في الذكرى الثانية لوفاة والدي رحمه الله حبيت اكتب هالموضوع البسيط وان شاء الله يوصل الاجر لوالدي كلما حد انتفع
الصدقات الجارية ممكن يعملها الانسان في حياته ويستفيد منها بعد مماته وذلك باخذ الاجر وكلنا نعرف ان اجر الصدقات عظيم وايضا ممكن حد يعمل الصدقات بنية وصول الثواب لشخص متوفي وان شاء الله ياخذ الحسنات وهو في قبره ،،، الامثلة على الصدقات كثيرة واغلبها معروف وان بذكر البعض واتمنى من اللي عنده افكار ما يبخل علينا وبسم الله نبدء ...
اناء فيه ماء للطيور
ياترا لو حد اخذ ملة (وعاء) قديم عنده بالبيت وحط فيها ماي وحطها ف الحوش (فناء المنزل) وشربت منه الطيور ما بتكون صدقة وياخذ عليها الاجر وممكن يعمل نية ان الاجر يوصل لمتوفي،، مافي اسهل منها وما تكلف شيء وممكن يتغير الماي كل كم يوم وتشرب منه العصافير وتتسبح وتتبرد من الحر واكيد بتفرح وتدعيلك
ممكن نشتري اكل للطيور وبنفس الطريقة نخليه لهم برا ،، ومافي اكثر من العصافير الصغيرة خاصة ع الاشجار (انا احط الاكل على درايش (نوافذ) البيت من برا المساحة الصغيرة وممكن ساعتها نستمتع بزقزقة العصافير طوال اليوم وفي البداية جاء عصفور واحد عندي والحمدلله الحين مجموعة كبيرة وانواع متنوعة من البلابل واليمام البري وفي انواع ما اعرف اسمها - والاكل او الحبوب ممكن نحصلهم في اي سوبرماركت في عند اللولو ك مثال كيسة ب 150 بيسة واتوقع في سوق مطرح وسوق السيب وباقي الاسواق بالكيلو بيكون ارخص واوفر)
اكيد اطعام الطعام صدقة للناس طيب واذا زاد الاكل بالعادة نرميه في الزبالة (تكرمون) في حين كثير حيوانات برا عند الدرام وكلنا نعرف قصة الرجل اللي دخل الجنة لانه سقى كلب وكلنا نعرف قصة المراة من بني اسرائيل اللي دخلت الجنة لانها اطعمت قطة ف ممكن نحن بعد الاكل الزايد بدل ما نرميه داخل الكيس الاسود نحطه في كيس ع جنب وممكن عابر سبيل ياكل منه
قبل ما اكمل واتكلم عن الصدقات الجارية اللي ممكن نعملها برا البيت ومع الناس ياريت نشوف تعاملنا مع الناس داخل البيت يعني اللي ما يكلم امه من شهر بسبب خلاف بسيط اظن قبل ما يفكر يعمل صدقة يروح يصالح امه ويحب على راسها واللي ما تقوم بواجباتها تجاه زوجها الافضل انها تحسن من تعاملها معه بالاول،، وقبل ما نفكر نساعد الفقراء اللي برا البيت نشوف اللي ف البيت ف اكيد اغلب الناس عندهم شغالة واغلب الناس يعاملون شغالاتهم بقسوة وبعدين يقولك والله انا برسل مساعدات لاسيا و لافريقيا طيب ما انت عندك اسيوية او افريقية بالبيت هي اولى بالمساعدات هذه وبالكلمة الطيبة
ممكن نعمل صدقات جارية مع الاطفال ف لو ارملة عندها اطفال او مطلقة عندها اطفال او فقيرة عندها اطفال او حتى اطفال اخوانا بالبيت او اطفال الجيران ممكن ندخل على قلوبهم الفرحة بحاجات بسيطة ممكن 200 بيسة تفرح طفل ممكن لو اشترينا لطفل ادوات مدرسية يفرح ممكن لو اشترينا لبنوتة فستان تفرح وناخذ الاجر ان شاء الله ،، ممكن مع مدارس القران نعمل صدقات ف ناخذ لهم الوسائل التعليمية من المكتبة مثل اللي تكون عليها الحروف والارقام او اشكال الفواكه واسمائها ممكن ناخذ هالحاجات ايضا الى دار الايتام اللي في الخوير جنب الكلية التقنية وياريت بلاش فكرة الحاجات المستعملة والقديمة واللي ما يبونها عيالكم ومهترية ولازم تنرمي ف الشي الجديد دايما يكون جميل وقيمته افضل عند الطفل ويكون هدية ويكون صدقة
ممكن نعمل صدقات جارية في بيوت الله خاصة المساجد الصغيرة او اللي تكون ع الطريق ونحن رايحين من منطقة الى منطقة او مسافرين بالبر من بلد الى بلد ممكن ناخذ معنا مصاحف وان شاء الله في كل مرة حد يقرا حرف نحن ناخذ الاجر او لو عاملين نية يوصل الاجر الى متوفي،، ف ممكن ناخذ للمسجد بنية الصدقة الجارية مصاحف او المسند الخشب اللي ينحط عليه المصحف لتسهيل القراءة او سجادات خاصة للمساجد اللي فرشها قديم وممكن حتى نحط علب كلينكس او ع البرادات اكواب ماي بلاستيك او في دورات المياه النعال الخاص بها (تكرمون) وكل امر يريح الشخص اللي رايح يتعبد اكيد بناخذ عليه الاجر ولو الشخص وضعه المادي ميسور ممكن يساهم في بناء مسجد او يشتري مكيف جديد لمسجد او براد ماي لو مافي او يجيب عامل يصبغ جدران المسجد من الداخل او يفرش الارضية
الامثلة عليها كثيرة وكل امر صالح اكيد ناخذ عليه الاجر وما نحتقر من المعروف شي ،، هذه الامثلة اللي تحضرني حاليا ولو خطر ع بالي شي بحطه واتمنى اللي عنده افكار ما يتردد ويخبرنا وبعد من اوجه الصدقات الجارية ممكن نساعد شخص فقير في الدراسة ك مثال لو نعرف ولد مخلص الثانوية وما عنده امكانية يدرس سواء كان من الاهل او الجيران ممكن نساعده ونسجله في كورس لدراسة الكومبيوتر واللغة الانجليزية وغيرها وممكن يشتغل بعدها ب هالشهادة ايضا ممكن نساعد شخص في عمل مشروع بسيط كمثال امراة فقيرة نشتري لها ماكينة خياطة ونوفر لها حد يعلمها (وصحيح انا تذكرت شي الوالد الله يرحمه كان على كرسي متحرك ف انا عملت اتصالات وقدرت اتبرع فيه لجهة وعرفت منهم ان كثير ناس تحتاج الى هذا الكرسي وممكن حد يشتريه من اي صيدلية وسعره 55 ريال ويتبرع فيه لشخص مقعد اما الجهة اللي خذت مني الكرسي ف موجودة ف الوادي الكبير جنب المركز الصحي في هناك مستشفى خاصة لكبار السن ) وممكن لو نعرف حد مريض ومحتاج يسافر يتعالج نساهم ولو ب 20 ريال وكل هالامور نحتسب اجرها عند الله وفي النهاية الكلمة الطيبة صدقة ياريت يكون كلامنا ويا بعض وتعاملنا ويا بعض وشعورنا تجاه بعض واقصد بالبعض هنا الناس اللي نعرفهم وما نعرفهم نكون طيبين معهم حتى ناخذ الاجر ونبتعد عن الحسد والغيرة ،،
شكرا لكم ،،،
