العاثرة
¬°•| عضــو مــهــم|•°¬
السلام عليكم ورحمة الله وبركاته
صارلي فترة مالقيت وقت اكتب فيه موضوع ولا اقرا شي من مواضيع المنتدى
أكيد اشتقتولي و وحشتكم طلتي <<شغلة غصب
خير ان شاء الله
كعادتي ما اعرف اييب بدايات كشخه وأطب الموضوع
طبة الكروزر فالرمل
يعني بالفصحى ادش الموضوع سيده <<احلفي عاد ان هااي فصحى
Anyway
كنت يالسه اقرا الورد اليومي لما وصلت الآية 58 من سورة النفال ،
قال تعالى: |[ إن الله لا يحب الخائنين ]|
وما ادري ليش مرت على بالي البنت ××× من كليتنا واللي انا
اسميها ( ياااي ) ، شكلها دوم يصرخ : " شوفوني ترا حدي كيووووت ..!"
اول شي يا فبالي هو .. هل ممكن نعتبر هالمظهر الأقشر المغبر .. خيانه!!
خيانة ذات كبدايه.. خيانة أهل .. خيانة عادات وحضاره ..والأهم ..خيانة دين!!
عموماً انا تفلسفت فداخلي وجرفني سيل من الأفكار <<خفي علينا يا افلاطون
بس بعفيكم من هالافكار اليوم وبطرح عليكم السؤال
اللي طرحته على نفسي بس الله ستر وماتعورت<<ماتيوز عن التحشيش
مامعنى الخيانه وماهي انواعها ؟
أولاً: معنى الخيانه
استقصيت عن معنى الخيانه وهذي هي النتايج اللي لقيتها:
• التعريف النسائي: الخيانه هي انه الريال يمشي ويا زوجته فالسوق
ويحقرها ويخزز الفلبينيات<<لاتسألوني شمعنى خصن الفلبينيات !!
• التعريف اللغوي : هو نقض العهد
• تعريفي الشخصي: انا اشوف انها حقيقة انك تسوي شي ما المفروض تسويه
وانت عارف انه المردودات ما بتكون زينه
طبعاً كلنا نعرف انه الخيانه من الأخلاقيات أو الصفات اللي حرمها الإسلام وحاربها
وما اقتصر فنظرته للخيانه على المعنى اللي نلقاه فالخيانات الزوجيه ولا خيانة الامانه والمال لكن نظرته للخيانه كانت اشمل.
• التعريف الإسلامي : هي التقاعس عن أداء المسؤولية الملقاة على عاتق الشخص، مهما كانت تلك المسؤولية صغيرة كانت أو كبيرة، عظيمة أو حقيرة.
اما متى تصير..
فهي تصير فمرحلة البلاده واللاشعور لما يتخلى الانسان عن مبادئه
ويصم أذنه عن صوت الضمير ...عندها فقط تحدث الخيانه والتي غالباً
ماتودي صاحبها فستين داهيه.
ثانياً:انواع الخيانه
1) خيانة الزواج والحب: فرايي هاي اشد انواع الخيانه فتكاً<<<سوتها بف باف
وبما ان الكل عنده فكره عنها من الافلام والمسلسلات تسدكم الا الافلام المصريه واحد خانته حبيبته مادري حرمته اهداها غنية يا غداره ، وحده بعد مادري كم سنه زواج تدش تلقى زوجها ويا البت الشغاله وتطيح ع الارض منهاره وبين دموعها تهمس :61: : أتلتني يا مجرم .. وتستمر الحكـــايه
2) خيانة الصداقه : نوع خطير يصير بين الأصدقاء <<<سبحان الله!!:29:
غالباً تكون اسباب تافهه ..ياما سمعنا عن ربع يتكلمون عن بعض بكره ويقولون انه فلان خوّن فيني
وغيره وفالاخير يطلع السبب تااااااااااااااافه اما اشاعه سمعها او غرشة بيبسي او مزحه او غيره..
واحيان تتعدى المسأله هالنظرات الطفوليه الفارغه وغايتها عاد تجرح اللي يتعرضولها بالقوو لدرجة انه الانسان اللي يواجهها ممكن يفقد ثقته بالصداقه عقبها.
3) خيانة الأهل: خيانة البنت او الشاب لأهله تتم عن طريق مخالفتهم للتربيه والتعاليم اللي حرصوا اهلهم عليها وتكون بأنكارهم وجحودهم بفضل اهلهم عليهم وكل هذا عشان يتبعون وهم اما حب مزيف او فلوس زايله او غيره وفالاخير يظلمون اهلهم ويكسرون قلوبهم ويرجعون نادمين بعدها.
4) خيانة العادات والحضارة : هي بأنا ننساها ونخليها للماضي على انها old fashion وما عادت تناسبنا ولا ترضي اذواقنا وميولنا
5) خيانة الوطن : ممكن بالطريقه اللي يت على بالكم وهي تسريب معلومات مهمه عن البلد للأعداء فحال حروب وغيره وممكن انا نخون وطنا عن طريق تشويه صورته جدام البلدان الثانيه طبعاً عن طريق تصرفاتنا اللامباليه نمشي ونفر الزباله نرمس عنه بالشين ...الخ
6) خيانة الذات: انا اشوف انه كل الخيانات تكون متظمنه هالنوع لأن الانسان لازم يخون نفسه قبل لا يخون اللي حوله ..تبدا خيانة الذات بالتخلي عن قيمنا الشخصيه وانّا نوصخ شخصياتنا بالاخلاقيات والتصرفات اللي تسم البدن وتلوع الجبد من كذب وخداع وزيف ونملي داخل نفوسنا مساحه شاسعه من حب الذات والانانيه .
7) خيانة الدين: هي اننا نخون فرايضه وحدوده وثوابته وهذا اكيد بيصير عن طريق التفريط فالدين و التهاون فارتكاب الذنوب الصغيره ومخالفة شرع الله وسنة الرسول
قال تعالى : |[ ياأيها الذين آمنوا لا تخونوا الله والرسول وتخونوا أماناتكم وأنتم تعلمون ]| الأنفال:27
طبعاً كلنا نعرف انه كل شي له سبب وحتى الخيانه لها اسبابها بس مهما كانت هالاسباب مايصير نسمحلها تسيطر علينا ..
السبب الأول : الروتين الممل..
خصوصاً فالعلاقات الزوجيه واحياناً فالصداقات .. يمل الشريك من الروتين المعاد كل يوم ويفكر بانه لابد من التجديد وهذه خطوه ايجابيه وحلوه لولا انهم غالباً مايبدون يجددون حياتهم بس ويا الشخص الغلط.!
السبب الثــاني : الغيره..
الغيره غالباً ماتكون سبب الخيانه عند الحريم وبعض الريايل لما يغارون من شخص معين للي متوفرله من خير وفلوس وزواج وعيال وهنا ياما سمعنا قصص عن حريم خانن ربياعاتهن وسرقن ريايلهن<<خطفات رجاله
يطبقن المثل اللي يقول:
(خاويني ، اخاويج ..اخذ زوجـج واخليج)
السبب الثالث : نظرية (الأنــا)..
هذي النظريه هي انه الشخص يحصر تفكيره على نفسه و يتم يردد ( انا اريد هذا انا استاهل هذا..انا ..انا ..انا) فيتحول الى شخص أناني غير مراعي للغير ومايشوف ابعد من خشمه<<<بسبب طولة الخشم وليس قصر النظر
السبب الأخير :قلة أدب..
عاد فهااي الحاله ما يملك الخاين اي سبب على الخيانه ..لكنه يكررها بستمرار ويصير مدمن عليها فهو بتالي انسان فارغ قليل ادب وماعنده سالفه..
طبعاً مثل ماقلتلكم الخيانه لها عدة وجوه وانا ماذكرت غير جزء بسيط منها..
أقدر استمر واطوول هذرتي فهالموضوع بتكلم عن اشكال الخيانه الواضحه المباشره واللي تيي بدسيه
وممكن اذكر اضرارها النفسيه والماديه والاجتماعيه ..لو ابا ارغي زياده ترا هالموضوع جنه بحر وما بيتوقف عند نقطه معينه.. انا كل اللي بغيت اوضحه فهالموضوع وهي اهم نقطه فأي شي فحياتنا..
شو نظرة دينا له وبالفعل ذكرت انه الخيانه من الاخلاقيات المحرمه وعليها ادله ياكثرهن ، اريدكم اذا الله كتب وصادفتكم مثل هالمشكله تقوون عماركم و تسيطرون على الألم اللي فداخلكم فالاخير يمكن اللي خانك كسب جوله فهالدنيا بس فالآخرة بيخسر ..قال تعالى : “إن الله لا يحب كل خوان كفور” (الحج: 38).
وقال : “إن الله لا يحب من كان خوانا أثيماً” (النساء: 107)
وقال سبحانه : “وأن الله لا يهدي كيد الخائنين” (يوسف: 52).
اسمحولي على الأطاله
واتمنى ان الطرح ماكان غلس
وان المعلومه وصلت والفايده عمت
تحياتي للجميع
العـاثرة
:banana:
