حمدان : افا تو الناس
البنت: ما اقدر ابطي ولو سمحت لا ترجع تتصل
حمدان : ان شاء الله الشيخة
سعيد : غربل الله بليسك .. شو سويت بالبنت وخليتها تتصل
حمدان : عطيتها نظره طيحتها في هوااي وما رامت تصبر واتصلت
سعيد يضرب حمدان ع جتفه
سعيد: بسك خريط
حمدان : والله ما اجذب عليك
سعيد : هيه
حمدان : تعرف انت نحيس
سعيد : ليش
حمدان : من نزلت عنيه البنت اتصلت
سعيد : ضحكتنيه ومالي خاطر اضحك
حمدان: يلا السموحة منك الشيخ بسير البيت ابا ارقد
سعيد : يلا فداعه الله .. وربي يحفظك
وسار حمدان بيتهم
\
/
\
يرجع سعيد ويهبط البيت ويشووف احمد ميود حميد وعفاري ويبا يسير البيت
سعيد : شحاالك احمد
احمد:: بخير يعلك الخير
سعيد : وين اشوفك بتظهر
احمد: اميه متصله وبنسير البيت
سعيد : تعاال انا بوصلك
احمد : لا عادي الا خطوتين
سعيد : لا ما عليه
ويسير سعيد ويشل عفاري واحمد ميود حميد .. سار مشي يوصلهم بيتهم سلم ع خالته نوره ورجع بيتهم
لقى شما وراشد يطالعون التلفزيوون وشكلهم مندمجين ..
سعيد : غريبه اليوم ما تتناقروون
راشد : لا خلاص خلصت الضرابه
سعيد : زين زين
سعيد: شمووه تعالي اباا ارمسج
شما : ان شاء الله
سعيد : تعالي حجرتيه فووق
شما : انزين ما تبا تتعشا
سعيد : لا الغاليه تعشيت عند حمدان خاري
شما: هيه
وسار عنهم سعيد
راشد: شمووه ليش يبااج سعيد
شما : ما اعرف
راشد : انزين سيري له
شما : الحين بسير
\
/
\​

 

[][تراتيل أنثى][]

\
/
\
في بيت ميثا .. شيخة وسيف
شيخة : سوااف يالهرم وينك ما يت تزقرنيه عسب نسير نلعب سوني
سيف : السموحة نسيتج
شيخة : حد ينسى تؤامه
سيف : والله سرت العب كوره ونسيتج
شيخة: هيه انت تنسانيه لكن انا ما انسااك .. امره مب جنيه تؤامك
سيف : شيخووه والله اسف ..
شيخة : خلاص خلاص .. مره ثانيه يوم بتطلب منيه حايه ما بسويها لك
سيف : افا ليش
شيخة : بنسااك شرات ما نسيتني
سيف : شيخووه اهون عليج
شيخة : هيه نعم شرات ما هنت عليك
سيف وشكله زعل : انزين انا بسير ارقد
شيخة : سوااف تعاال والله ما تهون علي
سيف والابتسامة طااره الحلج : ادري ما هون عليج
شيخة: شو اسوي فيك مشاركنيه في كل شيء
سيف : يعني في ذمتج .. حد يلاقي اخو شراتي ويكوون تؤام وياه ويقول ما ابااه
شيخة : بس مرات تغدي عووف
سيف : انزين وربي ما كان قصدي
شيخة : خلاص سامحتك
سيف : لا والله ... جيه تبين تزعلين منيه
شيخة : قلتلك اياها ما تهون علي
\
/
\
شما وسعيد
شما تحدر حجرت سعيد
سعيد : هلا شمووه دخلي داخل
شما : خير ياسعيد شو بغيت منيه
سعيد: ايلسي وبخبرج
شما وهي تيلس ع الشبريه .. سعيد تم ساكت فتره وشما مستغربه من سكووته عقب رمس
سعيد : شما
شما : لبيه ياخوي
سعيد : لبيتي حايه
سعيد : شما ابا منج خدمه
شما : اطلب ياخوي عيوني لك
سعيد : فديت هالعيون انا علني ما خلا منج
شما : ربي يخليك لي
سعيد : شمووه .. ما اعرف شقى ارمس
شما : خير ياخوي
سعيد : اهم شيء ما تفهمني غلط
شما : لا يا سعيد .. ما بفهمك غلط
سعيد : انزين برمس .. ابا منج تيبن لي اخباار ميثا
شما : من ميثا
سعيد : ربيعت حصه
شما : وانت شقى تعرفها
سعيد : يوم شليتها هي وحصوه من الجامعه ريتها وعيبتنيه
شما اطالعه بنضرااات غريبه : هيه
سعيد : بلاج جي اطالعينه
شما : ماشيء .. بس انت تحبها
سعيد : ما ادري
شما : كيف ماتدري
سعيد : شمووه ما ادري
شما : انزين بيب لك اخبارها
سعيد: تعرفين شمووه سمعت حسها
شما : وابوي عليك .. شقى سمعته
سعيد : هي اتصلت علي
شما : انت شكلك خاالص .. شفتها وخليتها تتصل لك بعد شو تبا
سعيد : شمووه لا
شما : عيل شو
سعيد : هي اتصلت بالغلط تتحسب تيلفوون فخوور .. تحيدين يوم سرنا المزرعه وانتن خذتن تيلفونيه .. فليل رجعت تتصل تتحسب تيلفون فخوور
شما : هيه
سعيد: فهمتي
شما : هيه فهمت
شما : الحين تبانيه ايب لك اخبارها ..
سعيد : هيه ..واهم شيء تعرفين جان هي مخطوبه .. او محيره لحد من هلها
شما : امره ما طلبت شيء
سعيد : فديت ختيه لي فاهمتني
شما : هيه فديتني
سعيد : شمووه
شما : نعم
سعيد : لا تخبرين حصووه ..
شما : اعرف ما بخبرها .. يعني لو كنت تباها تعرف جان خبرتها هي بس انت خبرتنيه لان ما تباها تعرف
سعيد : ما شاء الله عليج تفهمينها وهي طايره
شما : هيه .. ظاهره ع خويه سعيد
سعيد : خلاص سيري ارقدي
شما : ما تبا اخبرك اخبارها ..
سعيد : امره حار بحاار
سعيد : ادري وقلت حق حصه بوصلكم وما طاعت اونها ما تبا تعبل علي
شما : هاي عاد ما ترووم تظهر من الرمسه ..
مستحيل تخبرك عن ربعها

ويلست شما تخبر سعيد عن ميثا .. حتى اتفه الاسباب لي ما تنطرى تخبره .. أي تصرف أي كلمة قالتها ميثا تخبر سعيد عنها
\
/
\
في ثانوية خليفه بن زايد للبنين
راشد في الصف
المدرس : اسمعو بعد هالحصه لا تطلعو حيحظر موجه الانجليزي
راشد : استااذ من الحين اخبرك
المدرس : في حاجة يا راشد
راشد : استاذ انا ما اعرف انجليزي ابدا انت لا تقومنيه جداام المدرس وتفشلنيه
المدرس : ان شاء الله
راشد : بس تعرف .. بيلس طوول الحصه ارفع ايدي عسب يقول عني الموجه شاطر
المدرس : حاظر يا راشد
وحظر الموجه ويلس ورى
والمدرس يشرح وكل ما يسال سؤاال راشد يسوي حشره ويرفع ايده اونه يبا يشاارك .. بس المدرس يشوفه وما يقومه .. دق الجرس وخلصت الحصه وقام والموجه بيسال سؤاال قبل لا يظهر
سئل السؤاال بس راشد ما رفع ايده
الموجه ياشر ع راشد : انت جاوب
راشد : والله ما اجااوب
الموجه: ليش
راشد : من الصبح رافع ايدي والمدرس ما سوى لي سالفه .. تبانيه الحين اجاوب خلاص زعلت ما بجااوب
الموجه : طب انا لي باومك عشان تجااوب
راشد : خلاص زعلت لا ترمسنيه وما ابا اجاوب
راشد خلا عمره زعلان وما يبا يجاوب واصلن هو روحه ما يعرف يجااوب بس قال جي عسب ما يتوهق
\
/
\
بدت امتحاانات نص السنه وشما شرات خوها راشد مب فالحه فالنجليزي وطلبت من سعيد يوديها المعهد عسب تدرس .. سعيد ما عاارض لان من يوم شما داشه اول اعدادي تسير تدرس انجليزي في المعهد .. ومع نفس المدرس لي دووم يدرسها .. ورابعت البنات لي يدرسن وياها فالمعهد ..
في معهد بن خلدوون
سعيد وشما وهم راكبين اللفت لي يوصلهم المعهد
شما : سعيد قولهم ابا استااذ نمر
سعيد : ان شاء الله
شما : اخر مره خلو اخوه يدرسنيه .. انا ما ابا اخوه ابا استاذ نمر يعطينا كل شيء سهل ومختصر
سعيد: ان شاء الله شمووه
سار سعيد ودفع لها حق 3 ساعات وطلب الاستااذ نمر
سعيد : شمووه من تخلصين يلسي في غرفة الانتظاار ومن تشوفينيه تعالي صوبي انزين
شما : ان شاء الله ..
سعيد : وركزي عدل
شما : ان شاء الله
سعيد: يلا سيري عند هالحرمة بتوصلج عند الاستاذ نمر
شما : ان شاء الله بس لا تسرع
سعيد : بسير العزبه على ما تخلصين وبيج حتى لو ما كنتي مخلصه بتريااج
شما : انزين
سعيد : يلا فداعه الله
شما : ربي يحفظك
\
/
\
في بيت سلامة اربيعت شما
ام مطر : وشو فيها بنت عمك جيه ما تباها
مطر: اميه ما باها .. اشوفها شرات ختيه
ام مطر: بس هي هب ختك
مطر : اميه رابين ربااعه .. واشوفها شرات ختيه سلامة
ام مطر: انزين .. انا ابا ايوزك واشوف عياالك قبل اموت
مطر : يعل عمرج طويل يالغاليه
ام مطر: انزين خلني ادورلك ع حرمه ثانيه ..
مطر : اميه لا مب الحين ..
ام مطر : ودي اخطب لك قبل لا تسافر
مطر: اميه باجي اسبوعين وبساافر
ام مطر : لا تذكرنيه ..
مطر : خلاص اميه هانت باجي سنه وبرجع وبتم عندكم ع طوول
ام مطر : الله كريم
مطر : شيء في خاطرج يالغاليه بسير اشوف ربيعي من زمان ما ريته
ام مطر: سلامة روحك .. بس لا تسرع يوم تسوق
خلاها مطر وسار خاري البيت
\
/
\
حمدان متصل في سعيد
سعيد: حمدان بيك عقب بسير اشل ختيه من المعهد ومن اردها البيت بيك
حمدان : انت وين الحين
سعيد: فالعزبه
حمدان : انزين بيك
سعيد : انت ما تفهم اقولك بسير اشل هليه وبوديهم البيت
حمدان : هيه صح
سعيد: انزين يوم بخلص بسويلك تيلفون
حمدان : خلاص اتريااك
سعيد : اتخبرك علوم راعية كارفوور
حمدان : اطرش لها مسجات ومسويه لي اكبر طااف
سعيد : تستاهل
حمدان : سعيد برمسك خلاف عندي خط
سعيد : اوكيه ربي يحفظك
حمدان : فداعه الله
\
/
\

حمدان .. ليش يرمس البنياات فالتيلفون وشو سالفه البنت لي عطاها الرقم في كارفور ؟؟
راشد .. ليش يكره الانجليزي وهب فالح فيه ؟؟
عبدالله .. مختفي وماله حس في هالاجزاء ...
شما .. تدرس وتحااول تيب درجات عاليه عسب تحقق حلم بوها ؟؟
مطر خو سلامة .. ظهر هو الشخص لي شايف حصه فالجمعيه ..
\
/
\​

والسموحة منكم تاخرت عليكم في هالجزء ​

تحياتي ​

​

 

[حشيمة القلب]

ضحكني حمدان ع الحركه اللي سواها حشى كل هذا عشان مايدفع ولا درهم بس تادب ههههههههههههه


ولا رشود اونه مخلي عمره شاطر والله وسالف هالراشد خخخخ


وصج عبدالله ماله حس ابد


وشمووه اكيد اتسوي جيه عشان تحقق حلم ابوها



ويلا فديتج نتريا البارت الياي ^^

 

[اليوبيل الماسي]

قصة جميلة جداً

ننتظر الجزء الثاني