يالحلوة دشي .. أبيج بسالفة مهمة ^_^‏

الموضوع في ',, البُريمِي لِـ/ الهَمسَات الإسلَامية ,,' بواسطة شبيك لبيك, بتاريخ ‏25 سبتمبر 2010.

  1. شبيك لبيك

    شبيك لبيك ¬°•| عضو مثالي |•°¬

    بسم الله الرحمن الرحيم




    تعالي أختي باخذ من وقتج دقايق بس تكفين كملي وياي

    أختي الغالية، كم مرة وقفتي جدام المنظرة وطالعتي عمرج ؟
    وايد صح ؟

    تميتي جدام المنظرة وطالعتي هالعيون، وطالعتي هالويه والشعر حتى رموشج تميتي تقيسين وتحطين فيها
    يالله ما أحلاج وما اجملج، وسبحان الذي خلق و صور في أحسن تقويم
    وبعدها تقولين الحمدلله اللي خلقني بهالجمال و صورني بأحلى صورة


    أختي الغالية، ماعليه تحمليني واقري للآخر
    الين متى بنتم صاكين عيونا واذونا مانبا نسمع ولا نشوف


    يالحبيبة توج شاكرة لرب العالمين على نعمته والحين حطيتي اللي حطيتي على ويهج وظهرتي
    ليش ؟ ليش تتعاملين مع ربج بهالطريقة؟
    تقولين يا ربي شكراً وتكسرين كلامه بعدها على طول!
    من وين تعلمتي هالاسلوب اللي ولا مخلوق بما فيهم أنتي يرضاها حق نفسه فما بالج بللي ملك السموات والأرض واللي فيهن
    فما بالج بللي ما طلّعتي نفس وما دخلتيه فصدرج إلا برحمته! فما بالج بللي ما قبض قلبج و لا ارتخى إلا بحلمه
    اللي ما تحرك عصب واحد فيج إلا ودرى عنه وحركه بأمره


    انتي تعرفين ومتأكدة إنه بحركة أسرع من لمح البصر يقدر يخليج في أقرب مقبرة
    انتي تعرفين ومتأكدة أنه بعظمة أمره يقدر يخسف بالأرض اللي أنتي ماشية عليها
    لكنه للحين حليم وصابر يمكن فيوم تردين له ! مخلنج على راحتج من أول ما تنشين الصبح وتسيرين دوامج وتردين وهو يشوفج ويسمعج وانتي تكسرين بكلامه و تعصينه
    يشوفج وأنتي تحطين هالجحال والبودرة والروج واحد ورا الثاني والشيلة الغاوية ولا مانع من قصه صغيرونة على جنب مرة داخل وعشر مرات برع
    وهو الذي نادى : "وَلا تَبَرَّجْنَ تَبَرُّجَ الْجَاهِلِيَّةِ الأُولَى"


    شي بنات دائما نسمع منهم هالعبارة "أنا مب متبرجة حاطه شي بسيط"
    هيه نعم صدقتي للأمانة نلاقيها بس حاطه جحال ويمكن بودرة عالخفيف و مرطب الشفايف عشان الجفاف والحر حليلها

    تقولج الجحال سنّة ^^
    "يُخَادِعُونَ اللَّهَ وَالَّذِينَ آمَنُوا وَمَا يَخْدَعُونَ إِلا أَنْفُسَهُمْ وَمَا يَشْعُرُونَ"

    حبيتي الغالية أقولج ياها بصراحه (كذبتي!) لا تقصين على روحج غاليتي ولا تخلين إبليس يزين لج ويسوغ لج


    أنتي لو أن هالأشياء البسيطة عا ويهج ما تسوي شي جان ما حطتيها من الأصل. لكن تعرفين وكلنا نعرف أن لها التأثير الجمالي عسب جيه نحطها ويكون الجمال ناتشورال مثل ما يقولون



    أختي الغالية، رب العزة يقول:"وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ"
    تكلم عن زينة متخفية تحت الملابس! حذر من أن يعلمها الرجال
    وتقولين لي حاطه شي بسيط ؟؟؟!!
    انزين هني خلج من الويه! تعرفين هالكعب اللي أنتي لابستنه وطقطقين فيه سايرة راده وش يسوي بهاييل المساكين اللي حوليج
    وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ
    جمهور العلماء يقول قصد به الخلخال هنا! وهالخلخال شو عسا الله هالصوت اللي بيظهره مقارنة بالكعب
    جربي ! جربي في البيت ها .. لا تسيرين بين الرجال وتقولين قالولي اجرب تكفين يا معودة مب ناقصين
    جربي في البيت امشي فهالكعب واطالعي .. كل الرؤوس والعيون بتلف صوبج

    ترضينها لنفسج ؟
    ربج يغار وما يرضاها لج فشلون أنتي رضيتيها فحق نفسج
    وفالأخير محد بيخسر غيرج ! محد بيندم غيرج ومحد بيلوم نفسه غيرج


    أختي الغالية ، لاتترين هاليوم لا تترين هاللحظة
    احذري تكونين من اللي بيقولون " رَبِّ ارْجِعُونِ لَعَلِّي ..."


    اذكر فيوم ، كل حد واصل مكتبه يقول يا كريم
    إلا وننفجع بوفاة وحده من الموظفات كانت توها البارحة ويانا ما فيها شي
    لكن ربج إذا حكم وقضى فإنما يقول للشيء كن فيكون
    طبعاً الناس الكل متفاجئ ويسأل واللي مودر شغله واللي منصعق ويترحم
    وأنا أول ما خبروني تدرين شو أول ما خطر فبالي ؟

    تبرجها !
    عسى الله أن يرحمها ويغفر الله



    وتوقعت الموظفات اليوم الثاني وحده فيهم تعتبر لكن ما صار اللي توقعته
    إذا ما اعتبرنا من الموت عيل وش عاد ينفع ويانا
    يعني لازم نكون احنا العبرة عشان نتوب ؟؟

    وصدق ربي لما قال: "فَإِنَّهَا لاَ تَعْمَى الأَبْصَارُ وَلَكِنْ تَعْمَى الْقُلُوبُ الَّتِي فِي الصُّدُورِ"
    قلبج ! هيه نعم الخلل من داخل
    لحقي على عمرج ! الحين لو قالولج عندج سرطان قلب جان ما خليتي بلد ولا دكتور تعالجين عنده
    لكن لما يكون المرض القلبي من هالنوع نفكر مليون مرة قبل لا نريد نعالج


    أختي الغالية، لا تأخذك الدنيا بما فيها
    تراها مردها بتغدر فيج

    ربج رحيم رؤوف بعباده على كثر عصيانهم له ! بالأخير يقولج يحب التوابين !
    ولو درتي بهالكون تدورين أعظم نعمة أنعم بها ربج عليج بتلاقين أعظمها إنه


    ربج اهو ربج

    أنه ربج هو الله

    هيه والله !
    محد متحمل أذية الخلق قد رب العالمين
    فلا تكونين منهم

    أنتي بتبرجج ما تضرين نفسج بس، ولكن اتضرين اللي حولج بعد
    " زُيِّنَ لِلنَّاسِ حُبُّ الشَّهَوَاتِ مِنَ النِّسَاء"
    فلا تزيدينها عليهم و توقعينهم في الحرام




    واسمحيلي عالاطالة ! ما سويت جذه إلا أني أحبك في الله
    وأغار على أخواتي مثل ما أغار على نفسي

    وعددي كم مرة كررت "أختي الغالية" هذا لأنج غالية يالغالية


    عسى الله يتقبل منا ومنكم ويغفر لنا ولكم
    والحمدلله رب العالمين





    الدال على الخير كفاعله






    منقــــول للفــــآئــدة...~
     
    آخر تعديل: ‏26 سبتمبر 2010
  2. رحآيل

    رحآيل ¬°•| مُشْرِفة سابقة |•°¬

    سبحآن الله ..
    بالفعل ..
    هذا الواقع اللي يصير ويانا ..
    يزاج الله ألف خير أختي " الغالية "
    ويعله فموازين حسناتج إن شاء الله ..

    الله الولي
     
  3. alshibli

    alshibli ¬°•| مراقب عام |•°¬ إداري

    جزاكِ الله ألف خير،،
    وان شاء الله الأخوات يتفيدن من الموضوع،،
     
  4. ندى الصباح

    ندى الصباح ¬°•| مُشرفة سابقة |•°¬

    بارك الله فيج غاليتي
    يالله يا أختي بتشوفي عجايب وغرايب فالهدنيا
    الله يعينا كيف بنتحمل هالمنكر كل يوم نصبح بأشكال وألوان

    الله المستعان على ما يصفون
     
  5. شبيك لبيك

    شبيك لبيك ¬°•| عضو مثالي |•°¬



    ااااميـــــــــن.....ويعطيج العااافيــــــــــة ع المرور الغاااااوي....لا هنتي....~
     
  6. شبيك لبيك

    شبيك لبيك ¬°•| عضو مثالي |•°¬



    تسلم اخوووية ع المرور الغااااوي...لا هنت....~
     
  7. شبيك لبيك

    شبيك لبيك ¬°•| عضو مثالي |•°¬



    عسى الله من يتعض...وتسلميين حبوبة ع المرور الغاااوي...لا هنتـــي...~
     

مشاركة هذه الصفحة