وعليكم السلام ورحمه الله وبركاته
الحمد الله بخير عساج بخير غناتي
/
موضوع واقعي وأختيار موفق للقضيه
وسمحيلي راح ارد على كل نقطه ذكرتيها بقتباس ..
في بنات مايقدرون النعمه لي هم فيها
ومامقدرين الثقه لي اهلهن عاطينهم اياها..!!
يمكن ما يقدروا النعمه لانهم عمرهم ما شافوا حد محتاج !! ولا صاروا في هالموقف !
الثقه اساسها الاهل وسمحيلي لو أهلهم معطينهم الثقه يوم كانوا من بينهم عمر تصرفاتهم ما تتغير لم بيطلعوا عنهم
يعني لو عمت الثقه بين الاخوان شيء طبيعي راح تكون كل التصرفات ظاهره وعليها محاسبه بعقل وحكمه مب بضرب والحرمان
بس الي اشوفه من واقع الحياه أن الاخوان دوم مشددين على خواتهم لدرجه صارت الاخت تخاف انها تقول حق أخوه اي شيء
وجدامهم هي البنت المحترمه الي ربوها ومن وراهم تسوي الي ما تقدر تسويه جدام اهلها من خوفها منهم
فيصير عندها تضارب في الشخصيه لعدم وجود الاخ الناصح !!
//
وانهم متغربين من بلاد لبلاد بس عسب يدرسن ويرفعن راس اهلهم.!
خلينا نكون صريحين أكثر في هالنقطه ..
عمر الي تسوي جيه ما كان غرضها الدراسه غرضها الاول والاخير الخروج من السجن الي حاطينها فيه اهلها
ويختاروا ابعد كليه او جامعه ..؟ وفعلا هذا الي لاحظته في اخر سنه في الثانويه
أسالي اي بنت ليش رحتي هنااااك التخصص موجود هنيه .؟؟!!
ترد : عشان ارتاح من أهلي !!!!
ما اجذب عليج أن اختياري كان للبعثات في استراليا وبعدها الدراسه في بوظبي واكون بين اهلي
بس يوم اخترت استراليا حشى علي ما اريد اشرد عن اهلي
بالعكس أحب اهلي وايد ومالي غناء عنهم بس كان لتحسن المستوى التعليمي والاعتماد على الذات لا غير
< تراه كله من الاهل ومن تربيتهم وقسوتهم مع بناتهم ^^"
//
واخر شي راح طبعا يرد ع بنات البريمي.
صح ولا مش غلط؟
في نظري لا مب صح !
لاني أنا ما اعرف شيء عن البريمي وحياه البريمي وكل الي قلته عن بيئتي وهي بوظبي
هذا الشيء راح تلقينه في كل مكان واستحاله أن تصرف بنت في مكان معين يخرب سمعت بنات هالمنطقه كلها
اذا الاهل الي هم الاهل فيهم الزين والشين ويمكن في البيت الواحد تلقين الاخوان مختلفين مب كلهم نفس الشيء
من نظري من الغباء الحكمه على بنات او على منطقه من موقف شفته !!
//
طيب ليش هالتصرفات من بنات السكن
هل لانهم يكونن بعاد عن اهلهن وولا رقيب ولا حسيب.
طيب وين الضمير؟ وين العقل؟
لانهن تاسسن غلط للاسف
مستحيل وحده تسويها لو اهلها عطوها الثقه وترمس بحريتها جدامهم
لانها لو ما لقت هذا الشيء عمر العلاقه بينها وبين اهلها ما يسموها (( ثقه ))
لو كانت تربيتها صح والاهل فعلا غرسوا الثقه في بنتهم وكان بينهم رحمه وموده
مستحيل يكون ثمار غرسهم وحده في مول وتقول رقمني مستحييييييييييييييييييييييييييييل لو شو ما كان
في نظري اساسا الغلط من الاهل والتربيه وثانيا من البنت وقلت الدين والايمان
//
بس بسألج سؤال ؟!
في نظرج ونظر كل الي بيردوا من بعدي شو يعني (( الثقه )) عندكم ؟!
السموحه طولت ^^"
لا تحرمينا من يديدج المميز عزيزتي
عساج على القوة
دمتي بود
