تم تعطيل الجافا سكربت. للحصول على تجربة أفضل، الرجاء تمكين الجافا سكربت في المتصفح الخاص بك قبل المتابعة.

الرد على الموضوع

الرسالة: <blockquote data-quote="آل يذوه" data-source="post: 369882" data-attributes="member: 2098">بسم الله الرحمن الرحيم ...طبعا كلكم تعرفون ان ايام الجاهليه وغيرها وحتى يمكن لين الحين .. ان عيب ينذكر في قصايد اسم المحبوبه .. حفاظا على سمعتها وشرفها ... واي واحد يذكر اسم محبوبته في قصيدته يحلم انه يتزوجها ليش ؟؟ حتى ابوها يبرهن لناس انها عفيفه وانه الشاعر ما مس شرفها ... فكانوا يلجؤون لطريقة الدرسعي او الريحاني لتشفير اسم المحبوبه حتى ما يعرفه احد .. وليومنا هذا هي موجوده لكن بقله (( لاحظته يستخدمونه البدو اكثر شي )) ... ولا يفهمها الا اللي يتمعن في حروف القصيده او يستخدم ذكاءه لفك شفرات الحروف ...وهذا الشي واحد من خفايا بحور الشعر .. وهي تعتبر من اللهجة البدويه القديمه .. -=-=-=-=-=-=-=-=-=-=-=-الرمز ( الغـطـو ) :: أسلوب يستعمله الشاعر لإخفاء معنى ما عن الناس والتستر بستار الرمز ( الغطو ) الذي لا يفهمه ألا العارفين لهذا الفن والكلمة مأخوذة من التغطية والاخفاء، فاذا أراد الشاعر ان يقول مالا يرغب في ان يعرفه جميع السامعين فانه يعمد الى اخفاء معناه خلف صورة خارجية تغطيه وتعمي العيون العادية عن رؤيته وقد أسموا هذه الطريقة (الغطو) جمعها (غطاوي) وقد أشار الشاعر راشد الخضر إلى الغرض من استعمال هذا الأسلوب بقوله:الواو واسمه عندنا في الغطاوي = يخفى عليكم وافهموا يا العواني-=-=-=-=-=-=-=-=-=-=-=-لماذا تم ابتكار هذا النوع من الفن الشعري ؟ • لأن العادات والتقاليد تمنع الشاعر من التصريح بأسم محبوبته أو للإغراض الشعرية الأخرى، فالشاعر اذن يتستر بستار الغطو ويهجو من يشاء ويطلق العنان للسانه دون خوف لانه قد ضمن ان احدا لن يفهم سوى العارفين لفنون الغطو ولذا فانه يهجو بحرية ويشكو الى صديقه بحريه. • يقول الشاعر الإماراتي راشد بن طناف مفتخرا بقدرته الشعرية: مايعوقني نظم الشعر وامسالبه = لادرسعي جمل ولاريحاني -=-=-=-=-=-=-=-=-=-=-=- • الأنواع الثلاثة المستخدمة هي : 1. الأبجدي.2. الدرسعي.3. الريحاني. -=-=-=-=-=-=-=-=-=-=-=- الدرسعـــي ::: هاك الجواب الي تبي دون تفصيل ... والعذر بالتأخير يا ذرب الايمانالدرسعــــي ماظنتي بالافاعيــــل ... ولا هو بوزنٍ يالسنافي للالحـانهذا حسابٍ بالحـــــروف وتحاليل ... الغـــــاز تمويهٍ على فلان وفــلانوراي الاصيل المحترم طيبٍ حيل ... واسلـم ودم في صحة الدين وابدان الدرسعي هو نوع من الرمز يستعمله الشاعر في اخفاء مايريد التعبير عنه بحيث يعلمه من يعرف الدرسعي فقط ويكون باستعمال بعض الحروف بدلا من حروف اخري حسب القاعدة المعروفة لهذا الفن ينوب حرف مكان حرف اخر... والدرسعي نوعــــان ::: • الدرسعي الصغير • الدرسعي الكبير او العود. -=-=-=-=-=-=-=-=-=-=-=- الدرسعي الصغـــير :: (( شايع استخدامه )) ك=م ا=وح=طص=ظل=هف=يد=رس=عب=زخ=شغ=ضث=جت=ذن=ق يعني :: (أو - حط - له - في - در - سع - بز - خش - صض - ثج - تذ - نق - ظع ) -=-=-=-=-=-=-=-=-=-=-=- والدرسعي الكبيــر او العـــود :: • اما الدرسعي الكبير او العود فترتبط فيه الحروف على النحو التالي: ( نادرا مايستعمل ) رع طش نص كل تو سف هم ذي غب اج زل ثخ قد حظ ملاحظه :: اللي شايع استخدامه الدرسعي الصغير ... واذا بتسألون كيف نعرف اذا المقصود الدرسعي العود ولا الصغير .... هالشي يكون موضح في ابيات الشاعر وبتييكم الامثله واحيانا يمكن ما يوضحها .... فيبالها تفكير شوي وتمعن ... نكمـــــــل :: الدرسعي أن ينوب الحرف عن الأخر فأذا ذكر الاول كان المقصود الثاني والعكس , فمثلا اذا ذكر حرف الالف فان المقصود حرف الواو وهكذا بقية الحروف ويأتي الشاعر بمجموعه من الحروفتساوي حروف الأسم المراد أخفاؤه ... و يتضمن حروف الهجاء ماعدا حرف (الغين ) الذي قد والله أعلم يأخذ مكانه حرف (ق)وذلك رده أن العامه ينطقون الحرفين بصوت واحد ... يعني عدنا فالامارات ساعات يقولون بدال البرتقال ( برتغال ) لاحظتها في كمن لهجه .. -=-=-=-=-=-=-=-=-=-=-=- مثاااااااااال ::::: اسم (( شيخه )) بالدرسعي ( شوفوا الحروف اللي فوق ) تصير (( خفشل )) < لو كان الاخفش ابرك لوووول ... ش = خي = فخ = شهـ = ل .. مثال ثاني ..:: (( زايد )) بالدرسعي تصير (( بوفر )) مثال ثالث :::: (( خالد )) بالدرسعي تصير (( شوهر )) ظني سهل صار عليكم ملاحظه بسيطــــه ::: امثلتي من استخدام الدرسعي الصغير لانه الشايع في الاستخدام .. وليس العود -=-=-=-=-=-=-=-=-=-=-=- ننتقل لريحاني والابجدي ... -=-=-=-=-=-=-=-=-=-=-=- الريحـــاني والابجــــدي ::: تعمدت اني احط الريحاني بالابجدي ..ويا بعض عشان ما تخربطون ويسهل عليكم ... بس اللي لازم تعرفونه الابجدي هو (( الارقااام )) والريحاني هو (( يخص كل شي مجموعه )) الريحاني :: هذا النوع من الرمز يعتمد على حروف الهجاء فكل مجموعة أسماء متجانسه ومتشابهه يرمز لها بحرف معينوهو حساب يعتمد على تقسيم مكونات الحياة إلى مجموعات تبدأ بحروف معينة الابجدي يسمى ( حساب الجمل ) :: لهذا النوع من من الرموز نظام وقواعد مختلفه بحيث يرمز هنا لكل حرف من الحروف برقم مدد يعرف به .. يعني عكس الدرسعي ... شوفوا معاي ...:: وكل رقم يقابله حرف أبجدي يقابله الريحاني ( تصنيف المجموعه) .. وصنفت فهالجدول كل اللي اعرفه :::: -=-=-=-=-=-=-=-=-=-=-=- الابجدي = الحروف = الريحاني 1= أ = البشر = الرجال = آدمي2= ب = البقول 3= ج = جلووود4= د = دواب بدون الجمل ... 5= هـ = هوام = البحر = الثعبان = البعير 6= و = وحوش7= ز = زجاج8= ح = حديد9= ط = طيور10= ي = ياقوت20= ك = كائنات = كتب30= ل = لبن40= م = مدن50= ن = نجوم60= س = سمك = سجل70= ع = عطور80= ف = فواكه90= ص = صقر = صفر100= ق = قرى200= ر = ريحان300= ش = شهور = شهب400= ت = تمور500= ث = ثياب600= خ = خشب700= ذ = ذهب800= ض = ضوء = النور = السنا = الضباب900= ظ = ظباء1000= غ = غيوم -=-=-=-=-=-=-=-=-=-=-=- ولكل قاعدة شواذ وهناك شواذ أيضا لهذه الطريقة مثل:: • اعتبار الثعلب من الدواب في الريحاني .• واعتبار البعير من الهوام في الريحاني.. -=-=-=-=-=-=-=-=-=-=-=- ادري ما فهمتوا شي... لكن ركزوا فهالابيات وبأذن الله بتفهمون ... (( وقد يشمل اللغز الأنواع الثلاثة الدرسعي والريحاني والأبجدي )) -=-=-=-=-=-=-=-=-=-=-=- مثـــااال من ابيـــــاتي (لدرسعي والابجدي والريحااني) :::: سود العيون دعجها جتالي ... فيها المعاني ما توازي البديـــهثمان ليال حاصرتها ليالي ... ف بوظبي والرا سقته جاذبيــه ثمان ليال يعني رقم 8 ( في الابجدي حرف ) = حــ بوظبي = مدينه من المدن ( ريحاني )= مــالراء في (الدرسعي) يقابل الحرف= د يعني (( حمـــد )) مثاالي بسيط .. عشان ما يصعب عليكم ......-=-=-=-=-=-=-=-=-=-=-=-......مثـــال لدرسعي العود والابجدي ::: لشاعر سعيد بن عبيد بن مكتوم :: لي حروفه سين تنكتبا = من بعد في جيم تحلالينتليها بشين في الكتبا = ها ودرسع عود ينقاليخمس نختمها لكم عربا = في حساب الجمل اوصاليمن بعدما بالكم سلبا = وسط ريحي مدن تتالي الحل ::: طبعا اشااار لنا الشاعر لما قال ( درسع عود ) يعني نستخدم الدرسعي العود مب الصغير... • (السين) = (ف). • (الجيم) = (أ) • و(الشين) = (ط) • و(الهاء) = (م) • و(خمس) = (هـ) في الابجدي او ( حساب الجمل ) مثل ما سميناه ... وعند جمع الحروف الناتجة يظهر اسمه (فاطمة) وهو الاسم المخفي لمحبوبة الشاعر. -=-=-=-=-=-=-=-=-=-=-=- مثــال للابجـــدي :::: هالابيات ما اعرف لمن ولكن غيرت فيها عشان تعطيني الحروف بشكل مرتب... بنشدك كانك بخيص بالجواب ... أفهم أسمه كان لك قلب لبيبخمسة وتسعين بالأبجد حساب .. أربعه واحد ومعناهن غريب ركزوا معاي عشان اذا غلطت تنبهوني .. الحل ثمان = حــتسعين بالابجد = صــاربعه وواحد = مع الجمع 4+1 = 5 = هــ يعني الاسم (( حصـــه )) -=-=-=-=-=-=-=-=-=-=-=- مثـــاال لريحاني والابجدي :::: يقول الشاعر العبيدي : سميه الجوزاء وست حسابه ** وعويد ريحان وذيب عويبه تراي سميته وأنا في عتابه ** من خوفتي هرج يبين لعدوان الحل :::الجوزاء من النجوم يعني ناخذ منه حرف النون تبعا لقواعد الريحاني = نــ (( ارجعوا للجدول اللي فوق ))ست حسابه = العدد 6 =وعويد ريحان = حرف الراء من ريحان = رذيب = والذيب من الهوام = هـ (( نوره )) -=-=-=-=-=-=-=-=-=-=-=- مثـــال آخر :::: وهذي ما التمعن .. تحلونها ... مسعود بن السيحان : سمي الترف ريحان بضريه ... ترى اللي يفهمه فهو الدليلهمعه ياقوت نوعينٍ تتابـــع ... ثنين وكل واحــد من جبيــــله الحل ::: ريحان = رضريه قرية في السعوديه = قـ ( لا تخلطون المدن بالقرى لان الحرف يختلف تماما )ياقوت = يــنوعين2 + ثنين2 + واحد1 = 5 وهو رمز لـ حرف ( هـ ) (( رقيه )) . -=-=-=-=-=-=-=-=-=-=-=- مثال لدرسعي والريحاني والابجدي :::: واللي خمد ياسعيد نيم به إكسال ...... واسبوع تكميله المثل والهوادي الحل ::: (خمد) .. بالدرسعيخــ = شمـ = كد = ر ( يا سعيد ) والسعيد من الرجال يعني = أ .. اسبوع يقصد به رقم 7الهوادي ويقصد به الرقم 3و 7 + 3 = 10 والعشرة يرمز لها بالآبجدي ( ي ) ويستنتج من الأحرف ( ش . ك . ر . ي . هـ ) = شكريه ملاحظه :: لاحظوا (( يا سعيد )) >> ممكن تكون من الرجال يعني حرف = أوممكن تكون للهوام يعني حرف = هــوالنتيجه نفسها = شكريا او شكريه ...لانه افتر راسي وانا افكر ^_^ -=-=-=-=-=-=-=-=-=-=-=- مثال خطيير لكن بطررريقه ذكيه اكثر :::: هالبيت لشاعر صالح الشبل فيها يرثي خاله يوم الربوع بتالي جماد ثاني ـــــ+ــــ بالأبجدي زيغت قلوب من الناس لو تلاحظون قال الابجدي يعني فيها ارقااام .. ولو تلاحظون بعد كان بامكان الشاعر في مثل حجمه يرثيه بطريقه مؤثره اكثر ولكنه اختاره (( زيغت ))شوفوا بالابجدي شو المقصد .::::: الحل ::: (( زيغت )) بالابجدي حيث حرف ز = 7 وحرف يــ = 10 وحرف تــ = 400 وحرف غــ = 1000 بيعطينااا سنة وفاة خاله اللي هي .. 1417 هــ وفعلا هالسنة توفى فيها خاله ... -=-=-=-=-=-=-=-=-=-=-=- مثـــــاااال :::: وهذي لشاعر راشد الخلاوي اذا ما خانتني الذاكره ::: فتاة بحرف الوا والياء سنها .... فان حال حال يتقن الكاف كاسبه ... ينصح بزواج الفتاة اللي بين 16 لـ 20 الحل ::: و = 6 يــ = 10 المجموع = 16 سنهكـــ = 20 سنه ما نحسبها ويا الكاف لانه ذا شطر وذاك العجز ... -=-=-=-=-=-=-=-=-=-=-=- مثاااال الدرسعي والريحاني ::: قول الشاعر سليمان عبدالكريم الجطيلي رحمه الله سميها عودٍ بتالي جوابي ** بالدرسعي واكمالة الاسم بالداب الحل ::: (( عود )) بالدرسعي ع = سو = اد = ر (( الداب )) يعني الثعبان او الحيه وانا وضحت قبل في الجدول ان الثعابين من الهوام .. يعني حرف = هـــ تصير (( ساره )) .. -=-=-=-=-=-=-=-=-=-=-=- مثـــال آخر لريحاني ::: نجم سرى في دجى الليل رماس ... اخايل نجومه بروس العوالي ذيب الخلا ريحان قطاع الأرماس .. عبد نهار الكونماضي الفعايل الحل ::::: نجم من النجوم = نــذيب .. من الوحوش = وريحان = رعبد من الهوام = هــ يعني المجمل (( نوره )) وبعد تكرر هالاسم ... لكن الامثله تختلف -=-=-=-=-=-=-=-=-=-=-=- ::: وهـــذا مثــاال لشااعر اماراتي خطيــر ::: حصلته وانا اتصفح المنتدياات بس شوفوا ذكاءه في اخفاء اسم محبوبتهـ .. فـي العيــن اذكــر يــازي ٍ بـه تماثيــل. . . . . . . . . . . . . . امــن الــورد ومــن الفـرس مستذيـره حرب البسوس وخمس روس ٍ مذابيل. . . . . . . . . . . . . . و ميتيـن نجمـة فـوق خمـس ٍ خطيـره لـو دخـت بالمـدواخ كيـل ٍ علـى كيـــل. . . . . . . . . . . . . . واشـربـــت غليــون ٍ مذاقــه مريـــره والحقـــت رســلان ٍ به البـن والهيــل . . . . . . . . . . . . . . اليــوف عيّـــا مــا يهــــوّن سعيـــــره الحل ::: البيت الاول ::::اتبع اسلوب الريحاني .. العين = من المدن = ميازي يعني غزال من الهوام = هـالورد من الريحان = رالفرس من الهوام = هــ (( يعني مهره )) اي الفرس البيت الثاني ::::اتبع اسلوب الابجدي ..حرب البسوس = طبعا الكل يعرف ان فيها سالم الزير .. واستمرت 40 سنه40 = مـــخمس = هــميتين = رفوق خمس = هــ النتيجه (( مهره )) والبيت الثالث والرابع ... جاري التنقيب عنهم .... ....... +::: وفي النهايه :::+ +:::: اتمنى لكم الفايدهــ واتمنى اني اكون افدتكم ولو بالقليل ::::+ م ن ق و ل للأستفادهتحياتي </blockquote>

الإسم

التحقق