الهاجس
¬°•| حكاية تميز |•°¬
- إنضم
- 7 نوفمبر 2010
- المشاركات
- 11,079
كذاب من قال المحبه تساهيل..؟؟
لايومي بيـوم ٍ ولا ليلـي بليـل
ولا السّعد مقبل ولا الهـم زايـل
ماغير ازم هموم واحـط واشيـل
ولاراح منهـا هـم جالـه بدايـل
تدرون يالعربان وشهي البهاذيـل
فرقى وليف وحظ مامـن صمايـل
الوصل نعمه والمفـارق غرابيـل
ياحـظ ليتـك تعتـدل ماتمـايـل
لامن بغيت اعدّلك ترجـع تميـل
كنّك تقول اعيش وامـوت مايـل
والمهرة اللي ماتعيّن مـع الخيـل
من دونها تقصر جميع الأصايـل
من دونها ضاعت عقول الحلاحيل
وتضاربت فيهـا سلـوم القبايـل
ياشيب عيني يوم قفّت وانا اخيـل
دموعها وبلٍ علـى الخـد سايـل
وانا اتصبّر وازهم العقل والحيـل
والقلب يشكي للضلـوع النحايـل
اصبر مثل صبر الرجال المشاكيل
واخبّي جـروح الزمـن واتحايـل
لن الردي والهيس وخبل الرجاجيل
تفرح لا وراني الزمـان الهوايـل
وانا اترفع واترك القـال والقيـل
واجبر عزى قلبٍ على الموت آيل
أشب نار الشوق وارهي المعاميل
واريّح اعصابـي ببـدع المثايـل
ولاّ الغلا ماعاد يحتـاج تفصيـل
لنّـه مورينـي نجـوم القوايـل
ياللي غيابك حط بالقلـب تنكيـل
ويلي على قربك ولانـي بطايـل
لاغاب صوتك ماتفيـد المراسيـل
وفر على الجوال كثـر الرسايـل
والله لـو تاخـذ لدمـي تحاليـل
تلقاك بالجينـات صايـل وجايـل
حبك تعدى حب الاكـراد لأربيـل
الاّ تعـدى حـب شمـر لحـايـل
صبيت حبك مثل صـب الفناجيـل
وين الجليله تشرب اشواق وايـل
وانته تواعدني من اسهيل لسهيل
والشوق في قلبي مسوي عمايـل
ليتك تبادلني الغـلا والمواصيـل
وترد لي بعض الوفـا والجمايـل
تعبت من قولة ظروف وعراقيـل
وتعبت من قولة ياقـل الوسايـل
لاقلت انا احبك ومشتـاق بالحيـل
تقول لي جعل العوض فالموبايـل
يعني انا ويـاك مثـل المهابيـل
واشباهنـا فالوقـت هـذا قلايـل
كذاب من قـال المحبـه تساهيـل
راحو ضحيتهـا عيـال الحمايـل