تم تعطيل الجافا سكربت. للحصول على تجربة أفضل، الرجاء تمكين الجافا سكربت في المتصفح الخاص بك قبل المتابعة.

الرد على الموضوع

الرسالة: <blockquote data-quote="صقر قريش" data-source="post: 515124" data-attributes="member: 3248">الجزء الثالث البنت : أبد هو هو ما يتغير ما يعقل .. راعي البنات هو راعي البنات ..حيالله عزوووز ريم : اوه تعرفينه ..عبدالعزيز تشوف هاي البنت تعرفنك زين .وتسأل عنك ..تقرب لك هي ولا وشلون أنا : لا بس أكيد معجبة ولا واحد سامعة فيني ..شكلها كذا البنت : أي معجبة مالت عليك نسيتني أنا شوق ..من الرياض .خويتك قبل العام نسيتني يالمحلي ( المحلي = لقب يطلقونه البنات على أخوياهم اذا تطاقوا من بعد ما كانوا يسمونهم يا حلو وفي الغالب هي شتيمة ) أنا : أنتي .. هاه وش تقولين آسف شكلك غلطانة أنا مو اللي تقصدينه روحي دوري على اللي لعب عليك ... ريم : عزووز ما عليك منه شكلها مشبهه عليك ما تعرفه خلها تولي البنت : يا عيني و تدلعك بنت والله ما أنت سهل يالنيص ( النيص = شي مدري وشو بس شين وصغير ) وتعرفت على خليجيات والله شكلك شغال صح في النت ..وترقيم ومواعيد وهات يا شغل .. ريم : احترمي نفسج يبه شكلك غلطانة هذا عبدالعزيز مو مال هالشغلات .. ( وبدت تهمس في أذن البنت ) بيني وبينك هو عنده حالة نفسية ..ومتأثر منها الى يومج ... وما نبي نخليه بروحه لا يسوي في نفسه شي البنت : أحلىىىىى يالمريض النفسي أموت أنا في الولد الرومانسي يا عيوني أنتي وأياها أنا شوق من الرياض أعرفه زين ..متعرفة علية من الانترنت ..وقام يقنع فيني ويقنع فيني لين صرت أكلمه بالتليفون ... بعدين يقنع فيني ويقنع فيني لين شافني في السوق وبعدين يقنع فيني ويقنع فيني .. العنود : هاه شنو بعد هالمرة لا يكون أقنعج ااا....... البنت : وجع لا انشاءالله بس أنا ينقال لك حبيته وتعلقت فيه وأهلي جابوا لي واحد متقدم يخطبني وقلت له الحقيقة أنه يزعل أنه يحس أنه يتحرك ..بكل برود قال لي ... شوفي يا شوق أنا توني في أول حياتي ولا بعد أهلت نفسي ولا أقدر أتقدم لك ولا اقدر أربطك فيني ... أنا : ( لا شعوريا أتذكر بعض من كلماتي الخالدة ) الزواج مسئولية ومصاريف وفوق ذا كله مستقبل طرفين ..يا شوق الله يوفقك و... البنت : يا شوق الله يوفقك ويصبرني على فراقك مدري كيف باكر الرياض بتكون أذا ما سمعت صوتك والأسواق وش بتسوى أذا ما شفتك ..صدقيني يا شوق ... ريم : هاه وبعدين .... البنت : ولا قبلين دخلت مرة بالصدفة في الياهو شات لقيته يغازل بنت ويقول لها أنتي أول بنت ارتاح لها في حياتي ريم : يعني ما كان يحب واحدة ويوم أهلها غصبوها تتزوج غيره جاه اكتئاب وبغى ينتحر كذا مرة ... البنت : أي انتحار وأي بطيخ يا حبيبتي شوفي جواله بنفسك ...تلقين أسامي بنات أعرفه زين خبز يدي 8 شهور علاقة ..ما أكذب عليكم ..هو أذا حب يحب صح ..ويحسسك أنك أول بنت في حياته بس الصدق ..الله لا يوريك ريم : عبدالعزيز هات جوالك أبّي أشوف شي ..ييبه بسرعة أنا : بتصدقين ذي الخبلة أقول لك أنها غلطانة بالله تمقلي في وجهي هذا وجه راعي بنات بالله عليك ريم: أقول لك هات جوالك أحسن لك .... وتأخذ جوالي ..وتناظر فيه ..ما ناظرت قائمة الأسامي على طول دقت على جوالها و لما رن ّ جوالها وطلع لها رقمي ... أنا : عن أذنكم يا شباب تذكرت مواعد واحد في الوكرة بأروح أقابله ويمكن ما ارجع توصوني على شي يالله باي ريم : أنا أخو عبدالعزيز أحب أشكرك ... وأخوي مريض نفسي ومر بتجربة عاطفية قاسية وباغي ينتحر ..وقبل ذي كله جوالي مو معمم بس داخل السعودية ...أنت تجذب ( تجذب =تكذب ) علي طول هالمدة وكل شوي بروح بروحي وخلوني ..وعبالنا أنك بتنتحر ونخاف عليك وأمسكوا يدي وبأجلس هني وهني ونروح السينما مع بعض ..وش أسوي فيك هاه قول لي ... وكنّا في الدور الثالث وأشوف ريم ترمي جوالي من فوق الى تحت ويتحول جوالي ألى فتافيت .. منظر طبيعي خلاب وشفتها تقترب مني بسرعة ..قلت لنفسي يا ولد العطة يا بطة ...وركض في سوق السيتي سنتر وريم والعنود وراي ... الشي اللي ما أعرفه ليه صار كل السوق يلحقني هل هو تعاطف مع البنات ولا عرفوا القصة ... المهم انحشت وانحشت لين ضيعت ريم والعنود ورجعت لفندقي شلت عفشي ورحت لفندق ثاني ... بتقولون وش مقعدني بعد . مدري حسيت أني ارتبطت بريم ..أجلت رحلتي شوي ودورت لي فندق حلو ..وسكنت فيه وجلست أدور من مكان لمكان ..لين صدفة لقيت العنود في كوفي شوب مع بنات ... ورحت لها أنا : هلا العنود كيفك عارف أنك زعلانة مني وحاقدة علي بس ممكن تسمعيني العنود : شنو بعد بتقول انك محرول ولا يتيم .. ولا وش بتقول وش بتجذب بعد .هاه هات وش عندك .. أنا : أنا غلطان والغلط راكبني من رأسي لرجلي ..بس وش أسوي بنت عمك أعجبتني أول شي فكرتي عنها أنها حليوة بس فيها عناد ورزة على الفاضي بس بعدين أكتشتفت فيما بعد أنها طيبة وحليوة وتتأكل أكل .. العنود : انزين يعني أنا اللي طلعت جيكرة الحين وأنا الشينة يالله وش بييي منك يعني أكيد بتعذرب فيني بس ما يهمني رأي واحد مثلك ..خلاص أنا : لا والله أنتي ما عليك بعد قلبك ابيض وطيبة ..بس الحين نرجع لبنت عمك ريم ..شوفي أنا أقدر أروح لديرتي ولا كأن شي صار صح ولا لا بس والله مازلت افكر بريم البنت أعجبتني ودخلت مزاجي .. العنود : لا والله مبروك الحين اتصل عليها واعلمها قصدي ابشرها أنها دخلت مزاجك تروح مع السواق تخمس بالسيارة مع الدريول ولا أقول لك تاخذ علم قطر ..وتمشي على الكورنيش يعني تمويه ..هاه وش رأيك أنا : يا بنت الناس أفهميني والله ودي اصلح غلطتي و أبيها تسامحني من جد العنود : المشكلة ودي أصدقك بس تاريخك معنا أسود ما في شي يشفع لك ..أقنعني أنا : والله العظيم أني بس أبيها تسامحني هذا اللي أبيه كله عارف أني مصختها وسببت لها الأحراج العنود : تشوف أنا بأكلمها وبأحاول أقنعها ومع أ ني من جد ما أطيقك ولا أصدقك بس أحسك صادق هالمرة وتروح العنود بعيد شوي وتدق على ريم من جوالها وأنا أنتظر .وترجع العنود لي .. العنود : تشوف هي تقول لي ما ينفع تعتذر جذيه ...أنت عطنا رقم فندقك ورقم حجرتك ..وأحنا بندق عليك علشان نحدد لك موعد ..ريم تبي تقابلك شخصيا ... أنا : هي قالت لك تبي تقابلني شخصيا والله ودي ..واحد يطول يجلس معها ..طيب هذي أرقامي وما راح أطلع بأنتظر منكم مكالمة زين ..يالله مشكورة يالعنود وسامحيني أنتي بعد .. وأروح لفندقي ولا أتحرك لين بعد صلاة العشاء رن تليفون الغرفة ..و أرد .. الو ريم : عبدالعزيز العنود كلمتني ..وقالت لي أنك تبيني أسامحك بعد كل اللي سويته .. رغم أني من صدق ودي أزنطك بس مستعدة أسامحك بس قبل أبي تقابلني في مكان ..أذا ما ودك خلاص أنا : لا وش اللي خلاص يا بعد عمري وين تبيني أقابلك بس أنتي حددي ولا يهمك ريم : زين خلاص تمسك الطريق حق الكورنيش وتمشي وتمشي لين ينقطع بك الطريق بعدين تكمل في الرمل شوي لا تخاف ترى التراب تمشي فيه السيايير .. امش حوالي عشرين كيلو ..وانتظرني هناك على حزة المغرب هنيك منطقة حلوة أسمها بحر العديد ايلس هناك وانتظرني وأنا بأييك مو تمل وتزهق وتروح ترى من جد أزعل منك أنا : بس ما أدل ما في شي اقرب وأوضح وش بحر العديد هذا ريم : عزووزي ناوي تفضحني جدام الناس .. مواعدتك ..أنا بروح مزرعتنا وبعدين بأسوق السيارة بنفسي وأجيك وش فيك شكلك ما تبينا نجلس مع بعض ونأخذ راحتنا حتى العنود ما بيها تيي واياي ..خلاص بكيفك أنسى كل شي ورح للرياض أنت ما ودك تشوفني مبينه ..مع أني والله معجبة فيك و عجبتني خطتك يوم قصيت علي .. أنا : لا والله وش دعوة مو بحر العديد انشالله لو تبين بحر الصين ابشري يا عيوني ... وأروح للوعد .. وتظلم الدنيا ويطلع وقت العشاء ولا تجي ريم ..قلت في نفسي شكل البنت تبي تنتقم مني و قلبي يقول لي أنتظر بعد لو نص ساعة ( أخس يا ذا القلب كل ما شاف بنت صار كأنه سفتي المرور يونون ) ..وشوي وتبان أنوار سيارة كبيرة ..قلت بس جت حياتي ريم ..وشوي ألا السيارة تصير سيارات ... وزحمة ..قلت بس ريم بتعرف صديقاتها علي ..علشان تقهرهم بي ..وتوني جالس أتكشخ ألا ..وينزلون عساكر من السيارات ..حوالي 20 عسكري وينطلقون حوالي ويقولون أمسكه لا يروح لا ينحاش .. ويحاصروني ويكتفوني ويطقوني طق الله لا يوريكم ..وكل واحد يقول يا حمار وش تسوي هنا اعترف تنتظرها هاه تنتظرها ... أنا : أي والله انتظرها ..هي بتجي بعد شوي بس وش فيها انتم هيئتكم عساكر ولا وش السالفة النقيب : وتقولها ..تعترف بكل بجاحة أنك تنتظرها ... وهيئتنا عساكر تتطنز أنت وويهك ..هاه الأخبار اللي جتنا طلعت صج ..وكفشناك يالهيس ... أنا : والله الوعد كان هنا على أنها بتجي عندي بنفسها .. يعني بعيد عن عيون الناس بس وش السالفة الله يحييك عندنا في الرياض اذا الهيئة مسكت ولد و بنت متواعدين يقعدون يهاوشون فيهم لين يصيحونهم بعدين يوقعونهم على تعهدات بس ما توصل للعساكر والتكفخ وكلبشات في يدي .. النقيب : وش بنته أنت وويهك ..وش تخربط ...لا تستغبي علي فاهم لا أصفقك ..أنت عارف و أحنا عارفين أنا : والله العظيم بنت قطرية من عندكم واسمها ريم بعد ... هذي كل السالفة ..اقسم بالله لو أدري أن مواعد البنات في قطر كذا والله ما أواعد لو ولد النقيب : تبي تفهمنا أنك ما تنطر قارب مليان كراتين خمر ..بتجيك عن طريق الخليج ... هاه قول يالله سمعني أنا : وش خمره أنت ووجهك .. والله العظيم لاني راعي خمر ولا شرب ..الدخان ما أدخن هالمرة بأشرب خمر النقيب : يا حمار اللي مثلك خبيث ما يشرب بس يروج ويبيع عارفين أحنا هالأشكال أنا :والله العظيم أنها بنت ... وش خمره ... أول مرة أطب فيها قطر بأقوم أهرب خمور يا حضرة النقيب أفهمني النقيب : انطق هنا معنا وبننتظر نشوف بيجي قارب و لا لا ... أذا طلعت صادق بنهدك ..واذا طلعت جذاب يا ويلك يا سواد ليلك والله لا أنكل بك ... وننتظر بعد ما طفوا أنوار السيارات طبعا أنا شايل هم الكلبشات .. ولا عارف ما في خمر ولا يحزنون ويمر الوقت والنقيب يناظر فيني لين جت الساعة 12 وقال النقيب شكل ما في خمر ..وهو مواعد بنت يالله فكو كلبشاته وخلوه يمشي ... وشوي ألا ينط جندي الجندي : يا حضرة النقيب في أنوار جايه من البحر ... تولع وتطفي النقيب : اوكي انتبهوا ولا تتحركون ولا تطلعون أي صوت ولا أي ضوء أذا وصلوا للساحل اقبضوا على المركب .. ويوصل المركب وينطون عليه العساكر ...ويفتحون الكشافات في وجهه ويفتشون القارب والهندي اللي فيه ...ويطلعون كراتين وقراطيس ولفات واجد ..ويلتفت النقيب لي ..ويهديني تفلة و طراقين ثم يقول لي النقيب : أجل ما في خمر وكل المسالة أنك مواعد بنت وقطرية واسمها ريم ..هاه يا كلب أثرك مو بس راعي خمر ألا راعي حشيش بعد يا حمار ..وطراقين بعد أنا : والله العظيم مالي علاقة به اقسم بالله الله لا يوفقني أني ما قلت ألا الصدق .. النقيب : صادروا الخمر ..وجيبوا الهندي وهذا وخل نروح للمركز و أنا أراويهم .... ويسال الهندي وعلى فكرة الهندي أطرم وطبعا لأنه هندي ..مدري من لعب عليه مهرب هالخمر من مركب رايح لدبي .. وما غير يهز في رأسه سألوه أذا يعرفني هز رأسه سألوه أذا ما يعرفني قام هز رأسه بعد .. سألوه أذا جايب هالخمر لي ولا لا قام يهز رأسه .. طبعا الهندي بيسفرونه وخروج نهائي بس زي العادة يغير جوازه ويرجع والتفتوا علي النقيب : زين تقول هالخمر مو لك ولا تعرف عنه شي وأنك في الأساس مواعد بنت وقطرية بعد من عندنا واسمها ريم أنا : أي والله العظيم هذا الصدق أما الخمر وغيره ما عرف عنه أي شي صدقوني ... النقيب : بس مو غريبة تكون في المكان نفسه اللي وصل الخمر فيه ..لا ومدربين الهندي زين بعد ما غير يهز رأسه ..تدري لو أنت مهرب خمر بس كان هانت ..سجناك كم شهر وطردناك من قطر وخلاص ..بس فيها حشيش ذي يعني سجن مو اقل من عشر سنين ... أنا : والله العظيم ما عمري شربت لو نص كأس ولا شربت حشيش أنا أذا جيت بأدشر رحت باسكن روبنز وطلبت آيسكريم وحطيت فوقه صوص ( صوص يعني صلصلة مو و لد الدجاجة ) توفي ..وأدوخ بعدها وابشرك بعد ا لمقاطعة صاير ما أشتري من باسكن روبنز ما غير كون زون .. هالمرة توصل ..لخمر وحشيش حرام والله ..ثانيا أنا مواطن سعودي نادوا سفارتي أبيها تدخل النقيب : يا فالح دقينا على السفارة أول ما كفشناك ..تدري وش قالوا ..قالوا لنا حلالكم ..تبون تذبجونه تسجنونه يستاهل هالهيس الأربد... أحنا ما ندافع عن راعين الخمر والحشيش هاه عندك أحد تبي نعطيه خبر أنا : والله العظيم أقسم بالله يا حضرة النقيب ماني راعي هالشغلات ..طيب دوروا ريم ولا العنود بنت عمها ... واسألوهم .. لحظة رقم ريم ..هذا ---------- اتصلوا عليها ونادوها واسألوها بنفسكم ... النقيب : ( بعد ما اتصل بالرقم ) الرقم مو موجود في الخدمة ..الكيو تيل يقولون غلط ... أنا : وشلون ..طيب هذا رقم العنود بنت عمها واسألوها هي قلبها طيب بتقول لكم الحقيقة النقيب : ( بعد مادق على العنود ) عبدالعزيز تستخف دمك معطيني رقم واحد هندي يرد علي .. أنت على بالك جذي بنصدقك ونهدك التهمة لابستك تفصيل عليك فاهم ولا لا أنا : والله العظيم صدقني ..يا حضرة النقيب .... مالي شغل بهالدعوة ... النقيب : أقول انطم يجفي جذب بس عاد ..بعد أسبوع بتعرضك على المحكمة بس من الآن أقول لك مو اقل من عشر سنين ..بتخيس في السجن عندنا هذا أذا صدقك القاضي وينشرون صورتي في الجرائد وفضيحتي في جلاجل ويطلعون الخبر في قناة الجزيرة اللي ما تحب الفضائح أبدا وفيصل القاسم يقدم حلقه خاصة في الاتجاه المعاكس ..موضوعها لماذا السعوديون يحاولون تهريب الخمور دائما من بلدان مجاورة وبالذات قطر ..وأكثر من رأي يستضيفون لهم كم واحد ..كلهم يأكدون أن تاريخي ملطخ بالخمور والمخدرات والدعارة واللي يقول أني عضو في المافيا ونشيط بعد ..ويتصل واحد على باله بيدافع عني قال هذا من تنظيم القاعدة ..وكله كوم ..وبرنامج الأسلام والحياة كوم ثاني ..يناقشون الفرق بين المذاهب الدينية في السعودية ..والدول الأخرى وهل أباح علماء الشريعة في السعودية شرب الخمر خارج بلدهم ... المهم ودوني للمحكمة ..وفي يوم الجلسة ...قام محامي النيابة وشرشح فيني شرشحة طلع شارون أطيب مني .. وأني أ سعى في الأرض فسادا وأنا عيوني على باب القاعة ( متأثر بالأفلام المصرية أن ريم بتدخل آخر الجلسة ...وتقول داه بريء يا سعادة القاضي باحبه يا بابا باحبه ) .. ويخلص محامي النيابة من الحكي ويقوم القاضي يسألني وش رأيي أنا : والله يا سيادة القاضي بريء أقسم بالله أن محامي النيابة ما عنده ما عند جدتي ..والله العظيم يا سيادة القاضي كنت مواعد بنت قطرية اسمها ريم على أساس أني رقيق المشاعر وأبي أصالحها أيه هين عقب ما اكتشفت أني كذاب ..بس في شي اسمه نحس .. هي ما تجي ويجي مركب محمل خمر وحشيش وزيادة في البلاء الهندي اللي يسوقه أطرم يعني كملت .. والبنت تقفل جوالها وبنت عمها .مسبلة جوالها للهندي سواقها .. والله قهر ..نادوا السفير السعودي ابيه يجي الآن .... القاضي : تراك أدوشتنا الله يدوشك ..الأرقام اللي أنت أعطيتنا أياها واحد طلع لبنت وهي تقول أنسرق منها من شهر والثانية جوالها تبع العائلة والآن مع سواقهم ..يعني أنت نصاب ....أما سفارتكم .الله لا يهينهم في الأخير أرسلوا واحد من سواقينهم معه ورقة صغيرة ..مكتوب فيها يرجى تسهيل أمور المواطن عبدالعزيز والتعجيل بقضيته ....هاه وش رأيك . عندك شي ثاني تقوله ؟ أنا : يالله عاد تراني مليت عارف أن ريم تنتظرني ورى الباب يالله افتحوا الباب ..صرنا ولا ليالي الحلمية .. القاضي : أجل ليالي الحلمية ..حكمت المحكمة بالسجن والأشغال المؤبدة على عبدالعزيز لمدة خمسة وعشرين سنة ...هاه يا متهم عندك طلب تتمناه علشان نسويه لك قبل التنفيذ ..تعرف مهرجان صيف الدوحة موصينا نسوي عروض كويسة .. أنا : اممم أجل أطلب ..أبي تطلعون لي يد ثالثة على الأقل تونسني في السجن ..ولا أقول لك ..وش رأيك ودي أروح جزر حوار أتمشى فيها شوي القاضي: ماشالله تتريق على المحكمة ..أنا كم قلت 25 سنة وش رأيك بيصيرون 35 سنة .....هاه أخلص وش طلبك أنا : شف يا سعادة القاضي دام هالقضية فيني فيني ..فلازم استفيد منها ...طال عمرك الحشيش والخمر اللي لقيتوه في القارب تجيبونه لي أتونس به في هال35 سنة ... بعد انسجن بهم على الأقل استفيد منهم ..ومثلك عارف وكلنا شباب ..شراب وحشيش ما ينقصهم ألا بنات ..ترسلون واحد لدبي يتنقى لي كم بنت مغربية على روسية على رومانية وبولندية أهم شي البولنديات ..عليهم أجسام شي ووجوه تفتح النفس تقول آيسكريم فانيليا .. القاضي : أنت خبل ولا يتهيأ لي .. وش تخربط أنت وش بناته في أحد يجيب بنات عنده في السجن على ذي الحالة نص الناس تبي تنسجن ..وأولهم أنا أنا : الله وناسة ..أنت في السجن اللي جنبي ..ونتبادل البنات شي ...واسألهم عنك ..وش مسوي ...سبع ولا .. القاضي : احم احم أقول خذوه بس ودوه للسحن تراه أزعجنا ... واركب سيارة السجن وفي الطريق من المحكمة أشوف سيارة العنود .. والسواق يسوقها وأجلس أصارخ أنا : هذولي هم البنتين هذي سيارة العنود عرفتها من لوحتها ونوعها وقفوا والله العظيم هذي سيارتهم ..ويوقفون سيارة العنود ..وينزل النقيب ..ويشوف ريم والعنود وينزلوني أنا ..وأجلس أصارخ أنا : ريم واللي يرحم والدينك الله يخليك قولي لهم الحقيقة أنك كنتي مواعدتني ...تكفين تراهم بيسجنوني 25 سنة النقيب : أنت انطم ثانيا 35 سنة ولا نسيت ..يا أختي أنتي وأياها تعرفون هالولد العنود : لا أبدا من وين نعرف هالأشكال وش قالوا لك يا حضرة الضابط ..أحنا بنات عوايل .. أنا : والله مو وقت مزح مزحتوا معي في المحكمة ... ولا جيتوا زي الأفلام العربية ..خلاص عاد يكفي الرحمة زينة والله مستقبلي بيروح فيها .. ريم : وش القصة ليه ماسكينك ...كل هذا علشانك كنت في بحر العديد .. أنا : أنتي ما تتابعين قناة الجزيرة ولا تقرين جرائد تورطت في قضية خمور وحشيش كله من موعدك يا ست هانم ريم : الحمدلله أني ما جيت أنت شكلك راعي بلاوي ..يا عزوزي ..ثانيا من صجك أنت في قطري يتابع قناة الجزيرة ليه علشان يقهرونا .. فوق ما هم كرهوا الناس فينا النقيب : يعني تعرفونه أوكيه ..ياليت تجون معنا للمحكمة قبل ما يطلع القاضي علشان تشهدون من جديد قبل لا مستقبل هالخبل يضيع مع أن ويهه مو ويه مستقبل ونروح كلنا للمحكمة وندخل عند القاضي ..وأول ما شافني بدى يلطم ولما عرف القصة سال ريم أذا بتشهد أنها فعلا متصلة علي ..و عطتني هالموعد أنا : تكفين يا ريم اشهدي وفكيني لا يضيع مستقبلي ... ترى فيها سجن مو لعبة ريم : تبيني أشهد انزين قول لي آسف يا عمتي ريم و أنتي أذكى مني يالله قول أنا : أقول اها بس يالله ودوني للسجن بس ...أحسن ..ويمسكوني الشرطة علشان يطلعوني من المحكمة ولما شفت الدعوة صدق رجعت بسرعة و بديت أصارخ ... آسف يا عمتي ريم والله العظيم أني آسف وأنتي طلعتي أذكى مني .. هاه بس اشهدي ... ريم : انزين أشهد يا حضرة القاضي أني أنا متصلة فيه قبل ليلة اللي صار وعطيته هالموعد بس كنت أبيه ينطق هناك بروحه في مكان بعيد عن الدوحة علشان أئدبه ..وبس وماله شغل بالخمر القاضي : متأكدة يا بنتي ... ولا بس تبين تساعدينه وتفكينه ..والخمر كيف جا ريم : أي والله العظيم يا حضرة القاضي ..أنا أقول الصدق ..أما الخمر هي صدفة أكيد صدفة كلنا يعرف أن بحر العديد منطقة مهجورة وما أحد ييها بالمرة ... القاضي : طيب يا ريم ..بناءا على شهادتك أعلن أن السيد عبدالعزيز بريء من جميع التهم الموجهة اليه بمافيها التنكيت على هيئة المحكمة ...وأيضا توجيه التهمة الى الآنسة ريم بدعوى تضليل العدالة عندما أنكرت أي علاقة لها بالجوّال .. وتواجه عقوبة السجن لمدة 6 اشهر ..ألا أذا سامحتها يا عبدالعزيز أنا : اها يعني مستقبلها بيديني ..هاه ريموه تبيني أتنازل ولا لا .. ريم : وش دعوى عزوزي ..مو أنا جيت وشهدت لك و فجيتك من القضية والسجن صير أنت كريم بعد أنا : أذا تبيني أتنازل ..تقولين بصوت عالي وجهوري قدام المحكمة ..أحبك يا عبدالعزيز ريم : لا لو تموت مب قايلة شنو هي ..لعب عيال أنا : يا حضرة القاضي اسجنها البنت مو عارفة مصلحتها ... أنا سويت اللي علي ..والباقي على الله ريم : الله ينتقم منك ..احبك يا عبدالعزيز هاه ارتحت يالله تنازل .. أنا : ما سمعت قوليها بصوت عالي وجهوري أنا أحبك يا عبدالعزيز ريم : أنا أحبك يا عبدالعزيز ..خلاص عاد ما صارت .. أنا : خلاص يا حضرة القاضي أنا متنازل ... عن حقي وأطلقوا سراحها ..بس علشان تعرفين أني شهم .. ريم : لو ما شهادتي كان خست بالسجون أنت وويهك ... القاضي : بس سكوت حكمنا بطرد ريم وعبدالعزيز من المحكمة ..بتهمة السندرة فوق رأس القاضي وتسفيرهم لموزمبيق علشان يتهاوشون هناك وشوي وتدخل العنود ومعها أبو ريم ..وهي شكلها في الطريق قالت له السالفة كلها . الرجل طلع محترم وسلم علي .. وبعدين تطمن على بنته ... وتشكر من القاضي قبل ما يطلع من المحكمة وبعدين عزم علي العشاء في بيته أنا : مشكور يا عمي ..ما تقصر والله بس قل لي وشلون مستحملها ..يا شيخ بنتك تجيب الصمرقع .. أبو ريم : هم أنت بعد ما قصرت ... كلكم أن جيت للصدق تستاهلون الطق ... أنا : يابن الحلال وسع صدرك ...وش رأيك أسوي بك معروف ما راح تنساه لي طول العمر ..بنتك حلوة وتهبل وخفيفة دم ..وفيها شقاوة تطير العقل ..و داخلة مزاجي فوش رأيك تزوجني اياها يا عمي ... أبو ريم : والله احلف مب تهوّن بعدين ...تشيل هم عن قلبي ..مصاريفها ولا مصاريف دولة .. طول السنة لوحات وألوان وأوراق وغرف رسم وعافستنا عفس وفي الصيف جنها شغالة تروح أوروبا بشنطة وترجع بعشر ... أنا : يابن الحلال حاس فيك والله .. لا ولو افترضنا يعني مو صدق جا واحد وقال ابشتري لوحاتها يعني واحد خبل أعمى بيشتغل الهبال حقها بتقول هاللوحة تعز علي ما أقدر أبيعها ..وهذي تذكرني بموقف ..وهذي رسمتها وأنا في حالة تعبانة ..مرة يعني بصراحة كل اللوحات ما أقدر أبيع ولا واحدة منهم ..والله حاس فيك ريم : كأنكم تحجون فيني ..أنت ويّا ويهك تبي تزوجني أنا مب موافقة أنت آخر رجال في الدنيا أفكر فيه أنا : يا كذبك .. مو من شوي تقولين في المحكمة تصارخين أحبك يا عبدالعزيز ولا كلام الليل يمحوه النهار ريم : تشوف تشوف وأنت مو قلت يا عمتي ريم أحد يتزوج عمته أبو ريم : بس خلاص يكفي ..يا ريم العنود بنت عمج قالت لي كل شي وان عبدالعزيز معجبك و معجبتج خفة دمه وأنك تحبينه شوي ..يعني ليه ترفضين .. الزواج زين وأنا أبوج ريم : يووه أوريك شغل الله في العنود أن ما نتفت شعر رأسها شعره شعره ... أنا ما أبي أروح الرياض أذا بيتزوجني وبيجلس في الدوحة موافقة أنا : وش أجلس في الدوحة .. أقول أنثبري بس ..بتوافقين ورجلك فوق رأسك وبنروح الرياض ..من بعد الرياض عن الدوحة ..وأنت بعد شف لك دبرة في بنتك .. ولا عطيتها طراق .. أبو ريم : تعطي مين طراق أنت وويهك .. وانتي يا بنتي وش فيها الرياض خلاص ..بيسكن في الخبر بس وافقي ريم : ما أبّي يالدوحة و لا يخلي الدوحة جنب الرياض أذا يقدر ... أنا : يخلي الدوحة جنب الرياض .الرياض يبيلها 3 عفاريت وخمس صعايدة علشانه يخلونها جنب الدوحة .. يا عمي علمها الزوجة تتبع زوجها ريم : وأنت الحين على هالويه تزوجتني يوم تقول جذي ..يبه ما أبي أتغرب أبو ريم: وش تتغربين الرياض أهلنا وحنا أهلهم .. أنا : أي والله وعلى قولة المثل ..خليجنا واحد وشعبنا واحد يعيش يعييش فليعيش تبارك يا خليجي ربنا ريم : تبوني أوافق ...بشرط ..أذا صرت أروح للسعودية من قطر والعكس بدون جواز .وصار الكويتي ...يتعامل بالدينار الكويتي في عمان ... والبحريني يقدر يشتغل في الأمارات كأنه مواطن ساعتها أوافق ..بس دامني أتنقل بين الخليج بجواز سفر فهي دولة غريبة ..هاه بتقدر يا أبو العريف تقنعهم هالستة الأخوان أنهم يعقلون ويتحدون ولا لا؟ ..وش رايكم عبدالعزيز بيوافق على شرط ريم ... ولا لا هذا اللي بتعرفونه في القصة الجاية.... لي عوده مع الجزء الرابع تحيااااااااتي</blockquote>

الإسم

التحقق