تم تعطيل الجافا سكربت. للحصول على تجربة أفضل، الرجاء تمكين الجافا سكربت في المتصفح الخاص بك قبل المتابعة.

الرد على الموضوع

الرسالة: <blockquote data-quote="جعلاني ولي الفخر" data-source="post: 289385" data-attributes="member: 2363">دخل احمد على ريم لقاها قاعده تشرب ماي .. احمد : السلام عليكم .. شحالج ريم : عليكم السلام .. الحمد لله تماام احمد شاف دوا على الطاولة : ريامي شو فيج تعبانه ريم : شوية صداع بغيت شي احمد : بغيت اكلمج في موضوع لكن خليه وقت ثاني روحي ارتاحي ريم : أمر عادي شوي وبيروح الصداع احمد : اوكي أنا بقولج الموضوع بس أريد رايج بعد ما ترتاحين ريم : اوكي احمد : ظن الفترة كانت كافيه عشان تتاخذين قرارج في موضوع الخطبه من سيف وأنا ما أريد الجواب الحين روحي وارتاحي الحين وخبريني إلي قررتيه المساء .. تغيرت ملامح ريم وحست الصداع زاد عليها .. : إن شاء الله قامت وراحت الغرفه بدون ما تعلق على أي شي .. دارت بها الدنيا ما تعرف شو تسوي حمد ما يرد عليها وهو من فتره متغير عليها آآآآه قلبي تولع به غصب عني شو بيدي أسويه الحين .. قررت طرش له مسج تخبره بالي صار ... طرشة المسج حمد أول ما قرأ المسج كان في المستشفى هلت دموعه غصب عنه وقعد يصيح ما رد عليها وهو كان يحترق في داخله حمد في خاطره يقول (( يا ربي أنا ما أتخيل ريم تكون لأحد غيري آآآه شو بيدي غير أني ابتعد عنها حتى ما تتعذب )) وصله مسج من ريم (( كأنك تخاف الله ... في قلب محبوبك ..أسال ترى كسر ... الخواطر ظليمه )) قعد يسمع قصيدة الشاعر المرحوم أحمد الكندي (( وليت يا وقت رمانا بالفراق .. فرق قلوب مبطيات وليف .. يا وقت فعلك منه اليوم ما طاق )) مرت الأيام حمد يزيد عذابه وريم يزيد عذابها .. سيف طول الوقت يسأل عن جواب ريم عبود يحاول يغير السالفه .. احمد قاله أن ريم يوم بتاخذ القرار بتخبره سيف كان عنده أحساس أن ريم ما بتوافق على الخطبه .. لكن الواحد ما يعرف شو إلي الله كاتبه ... ريم كانت سهرانه تفكر شو إلي ممكن يكون مغير حمد عليها هل من الممكن كان يلعب عليها بس هي متاكده انه حمد يحبها حب لا يمكن ينوصف وهي تبادله نفس الشعور .. آآه ياليتني اعرف إلي في خاطرك ياحمد .. شوي وتسمع نغمة المسج ركضت وفتحة المسج كان من عند حمد نزلة دموعه على خدها نهر كان مكتوب فيه ... (( حبيبتي والله إني احبج واموووت فيج لكن القدر مستحيل يجمعنا ... الله يوفقج مع ولد عمج )) انصدمة من حمد بسهوله معقول يتخلى عنها ويتنازل عن حبهم وين الكفاح والنضال والوعود انه مستحيل يتخلى عنها .. كان كل شي يدور في رأس ريم كأنه فلم تعيده تذكر كل كلمه قالها حمد حبيبها الزوج إلي تتمنى أن الله يجمعها به بالحلال .. لكنها ما كانت تعرف أن حمد من الصوب الثاني يتعذب أكثر منها لأنه قال هال كلام من شدة حبه لها وغصب عنه يتمنى لها السعادة لكن وينها السعاده بدونه .. كان يريدها ترضى بزواجها من سيف لعل وعسى سيف ينسيها هذا الحب إلي بناه حمد والي هدمه بكلمته هذي .. حاولة ريم تعرف الموضوع من حمد لكنه ما رد عليها بأي رسالة من رسايلها إلي تبعثها أخر شي قسى قلبه وبعث لها (( أرجو انج تنسين هذا الرقم وتنسين انه في يوم عرفة واحد اسمه حمد )) بالسهوله هذي ياحمد تخليت عني والله انك ما تستاهل كل دمعه نزلة من عيوني لك والله خسارة الليالي إلي قضيتها وأنا احلم في اليوم إلي الله بيجمعني بك .. آآآآآه يا حسافه والله أني ندمانه على كل إلي صااار .. كانت ريم طول الليل تردد هال كلام وتصيح من قهرها من حمد .. أما حمد بعد ما أرسل لها المسج زاد التعب عليه سار به هزاع وحميد المستشفى .. ريم ثاني يوم راحت عند أخوها أحمد على أساس تخبره رأيها بالموضوع .. دخلت على احمد لقته يتريق مع مها .. ريم : السلام عليكم ؟؟ احمد + مها : عليكم السلام !! ريم : شحالكم ؟؟!! احمد + مها : بخير دامج بخير مها : ريامي حبيبتي تعالي تريقي معانا ريم : تسلمين ما أريد ريوق احمد : شو فيج ريامي مب من عوايدج متكدر الخاطر اليوم ليكون عبود قالج شي ؟؟ ريم : لا ابد أصلا أنا ما شفته مها : شو رايج تطلعين معنا أنا واحمد السوق ريم : مشكورة بس أنا بغيت احمد بسالفه وبروح مع أبوي الهايد بارك مها : خلاص أنا بروح أبدل ملابسي وأجهز حبيبي لين ما تخلص مع ريامي ريم : مها كملي الريوق برجع بعدين اكلمه احمد : لا خليها تجهز أنا ادري ساعه لين ما تخلص مها : الله يسامحك دور الحين حد يروح معاك احمد ركض وحبها على رأسها : افاا حبيبتي لا تزعلين ريم كانت تشوف احمد كيف يعامل مها وتقول في خاطرها آه ياحمد كانت ممكن تكون حياتنا سعيده لكن الله يسامحك شو سويت بي .. قطع حبل أفكارها احمد : ريامي .... ريامي ريم مرتبكه : هلا احمد : شو فيج عسى ماشر ليكون الوالد فيه شي ريم : لا ابد .. بس حبيت أقولك رأي في سالفة الخطبه .. احمد : الحمد لله اتخذتي قرارج أخيرا بس أتمنى تكونين مقتنعه به ريم : بصراحه أنا ....... احمد : أنتي شوو ريم بتردد : ..... مش موافقه احمد : مقتنعه من القرار ريم : هييه .. سيف والله والنعم فيه وما فيه شي ينعاب لكن يا احمد أنت تدري إحنا من يوم كنا أصغار واحنا مثل أخوان وأنا ما أريد بموفقتي على الزواج اظلم سيف معايه لأني اعتبره مثل اخوي و وما اقدر أحبه كزوج مستحيل أسعده احمد : بصراحه أنا كنت متوقع هذا الجواب منج حتى أبوي ريم منصدمه : أبوي كيف احمد : لا تنسين أبوي ويعرف إلي في خاطر عياله وهو قالي انه تأخرج في الجواب هو انج خايفه من ردت فعله هو و عمي وأنتي خايفه تنقطع العلاقات بسبب قرارج بالزواج من سيف.. ريم : معقوول فديتك يا أبويه .. ليش ما قلت لي احمد هال كلام من قبل ؟؟ احمد : ما حبيت يأثر عليج في القرار قعدت ريم تسولف مع احمد بعدها قامت ريم وهي مرتاحه من هال سالفه لكن حمد ابد ما راح عن بالها ... أما احمد طلع مع مها السوق .. أما حمد كانت حالته النفسيه تعبانه على الآخر لدرجه أنها أثرت واايد على صحته ونقلوه العنايه المركزه .. كان هزاع قاعد عنده وما فارقه لحظه وحده .. الدكتور دخل على هزاع الغرفه .. الدكتور : السلام عليكم ورحمة الله ؟؟ هزاع : وعليكم السلام !! الدكتور وهو يهز رأسه متضايق : شو إلي صاير على حمد صحته تسؤ كل يوم هزاع : والله ما ادري شو فيه كان عادي يسولف معانا وطلع شوي البلكونه وبعدها تعب .. الدكتور : ليكون في احد زعله أو خبر سيئ وصله هزاع : لا والله ما حد زعله في عيونا شايلينه .. بس إذا حد قاله خبر سئ ما ادري والله سولف الدكتور مع هزاع وتم يوصيه على حمد وانه لازم يخبر أهله عشان يأخذون الاحتياطات الآزمه .. شوي ونداء من الطوارئ يطلبوون الدكتور .. ـــــــــــــــــ في المساء أحمد راح وخبر أبوه بقرار ريم وتقبل الفكره أبو ريم وكان عبود موجود وعرف برفض ريم وعصب من ريم لأنه ما هان عليه سيف عبود : كيف ترضون انتم حرام عليكم سيف بيتخبل عليها احمد : ما نقدر نغصبها إذا هي ما تريده عبود : على كيفها احمد : عبود هذا زواج مب لعبه أبو ريم : هذا نصيب الله يعوضه بغيرها قام عنهم أبو ريم .. أما عبود كان معصب ويحلف لريم كان احمد يهديه ويحاول يفهمه لكنه عنيد وحبه لسيف يخليه يقول هال كلام عواطفه غلبته .. قام وراح صوب ريم .. عبود ويصرخ على ريم : والله انج ماتلاقين حد غير عن سيف ريم : باسم الله شو فيك عبود : شو فيه تسأليني أنا ولا أنتي اسألي نفسج ليش أن شاء الله رافضه سيف منو تتوقعين يتقدم لخطبج غير عنه .. ريم : عبود سيف مثل اخوي اعتبره أنت تعرف هذا الشي واحنا رابين مع بعض عبود : حراام عليج والله انه يحبج ويموت فيج تسوين فيه جذيه ريم : عبود لو أنا رضيت وتزوجته بظلمه لأني ما اقدر أحبه كزوج لي عبود باستهزاء : ليش إن شاء الله منوو في خاطرج تحبينه كزوج ريم : ما حد بس سيف مثل اخوي عبود : اسمعي يا ريامي والله لو صار بسيف شي يوم بيعرف برفضج صدقيني والله ما سامحج طول عمري .. طلع عبود وهو معصب ويفكر في سيف كيف بتكون ردت فعله .... في خاطره يقول (( آآآه يا سوواف ليتني اقدر اجبر ريامي تتزوجك عشان ما يتكدر خاطرك والله إني اعرف انك تمووت فيها وتعشق الأرض إلي دوسها لكن ما بيدي حيله مادام الوالد موافق على كل شي )) كان عبود يعبر الشارع وهال أفكار أدور في باله وما كان منتبه للطريق .. فجأه سيارة طلعت له ودعمته .. على طوول ألتمت الناس عليه ونقلوه المستشفى بعد ما وصلت سيارة الإسعاف .. في الطورائ كان المستشفى مزحوم لان كان صاير حادث كبير وزحمه والأطباء ماحد فاضي لعلاج عبود .. فتم استدعاء الطبيب إلي يعالج حمد .. على طول أول ما وصل الطبيب راح صوب عبود حتى يعالجه لاقى انه لازم يزيد دمه ... نقله على طوول لغرفه الاشعه حتى يتأكد من خلووه من الكسور .. بعد اتخاذ أجرأت الدخول وتعرف على هويه المصاب .. اتصلوو بالفندق إلي ساكن فيه وكلمو أحمد خبروه بان عنده شخص اسمه عبدالله وانه صار عليه حادث وعطوه العنوان .. احمد أول ما سمع الخبر طلع بسرعة وما خبر حد بأي شي .. كان احمد واقف على الشارع على أعصابه لمح تاكسي من بعيد ركض صوبه عشان مايروح .. إلا إلي نازل طلع سيف .. سيف : بلاك احمد تركض شي صار احمد : اركب ما شي وقت سيف : وين رايح خبرني احمد : بتروح معاي ولا اروح بسرعه مب فاضي سيف : لا والله ما خليك وأنت بالحاله هذي احمد بعد ماركبو عطى صاحب التكسي العنوان .. سيف كان يطالع احمد وهو مستغرب عنوان مستفشى شو صاير .. سيف : والله تقولي شو صاير احمد وهو يتنهد : شو أقولك يا سيف اتصل لي واحد من المستشفى يقولي أخوك مسوي حادث ما ادري صدق ولا جذب سيف وهو مصدوم صارخ : لاااا جذب لا تقول جذيه عبود ما ستوى عليه حادث لااا احمد : استهدي بالله سيف : لا اله إلا الله كان عبود يصارع الموت والدكتور يبذل كل ما بوسعه عشان ينقذه لكن عبود يحتاج لدم من وين ممكن يحصلون عليه والمستشفى كان بحالة طوارئ بسبب الحادث الكبير إلي صار يعني نفذ الدم كله .. بالصدفه كان هزاع طالع من عند حمد بعد ما طمئن عليه نزل من جهة الطورائ .. الدكتور كان طالع من عند عبود يهز رأسه ويدور من بين المتواجدين أي حد يتبرع بدمه لكن ما حد رضى يتبرع لو بالقليل لان عبود مسلم .. لما شاف الدكتور هزاع وربع صوبه وشرح له كل شي عن حالة المريض وافق هزاع انه يتبرع بدمه كان هزاع ما يعرف أن إلي بيتبرع له هو عبود .. أول شي سواه الدكتور تأكد من أن دم هزاع مناسب للتبرع ..... في الوقت إلي كان فيه هزاع يتبرع بدمه لعبود وصلوو احمد وسيف للمستشفى وعرفو المكان إلي موجود فيه عبود على طول راحو صوبه لكن ممنوع الدخول طلبو الدكتور عشان يستفسرون عن حالة عبود ويعرفون كل إلي صار له ... ياهم الدكتور وشرح لهم كل شي طمنهم شوي لكن بلغهم أن ما في خطوره إذا مرن 24 بدون مضاعفات وبلغهم سالفة تبرع الدم ... سيف يكلم احمد : يزاه الله خير إلي تبرع والله انه ريال وطيب أصله احمد : الله يجزيه خير فضل عمرنا مابننساه كانو يسولفون سيف واحمد ... قام احمد يطالع عبود لكنهم مارضو يخلونه رجع ويلس عند سيف احمد : لا والله أنا خايف عليه سيف : لازم يعرف احمد : أول شي نطمن على عبود بعدين بنخبره مرت ساعات خافت مها على احمد لأنه طول عليها اتصلت فيه وخبرها بكل إلي صار وصاها أنها ما تخبر أي حد حتى ريم .. هزاع بعد ما تبرع بالدم لعبود وارتاح قام وطلع من الغرفه شافه احمد وعرفه لأنه كان زايرهم مع حمد وهو طالع من غرفة عبود ربع صوبه .. أحمد: السلام عليكم ؟؟ هزاع وهو شوي باين عليه التعب : عليكم السلام !! احمد : ليكون أنت مسوي حادث مع عبدالله اخوي .. هزاع طول ماهو موجود في الغرفه ما شاف عبود كان تفكريه كله على حمد .. هزاع وهو مصدووم : إلي داخل عبدالله أخوك والله ما أدريت به احمد : هييه مستوي له حادث بس أنت شو تسوي داخل عيل هزاع : أنا قالولي واحد يحتاج لدم وتبرعة له بس ماشفت منووه احمد لوت على هزاع : مشكوور والله ما عرف كيف اردلك هذا الجميل هزاع : العفو هذا واجب علينا احمد : بسألك شو صحته ما خلوني ادخل عليه هزاع : والله أنا ما شفته بس من إلي فهمته من كلام الدكاتره أن الخطر راح عنه وانه بخير احمد : الله يريحك .. سيف سمع آخر الحديث وعرف أن إلي متبرع بالدم هو هزاع وشكره .. قعدو يسولفون وبعدها استأذن عنهم هزاع لأنه تعبان وعنده دوام أحمد قعد مع سيف يسولف ويتشاورون كيف يخبرون أبوه .. دخل عليهم الدكتور وطمنهم على حالة عبود بعد ما ستقرت وخبرهم انه عنده كسر بسيط في يده .. سمح لهم يدخلون عليه ويقعدون عنده بس شويه ما يطولون .. أول ما دخل سيف على عبود كان راقد ما يحس بالي حوله من أول ما شافه سيف نزلن دموعه بدون ما يحس ومسك يدين عبود وحبهن ورأسه وعيونه كل جسمه قعد يحبه ويصيح مثل يهال ويقول : ما صدق يا عبود إني في يوم كنت بفقدك لا يارب ما ريده يموت ... من شدة صياحه احمد قعد يصيح ويهدي سيف يحاول معاه شوي ودخل عليهم الدكتور وطلعهم من الغرفه لأنه ما يريد عبود يتأثر وتتعب نفسيته .. بعد ما هدا سيف حلف سيف على احمد انه يرجع الفندق ويرتاح حتى ما يحس أبوه انه في شي و إذا سال عن عبود وعنه يقوله أنهم عند الشباب سهرانين ويخبر أبوه الصبح .. رجع احمد تعبان الفندق طمن مها إلي كانت على أعصابها وكله تصيح في غرفتها ولاطلعت منها .. احمد : حبيبتي ليش كل هذا الصياح الحمد لله عبود بخير مها : والله إني خايفه عليه ليصير عليه شي احمد : حبيبتي الحمد لله حالته مستقره وعنده سيف ثاني يوم من الصبح راح احمد وخبر أبوه وأمه إلي تمت تصيح وقالهم أن سيف عند عبود وانه بيوديهم المستشفى يشوفون عبود ويطمنون عليه أما مها راحت صوب ريم وخبرتها إلي قعدت تصيح و تلوم في نفسها أنها هي السبب في كل هذا .. مها : استهدي بالله هذا قدر ومكتوب ريم : ونعم بالله .. أنا زعلته ليتني وافقت وغصبت نفسي أتزوج سيف على شان خاطره مها وهي تبتتسم : ريامي حبيبتي كل شي قسمه ونصيب والي صار لعبود مقدر ومكتوب قعدت مها عند ريم لحد ما هدت وتجهزت حتى يروحون المستشفى .. كلهم راحو المستشفى صوب عبود ... اتصل احمد لسيف يسأله عن مكان الغرفه خبره أن الدكتور طلب انه يكون في العنايه حتى يطمأن عليه بس بيخلونه في العنايه يومين احتياط .. راحو صوبه وبالصدفه كانت غرفه عبود مقابله لغرفه حمد إلي كان يصارع المرض .. أبو ريم أول ما دخل على عبود حبه على رأسه ما كان واعي لأنه معطينه ابره تنومه .. أما أم ريم سوتها مناحه لوت عليه وتمت تصيح .. ريم كانت دموعها تنزل غصب عنها كأنها نهر يجري لكن بدون صوت لأنه سيف كان موجود وأخوها احمد ما حبت تصيح جدامه يكفي دموعها راحت وقعدت على الطرف الأيمن وحبت عبود على رأسه وفي عيونه وقربت عند أذنه وهميت فيها : والله لو ادري أن رفضيه بيسوي فيك جذيه كان وافقت وأجبرت نفسي على شي ما تهواه .. كان سيف على الطرف الثاني قاعد وانتبه لرمسة ريم ونغزه قلبه حس أن الأمر يتعلق به .. ما تكلم بأي كلمه طول الوقت ساكت وماسك يد عبود ويطالع ويهه .. ريم كانت قاعده تمسح رأسه وتلعب بشعره ودموعها تنزل تذكر كل لحظه كان عبود معاها يسولف وتذكر كل ضحكه كل حركه يسويها .. تنهدت بصوت عالي ماحد انتبه لها إلا سيف لأنه قريب منها أما الباقي كان مشغول مع الدكتور ويهدون أم ريم ..قالها سيف :سلامتج ريم طالعته ولا ردت عليه .. مر الوقت وهم قاعدين عند عبود وهو تحت تأثير المنوم .. أبو ريم طلب من سيف يرجع الفندق عشان يرتاح رجعت معاه مها لان عيالها بروحهم مع الخدامه وخافت عليهم .. أما خالد واحمد طلعوو صوب المقهى يشربون قهوة .. أبو ريم : ريامي غناتيه اقري قرآن على اخوج قعدت ريم تقرا عليه بصوت عالي وكان صوتها رووعه يخشع له القلب تجيد التلاوه كل الممرضات قعدن عند الباب يسمعن ريم وهي تتلو القرآن .. هزاع كان رايح عند حمد اطمأن عليه وخبره بالي صار معاه البارحه دخل عليهم الدكتور وطمنهم على صحة حمد وانه صار بخير وفيه تطور في حالته .. سأله هزاع عن عبود وطمنه عليه خبره انه في الغرفه المقابله حاطينه بعدها راح عنهم الدكتور ... هزاع قال لحمد انه بيروح يطمن على عبود وبيشوف إذا يحتاج شي .. حمد شارد ذهنه حس هزاع إن حمد فيه شي قعد يكلمه لكن ما رد عليه ما كان يعرف هزاع أن حمد طلب من ريم تنهي كل شي وتنساه ما قاله حمد حتى ما يعصب عليه .. هزاع : حمد شو فيك حالك مب عاجبني حمد : ما فيني شي هزاع : شي صار بينك وبين ريم ... كان عنده أحساس أن في شي صاير لان انتكست حالته بعد ما كان ما سك التيلفون وهو ما يمسك التيلفون إلا إذا بيراسل ريم هزاع يعرف أن حمد يحب ريم وانه يراسلها وان نيته حسنه وما يلعب على البنيه .. حمد من قال هزاع اسمه تغيرت ملامحه وتنهد من خاطره ونزلة دمعه من عيونه لف على الصوب الثاني حتى ما يشوفه هزاع لكن ووين ما يخفى على هزاع .. أنصدم هزاع ما توقع أن حمد تعبان لهدرجه بسبب ريم أدرك أن الأمر كايد حمد يريد يغير السالفه ويقعد بروحه : هزاع روح صوب عبدالله اطمن عليه فهم هزاع أن حمد يريد يقعد بروحه لأنه يفهم كل إلي في بال حمد ... الظاهر بس اسمها رجع جروح والآم كان يريد ينساها ... هزاع يقول في خاطر (( ياويل حالك يا حمد هذا اسمها سوى فيك جذيه وين لو ما تزوجتها شو بيصير ... آآآآآآآه شو إلي خلاك تحب )) طلع وراح صوب عبود أول ما وقف عند الباب سمع صوت ريم وهي تتلو القرآن خشع قلبه ونزلة دمعه من عينه .. كانت ريم واصله نهايه السورة بعد ما خلصت قامت بتطلع برا تحس بضيق قبل ما تطلع دق الباب هزاع تغشت ريم .. هزاع دخل وسلم على أبو ريم أما ريم وأمها طلعوو برا .. عشان يأخذ هزاع راحته .. قعد هزاع يسولف مع أبو ريم وطمن على صحة عبود وخلال السوالف سأل أبو ريم عن حمد وعرف من هزاع إلي صار لحمد وحزن عليه واايد لدرجه انه دمعه نزلة من عينه وخنقته العبره .. هزاع ما يدري شو إلي خلاه يقول لأبو ريم سالفه حمد مع أن حمد منبه عليه ما يخبر احد ما كان يريد الخبر يوصل ريم حتى ما ترأف عليه وتحزن .. حس هزاع بتأثر أبو ريم .. أبو ريم كان يغلي حمد واايد ويعتبره مثل ولده ما يعرف شو سر حبه له .. </blockquote>

الإسم

التحقق