قصه انا كاتبتنها ابي رايكم (حلم عمري)

شووق محضه

¬°•| عضو مبتدى |•°¬
إنضم
24 مايو 2011
المشاركات
12
الإقامة
في بيتنا
{{~حلم عمري~}}

بداية إجازة الصيف الكل خلص من المدارس والجامعات وإلي خذ إجازه سنويه
هذي بداية مشوارنا بتكون على مدار الصيف بتكونون ويانا خطوه بخطوه ...أشياء وايد بتصير ...بنذكرها خلال سرد الروايه
وفيها حاله من الخوف الضغط النفسي والأشتياق واللوم والحب وهذي أهمها

حب من طرف واحد أم يجمع القلوب ببعض
بسرد مايجول في خاطري من كلام ..وعذروني أذا قصرت بسردي بالروايه

الكاتبه المـــــــــــــــــــــاس
القصه الثانيه
{حلم ..عمري}





صباح مشرق... بشمس حاره
بداية إجازه الصيف
بتاريخ ٢٤/٦/٢٠٠٩
الساعه عشر الصبح الكل متجمع فالصاله الكبيره وإلي تضم كل من أم خليفه {عايشه}وأبو خليفه{سالم}
و{خليفه} إلي عمره ٢٩ومتزوج بنت خاله {أسما} من سنتين ولا يابو عيال والله كريم بعباده
و{ريم }بنتهم العوده عمرها٢٤ومخلصه جامعه وماخذنها لولد عمها
و{سعود} عمره ٢٢يدرس فالجامعه أنسان طايش فحياته عايش الحياه بكيفه متهور فتصرفاته يموت شي أسمه بلياردو
{جواهر}البنت إلي يحبها الكل تمتلك قلب طيب وكبير وع فكره جواهر بطلتنا فهذي الروايه
عمرها ٢٠تدرس فجامعة العين
وتحب المغامرات شعرها اسود طويل ماشالله وعيونها عسليه وجسمها محلينها زياده
{عمر}أصغر خوانه عمره ١٩مخلص الثنويه هذي السنه لأنه رسب سنه وعمر أنسان مهمل وايد ومدلع وايد وايد

أبو خليفه: عايشه ناوليني فنيال قهوه
أم خليفه:بسك من هالقهوه تراها إلا ترفع هالضغط
أبو خليفه:فديتج تخافين عليه
أم خليفه:بس عاد عن المصاخه
أبو خليفه:يعلني ماأخلا منج يالغاليه
جواهر: أحلا أحلا أبوي يتغزل جدامنا ، سيروح حجرتكم في عزابيه هني
أم خليفه:شفت يبت الرمسه حقنا الحين منو يسكتها
سعود:نحن هنا يا عشاق
أبو خليفه:محد له خص فحرمتي أتغزل فيها بهواي
أم خليفه:خل عنك هالرمسه قوم /ماقايل بتروح العزبه
جواهر:أمي حرام عليج أحرجتي أبوي هاهاهاهاي
عمر :أبوي قول تم
أبو خليفه:جان أروم فالك طيب
عمر وهو يفرج يدينه أونه مستحي وقال لازم أقول قبل مايطلع ومافي فرصه غير الحين أقول/أبوي أريد سياره
أبو خليفه:شحقه عندك دريول يوديك وين تبا
عمر:أبوي أنا عمري١٩شو أركب ويا دريول بعد
أبو خليفه :يصير خير بس شاور أمك بالأول
عمر وهو يطالع أمه :أمي فديتج وافجي عسب يشترولي سياره
أم خليفه:مالي خص أنت وأبوك
عمر عصب جاف أمه مابتوافج
وجان يقول/أنابشتري سياره يعني بشتري
خليفه: بصوت عالي \عمرررر بس خلاص قالولك يصير خير
رن تلفون عمر وكان ربيعه خالد هذا أنسان طايش وايد وبس عمر وايد متعلج فيه وبحكم خالد عنده سياره فلازم هو تكون عنده سياره
عمر:هلا خلود
خالد :يلا طلع أنا عند الباب
عمر:دقايق بييك
سكر عن خالد وقال :عن أذنكم عندي مشوار بروح ويا خالد
محد رد عليه لأنهم معصبين منه،
بس جواهر لازم تنقذ الموقف
~ عمور الغالي
عمر:خير
جواهر:فديتك ييبلي حلاو وكافي يوم بترجع
هي ماتبا بس عسب تسوي جو ثاني
عمر:أذا مانسيت مع السلامه
طلع وسكر الباب بأخر قوته
سعود:ها هذا أخر دلعكم
أبوي أمي توصوني ع شي
أم خليفه :لا الغالي سلامتك
أبو خليفه:لا مانبا شي
جواهر :أنا سعود أبا شي~أباحلاوه
سعود:صج سخيفه جنج مطرشه عمور توج
جواهر:هي صح بس هذيج حلاوة عمور وحلاوتك شي ثاني
سعود:أوكي...يلا مع السلامه الجميع
خليفه يرمس حرمته:أسما
أسما :أمر فديتك
خليفه:مايامر عليج عدو حبيبتي أنتي جنج.. .....بعده ماخلص جملته جان تنش جواهر:هاخلصنا من أمي وأبوي يا الأخ خليفه والمدام أسما يتغزلو فبعض ياأخي حترم في عزابيه موجودين
وراحت فغرفتها وهي تظحك
خليفه:هاهاهاهاماقول غير الله يعين إلي بياخذج
ماعلينا.أسما بتروحي عند أهلج قايله ولا غيرتي
أسما:لا فديتك دقايق ببدل وبرجع
خليفه:أوكي يلا لاتتأخري




ف مجان ثاني من العين ف بيت أبو راشد {محمد}أخو أبو خليفه
كان يالس ويا حرمته أم راشد {سلوى}
كانو يالسين فالصاله ويا عيالهم كانت الساعه ١١
راشد يالس حذال حرمته ريم إلي هي بنت عمه
متزوجين من سنه ونص والحين بتربي يعني أيام معدوده
بييلهم أول مولود فالبيت
راشد:يهمس فأذن ريم ~متا بيشرف ولي العهد
ريم:وهي ميتا حيا منه..جريب نشالله يمكن اليوم
راشد :ع خير المهم تقومين بالسلامه
من جهه ثانيه
{أحمد }شخصيه محبوبه بين الجميع أحمد أمنية كل بنت ممكن تشوفه ولاكن هو يحب بنت عمه جواهر بس مخلي هذا الشي بينه وبين نفسه لين يكتبله القدر ويجمع مبينهم وحلمه هذا لازم يحققه يحب جواهر بس مابين هذا الشي
{ساره}كبر سعود ولدعمها ومولودين فنفس اليوم ومحيرين لبعض وصارت خطبه رسميه يعني باجي الملجه والعرس
ساره:أقول أححححمد بصوت عااااالي
أحمد:صمخ وياراسج شفيج أنا عدالج أسمع
ساره:لا شفتك سرحان إلي ماخذه عقلك تتهنابه
أحمد{ فخاطره فديتها والله} :أنا ولا أنتي طالع ويهج متا بياخذج سعود بيفكنا منج
ساره ستحت ع طاري سعود:أحمد عاد استحي
أحمد:الحين تستحي توه لسانج شطوله هاهاها
ساره : زين الحين أخبر عليك أمي \أمميي أمي
أم راشد:ها سويره
نش أحمد من مكانه وراح وحط أيده ع حلج ساره عسب ماترمس وقال:سلامتج الغالي هذي ماعندها سالفه
خوز أيده وطالعها :رمسي جان ترومي
ساره :لا خلاص بسكت أف حشا .
رن فون ريم وكانت جواهر متصله
ريم:هلا جواهر
من سمع أحمد أسم جواهر ع طول تم يطالع ريم
ريم:تمام الحمدلله أمي شحالها وأبوي وخواني
جواهر :كلهم بخير....بعدج ماربيتي
ريم: هاها لا بعدني شبلاج مستعيله عليه
جواهر: عاد أول ياهل فالعايله لازم نتريا وننذل عشانه
رمسن شوي وسكرت ريم عن جواهر
وقالت عشان الموجودين:جواهر تسلم عليكم
الكل رد: الله يسلمج وياها من الشر
أما أحمد تم يفكر فجواهر ويقول صار لنا زمان ماجفناها ياربي متا بس تستوي مناسبه عسب أييون



*في شي مهم أنا ماذكرته لكم أنا أم خليفه وأم راشد خوات وعندهن أخو واحد أسمه {عبيد}أبو أسما
*وفي شخص ماذكرته أسمه {هزاع } ولد أبو راشد هو مسافر يدرس وفهالأجازه بيي لبلاد عشان عنده إجازه لين نهاية الصيف وهو أكبر من أحمد بسنه وشخصيته هاديه وحبوب



الساعه عشر فليل
كانت جواهر ترمس ساره بنت عمها ع المسن وتاكل حلاوه طبعا عندها وايد يايبلها عمر وسعود
دش عليها سعود: ادخل ولا
جواهر: أونك تراك دخلت شحقه بعد تقول
سعود:أبوي وأمي علموني أستأذن قبل مادش هاهاها
جواهر :ونعم التربيه أقول دش دش
سعود: جواهر حبيبتي أبا حلاوه
جواهر: بعد حبيبتي ليش خذ بدون مقدمات
سعود جافها وهي تكتب ع المسن
منو ترمسين؟
جواهر:بلا مبالاه ساره
سعود :كح كح نعم نعم قومي
جواهر: خير شو بلاك
سعود: دقيقه بس بكتب شي
جواهر: أي وين تبا
سعود: أقول قومي بالطيب
جواهر: زين بنجوف أخرتها وياك
{ جواهر}
~*¤تكفيني كلمة أحبك¤*~
كتب سعود
أحبج موووووت $
{ساره}
*~*حبك بداخلي يسري*~*
جواهر شو بلاج ستخفيتي!¡!
~*¤تكفيني كلمة أحبك¤*~
أنا سعود ياحياتي$
*~*حبك بداخلي يسري*~*
.....^_^
~*¤تكفيني كلمة أحبك¤*~
شحالج حبي $
*~*حبك بداخلي يسري*~*
بخير دامك أنت بدنيتي
~*¤تكفيني كلمة أحبك¤*~
السموحه منج بس لاتنازعي جواهر أنا قلتلها بكتب
باي ياعيوني$
*~*حبك بداخلي يسري*~*
فمان الله *
~*¤تكفيني كلمة أحبك¤*~
أقول حبيب القلب طلع الحين أنا عندج ولا خلاص من لقا أحبابه نسا اصحابه
*~*حبك بداخلي يسري*~*
لا والله تعالي شقايل تخلينه يكتب والله فشله

وكملن سوالفهن <<<<<<





بفغرفة راشد وريم
الساعه ٣ الفير
كانت ريم تحس أنها ماتقدر تحمل تحس أنها بتربي وكان راشد نايم
ريم:راشد ....راشد
راشد: نش بسرعه يوم سمعها شو فيج شي يعورج
ريم: راشد ااااي لاماأقدر أتحمل أكثر من جي
راشد: مايدري شو يسوي راح بسرعه عند حجرة أمه وأبوه
أمي أبوي
نشت أمه: شو فيك ريم فيها شي
راشد: ريم بتولد

بسرعه شلوها السياره راحت وياها أم راشد
في مستشفا الجيمي
فغرفة الولاده
كانت ريم داخل وكملت نص ساعه داخل
راشد على أعصابه هو وأمه
بعد لحظات طلعت الدكتوره تبشرهم
الدكتوره: مبروك جابت ولد
راشد راح حب راس أمه وهو فرحان وايد
أم راشد : مبروك الغالي يتربا فعزكم
راشد: الله يبارج فحياتج يالغاليه

الساعه عشر الصبح وصل الخبر عند الكل وطبعا فرحو وايد لأنه أول مولود فالعايله
راشد كان يالس حذال ريم:حبيبتي شو بنسميه
ريم: مممم شرايك فسعيد
راشد:شرايج ف محمد
ريم :براحتك
راشد :بسأل أمي ..أم راشد
أم راشد:عونك الغالي
راشد.عانج الرحمن"" شرايج نسميه محمد
أم راشد: براحتكم أهم شي طلعت ريم بسلامه ويابت ولد
أم خليفه:صدقج والله أهم شي سلامتها وسلامت الولد

شوي ولا داشه جواهر وسعود وعمر وخليفه وحرمته
دشت جواهر:السلام عليكم حد هني ولا أدخل الجمهور إلي وياي
راشد :دشي جواهر ودخليهم محد هني
سعود يضرب جواهر ع راسها :جمهور فعينج
دخل الجميع فالغرفه وصارت زحمه إلي يايب باقة ورد وإلي يايب سلة حلاو ....
جواهر ع طول سلمت ع أختها وسألتها وين الولد. كانو شالينه الحظانه
جواهر :حرام مابجوفه أكيد يشبه خالته خخخ
عمر:خلي عنج أكيد يشبه خاله
راشد:لا يشبه أبوه
أم راشد:وحليله بعده ماكمل يوم وتقولون يشبه منو الله يعينه بس
الكل ظحل ع أم راشد وكانوا وايد مستانسين بالولد

عند الحظانه كان واقف أحمد وساره
يات صوبهم جواهرلأنها كانت متخبله تبا تجوف الولد وسبقت خوانها
ماجافت أحمد ... وع طول عينها ع الولد بعدها ماسلمت ع الموجودين
جواهر:واي فديته بسم الله عليه شحلاته ...خاطري اشله
ساره :أي وين تبين .. شفيج ماتشوفين حد جدامج حتا ماتسلمين
ونتبهت ع نفسها :هلا ساره سمحيلي ماجفتج شحالج
ساره:بخير الغالي
أحمد بعده مامستوعب إلي يجوفه ...وكان يرمس حد من ربعه وبدون شعور بند عنه لأنا إلي جدامه أهم من أي حد

أحمد سار صوبهم وهو كله وله وشوق:جواهر
جواهر طالعت صوبه:أحمد
أحمد:شحالج بنت عمي وين هالغيبه
جواهر وهي مستحيه منه:هلا بولد عمي موجودين... مبروك ماياكم
أحمد: الله يبارج فحياتج
لحظة صمت دامت دقايق
ساره: جواهر تعالي بنروح عند قوم أمي
جواهر :عن أذنك أحمد
وراحن وخلن أحمد واقف مكانه
شافن سعود وعمر يايين صوبهم سعود عينه ع ساره
وسلم عليها من بعيد وراحو عند أحمد وساره وجواهر سارن صوب غرفة ريم




بعد يومين طلعت ريم من المستشفا وسولها عزيمه كبيره

جواهر وأهلها كانو حاظرين أول الناس وفنفس اليوم كان هزاع راجع من السفر وماقال لحد غير فاطمه بنت خاله لأنه يحبها وناوي يتزوجها بعد مايرجع من السفر وخبر أخوه راشد عشان يتلقاله فالمطار
وخالهم وعياله حاظرين {عبيد} إلي هو خالهم عنده {أسما} أكبر وحده وأصغر عنها {فاطمه} وأصغرهم محمد عمره ١٢سنه وأمهم توفت من سنتين بسبب حادث



كان الكل فالبيت ومجتمعين ع وصول هزاع كانت فاطمه يالسه ويا جواهر وساره فالمطبخ كانن يسون عصير وعشان يشلونه الميلس ساره شلت الصحن فيه عصير ووقفت جدام الباب مال الميلس
فجأه بدون ماتحس إلا ينجب العصير وتصرخ
ليش شو فيها؟
شو خلاها تصرخ جي؟
ساره بصوت عالي: هززززززااااااع أخوي

طبعا إلي طلع من الميلس والحريم واقفات يطالعن وجواهر وفاطمه طالعات من المطبخ
كلهم راحو سلمو عليه

راح هزاع عند أبوه: شحالك أبوي
أبو راشد: بخير جي عاد ماتخبرنا
هزاع :هاهاها حبيت اسوي سبرايز
وسلم ع عمه وخوانه وعيال عمه وطبعا خاله خذه بالحظان أبو أسما لازم
ودارت عيونه وهو يدور فاطمه
وبتسم يوم شافها
وهي ستحت ونزلت راسها
فاطمه ف خاطرها:ياربي خبال فديته شتقتله


رجعو الميلس
وتعشو وكلن رجع بيته بعد هاليوم الحلو


بعد سبوع قرر هزاع يخطب فاطمه
كان يرمسها ع المسن دايما ويتفق وياها فكل شي
مره كان يرمسها بس هالمره فيس تو فيس لأنه كان فبيتهم وكانت فالمطبخ بروحها وكان يتريا خاله أيي بس تأخر شوي وخذها فرصه
هزاع :فطام
فاطمه وهي تحط الكيك فالصحن متعوده تسوي كيك كل ماأيي: عيونها أمر
هزاع: تحبيني~
فاطمه:........
هراع وهو يتقرب زياده:فطامي حياتي بقولج شي قولي تم
فاطمه:تم بدون ماأسمع الطلب
هزاع: لا لازم أقولج

أنا ياي اليوم عشان أخطبج
فاطمه ماقدرت تحمل وقفتها وياه وراحت بتطلع جان يمسكها بإيدها :فطامي شو فيج
فاطمه:هزاع أناموافقه بس ماتخيلت هاليوم بيي وبتخطبني
هزاع: أنا ياي اليوم بروحي عسب ارمس خالي وع فكره شاورت أمي وأبوي وهم وايد فرحانين
فاطمه: أحبك
هزاع حط أيده ع قلبه: أموت فيج
سمعو الباب العود نفتح وسار هزاع ع طول عند خاله وسلم عليه وكلمه عن سبب ييته وخاله ستانس من الخاطر:هذي الساعه لمباركه جان تباها مره مرخوص الحين شلها
هزاع:لا ياخالي نشالله بييب الوالد وبنتفق ع العرس
أبو أسما: ع خير



في يوم من الأيام كانت جواهر يالسه ترمس عند ساره بنت عمها وكانت تظحك بصوت عالي لأنا جواهر دفشه فظحكتها بس تخلي الواحد ينتبه
ويسمعها وهي تظحك
جواهر:هاهاها هاهاها اسميج سوالف الله يعين أخوي عليج
ساره: هاهاهاهاها زين سمعينا شي .............من زمان ما غنيتيلي
جواهر: مممممممممم بغنيلج غنيه عشان خاطر ناس
ساره: خخخخ ادري مب عشاني ...........
بدت جواهر تغني هذي الأغني وكانت تغنيه بحساس وبصدفه كان أحمد مار صوب حجرة ساره وسمعها وهي تغني وعرفها من صوتها

******
أحبس دموعي حبيبي من غلاك.......... انت دمعه خايف ابكيك وتطيح
يـاحبيب الجـرح اتعبني عنــاك........... فــي يدينك قـــلب لكنه جـريح
بنشدك قد صرت نجمٍ في سماك.......... اومشيت بدرب ما هو لي صحيح
جـابني يمـك حنيــني مــانسـاك........... قام ينشد عنك شوق بي يصيح
من عذاب البرد جيت ابغى دفاك.......... واثرك بصادق حنينك لي شحيـح
مايمـــوت القلب لا صــد وجفــاك........... مايموت القلب لكن يستريح
بحبســك مابين جـفنين ولقــاك.............. لاالتقى بالعين ملتاع ومريــح

ويوم خلصت جواهر جان يدش أحمد : يسلملي هالصوت وراعيه
جواهر: .....................................
أحمد : شخبارج جواهر
جواهر:بخير ربي يعافيك............ومن صوبكم
أحمد : يعلم الله وقلبي شاهد أن عيني من أملها بس تشوفك عندي قاعد
روحي ترجع في محلها
ساره: أنت يا الطيب ستح ع ويهك يالس تتغزل فبنت عمك جي
أحمد : جواهر أقرب من أنها تكون بنت عمي
وطلع وسكر الباب

جواهر سوت عمرها ميته:ساره لحقي عليه بموت
ساره: هاهاهاهاهاها طالع هي الثانيه لا تموتي علينا
جواهر وهي تصارخ: أأأأأأأأأأحبككككككككك
ساره : سكتي فظحتينا

بعد يومين قرر سعود يسوي الملجه وتكون ع أخر السبوع

طبعا ساره جهزت كل شي لهذا اليوم بمساعدة جواهر وريم وأسما وفاطمه

في نفس اليوم فغرفة خليفة وأسما
كانت أسما مب طبيعيه وكل شوي تحس بدوره
خليفه شافها جي وماعاجبنه الوظع: اسما شو بلاج انتي مول مب طبيعيه اليوم
اسما: لا حبيبي بس يمكن من دوارة هالسوق اليوم عاد هذي ساره لازم نوقف وها هاليوم
خليفه: متأكده مافيج شي
أسما: لا لا لا ....شوي وتروح الحمام الله يكرمكم
خليفه : لا ياأسما يلا لبسي عباتج وخليني بوصلج المستشفا
أسما وافقت لأنها صج كانت تعبانه

وصلوا المستشفا وسولها تحاليل وطلعت الدكتوره تخبرهم عن سبب هذا التعب

الدكتوره: مبروك أنتي حامل
أسما: متأكده ولا تستهبلي
خليفه: دكتوره من صجج ترمسي
الدكتوره : أيوه النتيجه إجابيه ميه فالميه


ع طول طلعوا من المستشفا وساروا البيت
وخبروا الكل بهالخبر وستانسوا وايد



يوم الخميس ملجة سعود ع ساره والكل فرحان وبعد عشان أسما وفرحتهم بالخبر

الساعه سبع المغرب الكل مجتمع في بيت بوراشد
ساره كانت وايد حلوه ماشالله فستانها لونه عنابي وشعرها مسواي كله رول ومحطاي ع صوب ومسواي ليها ميكب روعه وبين يديها مسكه كلها ورد طبيعي ....
أما جواهر فكانت لابسه فستان لونه تركوازي ومسويه ميكب وايد حلو وشعرها مرفوع بطريقه حلوه وأهم شي لابسه عقد هادينها أحمد يوم ميلادها
وريم كانت لابسه فستان خفيف واسما نفس الشي وفطمه لابسه فستان لونه أحمر وفاتحه شعرها لأنه قصير ولاسوت تسريحه..
^
^
^
^


اما عن الريايل كان سعود ع أعصابه ينتظر عشان يدخلونه عند ساره وكان كاشخ أخر شي ودهن العود مغطي المكان هو والدخون وخوانه وعيال عمه كانو كاشخين
سعود يرمس أحمد: بتخبرك أنته ليش كاشخ جي وايد يعني
أحمد: وأنت شو يخصك............... أنا كاشخ لعلرب عيونهم عسليه هههههه
سعود: أدريبك مب عشاني بس ماعلينا أهم شي الحين أجوف ساره
أحمد: حو وين تبا حد بيسمعك تقول ساره والله مايدخلونك ..............ثقل شوي تحمل مابقا إلا القليل
سعود: اااااااااااه فديتها والله مستعيل
أحمد: هههههههههههههه الله يعينك




الساعه تسع بعد العشا دخل سعود عند ساره بمرافقت أحمد طبعا :
أحمد دق الباب وجان يقول : درب درب المعرس وصل
تغطن البنات ودخل أحمد وسعود سلم أحمد ع أخته وبعدين سعود
سعود حب راس ساره : مبروك فديتج
ساره: الله يبارج فحياتك

أحمد : عندك ربع ساعة ويغمز له..................
وطلعوا عسب يخلون المعاريس ع راحتهم

طلع الكل وأخرهم جواهر .............
وقبل ما تروح تحت عند المعازيم .............
أحمد: الغلا لحظه شوي ممكن
جواهر ردت خطوتين لورا وبدون ما تصد صوب أحمد: هلا أحمد
أحمد: فديتج .............يا حلاة أسمي ع لسانج
تقرب منها وبصوت شبه مسموع: شتقتلج
جواهر:........................
أحمد: جواهر طالعيني ودي أجوفج
جواهر: لا ما أقدر
أحمد: أذا تحبيني صدي صوبي
جواهر: لا أستحي ما ريد
تقرب زياده منها ولفها صوبه وصارت مجابلتنه ورفع راسها
...............................والله تهبلي .............أحبج
جواهر: نزلت راسها :وأنا أموت فيك
أحمد بدون شعور مسك ويها بين يدينه وباسها ع راسها
دمعت عيونها وهي ما متحمله هالموقف : أحمد أن لازم أنزل أخاف حد يجوفنا
أحمد: أوكي بس لحظه ...............حط أيده ع خدها ومسح دموعها
.....................حياتي ماريد أجوف هالدموع مره ثانيه
جواهر: خلاص دامك انت فحياتي عمرك ما بتجوف دموعي نشالله
...........والحين ممكن أروح
أحمد: ودي ماتروحي بس ................خلاص أنا بعد لازم أنزل تحت




نرجع لساره وسعود إلي كانت هذي الليله من أحلا ما يكون
سعود وهو ماسك أيد ساره :حبيبتي شرايج فاليوم
ساره: وأحلا يوم ياعمري
سعود حبها ع خدها : فديتج والله

^
^
^
^
^

بعد مرور يومين من الأحداث إلي صارت

نشت جواهر من حلم خلاها تصرخ من شدة الخوف
جواهر:بسم الله ..أعوذ بالاه من الشطان الرجم
شو هالحلم لا لا ياربي نشالله يكون مجرد حلم
قامت وسارت عند أمها كانت الساعه عشر
وتريقت وكلت حبتين بندول
وراحت غرفتها تريح كان راسها يعورها

شوي ويرن تلفونها
رقم غريب
منو تتوقعون؟؟
ياربي شو الحين أرد ولا

وصلها مسج
{ردي أنا أحمد}
بعدها بشوي رد يدق
ويدق
وجواهر ستغربت ليش أحمد يتصل ومن متا عنده رقمي؟
ردت عليه

جواهر:.......
أحمد:جواهر حبيبتي ردي عليه
جواهر:خير أحمد شو فيك ومن وين تعرف رقمي؟
أحمد:كل هذا مب مهم....جواهر أهم شي أسمع صوتج أخاف ماسمعه بعد هاليوم

كان أحمد يسوق وساير صوب دبي والطريج زحمه
جواهر أنا محتاجلج أرجوج لاتخليني
جواهر:أحمد شفيك ليش تقول جي
أحمد :جواهر أنا أحبج
توت توت توت أنقطع الأتصال
جواهر:ألوه احمد وين سرت أحمد رد عليه


شي ماكنت أتوقعه أنا إلي أكتب القصه
ماأعرف كيف صار جي
ليش ياربي
خلاص مابكمل القصه أحس أني وصلت {لنهايه}

أحمد سوا حادث فظيع
وهذي النهايه

كنتم مع قصة {حلم عمري}
وسمحولي يمكن مابكملها
لعدم قدرتي على إكمال الأحداث


...حلم عمري تمنيته
...صار وتحقق منايه
...هذا حظي لي جنيته
...مالي غير اصبر وأنال

@@لحظه لحظه ترا هذا كان حلم لاتخافون جواهر بس كانت تحلم القصه ماخلصت بس بحكم الضروف ماكملتها ونشالله بحاول أني أكملها
أختكم الماس@@
 

سفاحة الجامعة

¬°•| عضو فعّال |•°¬
إنضم
26 أبريل 2011
المشاركات
160
الإقامة
قصر مهجور
قصة طويلة واحداثها مشوقة تسلم اناملك....يا شوق محضة....
 

عٍﮯـينأؤيِ مـﮯـآرڪۂِ

¬°•| عضو فعّال |•°¬
إنضم
24 مايو 2011
المشاركات
151
الإقامة
آلبريمي ~
ما شاء الله عليج <~ والله متفيجه تكتبين كل هذا .~

بالتوفيق لج خيتو ..~

القصه حلوه فيها احداث جميله ..~

واصلي و أبدعي .~

فـ أنتظار يديدج /

أخوج : عيناوي
 

ضيف البريمي

¬°•| عضو فعّال |•°¬
إنضم
22 مايو 2011
المشاركات
181
الإقامة
الغربه
مااااشاء الله عليج

هذي رواية

واصلي الابداع


تستاهلي التقييييم:16:
 

شووق قطر

¬°•| مراقبة عامة سابقة وصاحبة العطاء المميز |•°¬
إنضم
29 سبتمبر 2009
المشاركات
27,429
الإقامة
قـــلــبي""الـــدفــــنــــه""
قصه حييلللوه ومشوووقه

تسلميين غلآتي

ودمتي مبدعه
 
أعلى