العاثرة
¬°•| عضــو مــهــم|•°¬
اخط لكم احرفي و مخاخيطي وصلت ركبي من زوود حزني <<<تسمع عن الكناية فالعربي
وعدساتي جفت من كثر ما صحت
وغديت ينيه من ينانوة الزمن الغابر
طبعاً انا سمعت بناس يحلّوون يوم يصيحون بس انا مابدني شي من هالجمال
عموماً ما علينا
الله يسلمكم كنت من كمن يوم سهرانه فالحجرة ويا خواتي وفجأه شفنا فار (صغيرووون) يركض فالحجره
مر شرق مر غرب
طبعاً ما اعرت الموضوع اهتمام ومع الايام صار الفار صديقنا
ومسولنا اكشن فالحجره
مر يطلع يركض شال كلينكس فحلجه
ومره يطيح فالزباله (الله يعزكم) ويتم يخرخش
ومر يطلع ويتم واقف ويطالعنا
بعدها امي درت بالموضوع وطبعاً بما انه ذكر <<<عرفت انه ذكر من خفة دمه وهبله
و داااش غرفة بنات ..حكم عليه بالموت
قالت امي بتحطله سم ..قلنا : لا ..بيموت ورا الكبت وبيسويلنا ريحه
اقترحت انا ناخذ واحد من الاقفاص (المصيده) ونحطه له بس امي قالت انه و بسبب حجمه الصغير بيظهر منه
فالأخير كُلفت انا محدثتكم العاثرة بإن اشتريله لصق او قفاطه و انهي حياته
المهم ما بطول عليكم ... خفت اخذ لصق لأنه ما بيجتله وبالعكس بيتعذب
فخذتله قفاطه وجربتها ع صبعي <<<ام العباطه
المهم بعد الالم اللي فصبعي قلت لاااا..هاي اكيد بتجتله بخبطه وحده
المهم اننا نصبناها ويلسنا نشوف تايتانك <<<شدخل
وشوي ولا تزخه .. رفعت راسي ولا اشوفه يلبط و يصااوي
طبعاً هني قمت اصيح وحسيت بالذنب لانه ما مات مثل ما توقعت وتعذب مما اضطر اخوي انه يجتله <<لا تسألوني كيف
احم احم
هني ببدا الموضوع <<< عيل ذيج الهذره كلها شتطلع!
بعد ما مات الفار و مات جاك فالفلم << ناعرت من الخاطر ذاك اليوم
فكرت فهالموضوع ..ليش انا جي بسرعه ينكسر خاطري واحس بالذنب ومادري شوه ..
تمنيت لو اني قاسيه وشديده وما اعرف اصيح <<<من كثر ما عايبوا عليها
عقب تذكرت فلسطين ..اليهودي يجتل ام و طفل رضيع وشايب ضعيف بدون ما يرمش بعينه
هذي هي القسوة
اخوا يضرب اخوه ويسبه و يسرقه ويطرده ويقاطعه بالسنين
هذي هي القسوة
يار يرمس على ياره ويتهمه فشرفه ويطعنه فظهره ويشوفه ينكسر جدامه ويخسر هيبته
هذي هي القسوة
اولاد رابطين كلب فسدره وما خلوا غرشه ولا حصاه الا وفروها عليه وهم يضحكون كل ما عوا الجلب
هذي هي القسوة
انا مب جذي ولا ابا اكون جذي ..لاني بشر ولاني ابا الناس ترحمني مثل ما ارحمها
والاهم من هذا هو اني مسلمه ... ما اقو اني مطوعه ..او عالمه بالدين
لكني اعرف ان الله تعالى قال :
" وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً "
واعرف ان الدين وصانا بالرحمه وان ربنا سمى عمره (رحيم)
وان الرسول عليه الصلاة والسلام قال : ( لا تنـزع الرحمة إلا من شقي )
دينا وصانا بالرحمه ..حتى رحمة الحيوانات ما نساها ولا استثناها
:
القسوة دخلت بلادنا ودخلت بيوتنا .. و دخلت قلوبنا
وبصراحه صرت اشوف اليهودي رحيم اكثر من المسلم اللي يقسي على اهله ويرانه وناسه
على الاقل اليهودي سمى المسلمين اعدائه وقسى عليهم لكنه رحيم باهله
والمسلم يقسى على اهله اللي هم من دمه ولحمه
السموحه طولت عليكم
سلاماتي لكم واحد واحد
اثنين اثنين
ثلاثه ثلاثه
<<<وصلت الفكره ولا اكمل!!
:hai-there:
العـــــــــــــاثرة
التعديل الأخير:
