1. جمال نصير

    جمال نصير ¬°•| عضــو شرف |•°¬

    (( همي ))

    نفسي اضحك .. تضحك الضحكة ف دموعي
    تطلع الفرحة بترقص من ضلوعي
    مش يادوب مرسومة صورة فوق شفافي
    ضحكة صافية
    و أرمى همي خلف ضهرى
    بس همى .. مش سايبنى
    فوقى راكب
    زى ضلي .. ما يفارقني..

    ****
    فى المراية
    ألقى همي بين ملامحي
    أدى ضهرى للمراية
    ألقى همي خلف منى
    لما أكل.. لما اشرب.. لما أمشى..
    ألقى همي قبل منى
    اجى البس
    ألقى همي بين ملابسي
    لما ارجع بيتي متعب
    ألقى همي
    فوق سريري
    قال حاضني

    ****
    لما اسرق من زماني لحظة حلوه
    ألقى همي بيشاركنى
    ادخل الحمام أشوفه
    بين صوابعى.. تحت جلدي
    اترك الدنيا الكبيرة
    و أرمى نفسي ف ركن ضلمة
    ألقى همي
    طل م الضلمة يهاجمني

    لما اهرب بين دموعي
    ألقى همي تحت رمشي
    لما أفكر .. أي فكرة
    ألقى همي بيجادلنى
    لما احلم
    ألقى همي وسط حلمي

    ****
    حاسس انه زي اسمي
    لونه لونى
    شكله شكلي
    حته منه وهو منى

    ****
    كل دا فى دنيتنا عادى
    بس خوفي
    لما ارحل دنيا تانيه
    القى همى
    فوق كتافى
    بيعاتبنى

    ****

    جمال نصير
    18/2/2008
     
  2. [ود]

    [ود] ¬| رُوحٌ مُحلِّقَة بَين أسْرآبِ الأمَل ✿ ،

    أبعد الله عنك الهم أخي جمال نصير
    نص غارق في الهم ، حتى أن لفظة هم تكررت مرارا
    ، الحياة أجمل وإن تخللتها بعض الهموم فلا ينبغي أن تعكر صفونا
    دمت ودام بوح حرفك
     
  3. جمال نصير

    جمال نصير ¬°•| عضــو شرف |•°¬

    ὧeḍ
    اختنا الكريمة ... الهم فى الحياة كالتوابل فى الطعام ... لاقيمة للحياة بدونها... ولكن لو استخدمناها الاستخدام الصحيح..... دمت ىبخير
     

مشاركة هذه الصفحة