نسايم وبوجسيم

الموضوع في ',, البُريمِي لِـ/ للشٌعرٍوالْقصِيْد,,' بواسطة خاطر, بتاريخ ‏28 جويليه 2011.

  1. خاطر

    خاطر ¬°•| عضو مبتدى |•°¬

    علام بيبان الشعر ياهل الذوق
    مقفلة من وقت والجو غايم

    بالامس شجعني وانا عشّي النوق
    أكتب دعابة شخص شاره ولايم

    لفيت ضيف ودافعي مصدره شوق
    لكن ياحسرة لا تحايا وعزايم

    شاعر ولي شرهة عتب زايد حقوق
    أدورها من بوجسيم ونسايم
     
  2. Queen Love

    Queen Love ✗ الفريق التطويري الأعلامي ✗

    صح لسانك خيوو

    كل التووفيق لك
     
  3. ريح الحزن

    ريح الحزن ¬°•| عضو مثالي |•°¬

    تسلم يمناااك
    ربي يعطيك الف عافيه ​
     
  4. عذب القوافي

    عذب القوافي ¬°•| مجموعة تفاعل لأجل البريمي|•°¬

    أخوي خاطر مقصدك واضح لكن حبيت أخبرك إن احنا فهالقسم عايله وحده واخوان لا تتريا رد وانتقاد من شاعر معين ما تعلم بظروفهم
    أنا أدري انك مبتدئ وودك تكتب بس ما لاقي حد يشجعك
    احنا لما كنا شراتك ولا زلنا طبعآ كنا نزعل ونبوز بس عقب عرفنا إنهم مظلومين كل واحد وظروفه بس وياك الأعضاء بيوقفون وياك قلبآ وقالبآ وشد الهمه ولا تحاتي دام احنا كلنا وياك
    ربي يحفظك

    اوه صح نسيت صح لسانك أخوي وما قصرت وشد حيلك فاليايات
    نتريا يديدك
    ربي يحفظك
     
  5. الباهي

    الباهي ¬°•| عضو جديد |•°¬

    يسلمووو على عذب كلامك ابدااااااع والله وكلك ابداااع تسلم
     
  6. نسايم ريف

    نسايم ريف ¬°•| شاعرة |•°¬

    يامـــرحبا ملــــيون ياعالي الذوق && هذي تحيه وصّلتها نسايم
    وان كان قصّرنا لك الفال مسيوق && أبشر ولك وافي حقوق ولزايم
    مانبخص الضيفان يـ معشي النوق && ولانرتضي نلحق بحيف ولوايم



    مرحبابك فالمنتدى بشكل عام وفــ القسم بشكل خاص

    مرحبتين واسمحلنا ع القصوور يالشاعر
     
  7. عطر القلوب

    عطر القلوب ¬°•| عضو مميز |•°¬

    سلمت يمناك
    راقت لي ابياتك.. :==:
     
  8. ضاوي

    ضاوي ¬°•| عضو فعّال |•°¬

    كلام سليم ومرحبا بالشاعر

    لكن طال عمرك واجب علينا نحسن الظن بالجميع طبعا مع التحرّي
    يمكن تم نشر قصيدة على النت لشخص نشرها بأسمه ومن ثم أخذها
    من أخذها ونشرها بأسم نستعار .
    ودمت بود . تحياتي
     
  9. بنت المقابيل

    بنت المقابيل ¬°•| مشرفة سابقة |•°¬

    مب بيضيع حقك أخوي خاطر ... مشرفينا قدها ان شاء الله

    صح الله لسانك
     
  10. احاسيس الكون

    احاسيس الكون ¬°•| عضو مثالي |•°¬

    كلمات رائعه
    تسلم اخوي ع الطرح
     
  11. فـيـ الـكـعـبـي ـصـل

    فـيـ الـكـعـبـي ـصـل ¬°•|شاعر الشلّة |•°¬

    صح الله لسانك أخوي ع القصيده الطيبه وربي لا هانك..
     
  12. خاطر

    خاطر ¬°•| عضو مبتدى |•°¬

    أشكر أختي مشرفة الشعر واقولها
    لا هنتي وبنت الرجال تاخذ من مسناع أهلها وبيّض الله وجهك
    ووجه أعضاء المنتدى ما نخص حد .

    أرجو من الأخوة لا يحطون في خواطرهم شي القصيدة مب أكثر
    من دعابة قصدي أحرك مشاعر أهل المنتدى .

    مشكوريين ياخوان شمّه
     
  13. بو جسيمـ

    بو جسيمـ ¬°•| شاعر |•°¬

    الـــــحر يشره والربع تذرف الموق
    من ظرف عوق ومن محاين عظايمـ

    خذني ســماح ولا تشاره يـ مرموق
    لــــــو بشتكي حالي تزيح الملايمـ

    شفني عزير الحال ممزور مرهوق
    والــــضيق لو هده تموت الحمايمـ

    هذي علومي كان تعذر هل الشوق
    منهي فوادي داير ن ف الجهايمـ

    رمضان مقبل والمقبل يبـــا روق
    اما انا يا خوي مـــا ظن صايمـ
     
  14. الرمش الخجول

    الرمش الخجول ¬°•| عضو مميز |•°¬

    ماشاءالله عليكــ ,,,
    كلمات جميله


    تقبل مروري
     
  15. خاطر

    خاطر ¬°•| عضو مبتدى |•°¬

    الرمش الخجول تسلمين عل المرور
    أخوي بوجسم المعذرة ما انتبهت لردك ياشيخ
    وتسلم على الابيات الجزله ؛



    تسلم ياخو خاطر ومقدوركم فوق
    ماعاد متلوّم ولا عاد لايم

    ما كنت عاتب غير من باعث الشوق
    أشكرك يابوجسيم واشكر نسايم
     

مشاركة هذه الصفحة