ما بعد الحب الى الموت

الموضوع في ',, البُريمِي لِلقِصَص والرِوَايات ,,' بواسطة راعية بو شنب, بتاريخ ‏13 أبريل 2010.

  1. راعية بو شنب

    راعية بو شنب ¬°•| عضو مميز |•°¬

    []حديث مع الله]

    استجمعت قواي لكي أخاطب ربي
    بعد طول معصية رجعت لك يا رب
    نعم بدأت الحديث لكن كنت أرتعد خوفا
    كنت ظالم لنفسي عصيتك يا رب....
    والآن رجعت لك أريد أن أسمعها ....
    نعم رجعت وتبت وذرفت دموع التوبة
    الآن ترجع خائفآ تائبآ بعد طول المعصية؟
    أرحمني ياربي لم يكن قلبي موقنا برحمتك
    خررت ساجدا من عظمة الحديث معك ياربي.
    لم أدركم طالت سجدتي بين يديك؟
    ولكني أحسست بشيء عجيب !!!
    أحسست أنك قد بسطت يديك لترحمني نعم عفوت عنك
    وغفرت لك فاستغفر يااااه ما أسعد هذه
    الكلمات أتبت عني يا إلهي؟

    يا ليتني لم أعصك يا ليتني مت قبل المعصية
    إنها كانت ثقيلة علي قلبي وكأنها جبل كبير
    وإنها تظهر بسيطة عند بعض البشر ولكن لا فإنها ثقيلة علي
    لم أستطع تحملها ولو لثانية أخرى فشكرا لك ياربي
    فشكرا علي مغفرتك ورحمتك

    أما آن الأوان أن تخاطب ربك أيها الغافل؟؟؟
    أن تحس بمعني حبه خاطبه تجده مستمع محب
    أما فكرت في ذنوبك كم طالت وكم عظمت؟
    لا.. لا تقل إنها ذنوب صغيرة بسيطة
    كيف قمت بها كيف سولت لك نفسك؟
    ارجع يا عبد الله إن الله معك دائما


    أما تكون أنت معه؟

    قل وداعا للمعاصي قل وداعا للشيطان الرجيم
    خاطب ربك يوميا حتى ولو ساعة .. دقيقة !!!
    ستجد حبا يغمر كيانك ستجد الكون جميلا
    قل له في حوارك اليومي ولا تقطع هذا الحوار
    يا ربي يا مالك أمري يا حبيبي يا رحمن الدنيا والآخرة
    تب علي وأغفر لي وارحمني وأهدني وأعفو عني.
    نعم قل قل كل ما في قلبك من ذكر
    لا تستحي من الله فإنه الإله..
    أأحسست يوما بمعني كلمة الإله ؟!
    نعم إنها كلمة عظيمة ذات رونق جميل
    اختارها الله تعالي ... لتكون دليلا عليه
    فاكتشف هذا ... الدليل يا عبد الله
    نداء من الله ... نداء من الله
    أجيبوا النداء ... استعينوا بالله
    توبوا إلي الله ... استغفروا له
    كونوا معه ... لا تتركوه كلموه سبحانه وتعالي
    ستحبوه حقا ... ستعبدوه حقا
    فمن غيره تعالي أحق بالعبادة؟؟؟



    ـــــــــــــــــــــــــــــــــــــــــــــــــــــــــ
    السلام عليكم شباب ....

    نبدأ القصه بدون اي مقدمات

    بس اقووول لا تنامواا وانتوا تقروها جهزوا النسكافيه والشيبس ويفضل لو يكون شيبس عمان


    ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

    الفصل الاول :

    دخلت زهره على ميثه وشافتها يالسه ع اللاب توب ومندمجه مره ولاتحس بالي عدالها يعني اذا انسرقت عادي و هيه ما عندها خبر .(زهره) ميثه شتسوين ؟؟ (ميثه) بسم الله خرعتيني شفيج دقي الباب تحم حمي قولي اي شي ما تدخلين جذي وبس (زهره) شفيج انا دقيت بس انتي الله يهديج مندمجه ف هذا , وانتي شو يالسه تسوين عند منو تسولفين ؟؟(ميثه) وانتي شو يخصج وبعدين انا مب يالسه ع النت شوفي ... تقربت زهره من اللاب توب وشافتها فاتحه برنامج الوورد وصفحه بيضا يعني ما كاتبه شي ابد بس جذي , رفعت راسها ويلست اطالع ميثه وتقولها: انتي يالسه عليه من الصبح واخر شيء بس جذي والله اختي تخبلت مب بس تخبلتي الا تيننتي الله يهديج ويعطيج العقل . (ميثه) اقولج طلعي وخليني بروحي لا تخربين علي .. (زهره وهيه طالعه ) تخربين علي الي يسمعها المتنبي ولا الجاحظ الحمدالله والشكر ..
    مرت ايام ع ميثه وهيه يالسه بغرفتها محد يشوفها الا اذا كان وقت غدا ولا عشا والي يسأل عنها قالوله نايمه ولا فالحمام ولا طالعه , عصبت مريم ع ميثه لانها اول مره ماتكون محط انظار الجميع ولا كانت هيه الدلع ولانها كل مايلست عندهم يتكلمون عن ميثه وبس وماشي سيره ثانيه عشان جذي عصبت وتنرفزت وشلت البقعه فوق تحت وكل ما يكلمها حد ما ترد عليه واذا ردت بدون نفس . دخلت زينب غرفة مريم ويلست عدالها بدون ما تتكلم , (مريم ) هي انتي شفيج جذي اطالعيني شو تبين ( زينب ) اولا انا حقي اسم ولا نسيتي (مريم ) زبدة الكلام شو تبين ؟؟( زينب) مابى شي بس ابى اعرف انتي شفيج ليش متغيره, من يومين ما فيج شي واحينه صايره غير مب مريم الي نحن نعرفها .( مريم ) ما فيني شي بس جذي كيفي حرام ايلس بروحي بعد .(زينب)ع راحتج , بس بدال ما تعصبين من اختج سيري شوفيها شفيها يمكن تقولج ولا تكوني حقوده جذي . وطلعت من عند مريم وخلتها يمكن راسها يلين وتروح عند اختها .
    المهم نرجع البيت الثاني الي هو بيت امهم العوده .
    منصور ( هو ولد عمهم البنات الاربع ) امايه ما تبين تسيرين بيت عمي مازن .. (ام مازن) لا بويه ما بسير احينه, الصبح يايه من عندهم . (منصور) وشو اخبارهم انشاءالله بخير (ام مازن) هيه ولديه كلهم بخير , بس يا حليلها ميثاني مادري شفيها كله يالسه ف غرفتها سألت عنها شفيها بس محد رد علي كلهم يقولون ما ندري وهيه لا مريضه ولاشي ( منصور) انزين امايه انتي ما سألتيها ما كلمتيها (ام مازن) كلمتها بويه بس هيه بعد الله هداها ما قالت لي, تقول ما فيها شي . ويدخل فهد عليهم ( اخو منصور الصغير ) منصوي منصوي نلوح نلكب دلاجه ( ما يعرف ينطق الراء ) . (منصور) ما بسير وياك بتفضحني تناداني قدام ربعي منصوي فشيله ما تنشل مكان .( فهد) امايه شوفيه قوليله نيوح وقوليله .(ام مازن) ياحليلك فهود , ابويه منصور شله ما عليه عشان خاطريه هذا اخوك مالك غنى عنه بس اليوم عشان خاطريه .(منصور) خلاص امايه عشانج بس ولاهذا ما ينشل مكان , يالله سير تلبس واذا تاخرت ما بشلك وياي .( فهد وهو يناقز من الفرحه ) منصوي بييكبني دياجه , بيكبني دياجه ...
    تروح هيفاء عند عبدالله وتقوله : ما دريت تأجلن الامتحانات اليوم (عبدالله) حلفي قولي والله ( هيفاء) حبك عبدالله , ليش احلف ما تصدق سير تحت ف الصاله منزلين الاعلان ف الجريدة سير شوف .(عبدالله يطلع من غرفته ركض) اول ما وصل الصاله يلس يدور ف الجريده يبى يعرف اذا الخبر صح ولا لا , شافه منصور ويلس يقول: اليوم بيستوي شي ف البيت, اذا عبود يقرا الجريده يالله , الله يهديك انشاءالله . (عبدالله ) منصور وين الجريده الي منزلين فيها الاعلان عن تاجيل الامتحانات . (منصور) منو قالك فديتك انه الامتحانات تاجلت منو خارط عليك ؟ (عبدالله ) بس هيفاء قالتلي .(منصور) حليلك اذا هيفاء تكذب عليك وانت صدقتها .. يلس عبدالله يطالع منصور وهو معصب كان يحسب انه بيفتك من المذاكره شويه , ابو مروان وهو ينزل يشوف عبدالله معصب وماله خاطر ف شي ,سأل منصور عنه شفيه اخوك معصب (وقاله منصور ليش هو معصب) , وضحك ويلس هو ومنصور يتمصخرون عليه , بعد ماطلع منصور وفهد دخل مروان هو حرمته غدير وعياله الحشره والصدعه , ومن وصلوا عياله عند باب الصاله يلسوا يصارخوا ويناقزوا ف كل مكان , ويعصب مروان ع غدير : انتي وعيالج فضيحه وحشره حشى ما تنشلوا مكان فشلتوني الله يفشلكم . (غدير) وليش هم عيالي انا بس مب عيالك بعد , كل ما يسون شي قلت انا وانت شو خانتك هنيه هاه ؟؟. (مروان ) بعد عرفتي ترمسين من متى مدام غدير والله حاله , اقولج روحي داخل سيري من ويهي لا احينه اخمج بكف واخلي اذنج تنقع .( غدير ) هذا انت كل ما اقولك شي جذي ترد علي ما عندك شغله غير الضرب . تدخل غدير وتسير تيلس مع عمتها (الي هي ام مروان ).
    راح مروان يلس يسولف عند ابوه وياخذ اخبار الاهل .. (ابو مروان ) هاه مروان شو سويت عشان البيت ؟ (مروان) والله ابوي ما سويت شي بعدني يالس ادبر فلوسه .(ابو مروان) وانا شو قايلك لا تعب عمرك ولا تولف الديون ع راسك بس انت ما تسمع ؟ (مروان) يعني شو ابوي تباني ايلس بدون بيت وانا احينه ريال وعندي حرمه وعيال . (ابو مروان ) ما انت الي استعيلت وسرت تتزوج والله محد قالك , انت الي بغيت واحينه شوف منو بيساعدك لا وبعده طالع ف بيت اجار انزين يلس هنيه ومن يجهز البيت اسكن فيه بس انت العكس وانا ما اقول غير احسن وهذا دواك وانا ما ياي اساعدك . (مروان ) وانت كل ما انا يلست وياك فتحتلي نفس الموضوع خلاص تراني عرفت , وبعدين انا مابى منك شي انا اقدر ادبر نفسي . (ابو مروان ) انشاءالله تقدر وبنشوف هذا جزا من الي ما يسمع الكلام . (مروان) لا حووول , يالله ابوي بسير اسلم عليهم وساير البيت احسن مع السلامه. (ابو مروان ) كل ما اكلمك ف شي قمت تتهرب من الرد بس هذا طبعك ويقولوا بو طبيع ما يوز عن طبعه , روح الله يحفظك ولا تنسى تمر ع بيت عمك مازن من متى ما سرت عندهم وهو يسأل عنك . (مروان) انشاءالله ابوي . يطلع مروان ويسير يسلم على امه ويدته وشل عياله وطلع وهو معصب وبصراحه هو طفر من ابوه كل ما يزوره يعيد نفس الموال كل مره واحيانا يزيد حبتين, ع كثر ما كان يتكلم بس هو ما يسمعه , بس ف خاطره لو مره وحده يقوله الله يوفقك ويسعدك , بس من تزوج ما سمعه يقول جذي . (عبدالله) ابوي وين راح مروان . (ابو مروان) بعد وين راح , سار بيته ليش شو تباه ؟ (عبدالله) كنت اباه ف موضوع بس ما عليه بعدين بتصل فيه . طبعا كل مواضيع عبدالله نفسها ما تتغير مرواااااااااااااااااااان عطني فلوووووووس ما عنده شي ثاني , وياخذ فلوس من عند كل الي ف البيت , وكل يوم ع نفس الحاله ولو يجمعهن بيطلع مليونير ..
    نرجع لبيت مازن ابو البنات , ,, وبعدها ميثه حابسه عمرها ف غرفتها وما طلعت , زينب طفرت من حالة اختها وقالت لازم تعرف شو فيها , سارت عند زهرة ومريم وخبرتهن بالموضوع بس طبعا مريم ما رضت ف البدايه وبعد عناء طويل وافقت انسه مريم ,, وسارن غرفة ميثه وشافوها منسدحه ع الارض وحاضنه المخده , ومن شافنها ع هالحاله قالن اكيد ميثوه تحب ولا ما سوت جذي ( زهره) ميثوه شبلاج نايمه ع الارض شو فيج ؟(ميثه) ماشي ملانه ورقدت تحت فيها شي ؟ ( مريم) اووونه ملانه قولي الصدج شفيج وعن الحركات هذي ؟(ميثه) ما بلاني شي قلت ملانه وطفرانه ومالي خاطر بس . (زينب ) شوفي ميثه نحن كلنا خوات ولا تنسي نحن توائم يعني لازم تقولين شفيج ولا مايصير جذي ونحن مانعرف توئمنا شفيه .(زهره ومريم يقولن ف وقت واحد ) توااااائم .. وبعدين ادق زهره ع الخشب وقالت انا اول, ويلسن كلهن يضحكن ,(زهره) هيه احينه ضحكي مب قبل ماده البوز (زينب ) يالله ميثان قولي شفيج ولا تلفي ودوري .(ميثه) انزين بقول بس لاتضحكن علي ادريبكن بتتمصخرن .() انزين ما بنضحك قولي (ميثه) بصراحه انا احاول اكتب عن حياة امي وابوي . (مريم) كيف يعني تكتبين عن امي وابوي . (ميثه) يعني اكتب قصتهم عشان اقراها كل يوم . (زهره) يعني تخليها مثل الذكرى الا عمرنا ما عرفناها الا بالصور والكلام .(زينب) ايوااااه بس كيف بتكتبين وانتي ما تعرفين شي عنهم .(ميثه) ما ادري , عشان جذي انا كنت احاول اعرف شلون بكتبها. (مريم ) اصلا تعرفين انتي انانية , كيف تكتبين عن امنا بروحج يعني انتي بس الي تبين تعرفين عنها وكيف كانت ما فكرتي ف خواتج بصراحه ما هقيتها منج والكل يمدحج . كلهن استغربن من كلام مريم اول مرة تقول شي او تعترف انها تبى تعرف عن امها ولا كل ما يلسن مع بعض ويتكلمن عنها , هيه تغير الموضوع ولا تطلع عنهن . (زهره) صدقها مريوم المفروض تشاركينا مثل ما نحن نشاركج ف كل شي , ولا بعد ما تبينا نعرف عنها .(ميثه) انا ما قلت جذي بس كنت اتحسب انتن ما بترضن تساعدني وبس .( زهره) وليش بعد ما نرضى واذا صدج تبين تكتبين القصة نحن بنساعدج ولا انتن شو رايكن يا بنات ؟؟() اووووووووووكي . (زينب) عيل اول شي المفروض نسأل ابويه كيف تزوج اميه وبعدين نسأل يدوه والباجين .(ميثه) يا الله عيل انسير عند ابويه شو نتريا بعد . وسارن التوائم عند ابوهن وكل وحده شاله ف ايدها تيلفون عشان تسجل الكلام. اول ما وصلن غرفة ابوهن شافنه منسدح على الفراش ويطالع فوق ولا يتحرك وكانه ميت , زينب خافت وقالت حق مريم سيري شوفي شي نبض ؟(زهره) شو انتي شي نبض تفاولين عليه ليش ؟ . لف ابوهن راسه ويلس يطالعهن ويبتسم . (مريم) ابويه شفيك ؟ (مازن) ما فيني شي حبيبتي , خير بنات شو تبن ؟ انتن من تتولفن ما تتولفن ع خير . (زهره) افاااااااا ليش ابوي تقول عنا جذي يا حليلنا ما نسوي شي بس نبى نتيلس حرام ؟.(ميثه) هيه حرام ابوي قول اذا كان حرام .(مازن) انا ما قلت حرام بس انتن فيكن شي ؟(زينب) بنات قومن نطلع بكرامتنا احسن شكله ما يبانا نيلس عنده .(مريم) صدقتي زينبوه يالله طلعنا .(مازن) افاا تعالن تعالن وفي ابو ما يبى بناته , انتن قطعه مني ومالي غنى عنكن .(زهره) اكيد انا حقي اكبر قطعه صح باباتي ؟؟.(ميثه) لا والله اصلا ابوي يحبني انا اكثر مب انتي .(مريم) هي انتن اصلا ابوي ما يحبكن ولا يحبني يحب زينب اكثر دلوعته هيه الكل ف الكل . يلس مازن يسمعهن وميت ضحك وهو يشوفهن شاف انه كل بنت فيها شبه من امهن كل وحده ما خذه شي , ميثه ( ذكيه ومتفاهمه واحلى شوي من خواتها ) اما زهره (متواضعه ومرحه وهبله ) وزينب محد مثلها غير عنهن كلهن (خجوله ومؤدبه وحنونه والذوق كله فيها ) واخر شي اصغرهن بثواني مريم واعوذ بالله منها , ما فيها ابدا خصله من خصل امها طالعه غير( انانية ودلوعه ع الاخر ومتكبر وشايفه نفسها بس احلى ما فيها انها ما تاخذ ف خاطرها على احد وهذا الشي الوحيد الي خذته من امها بس تنجرح بسرعه وفيها حالات يعني مزاجيه مره جذيه ومره جذا ) .(زينب) ابوي شفيك جذي اطالعنا في شي ؟ (مازن) لا بنتي ما فيني شي , بس ياحلو سوالفكن .(ميثه) انزين ابوي بصراحه نبى منك تساعدنا ف شيء (مازن) انا قلت انكن تبن شي , امرن تدللن قولن ؟؟ (زهره) يالله ميثه قوليله .(ميثه) وليش انتي ما تقولي ؟(زهره) انتي اكبرنا يعني انتي قولي ؟(مريم) خلصنا تكلمن شفيكن صخيتن ؟ ولا قبل محتشرات واحينه ما تبن تتكلمن ؟(ميثه وهي متردده ) انزين بقول , ابويه بصراحه انا ابى اسألك عن اممممممممممممممم عن امي .(مازن وهو مستغرب) عن امج ؟؟؟ وشو تبن تعرفن ؟ وليش تسألن احينه شو الي ذكركن فيها ؟؟( زهره) ابوي ندري انك بتتضايق بس من طلعنا ع هالدنيا ما شفناها ولا حسينا ف حنانها واحيانا نحس انا وحيدات وما لنا احد ف هالدنيا ومفتقدينها وايد ونشتاقلها ف كل لحظة تمر , ف احزانا وافراحنا ومشاكلنا حتى الفترة الي كبرنا فيها ما لقيناها .(زينب) ابويه بصراحه نحن مانبى نزعلك ولا نضايقك لانا نعرف انت شكثر حبيت امي وضحيت عشانها .(مازن) لا يا بنات , هذا ما يضايقني وبعدين انتن من حقن تسألن عن امكن وكيف كانت بس صدقني احلى سنين ف حياتي قضيتها معاها واسوي المستحيل عشان بس يرد الزمن ع ورا واكون معاها
     

    الملفات المرفقة:

    آخر تعديل: ‏24 ماي 2010
  2. راعية بو شنب

    راعية بو شنب ¬°•| عضو مميز |•°¬

    .(مريم) يا ويلي ع الحب .(زهره) ابوي انا شكلي بتزوج ريال مثل مواصفاتك هههههههههههههههاي (مازن) يا حليلج زهره , تعرفين كل شخص ف هالعالم عنده طريقته ف الحب , كل واحد ومشاعره ويمكن تحصلن واحد يحبكن مثلي واكثر . (ميثه) انزين ابوي كلمنا عن حياتكم , كيف تقابلتوا وكيف تزوجتوا ؟ ( مازن) انزي بنات سمعن ... كل وحده بدت تسجل .......


    الفصل الثاني:
    واحينه نبدا بقصة مــــــــــــازن وهــــــــــــدى
    تزوج مازن من هدى عن طريق الاهل طبعا وما كانوا يعرفون بعض بس بعد ما تزوجوا صاروا يهتموا وايد وما افترقوا لحظه وحده ( بس ما اربع وعشرين ساعه مع بعض انا بروحي بمل ) المهم نرجع حق قصتنا .
    كان الكل يغار منهم ومن علاقتهم , كان بينهم شي عظيم وحلوين مع بعض متفاهمين ومتحابين واثقين ومخلصين لبعض ولا مره فكر ولا هي فكرة انهم يخونوا بعض .
    صار على زواجهم اربع سنوات والله ما رزقهم عيال والكل كان يتنقد عليهم ويذلهم خاصة ام مازن كانت دايما تقوله انه يتزوج غيرها لانه هدى يمكن ما فيها عيال وفيها عيب وكل يوم ام مازن على نفس الموال . وبعد فتره تفاجا الكل بخبر حمل هدى (صدمه ياربي ).
    ام مازن : كيف حامل ومن اربع سنوات ما حملت ولا من قلنا انك انت بتتزوج طلعت كذبت حملها .
    مازن : شفيج امي احينه حرمتي وحملت وانتي مب عايبنج ومن متى تحتشرين علي وتقولي اتزوج واتزوج وهذي حرمتي حملت ولو ما حملت انا مابتزوج غير هدى (وبستفزاز يقول ) هذي حبيبة قلبي وما بتخلى عنها .
    ام مازن سكتت وعصبت وطلعت عنه وهي تتحرطم وتكلم عمرها ..
    هدى : حبيبي تعرف شكثر انا مستانسه ؟؟ اخيرا بيصير عندنا ياهل وبيشل اسمك وبيقولك باباتي ..
    مازن : آآآآآآآآآآآآآآه يا حبي ما تعرفين الي فيني احينه ( وهو حاط ايده ع بطنها ) بطير من الفرحه احس عمري انا الي حامل مب انتي ..
    هدى : وهي تضحك ( مازن زين بعد بتريحني تشله تسع شهور بدالي ....
    كملت هدى ثلاث شهور وسارت المستشفى هي ومازن( وقالت الدكتوره : بصراحه انا ما اعرف شو اقول والا شعه تثبت هذا الشي ومثل ما تسمعوا انه هناك مب قلب واحد الي ينبض اربع قلوب يعني يا حبيبتي هدى انتي حامل باربع توائم والله يسهل عليج ومبروووووك) انصدم مازن وقال اربعه مره وحده يا ويل حالي وين اودي بعمري (يتمصخر) . وهدى من فرحتها ما اهتمت حتى لو كانوا عشره ما يفرق المهم انها بتصير ام . (مازن ) انزين يعني احينه عادي ما بيصير شيء. (الدكتوره) كيف يعني ؟ (هدى) قصده يعني ما بيصير مضاعفات ولا بيأثر فيني ولا بالعيال , جذي قصدك صح ؟ (مازن) صح حياتي .( الدكتوره) لا انشاءالله وانتي مب اول وحده تحمل باربع في غيرج حملن بثلاثه وحتى بخمسه عادي يعني , وانشاءالله ما بيصير شي والله يعلم . المهم الدكتوره طمأنتهم وما خوفتهم . بعد ما ردوا البيت ساروا وخبروا اهاليهم وما صدقوا اربعه دفعه وحده مب معقوله . المهم الحرمه حامل وخلاص . راشد الي هو اخو مازن يعني ابو مروان : احينه بسألك مازن انت كيف بتتحمل مسؤلية اربع عيال , وشغلها ؟ بتخلاها تودر شغلها ؟ وبعدين متاكد انهم منك انت ؟ ... تدخل ام مازن : ايواااه انت متاكد انهم منك انت يعني من اربع سنوات ما حملت واحينه يايين تقولوا هيه حامل وباربعه عن ابوه ارنب ولا قطوه ؟ ... ....
    واستوت المشاكل ف فترة حمل هدى وصار مازن يوديها المستشفى وف السادس سووولها فحص دم حقها وحق البيبيز وحق مازن وتاكد انه البنات بناته وكل شكوك اهله راحت .,.. وسار عند راشد وقاله : انت شلون تشككني ف مرتي وف بناتي وانا معيش حبيبتي وفديت قلبي ف شك وهم طول ست شهور وما ارتاحت ف حملها ما هيقيتها منكم , المفروض تستانسوا من وناستي وتدعولها الله يساعدها ويشفيها وينششها بالسلامه , وينها امي انا بوريها الاوراق الي تثبت انهن بناتي قطعه مني ... وكانت امه يالسه اطالع فيلم مصري ابيض واسود عادل امام وتضحك .. ويدخل مازن عليها ويقول تضحكين ع هذيل وماضحكتي يوم مرتي حملت ولا هذا تستانسين عليه وشوفي نتايج فحص الدم الي خليتيني اشك ف هدى ست شهور تاكدي انهن بناتي , واحينه روحي باركيلها وهنيها و دعيلها الله يساعدها وبدال ما تدعيلي وتستانسي وبيصير عندي عيال وانتي بتصيرين يده ... (ام مازن ) والله وليدي انا مايلي ويه اشوفها بعد الكلام الي قلته وطلعته عليها (مازن) اصلا هدى ما تاخذ ع خاطرها من اي احد كان تنسى بسرعه وتسامح ولو رحتي تباركيلها بتستانس وايد .... وحبست ام مازن عمرها ف الغرفه يومين وبعدين سارت هي وراشد وايمان ختهم الصغيره عند هدى ف المستشفى يباركولها ويدعولها ,,, انصدمت هدى منهم بعد ما سمعت الي سمعته واستانست . وبعدين دخلت الدكتوره وقالت شي ما يسر الخاطر ,,,, هدى نحن اكتشفنا ف نتايج الفحوصات انج ما تقدرين تتحملين فترة الحمل تسعة اشهر لانه جسمج وايد ضعيف ونفسيتج وايد تعبانه ولازم تستعدين ف اي وقت حق العملية . طبعا هدى ما وافقت تسو العملية ,,(ام مازن) لا يا بنتي لازم تسوينها عشان صحتج وصحة البنات ,,(هدى) بس انا مستحيل اسويها لو يصير ما يصير ابى بناتي يكملن تسع شهور ف بطني ولا بتخلى عنهن ولا تحاولون ....... بعد مازن ما سمع بالسالفه من عند هدى راح عند الدكتوره وسالها : السلام عليكم ., دكتوره ابى اعرف ليش تبين تسوين العمليه حق مرتي هدى ؟؟(الدكتورة) تفضل استريح وابيك تكون عاقل وهادي وما ابيك تخاف وتخوف هدى معاك. (مازن) انتي بكلامج هذا تخوفيني اكثر قولي شفيها هدى ؟؟؟ (الدكتورةوهيه متردده) بصراحه يا مازن بعد ما شفت الفحوصات الثانية اتاكدت لاني بالاول ما كنت متاكده بس احينه تاكدت وعرفت انه هدى فيها ورم سرطاني ف الرحم ...(مازن) شوووووووووووه ... صدمه كبيييييييييره عليه ,,, انتي متاكده ولا تتمصخرين ؟(الدكتوره) هذا مرض وما فيها مصخره يا اخ مازن عشان جذيه انا قلتلها تكون مستعده اي وقت انت تحدده حق العمليه .. (مازن) اووكي انا بسفرها الخارج عشان اتاكد اكثر يمكن انتوا مغلطين ؟(الدكتورة) ما عندها وقت حق السفر يمكن تدهور حالتها الصحية وبعدين تخسرها وتخسر بناتك وهذي حياتك وانت قرر ...(مازن) انزين ما يمكن تسووون الفحوصات مره ثالثه وعاشره ؟؟(الدكتوره) يا خويه هذا مرض مب لعبه انت بروحك بتاخر الوقت , واذا تبانا نسوي الفحص مره ثانية بنسوي ما عندنا اي اشكاليه بس انت بتخلاها تشك ف الموضوع وتخاف ..(مازن) تمام , شوفوا الوقت الي يناسبكم وانا بحاول اقنعها . ويطلع من عند الدكتوره وهو منصدم وعيونه مليانه دموع وصايرات حمر شرات الجمر. وهو يمشي يحس انه الدنيا ادور فيه ومب عارف شيسوي , ما يبى يخسر حب حياته وتوأم روحه وبعدين كيف هو بيسير يخبرها وكيف بيقنعها وهو عارف انه هدى مستحيل تسويها مهما صار, بس لازم يقنعها قبل ما تتأزم الامور ويخسر هدى ,,, ف هذاك اليوم ما راح مازن عند هدى واتصل فيها وقال انه طلع من المستشفى وراح يخلص شغله ,, استغربت هدى من مازن وهي عارفه انه مازن فيه شي ولانه صوته كان غير مب صوت مازن الطبيعي . المهم خلونا من هدى ونسير عند ام مازن ف البيت (ام مازن) ايمان انا حاسه اني انا السبب ف مرض هدى , ولو وقفت معاها من البدايه ما صار كل هذا ولا تعبت . (ايمان) لا اميه ما اظني وبعدين انا شاكه انه هدى فيها شي بس هم مب راضين يقولوا ؟(ام مازن) والله ما اعرف يا بنيتي حاسه بشي غير , انا لازم اسوي شي وما ايلس جذي ولا ما برتاح ,(ايمان) وانتي شو بيدج تسوين يعني , ادعيلها كل يوم الله يساعدها وينششها بالسلامه وبس هذا الي تقدرين تسوينه . وف اليوم الثاني الصبح سار مازن عند هدى ,(مازن وطبعا مخلي عمره مستانس وما فيه شي ) هلا حبيبتي شحالج؟ عسى احسن ؟(هدى) الحمدالله يسرك الحال حبي وايد احسن عن قبل وانت شحالك يا بعد قلبي ؟؟(مازن) فديتج والله من اشوفج بخير انا بخير واحس عمري اطير .(هدى) لا مازن لاطير بعدين منو بينزلك ؟؟(مازن) افااا , وانتي ليش موجوده ؟(هدى) لا انا حامل ما اقدر انزلك ؟ (مازن) اووووووه نسيت , المهم هدى انتي شو قلتي عشان العمليه بتسوينها ؟(هدى) مازن انا قلت ما بسويها ولو شو ما يصير ما بسويها يعني ما بسويها ولا تحاول ,,(مازن) بس يا عمري انتي سمعتي الدكتورة شو قالت لازم تسوينها عشانج وعشان البنات , ولا انتي ما تبينهم ؟؟ (هدى) شو ما اباهم وانا من متى احلم فيهم اتمنى يكون عندي عيال بس انا اخاف يصير لهم شي وهم بعدهم ما كملوا سبع شهور وحتى لو كملوا انا ما بسويها, وانت سير عند الدكتوره وقوللها ما بسوي العمليه وتأجلها ومن اكمل التاسع بسويها .. ما عرف مازن شو يرد عليها يلس يطالعها وهو ساكت وف خاطره يخبرها عن مرضها بس ما قدر انربط لسانه وما قال وكل الي قاله ,انشاءالله ما بيصير غير الي انتي تبينه ... وطلع من عندها وهو مضايق ومب عارف شو يسوي ,,,, اتصل ف اخوه راشد وقال : الووو هلا راشد انت وين؟؟ (راشد) اهلين مازن , يعني وين بعد ف الدوام الله لا يردهم انشاءالله (مازن) انزين ابى اكلمك ف موضوع بمر عليك تقدر تترخص ؟(راشد) هيه اقدر بس انت قولي شفيك عسى خير بس .( من اشوفك بقولك يالله باي .(راشد) بس تمام , باي .. وبعد نص ساعه وصل مازن عند راشد وركبوا ف السيارة , شاف راشد حالت مازن كيف وشكله غير مب مازن الي يعرفه الي مستحيل تهزه ريح , قوي مثل الجبل (مهما كان الانسان قوي ف الاخير يضعف وكل شخص له نقطة ضعف , ومازن كانت نقطة ضعفه هــــــــدى ,, المهم نرجع حق محور حديثنا ,,,,( راشد) شفيك مازن شكلك مب طبيعي خير , هدى صار فيها شي ؟(مازن) ااااااخ راشد حاس انه الدنيا ضاقتبي ومب قادر اتنفس وعمري ما حسيت جذي الا احينه .(راشد) يا ريال تراك خوفتني شبلاك قول ؟؟ (مازن) اوكي بقولك بس بشرط لا تقول حق حد , خلها السالفه بيني وبينك (راشد) بيني وبينك يعني السالفه فيها إن بس قول سرك ف بير. وبعدين قاله مازن بالموضوع وانصدم راشد وما عرف شو يقول حق مازن وهو يعرف انه يحبها ومستحيل يتخلى عنها مهما قال ,(راشد) بصراحه يا خوي ما دري شو اقولك بس الله يعينك واي شي تحتاجه انا موجود .(مازن) تسلم راشد وما قصرت . وطبعا راشد نشر الخبر ف كل مكان وما بقى حد وما خبره بالسالفه, عصب مازن ف البدايه بس عرف انه فالاخير بيعرفوا بالسالفه ,,المهم صار الي هدى تباه وما سوت العمليه وكملت تسع شهور بالضبط ,, ومازن منقلبه حالته وهو عارف انه يمكن يخسر هدى ,, دخلت الدكتوره وقالت انه لازم اليوم تسوي هدى العمليه وبدون تأخير وشرحتلهم كيف بتكون العملية , وافق مازن بسرعه وبدون ما يقول حق هدى و وقع ع الاوراق ,, دخلت هدى غرفة العمليات والكل ينتظرها ف قاعة الانتظار, ومازن يحس بتوتر وخوف وما كملت ساعه الا وطلعت الممرضه تقوله انه حرمته يابت اربع بنات وكلهن بخير والحمدالله , ولكن وضع الام ف حاله مستقره وطمانته انها بخير . الكل استانس بالخبر الا مازن قال ما بيطمن الا من يشوف هدى طالعه من غرفة العمليات وبخير , وبعد ساعتين طلعت الدكتوره من العمليات وشكلها غيرومن شاف مازن شكلها عرف انه الوضع ما يطمن ولا صار شي ,, (الدكتوره) انا بصراحه ما ادري شو اقوول بس صدقني انا سويت كل الي اقدر عليه,, وقبل ما تكمل كلامها (مازن) شو قصدج شو فيها هدى شو صار قولي ؟؟ (الدكتوره) انت حاول انك تهدئ شوي وانا بقولك ,,(مازن وهو معصب وخيفان) انا هادي انتي قولي شفيها هدى ؟(الدكتوره وهي متردده) بصراحه العمليه خذت مجرى ثانية (مازن) كيف يعني ؟؟(الدكتوره) بعد ما طلعنا البيبيز وضعها الصحي استقر بس ونحن بدينا نستأصل الورم صارلها نزيف حاد وما قدرت اسيطر عليه .(مازن) يعني هدى ماتت ؟؟(الدكتوره) انا اسفه وايد البقى ف حياتك .انهار مازن ويلس يصيح مثل اليهال وانصدم الكل بالخبر وبعد فتره وكانوا يالسين ف قاعة الانتظار وهم ما مصدقين فجأه يصرخ مازن وبصوت عالي ( لاااااااااااااااااااااااااااااااااا هـــــــــــدى مستحيل مستحيل هدى ما ماتت ما ماتت ليش تقولوا ماتت ليــــــــــــــش هـــــــــدى ) طلعت (الدكتوره وقالت حق الكل) لو سمحتوا تقدرون تشوفوها لاخر مره بس ارجوكم بهدوء لانه هذا مستشفى . قال مازن حق امه وخوه راشد انتو دخلوا بالاول وبعدين انا تاكدوا هدى صدج ميته,,(ام مازن وهي تصيح ) لاتقول جذيه يا وليدي بس قول الله يرحمها . ويرد عليها الله يرحمها,,,, دخلوا وشافوا هدى وكانت مثل الملاك ويها يشع نور مثل الشمس تفاجات ام مازن ويلست تون وتصيح وتقرا عليها الفاتحه وتتندم ع كل لحظه ظلمتها فيها بعد ما طلعوا حضن راشد مازن ولا تكلم وعيونه تدمع ,, وبسرعه راح يشوفها ومن بعيد ما قدر يمسك اعصابه واغمى عليه ويركض له اخوه واخته والكل تولف من ممرض ودكتور . المهم صار الي صار وماتت هدى والله يرحمها ويغمد روحها الجنه ,,,, ف البداية ما تقبل مازن البنات ونسى انه عنده بنات ولا يهتم فيهن ومهمل نفسه وف اهله والكل حاول فيه بس هو ما قدر ينسى حب حياته وروحه ولي ما شاف مثلها بين الخلايق كلهم , هدى كانت غير ع البنات واااااااااااااااه وكل يوم يقول اااااااه كل ما اذكرها (وهيه اصلا تروح عن باله ) ,, ومرت الايام والاسابيع والشهور بختصار كمل سنه وهو ع نفس الحال بس قررت امه تيبله مطوع ( عشان يسويله حرز>>>>>>>>>>>اتمصخر هههههههههاي سخيفه صح ) المهم يابت المطوع اول مازن ما تقبل الفكره وقال وهو يصارخ برب الي خالقنه : ليش امي شايفتني مينون عشان تيبلي مطوع (المطوع)لا يا ابني امك خايفه عليك لانك حارم نفسك من النعمه الي عندك (يتكلم عن بناته طبعا) (مازن) انا ما معترض ع حكمت ربي بس ما متقبل اني اخسرهدى ف لحظه و تبوني انساها بسهوله اسمحلي يا شيخي ما اقدر بس اذا ع بناتي لا تخاف امي وايمان معاهن,,,, (المطوع) بناتك محتاجيلك انت لا تحرمهن من حنان ابوهن يكفي انهن فتحن عيونهن ع الدنيا وما شافن امهن و ابوهن يعرفنه بس بالاسم لا تحرمهن هذا حرام انا بخليك احين و فكر بكلامي و ان شاءالله بعد فتره انت الي تياني و اشوفك ف المسيد مب انا الي اييك اتمنى اني اشوف مازن الي انا اعرفه والكل متعود عليه وصدقني بتشوف هدى ف عيون بناتك.. وبعد ثلاث ساعات طلع مازن من غرفته وشكله غير مرررره حلوو ويهبل وكانه معرس , حتى بناته ماعرفنه انخشن ورا عمتهن , (ايمان) لا تخافن حبيباتي هذا بابا ,,(ام مازن) الحمدالله ع السلامه وليدي .(راشد) عاش من شافك منور البيت كيف كانت فترة السجن والعدس حلوو عندهم ضابطين .. (ايمان) حرام عليك نحن ما صدقنا يطلع من حبسته فديته , شحالك اخويه كيف نفسيتك احينه ؟؟(ام مازن) عسى اهون بويه ؟(مازن) اميه هذيل بناتي الي منخشات ورا ايمان ؟؟(راشد) احينه عرفت انه عندك بنات وينك عنهن من قبل ولا خلاص نسيت حب سنينك هدى انزين مازن ,,(ايمان وهيه تهمس لراشد) ما تقدر تقبض السانك شوي واحنا ما صدقنا طلع وسأل ع البنات . (مازن) هاااه رشود تباني ارد مره ثانية عادي ما عندي مانع (راشد) لا يا ولد الحلال انا ما صدقت انك تطلع من حبستك واحينه حد بيسير معاي الصناعية والحلاق ,,وضحكوا وستانسوا .. وبعد يومين راح مازن عند الشيخ يتشكره وع النصيحه الحلوه (يقولوا النصيحه بجمل ) ,,,,,,,,,,,,,,,,,,,,,,
    (مازن) وهذي قصتكن يا بناتي عرفتن احينه .(ميثه) يعني احينه ابويه انت عشت حياتك كلها تذكر امي .(زهره) ونحن نذكرك فيها كل ما تشوفنا ,,(مازن) لاني احب امكن الله يرحمها واحبكن بعد , واحينه لليل روحن نامن تصبحن ع خير ,(البنات) وانت بالف خير باباتنا >>>> دلع [/


    وتوته توته خلصت الحتوته ,,, حلوه ولا فتفوته
     

    الملفات المرفقة:

  3. شووق قطر

    شووق قطر ¬°•| مراقبة عامة سابقة وصاحبة العطاء المميز |•°¬

    رآآآآعية بوشنب ابدآآآآآآآآآآآآآع عليج

    القصة وآآآآآآآآآآآآيد حلووة وتستآهلين التقيم يآعسل
     
  4. راعية بو شنب

    راعية بو شنب ¬°•| عضو مميز |•°¬

    هلا وغلا فديتج
    ومشكوره يالغلا هذا كله من ذوقج تسلمي
     
  5. راعية بو شنب

    راعية بو شنب ¬°•| عضو مميز |•°¬

    حرااااااااام ما اشوف مشاركات شكلها القصه ما عيبتكم
    انتظر راايكم ولو بنص حرف لو كان يستوي
    :61::61::61::61::61::61::61::61::61::61::61::61:
     
  6. FankoOshya

    FankoOshya ★ مترفة العطاء★

    ياربي ووايد طويله القصه
    بس حلوووووووووه
    يسلمواا
    ويعطيك ألف عافيه
     
  7. راعية بو شنب

    راعية بو شنب ¬°•| عضو مميز |•°¬

    مشكووره فديتج وانشاءالله انها تكون نالت اعجابج
     
  8. Ąℓŋ3αỉмỉ

    Ąℓŋ3αỉмỉ ¬°•| مُراقب سَابق ومطور |•°¬

  9. المهاجر

    المهاجر ¬°•| عضو مميز |•°¬

    قمة الإبداع ختيه ما شاء الله تبارك الله
    و ياليت نرى حدوته آخرى نعيش أجوائها نستمتع بخيالها
     
  10. راعية بو شنب

    راعية بو شنب ¬°•| عضو مميز |•°¬


    الله يسلمك ويعافيك
    الرووعه بمرورك الحلو يالغلا

    وع فكره انا بنت بس عادي طاااف
    :hehe2:
     
  11. راعية بو شنب

    راعية بو شنب ¬°•| عضو مميز |•°¬

    مشكوووووووووور اخوي المهااجر

    وانشاءالله قريب بنزل اخر ابداعاتي

    وتسلم ع مرورك الرائع
     
  12. عاشق البريمي AM

    عاشق البريمي AM ¬°•| عضو فعّال |•°¬

    رد

    بصراحه القصه واااااااااايد روعه

    بس طويلة وااااايد

    تسلمي أختي ...................


    :imuae86::imuae86::imuae86::imuae86::imuae86:
     
  13. راعية بو شنب

    راعية بو شنب ¬°•| عضو مميز |•°¬

    الله يسلمك اخوي
    اهم شي انها نالت اعجابك

    تسلم ع مرورك الرائع
     
  14. روووووووعه يسلموووو
     
  15. تـعـبـت اكـتـم الـحـزن

    تـعـبـت اكـتـم الـحـزن ¬°•| فخر المنتدى |•°¬

    يسلمووووو..
     
  16. غالي الأثمان

    غالي الأثمان ¬°•| مراقب سابق|•°¬

    ثااانكس.. روووعه..
     
  17. راعية بو شنب

    راعية بو شنب ¬°•| عضو مميز |•°¬

    الاروع مرورك خيوووووووو
     
  18. راعية بو شنب

    راعية بو شنب ¬°•| عضو مميز |•°¬

    تسلمووو ع مروركم الحلووووووو
     

مشاركة هذه الصفحة