للخلف در

[جمال نصير]

للخلف در

الجيش أمر .. للخلف در
إرجع يا مصرى بجهلتك ... وبوكستك .. وبحسرتك ..
للخلف در..
ستين سنة...
لما العساكر يسحبوك
لما العساكر يسرقوك
لما العساكر يرجعوا بيك للوهن
عصر الخيانة والمهانة والعدم
ستين سنة..
سرقونا لما الارض كانت أرضنا..
سرقونا لما الدنيا كانت .. عزنا
وسابونا واحنا بنتسجن
تحت التراب
وسابونا والارض العزيزة .. مصرنا .. صبحت خراب
*****
رجع العساكر بالبلد .. ستين سنة..
أيام بتسحب بعضها
بتلفنا ونلفها
وتجرنا .. ونجرها ... للخلف در
كل البلاد طالعة بتجرى بنفسها
ماسكة ف إيدها شعبها ..
باصين لبكرة وعزمها .. بيزقها
الا البلد دى وشعبها
لازقين فى جهل وفقرها
لازقين بلزقة عمرها ... ما تفكها
لابسين فى أم رجلها
جزمة عساكر قلبها
على قدها
مخ العساكر .. فكرها
فاكرة العساكر ربها
تسجد وتركع عندها..
وتنول رضاها وعطفها
علشان أمانها فى نعلها

*****
للخلف در.. قال العساكر للبلد...
للخلف در
من تانى عودى يا بلد .. للخلف در
ستين سنة...
وهناك هتلقى سور كبير
متجمعين فيه الحمير
وتلاقى منك ناس كتير
منهم بقر
منهم عبيد ما تنحسر
قلبك عليهم ينفطر
رفضوا الكرامة والقدر
بس المهم ...
أمسك لجامك وانكمد
واربط رباطك فى الوتد
خللى العساكر تحرسك
واسحب عساكرك تركبك
هتلاقى عند السور كرامة بتندبح
هتلاقى حر بينجرح
هتلاقى دين .. بين النجاسة بيمتهن
هتلاقى ناس .. راكعة وساجدة للوثن
هتلاقى نفسك بين ديابة بتحكمك
ووحوش بتنهب وسط لحمك .. تفرمك
وتمص دمك .. تحرمك
أرجع يا مصر – ما انتى مصرى- ومين تكون
أصلك فراعنة وهما يعنى ... كانوا مين !!

*****
للخلف در..
أخد العساكر مصرنا .. للخلف در
وسط الظلام
بين المهانة والضلالة واللئام
وهناك تقف... أرفع إيديك
واقلع هدومك كلها .. واخلع كرامتك حطها
تحت الجزم
خللى العساكر تبصقك .. وتبول عليك
هتشوف دماغك .. فى التراب
هتشوف .. سعادتك.. بالعذاب
هتحس بالعار أو ألم .. إشرب كمان...
مش هو إنت ال اتركب .. ضهرك صنم؟؟
مش هو إنت ال ارتضيت .. تبقى البجم؟؟
مش هو إنت العبد .. عايش كالخدم؟؟
مش هو إنت ال رفضت الدين حياة
مش هو إنت ال ارتضيت للفُجر طوقك للنجاة؟؟
*****
للخلف در..
أمر العساكر شعبنا..
للخلف در..
من غير كلام
لتشوف على ضهرك بيادة.. كام حزام
مش هى دى ودنك .. سرقها الكدابين؟؟
مش هو دا قرشك ف إيد النصابين؟؟
مش هو إنت ال اتخدعت ف عسكرك؟؟
مش هو انت ال انكتبت ف دفترك.. أنسان جبان
هتعيش كدا .. وتموت كدا..
وهتبقى مصر لوحدها .. من غير لسان
*****
وللحديث بقية ....
جمال نصير فى 16/7/2013

 

[اطياف راحله]

تسلم الايادي على الموضوع الرائع

 

[جمال نصير]

تسلم الايادي على الموضوع الرائع

نـآسـجـة الـخ`ــيـال.. مرورك الاروع .. شكرا لك

 

[miss 6air]

تسلم أستاذ ع الكلامـ الجمـيل . .

 

[روح الخير]

كلمات رائعة

ووصف جميل
بارك الله فيك وسلمت يمناك على ماخطت
فشكرا لطرحك الروعة

 

[حكآيةة غيم]

جميل جدا ما طرحت
بارك الله فيك
واصل~

 

[[ود]]

آه يا مصر ، كم أشعر بحرقة على ما آلت إليه الأمور في الحبيبة مصر
ندعو الله أن يوحد الصف ويجمعهم على كلمة سواء
أستاذي جمال نصير .. تعجز الحروف عن الثناء
فأنت أديب كبير و أشعارك قطع فنية

مني الختم + التقييم .. و ليتها تكفي

 

[أبو سليمان]

قصيده جميله جدا.. وتحكي واقع مرير..

 

[جمال نصير]

شكرا من القلب لكل من مر هنا .. وأأسف للجميع على عدم ردى لكل من مر على حده فحالتى النفسية لم تساعدنى من اليأس والاحباط .. ولكم جزيل الشكر...