مستشفى البريمي.....وأم ناصر

الموضوع في 'مركز أخبَار وقَضَايَا مُحـَافَظة البـُريمِي' بواسطة إنسآنـﮧ, بتاريخ ‏16 مارس 2010.

  1. إنسآنـﮧ

    إنسآنـﮧ °• الفريق الأخباري التطويري للمحافظة •°

    بسم الله الرحمن الرحيم​

    بدون مقدمات,,,,




    أم ناصر.......أم فـ الأربعينيات من عمرها تعاني من السكر والضفط وتتعالج فـ مستشفى البريمي شرات كل هل البريمي....

    من شهرين بالضبط يأتها حساسية فـ جسمها تعبت لدرجة أنها ماكانت قادرة تتحرك من فراشها صداع وخمول وجسمها تقطع والحساسية غيرت حتى لون جسمها تخيلوا حتى عيونها فيهن حساسية ماتقدر تبرق وجلد جسمها صار يطير ويتقشر....

    راجعت كذا مستشفى بس ماشي فايدة وسارت عن مطوع بعد ماشي فايدة غير الكريمات اللي من الصيدليات والدهون اللي قاري فيهن مطوع....ماشي فايدة

    بس هالحرمة الطيبة وقفت عن أكل الحبوب اللي عندها كلهن ماعدا حبوب السكر والضغط..
    والحمدلله صارت حالتها أحسن.... مع العلم أنها تأخذ حبوب كلسترول وهشاشة العظام بعد من مستشفى البريمي...

    قبل اسبوعين ردت ع أم ناصر نفس الحالة وأن شفتها بعيني حتى رأسها ماتقدر تشله من عالمخدة...وجسمها رد يتقشر ويحسس حتى من الماي....تخيلوا حتى شفايفها صار لونهن أسود....وسألنها شوكلتي؟؟وشوشربتي؟؟؟

    قالت:ماكلت إلا حبوبي قبل ماأرقد...أي حبوب؟؟؟
    حبوب الضغط والسكر وهشاشة العظام؟؟


    أمس كانت أم ناصر عندها موعد الصيدلية خذت دواها وردت بيتها....
    وفاليل...كانت أختها عندها ويالسه تراويها الدواء تقوللها شوفي ياأختي هذا الدواء اللي خذته ذالك اليوم عن هشاشة العظام......أختها مدرسة من شافت الدواء وقرت الوصفة اللي داخل "هذي أول مرة يعطون أم ناصر دواء هشاشة العظام فـ كرتونه وبورقة التعليمات" تغير لون ويه أختها........
    وصارت ضجه فالبيت غير عادية الكل يدعي من صوب واليده تتحسب والتيلفونات......

    ليش؟؟؟؟؟؟؟؟

    لأنه دواء هشاشة العظام اللي صارفينه حق أم ناصر واللي بغت تموت بسبته..

    طلع أسمه تريجتول"Tregtol"......دواء الصـــرع....

    أم ناصر...بغت تموت من دواء الصرع...واللي تأخذه على أساس أنه دواء هشاشة العظام...



    هذي قصة أم ناصر ومستشفى البريمي....وباقي نعرف عيالها شوبيسون.....​
     
    آخر تعديل: ‏16 مارس 2010
  2. a picky girl

    a picky girl ¬°•| مُشرِِفَة سابقة |•°¬

    وين الخبر؟؟؟
     
  3. a picky girl

    a picky girl ¬°•| مُشرِِفَة سابقة |•°¬

    الله يكون فعونها ,واتمنالها الشفاء العاجل....شكرا اختي على الخبر
     
  4. ما ينحني راسي

    ما ينحني راسي ¬°•| عضو مبتدى |•°¬

    تسلمين اختي ربي يعافيج نحن بصراحه
    محتاجين لناس مثلج تظهر مثل هاي الاخبار
    بالرغم انهم يتكتمون على مثل هاي الاخبار
    والله يعينها وبصراحه يحق إلها تقاضيهم
    وكذي احين بتخلين الناس يشيكون ويتاكدون
    من ادويتهم الله يعلم بعد شو عاطينهم
    والله المستـــــــــــعان
     
  5. الهيثمي

    الهيثمي ¬°•| عضو مبتدى |•°¬

    الله المستعان من الأخطاء الطبيبة
    نصحتي رفع دعوى تطالب بها تعويض عن الخطأ في صرف الدواء
    حتى ماتمر المسألة مرور الكرام
     
  6. βlậćҜ Ĉάt

    βlậćҜ Ĉάt ¬°•| عُضوٍ شًرٍفٌ |•°¬

    الله يشفيها
     
  7. أبو سلطااان

    أبو سلطااان مؤسس و رئيس الفريق التطويري إداري

    ربي يشفى أم ناصر و الله يعينا على مثل هذه الأخطاء الخطيره و من حقها تتطالب بما تسببت به من ألم و معاناه و كذلك حتى لا يقع نفس الخطاء لغيرها ..
    ألف شكر ...
     
  8. رعشة هدب

    رعشة هدب ¬°•| عضو مميز |•°¬

    اسأل الله العظيم رب العرش العظيم ان يشفيها ويشفي جميع مرضى المسلميين,...

    الى متى هذي الأخطاء الطبيه ..الي المفروض ما ينسكت عنها ممكن تؤدي بحياة الناس....مثل حالة ام ناصر ربي لطف فيها........بس المفروض عيالها مايسكتون
    ......المفروض يشتكو على الدكتور نفسه الي كتب الوصفه وعلى المستشفى حتى يتفدون الخطاء هذي في المستقبل
     
  9. |[ اليآزيهـ ]|

    |[ اليآزيهـ ]| :: إدارة الفريق التطويري :: إداري


    مش اول حاله
    وابشركم بعد مابتكون اخر حاله

    مدرستي الله يقومها بالسلامه
    كانت امرأه حامل
    ويوم ربت سارت مستشفى البريمي عشان توضع
    بنجوها بالغلط مرتين
    ولين يومكم الحرمه في غيبوبه لاتسمع لاتلكم ولا شي.!!

    ويوم قاضوا الدكتور محد سوالهم شي..!!

    الله كريييم..~

    وربي يشفي ام ناصر ان شاء الله^^
     
  10. سقوط المطر

    سقوط المطر ¬°•| مشٌرٍفةِ سابقة |•°¬

    يالله بستر فالدنيا والاخره .....................................
     
  11. السنـافي

    السنـافي ¬°•| عضو فعّال |•°¬

    مستشفى البريمي وايد اخطاء تصير فيه ولهذا السبب ما اسيره ولااعالج فيه حتى للاشياء البسيطة
    والله يشفي ام ناصر من المفترض ان ما ينسكت عن هالخطا
    شكرا لج
     
  12. صرناخ البريمي

    صرناخ البريمي ¬°•| إداري سابق |•°¬

    ( إنســانه )

    بالفعــل دواء ال ( تريجتـول ) يستخـدم لعـلاج المصـأبين بنوبـات الصــرع ( الله يبعدهاعنـا وعن جميـع المسلمين ) ^^

    وخطـأ كبيـر مثـل هذا كأن كفيلآ بأن يؤّدي بحيـاة ( ام نـاصر ) لولا ملاحـظه اختـهـا لعلبـة الدواء والتغييـر .. ونحمـد الله بأنها لاحظت الاختلاف في صرف الادوية ^^

    وبمـا ان ( ام ناصر ) معتـاده على صـرف الدواء عن طـريق ( مواعيد الصيدلية ) فهذا دليـل كافي بأن ( الدكتـور ) ليـس له ذنب في ذلك لأن ( ام ناصـر ) صـرف لها الدواء من قبـل اكثـر من مره وكانت النتائج إيجابية .. ولكـن الخطأ على ( الصيدلي او الصيدلانيـة) الذي صـرف هذا الدواء ولا بــد من محاسبــته على هذا الإهمال ^^
     
  13. لمسة إحتراف

    لمسة إحتراف ¬°•| عٌضوٍ شَرًفِ|•°¬

    خبر مؤسف..

    متى بننتهي من الاخطاء الطبي..

    الله يعون ويشفي امنا ام ناصر..وترجع مثل ما كانت واحسن ..

    نشأل الله السلامه..
     
  14. ريف المحبة

    ريف المحبة ¬°•| عضو فعّال |•°¬

    ربي يشفيها و يعافيها

    اخطاء طبية كبيرة وكثيرة بالسلطنة الله يعينا بس

    حتى انهم مرات ما يشخصوا المرض صح لين يموت الشخص والسبب لين الحين ما حد

    يعرفه

    لين متى هذا التخبط الي عندهم وهذه الاخطاء يمكن لين يقضوا علينا كلنا
     
  15. خُــرَآفـهَ

    خُــرَآفـهَ ¬°•| عضو مميز |•°¬

    دااائما اخطااائهم تقتل البشر


    انا ما اسميها اخطاء اسميها استعباط


    صحيح الانسان مب محروم من الغلط لكن هم غيـــر شكل عاااد


    قبل شهر كنت في المستشفى وسويت فحوصات ما قالولي انه فيني شيء

    ويوم طحت وسرتلهم ميته من الالم


    قالتلي الدكتوره انتي يايه قبل شهر ومسويه فحوصات ما قالولج

    قلتها لا


    يعني مثل أخطائهم واهمالهم ما شيء
     
  16. غالي الأثمان

    غالي الأثمان ¬°•| مراقب سابق|•°¬

    الله يشفيها ويخليها حق عيالها
     
  17. سنيوريتا

    سنيوريتا ¬°•| مُشرِفة سابقة |•°¬

    لا حول ولا قوة الا بالله

    الله يشفيها
     
  18. قلبے ميـھـود

    قلبے ميـھـود ¬°•| »[ نآهبن لـے فـوآدي ]« |•°¬


    لاحول ولا قوة إلا بالله ..
    الله يعينها ...
    يعني لو ماتت الحرمة شو بيسون ..
     
  19. لعيونكـ أشتاقـ

    لعيونكـ أشتاقـ ¬°•| عضو مثالي |•°¬

    للأسف!!


    هذا الطب ف بلادنـــــــــــــا


    الله يشفيها بس..
     
  20. نار الشوق

    نار الشوق ¬°•| عضو مميز جدا |•°¬

    الله يكوون بعوونها
    ويعطيها الصحه والعافيه يارب

    يس معقوله هالكثر ما طالعو الدواء
    اللي صرفوه حقها [​IMG]
     

مشاركة هذه الصفحة