قصة غايب وطيفك

الموضوع في ',, البُريمِي لِلقِصَص والرِوَايات ,,' بواسطة لسعـۃ ع ـَـَذآب, بتاريخ ‏21 سبتمبر 2010.

  1. لسعـۃ ع ـَـَذآب

    لسعـۃ ع ـَـَذآب ¬°•| عضو مميز |•°¬

    قصة من الواقع والخيال
    الكاتبه : لسعة عذاب
    قصة غايب وطيفك

    الشخصيات
    عبد الحميد: شعره طويل وسيم ويحب الكشخه واحلي شي فيه الغمازات وعيونه العسلية وعمره 25 سنه ويشتعل في شرطة بوظبي
    عفاري : شعرها اسود وطويل ولون عيونها عسلي واحلي شي فيها الغمازات وتشبه ولد عمها عبد الحميد وعمرها 20 سنه وتدرس في الجامعة
    خليفة: شعره طويل ولون عيونه بني غامق ويحب الطلعات مع ربعه وسيم اشوي وعمره 19 سنه ويدرس في كلية الطيران
    دانه: تشبه عفاري شعرها اسود غاامق ولون عيونها عسليات واحلى شي فيها الغمازات وعمرها 20 سنه وتدرس في الجامعه مع بنت عمها عفاري

    الجزء الاول

    في بيت بو خليفه
    الكل متجمع عند شاشة التلفاز يطالعون برنامج حقك علينا . وداقينها سوالف مع عبد الحميد وخليفه واخوانها . والحريم يالسات يجهزن الغدا حق الريايل عسب يتغدون جماعه مع العايله الكريمه .
    عفاري : السلام عليكم ورحمة الله وبركاته
    الكل ماعدا (عبدالحميد) وعليكم السلام والرحمه
    عفاري: يلاه نشوا تعالوا اتغدوا بسرعة بنسير انشوف النتايج مال الجامعة
    خليفه: انزين يلاه ياين روحي انتي ونحن بنلحقج
    دانة: عبد الحميد اشفيك من دشت عفاري وانت متغير شوفيك
    عبدالحميد: اظني عفاري عرفت بسالفة الخطوووبة وعن سالفة المهر لاني شفت ويها متغير علي
    دانة: يعني امنو بيخبرها بالظبط ان شاالله مااتعرف عشان ما تنصدم
    الكل يعرف انه عفاري اتحب عبدالحميد ولد عمها من زمان بس عفاري ما كانت اتحس بحب عبدالحميد لها لانه ما يبدالها نفس الشعور والاحاسيس وبعد غايب طويل دام حب عفاري لولد عمها محفور بالقلب بس عفاري ما كانت اتعرف انه عبدالحميد خطب وحده وكان يحبها من قلبه .
    مريم: عبدالحميد متا الملجه بسك ياخي نبا نفرح ملينا
    عبدالحميد: ان شاالله بعد اسبوعين بنملج عليهم والله يكتب الخير عااد
    رووضة: بتملج على امنو وليش ما خبرتوني ولا كاني وحده منكم الله يسامحك بس
    خليفه : ترى احيينه كنا بنقول لكم بس كنا خايفين اشوووي
    عفاري مصدومه ما توقعت انه عبدالحميد يخطب وبيملج بعد اسبوعين ونشت عفاري من ع الغدا وسارت تغسل ايدها والكل لاحظ عليها تأثير الصدمه وسارت صوب الكرسي وع طول شلت مفتاح السياره.
    عبدالحميد: عفاري لحظه وين رااايحه يلسي كملي الغدا
    عفاري: مالك خص انته واجلب ويهك عني مابي اشوووفك
    عبدالحميد: يرمس بالفون ويقول حق لطيفه بعدين بكلمج يلاه باي
    لطيفه : آوكيك يلاه باي
    بالسياره صووووب عفاري اللي كانت دموعها اربع اربع موب عارفه شوا تسوي وبشوا تفكر ويرن فونها اكثر من مره وما اترد عليه . عفاري شغلت المسجل وكانت حاطه اغنية غايب وطيفك عن القلب
    في بيت بوخليفه الهدوء يعم البيت بكبره موب عارفين شو يسون غير انهم يصبرون ويتريون اي خبر عن عفاري ترجع لهم
    خليفه : يدق حق عبدالحميد : الو هلا حمييدوه ها بشر لقيتها ولا بعدك
    عبد الحميد: لا بعدني ما لقيتها ما ادري وين سارت دورت عليها بكل مكان
    خليفه: انزين انت وين بالظبط احيينه بيك وي ربيعي
    عبدالحميد: انا صوب بحر عيمان تعال اهناك بسرعه لا تتاخر
    خليفه : اوكيك يلاه ياي بباي
    عبدالحميد: بباي
    عفاري يالسه بالسياره واتصيح ومنصدمه ها آخر شي توقعت انه عبدالحميد يملج ع آخت مرت اخوه . ودقايق يرن فون عفاري
    عبدالحميد: الو عفاري انتي وين دخيلج خبرييني انتي وين؟
    عفاري : مالك خص اتعرف انا وين خلاص خلني بروحي يا عبد الحميد مابي اسمع صووتك
    عبدالحميد: انتي فهمتي كل شي غلط دخيلج خلييني افهمج السالفه كلها
    عفاري: خير شو بتفهمني قول اهني
    عبدالحميد: انا صج خطبت ودفعت لها المهر بس بعدنا ما حددنا الملجه ولا صار شي رسمي انا اعرف انج اتحبيني
    عفاري : خلصت اللي عندك خلاص روح الله يوفقك مابي اسمع اكثر من اللي سمعته وسكرت الخط في ويه

    ونزلت عفاري صوب البحر وقعدت تتمشا واتصيح من خاطرها وراحت قعدت ع الرمل ورسمت قلب مجروح بالرمل وصورته بفونها وكانوا شي ثلاث شباب مارين من الصوب اللي فيه عفاري

    الولد الاول : هلا والله بالغزال الشمالي عطينا ويه اشوي
    الولد الثاني : ياحلوه اشفيج زعلانه امنو امضايقنج
    الولد الثالث : شكلها زعلت من حبيب القلب ولا من شي ثاني
    عفاري بدت تضايج منهم وسكت ما سوت لهم سالفه وكملت الرسمه .. وكان فيه ولد حلييو بقمة الجمال شاف الشباب يضاقون با لبنت وراح صووبهم
    عبدالرحمن : لو سمحتوا انتوا ما تستحون ع ويهكم اضايقون بالبنت
    الولد الاول: وانت اشلك ياخي نحن انغازل متا ما نبي
    عبدالرحمن : لا والله احلف بس انته وضرب الولد ع راسه ضربه قويه
    عفاري خافت على الولد اللي دافع عنها وشافت ويه كله دم والكل راح وعبدالرحمن طايح ع الارض وينزف الدم . وبتعب عبدالرحمن يقوم يشوف عفاري اذا صار لها شي.

    عبدالرحمن :صار لج شي حبوبه
    عفاري : لا ما صار لي شي بس انت تعورت ويهك ينزف دم
    عبدالرحمن : لا ماعليج عاادي اهم شي انج انتي ما تاذيتي
    عفاري: شكرت عبدالرحمن ع المساعده وراحت صوبه ومشت له الدم
    عبدالرحمن: العفو الغلا ما سويت الا الواجب
    وراحت عفاري بس كانت ناسيه فونها وردت اتيبه وحصلته عند عبدالرحمن . وركبت عفاري سيارتها وشخطت على 180 ما كانت تسرع بس ما انتبهت للسياره اللي يدامها ودعمتها لين انجلبت سيارة عفاري وبدا الدم يتناثر من ع السياره
    عبدالحميد يتصل ع فون عفاري ومحد يرد عليه واشووويات
    عبدالحميد: الو عفاري وينج دخيلج قولي انتي وين
    الريال : يرمس عبدالحميد ويقول انه البنت سوت حادث وهي احيينه بالمستشفي
    عبدالحميد: شووووه عفاري سوت وحادث وين باي مستشفي
    الريال : مشتشفي القاسمي بالشارجه
    عبد الحميد: اوكيك يلاه ياي
    ويسكر عبد الحميد من اللي كلمه من اشوي وع طول دق حق خليفه ولد عمه وخبرها اني اي مستشفي القاسمي بالشارجه

    صوب مستشفي القاسمي بالشارجه عبدالحميد كان واقف صوب غرفة العناية المركزه ويطالع عفاري من الدريشه كيف الاجهزه مركبه في جسمها ويلوم حاله انه هو السبب باللي صار حق عفاري

    خليفه: عبد الحميد وينها عفاري وينه اشو صار لها خبرني قول شو صار لها
    عبدالحميد: آآكيه عفاري داخل يا خليفه في غيبوبه واظني ما بتنش منها انا السبب باللي صار لها
    خليفه لا اتلوم حالك كلنا غلطنا وكان المفروض انخبرها من قبل لا يصير لها ها الشي
    آم منصور: وينها عفاري شو صار لها واتصيح من خاطرها وين بنتي شو سويتوا فيها قولوا
    عبدالحميد: آآم منصور تطمني عفاري ما فيها الا الخير بس نتريا الدكتور يطلع وبيطمنا عليها
    شو تتوقعون بيصر لعفاري ؟؟
    عبدالحميد بيملج ع لطيفه
    وعبدالرحمن اللي متشوق للقلب عفاري شوبيسوي ​
     
  2. لسعـۃ ع ـَـَذآب

    لسعـۃ ع ـَـَذآب ¬°•| عضو مميز |•°¬

    الجزء الثاني

    في المستشفي عفاري بعدها في العنايه المركزه وكانت اتصيح بكل هدوء وبدون صوت وجهاز النبضات يمشي ببطء الكل خاف عليها وبالذات امها اللي صار لها يومين هب ماكله شيء
    بعد مرووور ساعه من الاحداث اللي صااارت .

    عبدالحميد: دكتور طمني شلونها عفاري دخيلك طمني
    الدكتور : لا اتخاف هي بس بغيبوبه وان شاالله راح اتعدي ع خير بس في رضه بايدها اليسار
    عبدالحميد: الحمد لله ع كل حال . دكتور ممكن اشوووفها دخيلك دكتور
    دكتور: ممكن بس بدون صوت الله يخليك
    أبو منصور: وينها عفاري وينها شووو صاار لها خبروووني
    ابو عبدالحميد: تطمن عفاري مافيها الا العافيه بس هي العنايه المركزه وتوه الدكتور طمنا عليها
    ابو منصور : الحمد لله ع كل حال
    ودخل عبدالحميد غرفة العناية المركزه الذي يسكنها الهدوء وينعتم الصوت صوت جهاز ضربات القلب .
    عبدالحميد: عفاري دخيلج سامحيني وانا بعد حبيبتج من يوم الطفوله بس لازم نرضا بالامر الواقع
    عفاري كانت تسمعه شو يقول واتصيح بهدوء وفجاه مسكت ايد عبد الحميد وبدون احساس
    عبدالحميد: عفاري دخيلج انا اسفه والله بس تمنيت انج ما تنصدمين سامحيني
    وظهر عبدالحميد من غرفة العناية المركزه من بعد ما حس بقبضه قويه في ايده كانت ايد باردة دافية

    في بيت بو خليفه
    خلود : وووووووووويع ما عندها شغله هاي اتحب واحد حافي منتف ما عنده حتي بيزه
    ريم: انتي شو تبين فيه خلاص الريال بيعرس احيينه وانتي يالسه اتعيبن عليه صدق ما عندج احساس
    خلود: انا ما عندي احساس يا بنت اللذين
    ريم: اووكيك برايج انا بروح بيتنا ولا بتشوفييني بعد
    خلود :آآحسن فكه بعد روحي

    في المستشفي طلعت عفاري من العنايه المركزه والكل استانس انها عدت مرحلة الخطر والحمدلله ما كان شي خطر عليها
    عفاري: هلا والله الحمدلله بخير وانت اشحالك
    عبدالرحمن تذكرووونه اللي شاافها ع البحر : الحمدلله بخير يعلج مديمه ان شاالله
    عفاري: آآمين يارب العالمين ..عبدالرحمن حد ياي بكلمك بعدين
    عبدالرحمن : اوكيك الغاليه ديري بالج ع رووحج وسكر الخط ع طول
    آم منصور: السلام عليكم ورحمة الله وبركاته اشحالج احينه ان شاالله احسن عن قبل
    عفاري : وعليكم السلام والرحمه .. الحمدلله ع كل حال انا احسن عن قبل
    آآبو منصور: اشحالج عفاري ان شاالله احسن عن قبل
    عفاري : الحمدلله بخير لا تحاتي يابوي وينه عمي عيل
    آآبو منصور: يالسين برع بسير ازقرهم وبرد لج
    عفاري: اوكيك بترياهم عيل
    دخلوا العايله الكريمه ع عفاري اللي كانت لا فه ويها ع الصوب الثاني
    آآبو عبدالحميد: السلام عليكم ورحمة الله وبركاته ... عفاري شلونج احيينه ان شاالله احسن عن قبل
    عفاري : وعليكم والسلام والرحمه... تطمنوني انا ما فيني الا العافيه بس الا ادلع
    الكل( ما عدا عبد الحميد اللي كان يطالعه بنظرة خوف) هههههههههههههههههههههه
    بعد مروور اسبوع من الاحداث اللي صارت. طلعت عفاري من المستشفي وكانت مستانسه وفرحانه حق عبدالحميد وكانوا كلهم متعين في بيت يدها ..
    في الصالة
    عفاري: آآآقول حمدووه شو رايج انسير نشتري فساتين ومكياج يديد حق العرس
    حمده: يلاه عيل فوقه والله بيكون ربشه يلاه خلينا انسير بس صبري بشووف ريم قبل
    عفاري: آآوكيك يلاه بترياكم بغرفتي بسير اكشخ انا
    حمده: يلاه عيل بنطقم بنلبس نفس الشي وظهري النظارات اليداد
    عفاري : آآوكيك بظهرهن يلاه سير ي شووفي ريم
    حمده: ريم وينج وي هالراس تعالي بسرعه
    ريم: ها شعندج اتصارخين شو تبين وي هالراس
    حمده: بتروحين ويانا نشتري فساتين حق العرس وبناخذ لنا مكياج
    ريم: هي بروح وياكم ما بيلس اهني ملل ياخي
    في غرفة عفاري اللي كانت كاشخه وامخلصه بس تتريا المسعدات ريم وحمده يخلصن
    عقب بخبركم شو لابسات وشو حاطات
    عفاري وهي امعصبه: ايه انتوا يلاه سنه لين تتعدلن
    ريم: انزين انا خلصت هاتي نظاراتي عيل
    حمده : وانا بعد خلصت بس باقي احطي القلوز اتري لا اتروحين عني عفاري
    عفاري : يودي نظارتج انتي الثانيه ويلاه بسرعه بترياكن برع انا
    حمده وريم: اوكيك يلاه احيينه بني
    وعفاااري كانت وافقه برع امجابلة غرفتها واتغني اغنية بحضر زفافك ياحياتي وبرزف عشانك لا تحاتي.. كان صوت عفاري عذب ومميز من بين الكل ... وفجاه سمعها عبدالحميد واخوه يوسف اللي كان يهديه عشان العرس وشوي سوي وما يسوي وصدت عفاري وشافتهم وجان تسكت فجاه

    عبدالحميد: اشوفج كاشخه ع وين ان شاالله
    عفاري : بنروح المول فيها شي يعني ولا شو
    عبدالحميد : بتروحين المول وانتي كل ها الكشخه عشان مول
    عفاري: تطالعه بنظره تذبحه هي كيفي بروح جي
    ريم: عفاري يلاه نحن خلصنا خلينا انروح مانبي هايل يخربون علينا
    حمده: هي يلاه عفاري خلينا انروح والله بنتاخر جي
    عبدالحميد: خوووش والله مكياج وحالتكن حاله انتن وين بعد رايحات
    يوسف: عثره سايرات عرس انتن الا المول تراكن
    عفاري وحمده وريم مره وحده جان يزعقون عليهم : انتوا جاااااااااااااااااااااااااااب مالكم خص ياخي
    وساروا عنهم ما عطوهم ويه .. وعبدالحميد يوسف مستغربين منهم اول مره يشوفون عفاري اتعصب عليهم .. خلوني اخبركم شو لابسين.... عفاري لابسه تنوره وقميص لونهم وردي وبوت وردي ومكياج وردي خفيف و ساعه ورديه والنظاره ورديه والعبايه عليها ورد كرستال يلمع مع الشيله وكانت راسمه عيونه رسم خفيف وحاطه قلوز ودري لانه امبونها عفاري شفايفها حلوه بدون مرطب وغير ..... ريم ... لابسه تنوره وقميص نفس مال عفاري بس الالوان تختلف لونها بنفسجي فاتح بوت بنفسجي ومكياج بنفسجي خفيف وساعه بنفسجيه والنظاره بنفسجيه والعبايه شرات مالت عفاري وراسمه عيونه رسم خفيف وحاطه قلوز وردي شرات عفاري....حمده لابسه تنوره وقميص نفس مال عفاري بس الالوان تختلف لونها آحمر فاتح بوت بنفسجي ومكياج آحمر خفيف وساعه آحمر والنظاره آحمر والعبايه شرات مالت عفاري وراسمه عيونه رسم خفيف وحاطه قلوز وردي شرات عفاري...
    عفاري: اترمس ابوها نحن بنسير المول بناخذ لنا كمن شغله وبنرجع وعقب بنروح نحجز بالصالون لا اتقولون ما قلت لكم
    آآبو منصور: آآوكيك سيروا برايكم بس تحملوا على عماركم ماتبون فلوس
    عفاري :لا مشكور ابوي عندنا فلوس يكفنا يلاه تشاااو
    وراحت عفاري شغلت سيارتها كان عندها رنج سبورت آآبيض وركبت حمده يدام وراه ريم ع طول ...
    حمده : عفاري حطي لنا حربي العامري أغنية اليديده وعد مني
    ريم: لا حطي لنا الدماني أغنية آآنت الوحيد
    عفاري ::::: اش اسكتوا انا بحطي اللي ابيه اااوف تراكن غبيات يعني ما تعرفن عفاري شوا تحب تسمع
    حمده : آآوف منج خلي حربي ياخي
    عفاري : مابا اسمع حربي بسمع فرقة دبا الحربيه
    حمده : آآوكيك عيل حطي آآغنية نصخ روحي اليديده بنسمعها
    وشغلت عفاري الاغنيه وتمت اتغني وياهم بصوتها العذب
    كنك نصـخ روحـي وكنـي
    رد النـصخ اولافــااولاف
    أو مثـل حانـوت ودنـي
    خمره عتيج وسكره اسراف
    عيت كـم اهدمـة وبنـي
    اي منـزل يبغون لشـراف
    الـراي يقـصر والتمني
    وجنات عادمن بعض لصناف
    حلم المـلك ماطاف عني

    حمده: عفاري واااي صوتج خبال الله يحفظج يارب
    ريم: يابخت اللي بياخذج ياعفاري والله صووتج طرر
    عفاري: تسلمون هذا من ذوقكم ويحفظ الحميع ياربي
    ودقايق يوصلون المول وكله وحده اتعدل عمرها ويشوفون اذا ضايع شي عسب يعدلونه
    ودشوا اول محل مال الفساتين ... وكانوا شي شباب واقفين صوب المحل
    عفاري: السلام عليكم ورحمة الله وبركاته ... لو سمحتي بغيت فساتين يداد
    الحرمه: اوكيك تفضلي استريحي وانا بظهر لكم الفساتين
    عفاري : آآوكيك بنتريا نحن
    ريم:: عفاري شو رايج بهذا الاكسسوار واايد حلو
    عفاري :: اشووف شكله نايس عيل بناخذ كل شي من هذا المحل عيل
    الحرمه: هايل الفساتين اليديدا اللي وصلنا حاليا تحبون اتجربونه
    حمده: انا بجرب هذا واايد عيبني شكله
    الحرمه: اوكي اتفضلي دشي اهني وجربي الفستان ومن اتخلصين نادي علينا
    حمده: اوكيك ... دشت حمده ولبست الفستان وكان عليها روعه .. وتزقر عفاري وريم عشان ايوون
    عفاري:: الله واااااااااااااااااااااايد حلو خبال عليج ما شاالله عليج قمر ياربي
    ريم:: هي والله واايد حلو عليج طالع شكلج كيوت ياربي
    حمده: عيونكم الحلوه خلاص باخذ هذا قياسه وااايد زين
    عفاري: عيل انا باخذ هذا عيبني لونه فوشي واايد حلوبسير اجربه ... دشت عفاري ولبست الفستان وكان عليها خبال شرات الملكات وزقرتهم عشان ايون يشوفون كيف طالع عليها
    حمده: آآووبس عفاري شو ها طالعه قمر قسم بالله كيوت من الخاطر يابخت الي يباخذج بس
    ريم: هي والله يابخت اللي بياخذج بس يلاه دوري خلوني البس ويلاه أنتن برع اشوووف
    ومن بعد ما خلصن من الفساتين راحن صوب المكياج وخذوا اللي يبونه وعقب راحو الكارفور داخل وخذوا لهم حلويات وغيره ماخلوا شي ما شروووه
    عفاري: آآف تعبت حشا على ما روم اشل آآكثر عن هذا
    ريم: حتى آآنا تكسرت يابوج خلينا انروح صوب السياره انحطي الاغراض وانرد انكمل الباقي
    حمده: هي والله صدقها ريموووه خلينا انسير صوب السياره وانحطي الاغراض
    عفاري: آآوكيك يلاه نمشي
    وكانوا شي شلة شباب واقفين ويطالعون عفاري و حمده وريم اللي كانوا شالين الاكياس في ايدهن
    الولد الاول: هلاوالله هاتوا خلونا انشل عنكم الاغراض بنساعدكم اشوي
    عفاري: مشكور اخوي نقدر انشلهن بروحنا
    الولد: بس ايديج بتعورج من كثر الشل
    عفاري:: انت مالك خص اوكيه ويلاه اجلب فيسك
    الشباب كانوا مستغربين من ردة فعل هاي البنت وكيف كانت اترمسنا اتقول ماكلين حلال ابوها
    وفجاه طلعوا لهم البودقارد في ويهم وهزبوهم هزاب
    عفاري: هايل شو يابهم ورانا هايل ااف قايله لهم مانبي حد ويانا
    حمده: هي والله شوي يابهم هايل اااف منهم
    ريم::: طوفن خلهم يولون البودقارد
    وفي المول البنات كانوا داخل يتمشون ويحوطون صوب محل العطور وغيره وعفاري كل اشوي ادش محل تتطالع اذا عيبها شي واترد تتطلع وتدخل محل ثاني وتمت ع هاي الحاله يمكن ربع ساعه وبالصددفه كان بالمحل عبدالرحمن اللي شافته ع البحر عفاري ما انتبهت له هو شافه وتم يتفداه مليون الف مره
    عبدالرحمن: عفاري اشحالج شخبارج عساج مرتاحه
    عفاري وبصدمه : عبدالرحمن انا الحمدلله بخير وانت اشحالك
    عبدالرحمن : بخير الله يسلمج بس مشتاق لج حيل ليش ما سمعتييني صوتج
    عفاري: مديم اممم سوري ما قدرت اتصل فيك
    كــــــــــــــــــــــــــــــــــــــــــــــــــــــــــــــــــــ BRBـــــــــــــــــــــــــــــــــــــــــت
    شو تتوقعون عبدالرحمن بيقول حق عفاري؟
    ريم وحمده بيعرفون شو سالفة عبدالرحمن ولا ؟؟
    وعبدالحميد شو استعداته للعرس؟؟​
     
  3. لسعـۃ ع ـَـَذآب

    لسعـۃ ع ـَـَذآب ¬°•| عضو مميز |•°¬

    الجزء الثالث
    عبدالرحمن: الا اشوفج اهني عيل اليوم شو عندج
    عفاري: والله ماشي ياين ناخذ عطور وطالعين
    ريم: عفاري امنو هذا وليش وافقه وياه
    عفاري: هذا الدكتور اللي يدرسني بالجامعه السنة الاولي
    حمده: هي دكتور عبدالرحمن شلونك شخبارك
    عبدالرحمن: كاتم الضحكه يسرج الحال
    عفاري: يلاه بنيات ثجلنا ع الدكتور خلونا انروح
    حمده: يلاه عيل انشوفك ع خير يا استاذ عبدالرحمن
    عبدالرحمن: يلاه عيل ديرو بالكم ع روحكم
    عفاري وريموه وحمدووه مع بعض : مع السلامه دكتور
    من بعد ما خلصن البنات راحن الصالون يحجز حق الحناء وحق المكياج والتسريحه وحدووا وياهم موعد قبل العرس بيومين عشان يخلصون . وردن البيت هلكانات وتعبانات وحالتهن حاله
    .عبدالحميد: اشوف ما شاالله خميتوا اللي بالسوق كله
    ريم: عاااد انت شو يخصك والله نحن كيفنا ياخي
    حمدووه: وي راسك أنت بتعرس وبترتاح ياخي خلونا نستانس ع كيفنا
    عفاري: تزقر دانه وامسويه اكبر طااااااااااااف حق عبد الحميد وخلاص انه هو امقرر العرس وكل شي .. داانه داااااااااانوه يعلج ما تسمعين ولا عداج اخوج عبدالحميد
    دانه: ها اشعندج اتصارخين هي ما اسمع طالعه ع اخوي ياخي ااافف منج شو تبغين
    عفاري: يؤدي هذا المكياج لج شريت لج واااحد شراتنا
    دانه: فديتج والله عفاري مشكووووووووووووره وتسلمين ع المكياج يلاه انا بسير اشوف الفستان مالي
    عفاري اوكيك برايج عيل _ ويرن فونها وكان المتصل عبدالرحمن وخلته يرن وعقب ردت
    عبدالرحمن: الووو حيا الله الصوت اشحالج الغاليه
    عفاري: الحمدلله بخير يسرك حالي و آآنت اشحالك
    عبدالرحمن : الحمدلله بخير انا من سمعت صوتج .. آآمم حد عندج
    عفاري: لا محد بس دقيقه بطلع خاري وبرمسك خلك ع الخط ولا اتسكر
    عبدالرحمن: آآوكيك الغاليه خذي راحتج بس لا اتطولين علي لانه عندي كلام و آآ[يه اقول لج
    عفاري: آآوكيك تمام
    وظهرت عفاري من غرفتها ونزلت وسارت برع في الحوش وبدون ما اتقول ما تلتفت صوب اي حد من هلها وبالذات عبدالحميد اللي كان يالس برع وي اخوه يوسف وعيال عمه البقيه
    عفاري: هلا عبدالرحمن سوري تاخرت عليك
    عبدالرحمن : افا عليج حبيبي ما تاخرتي ولا شي
    عفاري: آآآمــــمــ شو الكلام اللي بتقوله لي خرعتني بكبري ارتجف والله
    عبدالرحمن: لا اتخافين فديتج الكلام اللي بقول لج بس ماعرف كيف ابتدي
    عفاري: قول لا تستحي مني افا عليك كلي اذان صاغيه لك
    عبدالرحمن: عفاري انا من اول ما شفتج حبيبتج وخاطري اعيش العمر كله معاااج وما يفرقني شي بينا الا الموت والله الشاهد اني احبج و آآغليج آآكثر من روحي بس ماعرفت كيف اوصل لج شعوري .
    عفاري بصمت : ومنصدمه ما توقعت انه عبدالرحمن في يوم من الايام بيحبها او يعشقها واتكون ملكه له بس
    عفاري: ماعرف شوا قولك يا عبدالرحمن آآنت فاجاتني الصراحه بس لازم آآكون وياك صريحه
    وبكل شي قبل لا تخطي هااي المرحله
    عبدالرحمن : آآآوكيك حبيبي اتفضلي انا اسمعج قول اللي عندج
    عفاري: آآنا كنت أحب ولد عمي بس لاسف هو ما بادلني نفس الشعور لانه قلبه امتلك وحده غيري
    وجريب عرسه وانا ابي انسا كل اللي بيني وبينه وادفنه حبه بعيد عن قلبي وابي قلب يفهمني وافهم مشاعرها اتجاهي : هذا اللي كنت بقول له لك
    عبدالرحمن: وإن شاالله آآكون الأنسان اللي بقدر اسعدج واعوضج عن كل اللي راح انتي لا تخافين واوعدج اني بسوي لج احلى عرس ووباحلي قاعه فديتج
    عفاري : آآن شاالله وانأ بعد أقدر آآسعدك و وأعيش وياك طول العمر حياتي

    عبدالرحمن : شوفيج حبيبي بشوا تفكرين ياقلبي
    عفاري: ماشي فديتك افكر كيف اني بقدر اسعدك واعيش العمر كله وياك
    عبدالرحمن: ماعليه حبيبي لا اتفكرين ولا شي بس اللي ابيه منج انه تهتمين في عمرج ولازم تاكلين واايد
    عفاري ::آآن شاالله من عيوني باكل قد ما اقدر بس عسب انته ما تزعل
    عبدالرحمن: حبيبي متا بترقدين
    عفاري: ما برقد آآحينه بتم سهرانه اليوم وي بنات عمي
    عبدالرحمن : يعني بقدر آآتصل فيج اليوم حياتي
    عفاري:آآآآآآآآآآآآمم هي تقدر حياتي
    عبدالرحمن : عيل بخليج احيينه بسير اودي امي بيت خالتي وبالليل بدق لج
    عفاري:آآوكيك الغالي دير بالك ع روحك
    عبدالرحمن : ان شاالله يلاه مع السلامه
    عفاري: مع السلامه
    وانتهت المكالمه وعفاري واااااااااااااايد كانت مستانسه من كلام عبدالرحمن ..... وارتاحت له .... عبدالرحمن كان يفكر بعفاري طول الوقت ويفكر بكلامها وبصوتها العذب والحنون... عفاري كانت يالسه برع ع طرف الرصيف مال الميلس واتفكر بعبدالحميد وكيف القدر خذاه منها وبكل سهوله فقررت عفاري انها تدعي له ان الله يوفقه بحياته اليديده
    عبدالحميد: عفاري ممكن اتكلم معاج اشوي ابي اقول لج شي
    عفاري: اتفضل انا آسمعك وكلي اذان صاغيه لك
    عبدالحميد: آنتي بعدج اتحبيني ولا خلاص بتنسيني وبتنسين الحب اللي عطيتني اياه
    عفاري: انا مستعده انسا الحب اللي ضيعته عشانك بس انت الله يوفقك بحياتك اليديده وانت اخترت اللي تبيها
    عبدالحميد: يعني انت لين احيينه اتحبييني و مستحيل تنسين حبج لي صح
    عفاري: عبدالحميد انت خلاص انت انتهيت من حياتي وانا ما آكرهك لانك آنت أخترت البنت اللي تبيها واتحبها من قلبك
    عبدالحميد: عيل انا آآقولج انه قلبي بعده يفكر فيج حتى لو عرست مستحيل انسا حبج لي
    عفاري: آآوكيك آآنت حر وهذي حياتك موب حياتي
    ابتسم ابتسامه انرسمت ع شفاته وكان قلبه يقول لا تتسرع في اتخاذ قلبك وبهاي السهوله . عفاري كانت هاديه طول الوقت ومارمست ولا نطقت بكلمه غير انها اترد له ابتسامه حلوه من ع شفايفها .. ويت العنود فجاه هاي البنت اتحب اتطفر بالواحد وكله اتلعوز عبد الحميد واخوها يوسف
    العنود: اشوف الحلوين قاعدين وي بعض شعندكم شوا تقولون لبعض
    عبدالحميد: ولا شي يالسين انسولف عن العرس وجي
    عفاري:: آآنا بسير تامروني بشي
    العنود: يلسي لاه انا ابي اسولف وياكم اشوي اااف منج عياره
    عبدالحميد: يلسي لا اتروحين بنسووولف بنجمع الشله كلها ايون يلسون ويانا
    عفاري:: آآوكيك بيلس
    وراحت العنود تزقر البنات والاولاد عشان ايلسون وي بعض ويسولفون وايبون وياهم آآووونو عشان يلعبون
    ريم: امنو بيلعب آآآآووونووو
    عبدالحميد:::::: آآآنا بلعب وياج
    دانه :: وانا بعد بلعب معاكم صبروا لا تخبصون الاوراااق
    حمدوووه:: وآآنا بعد بلعب معاكم
    خلوني اخبركم كيف يالسين امسوين دائره عبدالحميد امجابل آآخته دانه وريم امجابله حمده وبدو يلعبون لين خسرت الريم و طلعت برع الللعب وكملوا اللعب وخسرت الدانه وظهرت برع اللعبه وتمت اتسب حمدوووه لانه هي خسرتها خيخي وبقت حمده وعبدالحميد بيشوفون امنو بيفوز على الثاني طبعا الذكيه حمده حطت الكرت وبدون ما نتبه انه عبدالحميد فاز عليها
    يوسف: يكلم خليفه انه يبا يلعب كيرم خلووف يلاه خلنا نلعب كيرم
    خليفه :: آآوكيك يلاه تعال عشان نغلب هايل الزعاطيط العنود و وخلوود
    يوسف: يلاه عيل فوووقه عيل والله برشكم رش عيل بتندمون ع اللعب اللي بتلعبونه وياااي
    خلود:: يعني واايد واثق من عمرك ياخوي
    العنود:: خليه يوثق بعمره وبنشوف امنو اللي بيفوز
    يوسف وخليفه: آآوكيك بنراويكم نحن
    خلوني آآخبركم كيف يالسين امسوين ع شكل مربع ويوسف امجابله العنود وخليفه امجابل خلود
    وكل مره خليفه يدخل ع العنود وبدور وكل مره حد يدخل لين فاز اخر شي خليفه عليهم كلهم ... وعفاري كانت يالسه بس تتطالعهم وهم يلعبوووون
    عفاري: الريم هاتي لي كاافي وحليب كوفي شوك ليت
    الريم: اوكيك بيبت لج بعد تبين شي ثاني
    والعنود: عفاري شوفيج ليش ما يتي تلعبين ويانا
    عفاري: مالي خلق آلعب بس ايلس اطالع احسن
    عبدالحميد : يرمس اخوه يقول له انه انا جرحت عفاري بدون سبب هي شو ذنبها اذا حبتني
    يوسف: خلاص انسا انت بتعرس وطيف عفاري بيروح بسهوله لا تحاتي ولا اتشيل هم انت
    طبعا الكل يعرف معزة عفاري عند عبدالحميد كان يعزها آآكثر عن روحه بس احييينه عفاري كرهته عشان هو بيزوج وبيكون ملك لغيرها ... بس الحمدلله عفاري ما بينت له شي وتبا اتوضح له انه هي ما تغيرت عليه ولا عمرها بتكره مثل ما هو يتوقع بيكون العكس تمام ...

    كــــــــــــــــــــــــــــــــــــــــــــــــــــــــــــــــــــــــــ BRBــــــــــــــــــــــــــــــــــــــــــــــــــــــــــت
    شو تتوقعون بيصير يوم العرس ؟؟
    عبدالرحمن بيتقدم حق عفاري ؟؟
    عبدالحميد شو تتوقعون بيكون ردة فعله اذا انخطبت عفاري؟؟؟​
     
  4. لسعـۃ ع ـَـَذآب

    لسعـۃ ع ـَـَذآب ¬°•| عضو مميز |•°¬

    الجزء الرابع
    يوم الحميس الكل مرتبش في عرس عبدالحميد والكل فرحان ومستانس وعفاري ودانه والريم وحمده كانوا بعدهن بصالون يتعدلن .. عفاري كانت امخلصه بس باقي لها تلبس الفستان وتركب السياره واترد البيت ع طول
    عفاري: اقول بنات انا بروح آآوكيك بنلتقي بالفندق
    حمده: صبري انا بخلص وبروح وياااج
    عفاري :آوكي يلاه بتريا
    الريم: أأوف و أأخبرا خلصت تعبت والله كل اشوي عيوني ادمع من ها الجحال
    الدانه: يلاه ما عليه ترى الا هي ليلة وحده خلينا نستانس فيها
    الريم: يلاه اوكي خلينا انرووح عند عفاري نبا نلحق بعد نحن
    الدانه: يلاه عيل خلينا انرووح خاطري اشوف عفاري كيف بتظهر بالميك آآب
    حمده: واو اتخبلون والله طالعات آآحلى عني بيملون مره
    الريم: لا والله بالعكس الحلا كله من صوب عفاري
    عفاري: وين حلوه عاااد آنا الا خسفه بكبري
    الدانه : لا اتقولين جي عفاري وربي انج حلوه
    خلوني اخبركم كيف لابسين .. عفاري لابسه فستان كت ولونه فوشي وطالع عليها كيوت من تحت اي منفوووش اشوي وراسمه عيونها رسم تذبح الواحد وبوت لونه فوشي واكسسوار عليه ورد وكله لمعه .. حمده لابسه فستان كت ولونه بنفسجي فاتح وكله كرستال وامرصع بالمعه ومن تحت منفوش وراسمه عيونها رسم يجنن عليها وطالع شكلها كيوت. الدانه لابسه فستان وردي وطالع عليها كيوت وخاصه انه مرصع بالكرستال اللي يلمع وراسمه عيونها رسم فنان ويطير العقل.. الريم كانت لابسه فستان لونه آحمر وكان عليه كيوت وكله مرصع بالكرستال الزين والغاوي وراسمه عيونها رسم حلو والاطقم كلهم نفس عفاري ......
    ف قاعة الحريم:
    لطيفه: اييه ليلوه والله بصيح اخاف مابا اظهر جي يدامه
    ليلي: خليج عااديه ويوم تظهرين ابتسمي للكميره و لا اتبين لهم انج خايفه
    آآمون: مثل ما قالت لج ليلوه خليج عاااديه ولا اتخافين كوني وااثقه
    لطيفه: آآوكيك ان شاالله ما يصير شي ويعدي اليوم ع خير
    ليلي و آمون :إن شاالله خير لا اتحاتين
    بقاعة الريايل الكل مرتبش وشالين الدنيا من الاغاني واليوله
    عبدالحميد: يلاه ايييه خلوني ارزف وياكم اشوي عن خاطري
    يوسف : يلاه اوكيك تعال ارزف شو وراك آآنته
    داخل قاعة الحريم طلعت لطيفه شرات الملاك والورده اللي تمشي بخفه ورقه والذيل اللي يسحب من وري فستانها كانت خبال مثل الملاك.. والبنات يصفقعن ويرقصن فوق ع الكووووشه والجو كان روعه داخل خيمة الحريم ..
    الريم: عفاري وين سايره اشفيج
    عفاري: بروح الحمام وبرجع لكم ما بتاخر
    الريم: آآآوكيك برايج عيل
    حمده :أأقول الريم شو رايج انسير نرقص والله وناسه من متا ما رقصت
    الريم: يلاه عيل فووووقه خلينا انسير
    ولطيفه كانت مستانسه وبنفس الوقت ما كانت تدري انه بعد اشويات بيدش المعرس فلازم تتغشا عشان ما تتوهق يدام الحريم ويوم بيدش عليها ... وفجاه تم اعلان عن دخول المعرس وتغشت لطيفه بالطرحه مالت الفستان .. وطلع عبد الحميد ع الكوشه وباسها ع رااااسها وتصور وياها كمن صوره عشان اتم ذكر
    عبدالحميد: مبروووووك غناتي تستاهلين كل الخير
    لطيفه وبكل خجل : الله يبارك فيك حبيبي
    عبدالحميد : شو ما سمعت شو قلتي
    لطيفه وهي مستحيه من الخاطر: حبيبي
    عبد الحميد: عيون حبيبج امري فديتج
    لطفيه : عيل وين بنت عمك المزيونه خاطري اشوفها
    عبدالحميد وهو يتلفت يمين ويسار : ما ادري ما شفتها انا اليوم
    وفجاه من قاعة الاغاني والطرب عفاري كانت مووجوده وبايدها المايك عسب اتشل شلة بحضر زفافك ياحياتي
    عفاري: لو سمحت ممكن تعطييني المايك
    الفنان : ممكن ليش لا اتفضلي المايك عندج شو تبيني احط لج اي غنية
    عفاري:مشكور انا بروحي بغني اغنيه حلوه حابه اهديها للمعرس وللعرووس
    الفنان :آوكيك ع راحتج حبوووبه بس انتي تقربين للمعرس
    عفاري:هي اقرب له
    عفاري: وهي ترمس بالمايك :: آآحمم مبروووك يالمعرس تستاهل ومبرووك يالعرووس تستاهلين كل الخير لكن انا بغني آآغنيه اهداء للمعاريس
    عبدالحميد: امنو هاي اللي بتغني انا ما يبت فنانه ولا شي
    لطيفه : والله ماعرف امنو هاي اللي بتغني
    الريم: وين عفاري عيل لين احيينه ما يت من الحمام
    حمده: والله ماعرف وينها ما شفتها لين احيينه يمكن ردت البيت
    الدانه : لا ما ظني ردت البيت
    العنود: عيل وين بتروووح ياربي ان شاالله ما يصير لها شي
    وبدت عفاري اتشل شلة بصوتها العذب والحنون وتبقي احلى الذكريات واتقول فيها:

    بحضر زفافك يا حياتي ..بحضر زفاف اللي هويته
    وبرزف عشانك لا تحاتي ..وبهديك كل اللي بغيته
    بهديك دمعي وعبراتي ..والهم اللي فيني رميته
    بحضر ولو بعرسك مماتي ..شايل معي قلب نسيته
    واجمل قديم الذكرياتي ..والظيم اللي منك خذيته
    وبذكر ليالي الماضياتي ..كنت الوليف اللي اهتويته
    كنت الذي لجله اباتي..ساهر ونومي ما هتنيته
    بهديك في ليله وفاتي...حلم الليالي لي طويته
    واعطيك من قلبي امنياتي ..تلقى الهنا بدرب مشيته
    وتعيش في راحه وسباتي ..ويا الذي عقبي لقيته
    بحضر زفافك يا حياتي ...بحضر زفاف اللي هويته


    وخلصت عفاري الشله ودموعها ع الخد مسكوووبه تمنت انه هاي الليله هي اتكون فيها العروس ولابسه فستان ابيض.. وطبعا الكل مصدوم بصوتها العذب والحنون محد كان يتوقع انه عفاري بتشل هاي الشله ويدامهم وبدون ما اتخااف وفجاه طلعت عفاري وراحت صوب عبد الحميد وسلمت عليهم وراحت بدوون اي كلمه بس البنات شافوا عفاري وحسوا بالمعاناه اللي هي فيها
    الريم: اكيييه عفاري اهناك قومي خلينا انروح صوووبها
    الدانه: يلاه عيل بسرعه انسير صوووبها
    حمده : كانت سابقتنهم بالطلعه بس ما قدرت تحلق عفاري
    الدانه: اشفيج
    حمده: خلاص عفاري راحت ما بنقدر نلحقها
    العنود: ليش وين سارت
    الريم: وين راااحت وليش ما قدرتي تلحقينها
    حمده: حاولت اوقفها بس ما قدرت عفاري كانت اتصيح
    خلص العرس وراح عبد الحميد ولطيفه بالفندق عشان باجر بيسافروون ماليزيا اسبووع وبيردون
    وكانت احلى ليله عند عبدالحميد ..آآما عفاااري كانت يالسه ع البحر واتصيح من خاطرها وكانت الساعه اربع الفير ولين احيينه ماردت عفاااري البيت
    الريم: ااافف عفاري لين احيينه ماردت ياخوفي الا يكون صار لها شي
    الدانه : والساعه صارت اربع الفير وهي لين احيينه ما يت
    حمده:: افف ياربي وينه اشو صاير فيها حتى ع الفون ما ترد
    العنود: وانا نفس الشي اتصل واترد يارب ما يكون صار لها شي
    الريم: آآكوه عبدالحميد دق شوا قول له احيينه
    الدانه: قولي له الصدق بعد شو
    الريم: الو هلا عبدالحميد شحقه هاد مرتك ومتصل فيينا
    عبدالحميد: آهلين برايها الحرمه وينها عفاري
    الريم: آآمـــمــ عفاري لين احيينه ماردت وكل ما نتصل فيها ما اترد علينا
    عبدالحميد: شوووه لين احيينه ماردتت كله بسبي انا ياليت تسامحيني ياعفاري
    الريم: عبدالحميد احيينه الندم ما ينفع انت تزوجت روح عند مرتك احيينه ولا تشغل بالك فيينا عفاري بترد لا تحاتي
    عبدالحميد: اوكيك خلاص بس طموني عيل عليها
    الريم: ان شاالله بنطمنك يلاه عيل برايك مع السلامه
    عبدالحميد: مع السلامه
    عالبحر عفاري كانت يالسه اتفكر بكل شي وباحلى ذكريات قضتها مع ولد عمها وفجاه رن فونها كان المتصل عبدالرحمن .
    عفاري: الووو هلا عبدالرحمن
    عبدالرحمن: اهليين عفاااري اشحالج اشفيج ما اتردين ع فونات
    عفاري: تمام اسفه الفون كان ع السايلنت ولا سمعته
    عبدالرحمن : شوفيج عفاري صوتج مووب عايبني انتي وين احيينه
    عفاري: ما فييني شي بس تعبانه اشووووي انا ع بحر دبا يالسه بروحي
    عبدالرحمن : امعصب : شووووووووووووه ع البحر بروووحج وفي دبا شو اميلسينج لهاي الحزه
    عفاري: مضايجه ياعبدالرحمن والله اللي فييني امكفييني
    عبدالرحمن: بسبب العرس صح وقولي الله يسامحه بس احيينه نشي وروحي البيت حياتي وارتاحي
    عفاري: هي بسبب العرس خلاص بروح البيت اول ما اوصل بطرش لك رساله وبخبرك اني وصلت
    عبدالرحمن: اوكيك حبيبي ديري بالج ع روحج وبتريا المسج منج
    عفاري: اوكيك يلاه مع السلامه
    عبدالرحمن: مع السلامه فديتج
    ركبت عفاري السياره وراحت صوب البيت ودخلت وكانت الساعه بعدها اربع ع الفير عفاري كانت راده البيت بصوت مبحوح ومتغير وباين عليه التعب والارهاق وعيونها الحمر اللي من الصياح . فجاه البنات شافن عفاري تنزل من السياره والكل سار صوبها وخايفين عليها
    الريم: عفاري وين كنتي خوفتينا عليج
    عفاري بصوتها المبحوح : كنت ع البحر وماكان لي خاطر اسولف وي حد
    الدانه : والله اتصلنا فيج اكثر من مره بس كنا خايفين عليج
    العنود: شوووفي كم مكالمه في فونج وانتي ما اترديني
    حمده: اييه بسكم فجوا اشوي عنها خلوها تتنفس بروحها تعبانه عفاري خلينا اندش الميلس
    عفاري: لا اتحاتون ما فييني شي انا بخير كاني يدامكم
    دشوا البنات الميلس العود كانوا فراشين فراش عشان يرقدون بس ما رقدوا عشان عفاري كانت متاخره وخايفييين عليه
    الدانه: تتساسر الريم واتقول لها طرشي مسج حق عبدالحميد طمنيه
    الريم: آآوكيك وظهرت الفون
    المسج : ياخوي ترى عفاري ردت البيت ارقد وانت مرتاح لا تحاتي عفاري
    ما فيها شي
    وصل المسج حق عبدالحميد:: طووووووووووط طوووووووووووووووط
    عبدالحميد: خير ان شاالله امنو ها المتفيج اللي يطرش مسج عند الصبح
    لطيفه: يمكن حد من خواتك يبن يطمننك ع بنت عمك
    عبدالحميد: يمكن خليني افتح واشوف امنو امطرش لي المسج
    لطيفه: الصراحه كسرت خاطري بنت عمك وهي يوم يت اتسلم علينا حسيتها انها اتحبك من الخاطر
    عبدالحميد: ماعليج بيها الاحسن مني وان شاالله خير ها المسج من اختي الدانه
    لطيفه: شوا تقول لك
    عبدالحميد: تتطمن عفاري بخير وما فيها شي ردت البيت وهي تعبانه
    لطيفه: الحمدلله انه ما صار لها شي
    الساعه تسع في فندق الشارجه كان عبدالحميد يجهز آآغراااضه عشان يلحقون ع الطيااره وتجهزت لطيفه وكانت جاهزه ومستعده انها اتسافر ماليزيا وي ريلها والحمدلله راحوو صوب المطار وركبوا الطياره ..
    عبدالحميد: كان يالس وحاطر ريل ع ريل وحاط يشرب ديو يبا يقهر لطيفه
    لطيفه: بالماصخ عتني ديو ولا انت فالح تقهر ني بس
    عبدالحميد: ههه يلاه ما بعطيج كيفي ياخي مالي اافف
    لطيفه: اونا زعليت برايك اشرب وانا برقد عنك وعقب سولف ويا ليدار برووحك
    عبدالحميد: كسرتي خاطري يودي اشربي العصير وانا بطالع الفلم
    لطيفه : مشكور حياتي وانا بعد بتابع الفلم وياك
    عبدالحميد : قلاده ياربي انزين شوفي
    لطيفه: كيييييفي ياخي بطالع الي ابيه لووول
    في بيت بوحمد
    الساعه تسع الصبح في الميلس عفاري نشت من وقت وكانت يالسه اتابع فلم هاري بوترع قناة mbc max وكان الكل راااااقد وعفاري الوحيده اللي ناشه .. وعقب نشت الدانه وسارت تغسل ويها وشافت عفاري محد وخافت اكثر وما نتبهت انه عفاري يالسه اطالع التلفزيون

    الدانه: عفااااري وينج وين سرتي ااافف
    عفاري: الدانه انا اهني يالسه بالغرفه الثانيه اطالع فلم
    الدانه : خرعتنييني عليج يالدبه ااف يلاه بغسل ويهي وبي عندج
    عفاري: آآوكيك بترياج .. وفجاه يرن فون عفاري
    عبدالرحمن : الو هلا عفاري فديتج اشحالج
    عفاري: الحمدلله زينه ما نشكي باس
    عبدالرحمن : شو حد عندج شكلج ما اترومين اترمسييني
    عفاري: هي عندي بنت عمي بس تقدر اتسولف عاادي
    عبدالرحمن : آآمـــمــ انا بي بتقدم لج من بعد ما يرد ولد عمج من السفر
    عفاري: خلاص تمامـ حياكم الله في أي وقت وبكون ع اتصال ان شاالله
    عبدالرحمن: اوكيك بس عطيني رقمـ حد من هلج عسب انحدد موووعد وي اخلج
    عفاري: أأأمــمــ ها رقم آآبوي ******\050
    عبدالرحمن : آآوكيك عيل حبيبي بنيكم نحن ان شالله وبيكون ابينا اتصال
    عفاري: آآوكي يلاه عيل مع السلامه
    عبدالرحمن : مع السلامه
    في ماليزيا اليوم كان أأخر يوم حق المعاريس واليوم بيردون البلاد ان شاالله .. وفي بيت بوحمد الكل مرتبش لانه اليوم عبدالحميد بيرد من السفر ... الا عفاري كانت اتفكر كيف بشوفه كيف بتحمل اني اعيش وياااه بنفس المكان كيف وبشوف مرته أأأفف
    آآآبو عبدالحميد: حد سار ايب عبدالحميد من المطار ولا محد سار
    أأبو غيث: هي يوسف ايبه ولا اتحاتون
    آآآبو خليفه: آآبو منصور قم نش انسير انيب فواله وغيره حق البيت
    آآبو منصور: يلاه انسير عشان ما نتاخر واتوفتنا الحلويات وغيره اللي بتسويه آآم منصور
    الكل ماعدا(عفاري) ههههههههههه ما تحاتي غير بطنك انته يا بو منصووور
    آآم منصور: عفاري سيري سوي سويت انتي والدانه والريم
    عفاري: ان شاالله بسير احيينه بسوي لكم سويييت
    آآآم غيث: الدانه يلاه نشي ساعدي عفاري بنت عمج
    الدانه: ان شاالله احيينه بسير وياه وبنسوي
    الريم: آآنا بسوي معكرونه وثريد
    عفاري: انزين سوي اللي بتسوينه الدانه هاتي لي الطاسه والبيض بسوي كنافه
    الدانه:اوكيك آآحينه بيه بس صبري اشوي علي
    عفاري : آآوكيك وبنسوي سويت بالتمر اكيد بيعيبهم مثل كل مره
    الريم: وسوي بعد حلاوة جوز الهند بس باكافي نباها
    الدانه: عيل انا بسوي ايس كريم
    وتموا يشتغلوا لين ما خلصوا من الحلويات وغيره وتمت عفاري اتسوي حلاوه كان عبدالحميد يحبها وااايد وقرت انها اتسوي ثلاث صحون ويوم خلصوا من المطبخ راحو برع سوا صالونه حق الثريد وكل شي عليهم اليوم .
    آآم حمد: اشعندك يالس اهني يا بو غيث قم نش هب عليك بس فالح ازط آآنته
    آآبو غيث: حرااااااااااام عليج يدووه والله اني ماكلت شي غير هاي الحلوى اللي يابتنها عمتي
    آآم حمد: هب بطن عليك يلاه قم نش سير هات لنا عصير طازج
    آآبو غيث: ان شاالله يدوه احيينه بسير ايب لكم كم غرشه تبون
    دخل يووووسف البيت وكان مخترش وحالته حاله ويقول حق اهل البيت هوووود هوووووووود
    يا آآهل البيت المعرس والعروووس وصلوا من السفر يلاه قربوا حياكم الميلس
    يوسف: حياك عبدالحميد توه مانور البيت يالغالي
    عبدالحميد: امنور بوجودك يالغالي وقريب ياخوي الا وينهم العرب
    آآم خليفه: السلام عليكم توه مانور البيت يا عبدالحميد
    عبدالحميد:امنور بهله يا مرت عمي
    آآم خليفه: حياج يالطيفه ليش وااقفه قربي البيت بيتج
    لطيفه: قريب يا آآم خليفه عيل وين البنات وآآم منصور و آآم حمد و آآم غيث
    آآم خليفه: موجودين احيينه بيون
    ودشت آآم منصور و آآم حمد و آآم غيث وسلموا عليهم ويلسوا يسولفون لين قالوا بس وكل وااحد يقول رايه بالعرس اللي سواه حق عبدالحميد ولطيفه ... ويضحكون عليهم
    الدانه: السلام عليكم ورحمة الله وبركاته اشحالك عبدالحميد الحمدلله ع السلامه
    الكل وعليكم السلام والرحمه
    عبدالحميد: الحمدلله بخير والله يسلمج يا ختي
    الدانه: مديم انشاالله لطيفه اشحالج عشاج بخير
    لطيفه: الحمدلله بخير وانتي اشحالج
    الدانه : الحمدلله بخير
    الريم : السلام عليكم اشحالك عبدالحميد
    الكل وعليكم السلام والرحمه
    عبدالحميد: بخير الله يسلمج
    الريم: لطيفه اشحالج شخبارج
    لطيفه : الحمدلله بخير يسرج حالي
    العنود: السلام عليكم وانا اقول ليش البيت امنور آآثريه عبدالحميد رااااد من السفر
    الكل وعليكم السلام والرحمه
    عبدالحميد: خخخخ يوزي عن هاي الحركات
    لطيفه : صدق انج خريشه يالعنود
    العنود: من يومي خريشه والخريش راااكب راااسي
    الكل(ههههههههههههههههههه) الحمدلله والشكر مينونه العنوووود
    عبدالحميد: عيل وين عفاري وحمده مالهم حس ولا خبر
    الدانه : حمده احيينه بتي لكن عفرووووه ما ادري عنها
    عبدالحميد: هي زين عيل
    حمده: مرحبا الساع بالمعاريس ياليدايد اشحالكم
    عبدالحميد: مرحبا فيج الحمدلله بخير دامج انتي بخير
    لطيفه: مرحبا فيج نحن الحمدلله بخير
    حمده: مديم ان شاالله
    اشووويات ويحدر ابو منصور و آآبو خليفه و أأبو غيييث و أأبو حمد يتخاشمون وي عبدالحميد
    بس.. نسينا عفاري تبون اتعرفون هي وين عفاري كانت واااقفه صوب الباب اترتب شيلتها
    بس ما بخبركم شو لابسه وشوا مسويه ..
    عفاري: السلام عليكم الحمدلله على السلامه عبدالحميد
    عبدالحميد بصدمه ما توقع انه عفاري تغيرت:: الله يسلمج يا بنت العم
    عفااري: الحمدلله ع السلامه لطييفه
    لطيفه: الله يسلمج يا عفاااري
    عبدالحميد: يزقر الدانه ويقول لها انه تلحقه .. الدانه تعالي وياي برع اشوي ابيج
    الدانه: يلاه اوكيك بي احييينه
    آآم منصور: عفاري سويت كل شي خلصتوا اللي عليكم
    عفاري: بصوت مبحووح : هي خلصنا اللي علينا
    آآم منصور:: حست انه عفاري فيها شي :: زين علي سير خلي البشكاره اتحط لنا الريووووق
    عفاري: ان شاالله احيينه بسير اقول لهن يحطن لكن السفره
    عبدالحميد: اقول الدانه عفاري شو فيها جي متغيره وصاريه محلوه شو اتسوا فيها
    الدانه: تبا الصرااحه عفاري من عرست انته ما قامت تيلس ويانا كله مع نفس وما تختلط مثل قبل
    عبدالحميد: ايوااا عشان جي هي متغيره
    الدانه: الله يعين بس
    وفجاه رن فون أأبو منصور وما كان يعرف امنو المتصل فرد عليه
    أأبو منصور : الوو مرحبا الساع
    أأبو عبدالرحمن : الو مرحبتين ابو منصور يالله حيهم بالشيوخ اشحالك
    آآبو منصور مستغرب امنو ها الريال: الله يحيك بس ماعرفتك امنو الريال
    آآبو عبدالرحمن: معاك أأأبو عبدالرحمن من بوظبي
    آآبو منصور : هلا بو عبدالرحمن اشحالك عااد اسمحلي ماعرفتك
    آآبوعبدالرحمن: آفا عليك يا خوي انا الحمدلله بخير امم ابووومنصور يوم الخميس فااضين انتوا
    آآبو منصور : هي نعم فاضيين ما بنروح مكان
    آآبو عبدالرحمن : عيل خلاص الخميس الياي بني عندكم نحن والاهل عشان نخطب بنتك عفاري حق ولد عبدالرحمن
    آآبو منصور: حياك الله في اي وقت بتورنا
    ابو عبدالرحمن: امنور بوجودك يالغالي يلاه عيل نلتقي يوم الخميس مع السلامه
    ابو منصور علي خير عيل نلتقي مع السلامه
    منصووور: ابوي امنو هذا اللي بي يوم الخميس
    آآبو منصور: وااحد من الربع ياين يخطبون آآختك عفاري حق ولدهم
    عبدالحميد: شووووووووووووووووه يايين يخطبون عفاري
    ابو منصور : اشفيك هي ياين يخطبون عفاري حق ولدهم ليش فيها شي
    عبدالحميد: عفاري تعالي ابيج اشوي
    عفاري: خير شو عندك قول اهني ويدام اهلي
    عبدالحميد منصدم ما توقع عفاري انه بتكره وبهاي الطريقه وعاادي يسوي شي ويخلي عفاري تندم ع الاسلوب اللي كلمته فيه
    عيدالحميد: يعني ما بتين اووكيك برااايج بس تحملي اللي بيج
    عفاري: موووب خاايفه منك

    وظهرت عفاااري عنهم من الميلس ولا سوت له سالفه ورااحت يلست برع ع الحصا اتفكر في عبدالرحمن ومسرع ما كيف خطبها وكل شي صاار بسرعه ولحقها عبد الحميد
    عبدالحميد: عفاري وصمخ ما تسمعين يعني يوم ازقرج
    عفاري: لا ما اسمع شو تبا مني احيينه
    عبدالحميد: عفاري شو ياج تغيرت علي جي
    عفاري: خلاص روح مابي اسمع منك شي انا لا تغيرت ولا شيااته بس انت بطريق وانا بطريق
    عبدالحميد: لاه اشوف لسانج طال علي يابنت حمد وصفعها كف محترم خلها ويها احمر
    عفاري:كيف تتجرا وتضربني ليش اصغر عيالك انا تضربني
    عبدالحميد: اسكتي ترى والله يخلي الدم ينزل منج لين اتقولين بس
    والكل سمع الصريخ اللي برع ورااحووا صوووبهم عشان يهدوون عبدالحميد لكن عبدالحميد ضرب عفاري ضرب لين طلع منها دم وطاحت ع الارض ممغمي عليها والدموع مسكوبه ع الخد
    لطيفه: عبدالحميد حرام عليج شو سوت لك عشان تضربها جي
    عبدالحميد: آآنتي مالج خص انا حر باللي اسويه
    منصور: يوم بتكون اختك اضربها لكن مالك حق انك تضرب عفاري ويدامنا بعد
    خليفه: هي صدقه منصور ليش ضربتها شو سوت لك هي حتى ماغلطت عليك ولا مدت ايدها ع مرتك
    عبدالحميد: عيل بخليها تزوج ووواحد ما انعرف شو فصله واصله
    آآبو منصور: انت مالك خص وعفاري هي اللي بتعرس موب انته فاهم واحيينه روح عن ويهي
    لا اقوم اصفعك احيينه
    عفاري نشت وراااحت صوب سيارتها وركبت وشخطت على 180 وراااحت تتمشا واتصيح من خاطرها وعبدالحميد متحسف ع اللي سواه في بنت عمه وجان يركب سيارته ويحلقها لين نزلت عفاري من السياره وسارت صوب بحر دبا ونزل عبدالحميد ورااه وسيده ركض صوووبها
    وحضنها بالقووو وهي اتصيح من خاطرها ..
    عبدالحميد: عفاااري دخيلج سامحيني والله موب قصدي اني امد ايد عليج بس انتي تغيرت علي وااايد
    عفاري وهي اتصيح: انا ماتغيرت انا سويت جي بس عسب ابتعد عنك وعن مرتك مابي اسوي له مشاكل
    عبدالحميد: فديتج والله سامحييني اقص ايدي لو انمددت عليج مره ثانيه
    عفاري: امسامحتنك بس وخر عني ابي انتفس اشووويات
    عبدالحميد: نق من الضحك عليها كانت اشوي بتموت: انزين وخرنا وي رااسج يلاه ركبي سيارتج خلينا انرد البيت
    عفاري: زين بنرد بس موب احيينه
    كـــــــــــــــــــــــــــــــــــــــــــــــــــــ BRBــــــــــــــــــــــــــــــــــت
    شو تتوقعون عفاري بتوافق على عبدالرحمن ؟؟
    تتوقعون انه عفاري بترد اترمس عبدالحميد شرات قبل؟؟​
     
  5. لسعـۃ ع ـَـَذآب

    لسعـۃ ع ـَـَذآب ¬°•| عضو مميز |•°¬

    الجزء الخامس
    بعد مروور ساعه من الاحداث
    عفاري ردت البيت هي و عبدالحميد بس ما كانوا يعرفون شو غير راي عفاري الكل يتحرا انها ما بتسامح عبدالحميد بس الكل استانس من عبدالحميد وعفاري اللي ردت لهم ..
    عفاري: بلاكم تتطالعوني جي كانكم اول مره اتشوفوني
    العنود: ماااشي بس مستغربين لا يكون تصاحلتوا وي بعض
    عبد الحميد: هي تصالحنا ليش فيها شي ويرد يطالع مرته
    عفاري: ما انروووم عليك يالدب بس عينك عن اتطيح
    الكل ماعدا( لطيفه لانها كانت مستحيه ) هههههههههههههههههههههه
    عفاري: آآقووول لطييفه شو راايج انرووح العزبه بنركب ع الخيووول
    لطيفه: هي يلاه برووح ويااكم خاطري اركب الخيل من زمان ماركبت والله
    الريم: هي والله عفاري خلينا انرووح من زمان ما سرنا صوب العزبه
    العنود: فديتج عفاري والله يبتها ع العووووق خلينا انسير
    عفاااري: خلاص عيل يلاه بنروووووح بس لا اتخبرون هايل الدببه والله ما بيخلونا انسير
    لطيفه : عيل عبدالحميد امنو بيخبره والله بيصفعنا هذا
    الدانه : هي والله شو بيفكنا من لسانه هذا بعد اافف
    العنود: عفاري شو بتسوين احيينه خبريينا
    حمده: هي صح انا بسير فوووق بجهز الاغراااض بدون محد يشوفنا
    الريم: اتري حمده انا بي وياج بس لازم نسمع خطتة عفاري
    خلود: عااادي اي ويااكم خاطري اني اركب الخيل
    عفاري: هي عاادي خلود شوووفيج انتي منا وفيينا
    خلود: مشكوره فدييتج عفاااري
    عفاري: سمعوا الخطه احيينه نحن ما بنرووح بالسياره اووكيك وبنظهر من الباب الخلفي لانه محد بيشوووفنا بس تحملوا اظهرووون اي صوووت ترى والله بنكشف جي
    الكل اوكيك ما بنظهر صووووت
    طبعا الكل راح الغرفه وخذوا اللي يبونه عسب يرحون العزبه وشلوا وياهم اكل عشان ما ايوعون اهناك وطلعوا البنات من الباب الخلفي بدون ما يظهروون اي صوووت... وكانوا البنات يمشون لانه العزبه مووب بعيده عن البيت وبعد دقاايق وصلن البنات العزبه وفي البيت الشباب جابلبين الدنيا وهم يدورن ع البنات وهب امحصلينهم ..
    عبدالحميد: هايل وين سارن دورت انا تحت وما لقيتهن
    يوسف: حتى انا ادورتهم بالميلس ومالهم حس حتي لطيفه محد
    منصور: حتى بغرفة عفاري مووب موجودين
    خليفه : والعثره وين سارن هايل انا دقيت حق حمده وماردت علي
    عباادي: قوموا خلونا اندورهم بالميلس الثاني يمكن يكونون اهناك
    رشووود : هي خلونا انروح اهناك يمكن يكونون موجودات
    عبدالحميد: المشكله انه سيارة عفاري موجوده بالجراج معقوله يكونون في بيت عمي
    يووسف : ما ظني بس ما مندر وين راحن هاااايل
    في العزبه البنات كانوا يالسات يفكرون بطريقه عشان يخبرون فيها الشباب وتمت عفاري اتفكر كيف يخبرون فيها الشباب لانه اهلهم محد سايرين دبي يشترون اغراااض خاصه للبيوت من بعد مافكرت عفاري بخطه عسب اتخبر فيها الشباب .
    عفاري: بنات يتني فكره انا بدق حق منصور وبغير صووتي اوكيك وبقول انه البنات اللي ادورون عليهم في العزبه
    لطيفه: والله فكره ياعفاري يالله عليج فيهم
    خلود: والله انج ذكيه عفاري ع امنو طالعه خيخي
    حمده: بس قبل نركب ويوم انخلص بندق لهم جي احسن
    الريم: كلام حمدووه صح ياعفاري خلينا نركب احيينه يعني لو وصل الشباب العزبه ما بيخلونا نركب
    الدانه: اوكيك صبروا بس نحن بنركب قبل لا ايون عشان ما ناكل لنا هزاب محترم شو رايكم
    العنود: انا معاكم بالخطه عيل نركب احسن عفاري عشان والله ما بيخلونا نركب عقب
    عفاري: اوكيك يلاه فوقه نركب الخيول بس تحملوا وحده اتقول لي اني اخاف
    الكل آآوكيك عفاري يلاه انسير
    لطيفه: الله خيل امنو شكله كييييوت
    خلود: ها خيل عفاري اسمه غرااام
    لطيفه :هي ما شاالله وااايد حلوو شكله
    وركبوا البنات الخيول و تمن يتمشن بالعزبه كلها لين ملوا البنات وقالوا انهم بيرحون اشوي لانهم تعبوا من كثرا ما يحطووون بالعزبه ..
    الريم:: عفاااري اول مره اشوووفج جي خياله ماشاالله عليج
    العنود: هي والله اول مره انشوووفج جي ما شاالله عليج امنو علمج
    عفاري: امــمـ اللي ع ملني ع ركوووب الخيل عبدالحميد هو اللي علمني
    لطيفه: ما شاالله عليج طلعتي مووب هييينه
    الكل( ما عدا عفاري) هي والله ما شاالله عليها طلعت خياله رقم واااااحد
    عفاري: ايييه خلوني اتصل فيهم
    الريم: يلاه دقي لهم عسب ما يسون لنا سالفه
    لطيفه: ع امنو بدقين احييينه
    عفاري: بدق حق عبدالحميد يلاه اشششششششش
    ترن ترن ترن فون عبدالحميد يرن وما كان يعرف امنو متصل فييه فقال برد يمكن حد من ربعه
    عبدالحميد: مرحبا
    عفاري : مرااحب اخوي
    عبدالحميد مايعرف امنو اللي متصل فيه: اامم السموحه اختي ماعرفتج امنو انتي
    عفاري وهي ماسكه الضحكه : بعيت اخبرك امه نحن شفنا بنات ظاهرين من البيت وسايرات االعزبه
    عبدالحميد:: شوووووووووووووه بنات سايرات العزبه انتي متاكده
    عفاري: هي متاكده ويلاه مع السلامه وسكرت الخط سيده
    عبدالحميد: اقول لكم البنات في العزبه يلاه نشوا انسير لهم
    يوسف: احلف انهم بالعزبه
    عبدالحميد: والله انهم اهناك يلاه خلونا انسير
    منصور: يلاه دقيقه بشغل السياره
    خليفه: والله براويهن هايل كيف يرحون العزبه بدون ما يخبروونا
    وراااحو الشبااب صوووب العزبه واتريوا البيدار يفتحون الباب .. وكانت عفاري بعدها ع الخيل تتمشا وناقعه ضحك ع المقلب اللي سوته حق عبدالحميد .. دشوا الشباب العزبه ونزلوا من السياره
    وتموا يدورن ع البنات والجو كان بارد من الخااطر.. اشوي خليفه شاااف عفاري على الخيل وانصعق لانه اول مره يشوووفها عالخيل ..
    خليفه: اقول شبااب اكووهم اهناك وااقفات
    عبدالحميد امعصب : اااااااااااااااااااايييييييييييه انتوا شقايل تظهرووون من البيت بدون ما اتخبرووونا
    يوسف: انزلي من ع الخيل ورمسي شقايل تظهرون من البيت بدون ما اتقولون لنا
    عفاري: اشعندكم اتصارخون علينا اتقول اصغر عيالكم نحن
    عبدالحميد: جااااااااااب ولا كلمه ولا ترى بيرج بكف محترم
    عفااااري: اضرب مووب خااايفه منك اصلا
    منصور : انزين ليش تظهروون من البيت بدون ما اتخبروونا
    لطيفه: نحن كنا بنخبركم بس عفااااري قالت عقب بنخبركم
    عبدالحميد: لا والله احلفي بس انتي
    عفاري: هم مالهم خص انا اللي قلت لهم وهااي فكرتي اصلا موووب فكرة اي حد ثاني
    عبدالحميد يجرب من عفاااري ويصفعها كف محترم ع ويها .. طبعا الكل انصدم منه عبدالحميد لانه هااي ثاني مره يمد ايده علي عفاري
    منصور: انت اشفيك ما تعرف غير تضرب
    عبدالحميد: والله ما ادري كيف مديت ايدي عليها
    يوسف: عااد انت تحلم انها تسامحك هااي المره
    عفاااري : اضرب ياعبدالحميد ماعااااد يهمني ضربك
    لطيفه : عفاري هدي لا اتعصبين
    الريم: انت شووووه من البشر كله اتمد ايدك
    الدانه : عفااااااااااااااااااري صبري لا اتروووحين دخيلج
    العنود: عفااااااااااااااااااااري لا اترووحين اتري
    خلوود: انت قلبك قاااسي وانسان اناني
    حمده: ليش جي اتسوي انت شو امسووويه لك هي كل ها عشان ما خبرناكم
    وطلعت عفاااري من العزبه وهي ع الخيل كانت مقهوره والدموع في عيونها ... عبدالحميد بغا يلحقها لكن لطيفه ومنصوور ما خلووه خلوها ع راااحتها وجان يقول حق الشباب خذوا البنات ورحوا البيت انا برجع عقب .. وقعد عبدالحميد يصيح ومنتدم ع اللي سوااه فركب خياله ورااح يدور ع عفاري لين حلصها وشافها وااقفه صوب البحر ع الخيل
    عبدالحميد: عفاااري سامحييني دخيييييييييييييلج والدموووع في عيونه
    عفاري:..................
    عبدالحميد: دخيلج ردي على لا تسكتين
    عفاري:..............
    عبدالحميد: عفاااري والله اسف اااااااااااااااااااااااااسف
    عفاري سوت له طاااف ورااحت عنه ما اهتمت له وفي خاطرها والله ما اسامحك ياعبدالحميد وبتشوووف الزووود مني وان ما خذت عبدالرحمن ما كون انا بنت امي وابووي.. دشت عفاري البيت وكان وراه عبدالحميد والاهل كانوا موجودين ..
    عفاااري: السلام عليكم
    الكل ( وعليكم السلام والرحمه
    آآم منصور: من وين يايه انتي
    عفاااري: من العزبه كنت ادرب ع الخيل
    آآو منصور: ان شاالله تدربتي عدل
    عفاري: الحمدلله تدربت عدل يلاه انا بسير اسبح وبقعد ع النت
    آآم منصور: برااايج عيل سيري
    عفاري: اوكي برايكم وطالعت عبدالحميد بنظرة احتقار ورااحت
    ابو منصور: عفااري
    عفاري: هلا ابوي امر
    آآبومنصور : باجر بيونا ناس عشان يخطبوون فكري عدل في المووضوع
    عفاري: ان شاالله ابوووي يلاه تشاو
    لطيفه: عبدالحميد تعال اشوي ابيك
    عبدالحميد:انزين بي
    لطيفه: آنت زعلان مني حياتي
    عبدالحميد: لا موووب زعلان منج حبيبي بس ع الاقل جان خبرتونا
    لطيفه: خلاص حبيبي انسا عفاري سامحتك
    عبدالحميد: لا وما اظني بتسامحني بعد اليوم
    في غرفة عفاري الله توها ظاهره من الحمام اكرمكم الله كانت متسبحه وراحت صووب التسريحه ومشت شعرها ولفته بتوكه كلها ورد وقلوووب وشغلت لاب مره وحده وفتحت المسن وشاافت المي اون لاين وقعدت اتسوولف معاه
    عفاري ׫ I really can't × .. see me .. × without you »×
    هلا والله بالمي اشحالج اشتقت لج حيل وربي
    المي(●● ياخذون الي يبونه [ كل ] هالعالم وكونه ,, الا قلبك يتركونه لاتمس)
    آهلين عفاري انا بخير انتي اشحالج وانا ابعد اشتقت لج
     ׫ I really can't × .. see me .. × without you »×
    انا الحمدلله بخير .. شوا تسوين فديتج
    (●● ياخذون الي يبونه [ كل ] هالعالم وكونه ,, الا قلبك يتركونه لاتمس)
    مااشي يالسه ملانه وطفرانه من حالي والله
    فديتج والله انا احيينه بخليج بسير اتعشا
    (●● ياخذون الي يبونه [ كل ] هالعالم وكونه ,, الا قلبك يتركونه لاتمس)
    اوكيك الغاليه بالعافيه عليج وبباي
    ׫ I really can't × .. see me .. × without you »×
    الله يعافيج ومع السلامه
    في صباح يوم الخميس الساعه عشر في بيت بوحمد كانوا آهل عبدالرحمن موجودين في بيتهم وياين يخطبون عفاااري حق عبدالرحمن . خلوني اعرفكم ع عبدالرحمن : شعره طويل وابيضاني وسيم اشوي ويعلب رياضيه ويشتغل بالشرطه وعمره 23 سنه ويحب عفااري واايد
    آآبو عبدالرحمن : ونحن لنا الشرف انه نحن اناسبكم يا بو منصوووري
    ابو منصور: تسلم يابو عبد الرحمن وعبدالرحمن مثلي ولدي وبنتي هي مثل بنتك
    ابو عبدالرحمن : تسلم هذا من طيب اصلك يا بو منصور
    ابو منصور: عيل انا بترخص وبسير اشوف ام منصووور
    وراح ابو منصووور صووب ام منصوور يشاروها بالموضوع وعسب هي اتخبر عفاري عن الموضوع وتسالها واتشووف ردها
    بعد اسبوع من خطبة عفاري تم الرد على اهل عبدالرحمن وخبروهم انها موافقه وحدوودا متا الملجه وكل شي
    الدانه: فديييييييييييتج عفااري بتعرسين مبرووووووووووووك فديتج والله تستاهلين كل الخير
    عفاري: الله يبارك فييييييييييييييييييييييييييييييييييييييج
    كــــــــــــــــــــــــــــــــــــــــــــــــــــــــ BRBــــــــــــــــــــــــــــــــــــــــــــــــــت
    شو تتوقعون عبدالحميد بيسوي ؟
    وشو تتوقعون يصير بالملجه ؟​
     
  6. جعلاني ولي الفخر

    جعلاني ولي الفخر ✗ ┋ جًعًلٌأَنٌيِ وَلِيَ أُلّفّخِرَ أُلٌمًسًرًۇۈۉرً

    شكرا على هذه القصه !!

    وننتظر البقيه !!
     
  7. روح الإمارات

    روح الإمارات ¬°•| عضو فعّال |•°¬

    :cheer: :cheer: اشكرك ونتريا الباقي وينننننه :cheer:
     
  8. alshibli

    alshibli ¬°•| مراقب عام |•°¬ إداري

    يسلمووو ع القصة،،
    في انتظار البقية،،
     
  9. رواضي

    رواضي ¬°•| عضو مميز جدا |•°¬

    يسلموا ع القصه ما شاء الله مبدعه ..
     
  10. صقر آلبريمي

    صقر آلبريمي ¬°•|مـכـتـآر [آכـبـﮗ]ولآ [آטּـسآﮚ]ـ |•°¬

  11. عاشق البريمي AM

    عاشق البريمي AM ¬°•| عضو فعّال |•°¬

    مشكور ع الطرح

    لاكن بصراحه ما قريت غير الجزاء الاول منها وسموحه
     
  12. بدوي آلبريمي

    بدوي آلبريمي ¬°•| فخر المنتدى |•°¬

مشاركة هذه الصفحة