بصراحة وبدون لف ... انتو احبابى فى البريمى ال شجعتونى اكتب لكم بالعامية المصرية .. فاستحملونى اكرمكم الله
كتر الكلام
وصبح رخيص
من كثرته ..
الخلق صاحية تنام عليه...
نفطر.. كلام
نتغدى نتعشى.. كلام
حواديتنا للأطفال.. كلام
أحلامنا آمالنا لبكرة يا دوب .. كلام
سعادتنا مرسومة بكلام
ودموعنا مغموسة بكلام
ف الحارة والشارع .. كلام
نتذل نتهان بالكلام
نرفض ونشجب.. بالكلام
ف الجامعة والمصنع.. كلام
وعلى المنابر و المساجد والكنايس والمجالس
ما تلاقيش.. غير الكلام
و بقينا نوصف بين جميع الخلق إلا.. بالكلام
لما بقى ف جبينا عار
وصبح كلامنا بين كلام كل البشر.. طعمه مرار
والصمت اصبح مستعار
ما عادتش نبرة صوتنا تحمل ..
غير معاني الانكسار.
***
لما الكلام رطرط وبار
والجَد تاه بين الهزار
كل الأمور اتلخبطت..
الحق جار
والحقد ولع بين قلوب الناس وأصبح كالشرار
وصبحنا وسط الخلق نمشى بالمهانة ليل نهار
الدم ف عروقنا برد
والحب جوانا جمد
وعيونا ما عادت تشوف .. إلا معاني الاحتقار
***
أو باختصار
أصبحنا أموات يا عرب
والحى فينا يادوب .. لسان.....
عمّال يطلع ف الكلام
وملى الودان ... وملى العيون... وملى العروق
وكتم على روحنا وباقى خطوتين
ويدوى فينا الانفجار
ويصيب حياتنا كلها .. الانهيار !!!
***
كثر الكلام
وبقاله أسواق كالنجاسة والنخاسة ف كل شارع .. كل حارة .. كل حته م الديار
وف كل حى بنينا ساحة للمصارعة والمبارزة للحكاوى والهزار
ونشوف يوماتى شباب مقاتل
جُوا ساحات القتال
مرسوم على جبينهم عزيمة للنضال ..
والخلق سايبة شغلها..
تركوا المصانع والمزارع والمدارس جم يعيشوا اللحظة ويشوفوا البطل
ال هيرسم للعروبة مجدها!!
وهيحيى فيها عزها!!
ويصحى فيها دمها!!
والساحة ينتهى عرضها
لا نشوف بطل
ولا حتى ثائر مستعار!!
منشوفش غير كلمات تفرقع ف الهوا
ابلغ معانى الانتصار!!!
***
أسف أنا خدنى الكلام
ما انا اصلى شغال زيكم
حمّال فى أسواق الكلام
ونسيت كتبت قصيدتى ليه؟
وبدأت فيها وهنتهى منها بأيه؟
مع إنها ..... برضه كلام!!
*****
لكن إسمحولى هزيد عليكم كلمتين ...
لما رخص فينا الكلام
رخصت معاه كل الحياة
الدم جوانا رخص
والهيبة ضاعت والكرامة والشجاعة ال اتمحت
والحس بلد والعروبة ال اتنست
وما عدش يربطنا بدينا غير بطاقة من ورق
والنخوة هربت وييا حبات العرق
لما جرينا ورا الحياة
ورمينا روحنا للغرق
واتارى بحر الدنيا نار
كل ال ينزله .. يتحرق
***
أسف أنا بحرت بيكم ف الكأبة والظلام
لكن اعمل ايه؟
مش دى الخلاصة م الكلام
ولا انتوا مش شيفنها بعد ما كلكم
حطيتوا روسكم فى الرمال زى النعام
لو بس لحظة تفوقوا من غفلتكم هتشوفوا الكتير ..
اكتر واكتر م الكلام
***
جمال نصير
2/1/2009
التعديل الأخير:
