~|| الديـــوان الــشــ ع ــري ||~

[آل يذوه]

جاكم الاعصار

جاكم الإعصـار مـا شـيٍ يعيقـه
منتخبنا اليوم .. وخّر عـن طريقـه
هــذا الاخـضـر لــي لـعــب
جـهــزوا كـــاس الـذهــب
اذكـــــر الله وشــــــوف
وانـسـى الـحــذر والـخــوف
مـــا يــعــرف الــخــوف
مــــن هــــذا فـريـقــه
لعبكم مغنـى فيـه المثـل يضـرب
ولفوزكم معنى .. الكل لـه يطـرب
باخلاقكم نفخـر مهمـا انتصرتـوا
وما نطري غير الفوز .. لامن لعبتوا
مــن واجـــه الاعـصــار ..
مهـمـا صـمـد .. يـنـهـار ..
اذكـــــر الله وشــــــوف
وانـسـى الـحــذر والـخــوف
مـــا يــعــرف الــخــوف
مــــن هــــذا فـريـقــه
خصمكم معذور لـو مـا يجاريكـم
صقورنـا يالخضـر .. الله يقوّيكـم
فـــن وعـــزم واصـــرار..
فـيــه الـخـصـم يـحـتـار ..
مــن يـوقـف الاعـصــار ..!
مــن يـوقــف الاعـصــاااار؟
اذكـــــر الله وشــــــوف
وانـسـى الـحــذر والـخــوف
مـــا يــعــرف الــخــوف
مــــن هــــذا فـريـقــه ​

 

[آل يذوه]

بنفترق

تدرين وادري
تدرين وادري بنفترق
وتدرين قلبي بيحترق
حنا أتفقنا بكل شي .. اٍلا الزمن
عيا الزمن لانتفق
ولاتزعلين .. لو نفترق
قلبكِ خلي .. وقلبي أنا اٍللي بيحترق



ياوردة في كل الفصول .. يافرح عيا لا يطول
قولي واقول
اٍن كان عندكِ لي حلول
يافرحة القلب الحزين .. الوقت يمر
ومالك عذر
كانكِ تبين .. ننسى العمر .. ننسى السنين
ونذوب في حب وحنين
تدرين وش سر الحكايه؟ الوقت يمر

ولكل شي لابد نهايه
وحنا قربنا من النهايه
ومالكِ عذر ..

يابسمه الثغر الخجول
اٍن كان عندكِ لي حلول

واٍن كان ودكِ نتفق
والا ترانا بنفترق

ولا تزعلي لو نفترق
قلبكِ خلي .. وقلبي أنا اٍللي بيحترق




ياحب يادنيا جديدة
يااحلى ابيات القصيدة

اٍن كان جرحي ماكفى .. أنزف لكِ جروح جديده
واٍن كان شعري ماوفى .. أنسى الحكي وأنسى القصيدة

يااحلى أيام العمر .. كثر الحكي وش بيفيد
مابقى عندي صبر .. والجرح في قلبي يزيد

مالكِ,,,, عـــذر

يابسمة الثغر الخجول
ماظن عندكِ لي حلول

وماظن ودكِ نتفق
واحنا ترانا بنفترق

ولا تزعلي لو نفترق
قلبكِ خلي .. وقلبي أنا اٍللي بيحترق​

 

[آل يذوه]

رحل


رحل

رحل اشتاق لجراحه
رحل...

اشتاق لجراحي ... رحل
يحق له طيبتي ماتحتمل

قليلة في وقت الهموم
ما كنت اعاتب أو ألوم

يحق له ما يحتمل ..
هذا الملل ...

اسدلت أيامي لعناده
حبيته في قربه .. وبعاده
متعبه هذي السعادة

رحل اشتاق لجراحه
رحل ...​

​

 

[آل يذوه]

شهر


ياللي تحبيني شهر..
ثم تجافيني شهر ..

ثم تحنيلي شهر..


وتفكري كيف الرجوع كذا شهر ..


وترجعيلي في شهر
ماقد خطر في خاطرك ..
ان السنة اثنعشر شهر

وقتي معك نصفه هموم
ونصفه الباقي اسى..

ولو طبعك القاسي نسى
وبالصدفه جاء مره صباح..

وكلمه منك فرحتني
لابد ما همس الجراح ..

تسمعيني في المسا
ولو تعتب اجروحي عليك..
وتشتكي منك اليك

بترجعي تحبي شهر..


ثم تجافيني شهر ..


ثم تحنيلي في شهر..


وتفكري كيف الرجوع كذا شهر..


وترجعيلي في شهر..


ولا يجي في خاطرك ان السنة اثنعشر شهر

اعذريني لو اقول ..حبك نسى معنى الفرح
اعذريني لو اقول ..وشلون يذكرنا الفـــرح

مادام اذا كنتي قريبه..كل تفكيري يكون
بعدك متى..والى بعدتي ابلا سبب

الاكيد بترجعي..بس الاكيد هذا متى؟
ولو تعب مني الصبر..ومل من صبري العذول

وقلت ياناس اسألوها ..الحب هو كله هجر

ردك يجيني في شهر..
قالوا تقول "ماينتظر ..
بس يشتكي
يصبر علي..
ترى السنة اثنعشر شهر​

 

[آل يذوه]

استاهلك


ابسألك عن حالنا انتي وانا
ياللي احس..انك انا
حالنا ما هو غريب
انا نكون متأكدين ان الفراق ما هو بعيد
بالرغم من جرح السنين
ماهو غريب .. اني لو مرة في همي
نسيت وبكلمة جرحتك
قبل ما تتألمين .. اللي ينزف هو دمي
ابسألك ماهو غريب .. استاهلك
ابسألك لو قلت لك ان الحنان اللي في قلبك
ينبت من الصخر الزهر .. بأستاهلك
وان النهار اللي في خدودك يخلي النسمة عطر..بأستاهلك
وان العذاب اللي في عيونك يعلم الناس الشعر..بأستاهلك
ولو قلتلك اني احبك اكثر من هموم البشر
وكثر الجفاء وكثر السهر ... لو قلت لك
وانك اقرب من عيوني للنظر
كل الذي اقدر اقوله
واللي ما اقدر اقوله
بأستاهلك.. حبيبتي
وباجاوبك ..للاسف ما به احد يستاهلك​

 

[آل يذوه]

مليت

قالت لي مليت..ودي بحد غيرك
جمع جروحك..لملم مشاويرك
واذا قضى صبرك..جرب صبر غيرك
لو اشغلك وعذبك طيفي..ابكي
واذا بكيت اكتب بدمعك شعر اشكي لمراسيلك
وبوعدك اذا صرخ جرحك ونادى..دمعتي تنزل عليك
بضحك على ايامي معك..واخذ على قلبي عهد مايخلص لغيرك
اعذرني..مليت



ماتبيني ملت الصدق المشاعر..يانور ايامي وسنيني اللي مضت
يالظلام اللي بيديني..مابقى فيني بقايا اتركيني
سل الحزن لغدرك خناجر ومالقاني فيني
وجرحي نادى..يامحاجر الدمع مايكفيني
ضاعت بداياتي..بقيت نهاياتي واسأل اجاباتي..هو أنا اخطيت
هو بقى في اللي بيجي ياليت..ماتت اجاباتي
قالت لي..مليت



يا اكثر جروحي الاخيرة..لو عرفتي اليوم قلب ودعك
يا آخر جروحي الكثيرة..ماعرفتي اليوم ما عاد اذكرك
وما اذكر من اللي مضى..الا غرامك والفراق
بعض اللقاء والاشتياق
وكل الاحاسيس الصغيره
يابرد عمري وياهجيره..تخطين لو يخطر في بالك
انك في بالي كل دقيقة..وانك خيالي والحقيقة
واني احبك مهما كنتي..يابرد عمري وزمهريرة
ان كان قلتي اني فقدتك..ماصدقتي
وان كان قلتي مانسيتك..ماصدقتي
لو عرفتي مااذكر من اللي مضالي الا انتي
وما اذكر من اللي مضى الا انتي
وما اذكر الا اني بكيت
وفي ليلة مافيها وفاء..قلتيلي مليت
يا انتي اخر أولي..لاتصدقي اني نسيت​

 

[آل يذوه]

دخون


هو فيه مثلك..ياللي الحسن ظلك


ليه العطر ؟
وانتي انفاسك دخون
وليه الكحل؟
وانتي ماغيرك عيون
وليه تفكيرك يكون
انك تكوني دايم اجمل
انتي اجمل
من جمالك
من دلالك
من خيالك
ياللي كل افراح قلبي والحزن
في المسافة بين فرقاك ووصالك
وليه يالقلب الحنون
تاخذك فيني الظنون
ضيعتي عدلك..هو فيه مثلك..انتي ماغيرك عيون
وانا احبك .. وانتي انفاسك دخون





ياللي احبك..ليه احبك؟
او ليه ماحبك؟
وانتي علمتيني ان الحب كله اسئله ما تنتهي ...
ليه ما احبك وانتي علمتيني ان الحب لا غدا لمثلك ابد ماينتهي ...
ياللي علمتك عذابي والهجر..ليه ما احبك؟

ياللي علمتك تكوني..في ضعف ضعفك..اقوى مني

يا انتي ضحكاتك تغني..وابتساماتك شعر
يانتي ضحكاتك تغني..وكل ما شفتك اصر
انك اجمل من جمالك..من خيالك..من دلالك
على حبك انا..بقفل ابوابي
وبطيوفك انا..باسقي اهدابي
يا انتي..يا انتي احبابي
تصدقين..تصدقين..صدقي
قلبي لكي وحدك..صدقي
ماقوى على بعدك دقايق..بس دقايق





ياظلي .. يا داري
يا اجمل..افكاري..
تظلمني لوتقولي اني عاشق .. بس عاشق
ياللي وحدك تسمعي صمتي وكلامي
ياللي ضيك
..اتعب همومي وظلامي..

صدقي اللي في قلبي لكي
اكبر افكار من القصيد والحكي

تصدقي انك اجمل في عيوني
من جمالك
من خيالك
من دلالك
لا يالقلب الحنون لا تاخذك فيني الظنون​

 

[آل يذوه]

سألتها



سألتها ليه البحر ساكن عيونك ؟
جاوبتني للغرق





سألتها ليه السواد اللي في عيونك ؟
قالت للأرق





سألتها ليه الخدود ؟
قالت عبق





سألتها هي رقتك مثل النسايم و الورود ؟
قالت لي لأ يمكن أرق





سألتها عن حسنها كنه يقول ماللشعر فيني حدود ؟
قالت صدق





سألتها يا اغلى الأنام .. وشو الغرام ؟؟
قالت لي انك ما تنام .. و أوهام
و تنتظر شمس اللقا و ما تجي شمس اللقا
ومشوار ما يعرف وصول
و لحظه بها كل الفصول
و قلب واحد يحترق
و بعض الصدق
و وقت عصيب و يتبعه وقت عصيب
و لين يتعدى الصباح
و جراح تدمى لو تطيب
و في الأخير .. خل عن خل افترق
و في الأخير كل النهايات الفراق
ما في فرص
مافي نهايات بلقا إلا في خيالات القصص





سألتها وش هو الوفا ؟؟
قالت كفى .. النور من ضيي اختفى
و الليل في عيوني غفى
اترك كثير الأسئله .. اسأل عن عيوني و كفى





اسألني ليه البحر ساكن عيونك ؟؟
ليه السواد اللي في عيونك ؟؟
سألتها ؟
جاوبتني للغرق .. للأرق





سألتها عن حسنها كنه يقول
ماللألم فيني حدود؟

قالت صدق ...​

​

 

[آل يذوه]

طابور



لا تقروا ما بين السطور ..
هذي القصة خيال ..
وما لها أبدا علاقة ..
بالذي دار ويدور..
تبدأ القصة بناقم
كُلَفّ يأدي مهمة ..
وكان بايع مايهمه ..
يموت هو أو يبقى عايش..
سهم مُتَعمد وطايش..
من بعيد يسدده..
ويدمي هذاك الثور..
ثور هائج مندفع مجروح..
هائل القوة..
عدائي غاضب ومغرور..
وطابور..
كلهم ناطر ويرجي..
مايجيه الدور..
وفأول الطابور ..
يوقف ثاني واحد..
حيث الأول .. مالقى أحدٍ يساعد..
انتظر فترة طويلة..
وبعد طول الانتظار..
وعلى الملا فوضوح النهار..
أجهز عليه الثور..
ثاني الطابور أول..
فسّر وحلل وأوّل..
قال أنا مالي هروب..
ودوم تايه في الدروب..
وياما قالوا الناس إني..
في جنوني مافي منّي..
وضعي متدهور ويائس..
ببدأ بخلع الملابس..
قال أنا يا ثور عاري..
وباقتناعي واختياري..
بصبح البقرة الحلوب..
ويترك الطابور.. ويتجه للثور..
ويختفوا خلف التلال..
وماحصل صعبه يقال..
الرقابة لا تجيزه..
يرجع الثور العدائي..
يواجه الطابور..
طابور .. كلهم ناطر ويرجي ..
مايجيه الدور..
أول الطابور .. يحمل في يدة باقة زهور..
بادره لحسن النوايا..
يدري هو ماله مزايا..
شاءت الأقدارُ أمرا..
كانت الأزهار حمرا..
وزادت هياج الثور..
طابور.. كلهم ناطر ويرجي..
مايجيه الدور..
باقي الطابور يرجف..
كلهم يدري ويعرف..
وضعهم حالك وهالك..
ضعفهم ينبي بذلك..
كلهم غارق في أصناف البلاوي..
فقر مدقع .. جهل مفزع .. عقل خاوي..
طابور .. خلفه هلاكه والثبور..
وأمامه الثور الجسور..
طابور .. صمته مثل صمت القبور..
ينطر المنقذ يجي..
ويكف بطش الثور عنهم..
أو ينطر الدنيا تدور..
ويصبح الطابور فجأة..
قوة عظمى !!
ويطحن عظام الثور..
بالدور..
أو ربما .. على الأقل .. يصبح الطابور ثور..
والثور طابور..
لا تقروا ما بين السطور ..
هذي القصة خيال ..
وما لها أبدا علاقة ..
بالذي دار ويدور..
آخر القصة .. كهل مجنون..
يوقف على تلة قريبة..
يصيح بالطابور..
يا طابور:
أنت أول وربما آخر أعاديك..
يا طابور:
كل مابك منك وحدك من صنع أياديك
يا طابور:
أسمع كلام الأقدمين
لربما يهديك..
يا طابور:
أمشي عدل.. يحتار ثورك فيك ​

​

 

[آل يذوه]

عجب عجاب

عجب عجاب .. طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون
ياهي جريحه طيبه .. لكن جريحه



عجب عجاب
وسيم أنيق شاب .. كسبه حلال مشروع ماجرب الجوع




ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت
تــخـــونـــه




عجب عجاب كثر الفقر ماله
كلاً يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر يــطــاع
الدول تحسب حسابه
والكل يخشاه ويهابه
لاكن مريض ياعذابه
ممنوع يأكل لو أكل جايز يموت




عجب عجاب
مرتاح الضمير لاسرق لاظلم لاحسد
عنده قليل أصحاب
قلبه كبير بيته صغير
والمرض عن صحته بعيد
عنده ثلاث اطفال
أحمد وايمان ويزيد وامهم
وكثر السماء يحبهم
لاكن فقير مالقاء لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع



عجب عجاب
عبقري في الطب ملحد



عجب عجاب
شاعر عظيم داخله فارغ


عجب عجاب أمير كذاب



عجب عجاب ملايين البشر
تعبد بقر




عجب عجاب
ماتصلي فرضها وتلبس حجاب



ياصاحبي عطني يقينك والظنون
؟..من ودك تكون ​

​

 

[آل يذوه]

احترامي.. للحرامي


احترامي.. للحرامي
صاحب المجد العصامي
صبر مع حنكة وحيطة
وابتدا بسرقة بسيطة
وبعدها سرقة بسيطة
وبعدها تَعدى محيطه
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
صاحب النفس العفيفة
صاحب اليد النظيفة
جاب هالثروة المخيفة
من معاشه في الوظيفة
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
يولي تطبيق النظام
أولوية واهتمام
ما يقرب للحرام
إلا في جنح الظلام
صار في الصف الأمامي
احترامي.. للحرامي
احترامي.. للحرامي
صاحب المجد العصامي
يسرق بهمة دؤوبة
يكدح ويملي جيوبه
يعرق ويرجي المثوبة
ما يخاف من العقوبة
صار في الصف الأمامي
احترامي.. للحرامي
احترامي.. للحرامي
صاحب المجد العصامي
صار يحكي في الفضا
عن نزاهة ما مضى
وكيف آمن بالقضا
وغير حقه ما ارتضى
صار في الصف الأمامي
احترامي.. للحرامي
احترامي للنكوص
عن قوانين ونصوص
احترامي للفساد
وأكل أموال العباد
والجشع والازدياد
والتحول في البلاد
من عمومي للخصوص
احترامي
للصوص ​

​

 

[آل يذوه]

ذبابه
ذبــابه

،،،
ذبابه ،، مرّت على قصر شامخ
عرّفوا معنى الأمن ،، مما يطبق عند بابه
ذبابه ،، من خارج القصر أقبلت
مرّت فوق حراسه ،، وعلى مرآى ومسمع من كلابه
ذبابه في قصر شامخ
به ينتقل ،، أعيان والساسه
مايدخله ،، إلا كبار القوم
واليوم ،، رغم القيود ورغم الجنود رغم الحراسه !!
ذبابه في قصر الرئاسه ،،!!
ماكان الظلام دامس ،، كانت الدنيا نهار
مرّت ومن دون انتظار ،، وقعت على طاقية الحارس
سياره عند الباب تتوقف ،، !!
وفي المقعد الخلفي ،، شايب وقور
تكسو ملامح وجهه الطيبه ،،!
يفتح السواق فيها نافذه ،، ويقرب منه الحارس
وبصوت ،، فضٍ جهور يسأل السواق في ريبه :
- من أنت ؟؟
- من هذا الذي معك ؟؟
- ومالذي تريد ؟
- انا سائق ،، أعمل سائقاً بالقصر
أرسلني سيادة العميد ،، ومعي العالم عبدالغفور
له موعدٌ مع سيدنا الزعيم المنصور
وليست هذه أول مرةٍ يأتي
سبق له الحضور ، كان هنا منذ مده ، قبل فترة قريبه
- أقوالك تبدو مريبه ،، لماذا أنت تحضره ؟ لماذا لم يأيتِ وحده ؟
- لا تكلمني بحده ! عبدٌ أنا ،، مأمور
أرسلني العميد وقال :
أحضر لنا عبدالغفور ، وهاهو ذا عبدالغفور
وفي وسط الحوار ماهو يدور ،، الذبابه تنتقل من طاقية الحارس ،، إلى شارب صقر
إلى ربطة عنق عبدالغفور
تبدو أوراقكما سليمه ،، هيا إنزلا ، وأركبا تلكم السيارة القديمه
وأنت أيها العالم ،، أترك هذه الحقيبة عندي
وأنت أيها الجندي أقلَهما إلى الداخل .
- عفواً أيها الحارس ،!!
حقيبتي كلها أوراق ،، وإحضاري لها هنا له أسباب
وآخر مرة جئنا ،، دخلت بها إلى الحاكم .
- تباً أيها الجاهل ،، تقول الحاكم هكذا بلا ألقاب ؟ قل سيدنا ،، العظيم المهاب ،، ( ويمسك في تلابيبه )
- قل سيدنا ،، قل سيدنا !!
وفي ذعر ،، عبدالغفور يصرخ ،، سيدنا ،، سيدنا
هيا أيها الجندي ،، أقلهما إلى الداخل ، وأنت أيها الجاهل ، خذ الحقيبه
سيارة عسكرية ،، قديمه
تمشي في قصر شامخ ،، وتتوغل ،، تتوغل
وتوقف عند بوابه ،، ومنها الجندي يترجل
وعبدالغفور ، بكل توتر وإرتباك ،، من الشباك يتأمل
يناظر عن يسار ،، دبابه
وعن يمين ،، مدرعه
وحرس مدجج بالسلاح ،، في الجهات الأربعه
وضع متوتر ،، مخيف
وعبدالغفور في داخل السياره ،، حاضن شنطته
وركبة صقر ،، في ركبته ،، والدنيا صيف
وريحة صقر ،، جداً جليه ،، ريحة نفاثه
ويبتدي عبدالغفور من القلق يراقب البطء الشديد في عقارب ساعته
وغير حبات العرق اللي بدت تغزو زوايا جبهته
ذبابه على جبهة العالم عبدالغفور ،، يهشها تطير وتلف وتدور من صقر إلى ربطة عنق عبدالغفور إلى الشنطه
وعبدالغفور ،، تشيله الحيره وتحطه ، ويبتدئ في داخله يتسائل ،، ويتشائم ،، ويتفائل
ماذا يريد الحاكم مني ؟
أهو السلاح الذي يريد تطويره ؟؟ أو أنه أحس أن وضعي سيئ ويريد تغييره ؟
أو عله سيمنحني وسام الدولة الأكبر على الدواء الذي طورت للسكر ؟
ماذا يريد الحاكم مني ؟
ويقطع حبل أفكاره صوت العميد ،، يفتح باب السياره ،،
أهلاً سيدي العالم ،، تفضل هانحن نلتقي من جديد ،،
أهلاً سيادة العميد ،،
أهلا بك ،، سيدنا في إنتظار ، ولكن قبل أن ندخل !
هناك إجراءاتنا قبل الدخول ،، وتحرياتنا تقول :
أنك لست بالشخص الملول ،، أدخل هذه الحجره ،، وسلّم حقيبتك للضابط المسؤول ،، وأخلع ملابسك ، وأغسل يديك بذلك المحلول
،،
ويمتثل عبدالغفور للأوامر ، في ذهول
ويدخل الغرفه ،، غرفه كبيره مستطيله جدارنها من قزاز
فيها جندين والضابط المسؤول قدامه جهاز
كبر الباب ،، وفيما الضابط المسؤول يفتش الشنطه ،، تطير الذبابه من الشنطه وتوقع على الباب ،، ويبتدي عبدالغفور في تردد يخلع الثياب
عبدالغفور ،، هذا طبعه من يومه خجول
بأسلوبٍ رقيق يفتشونه جنود ،، تفتيشٍ دقيق ويدخلونه في الجهاز
وبعد ما يلبس ثيابه ،، ياخذونه للمغسله في آخر الغرفه ويغسلون يديه ،، بالمحلول
ويرافقه الضابط المسؤول خارج الغرفه ،، وتطير الذبابه من الباب ، وتوقع على الشنطه
وعند الباب يضرب الضابط تحيه للعميد ويقول :
وَضعُه مَقبول سيدي العميد
في حنق ممزوج بالغيض ،، عبدالغفور يقول :
ماذا بعد أيها العميد ؟
لا جديد يا عبدالغفور ،، لن تصافح سيدنا ،، سلّم عليه من بعيد .
وهل هذا معقول ؟ إذا كنت لن أصافحه !! فلماذا كان المحلول ؟
عفواً أيها العالم ،، تِلك هي إجراءات الدخول
أفتحوا البوابه ،،
تطير الذبابه من شنطة عبدالغفور ،، إلى كتف العميد
وتُفتح البوابه ،، على أبهى مكان في القصر العتيد
ويدخل عبدالغفور ،، يمشي مع العميد ،، سبحان الحميد
المجيد ،، الطبيعه ،، ساحره
وكل شئ في هالمكان غير
الفخامه ،، الخضار ،، الطير
حتى الهوى ،، غير
وترتسم على وجه عبدالغفور إبتسامه ساخره
فحواها يتسائل ،، كيف يقولوا البلد ماهي بخير ؟
ويلمح عبدالغفور في السما كذا سحابه ،، ويتفائل
وتطير من كتف العميد الذبابه ،، إلى ياقة قميص عبدالغفور
ويجلس عبدالغفور مع العميد
في قاعه ،، كبيره من رخام
فيها مقاعد فاخره ،، لوحات جداً نادره
وفي آخر القاعه باب كبير مذهب ،، واقف بجنبه حارسين
عابسين الملامح ،، ممشوقين القوام
هذا مكتب سيدنا المقدام
عبدالغفور ،، لا تنشى ماقلناه بخصوص السلام
أمرك سيدي العميد ،، من بعيد ،، لا مصافحات
حسناً يا عبدالغفور ،، فلتجلس هنا لحظات
ويدخل العميد إلى المكتب ، وتمر أكثر من دقيقه
وقلب عبدالغفور ،، تتسارع به النبضات
يظهر العميد من المكتب ،، تفضل أيها العالم
سيدنا في إنتظارك ,,
وعندما تخرج ،، ستجدني في إنتظارك ،، إما هنا ،، أو في الحديقه
عبدالغفور ،، سيدنا له موعدٌ مع رابطة الإدباء بعد ثلاثين دقيقه
ويدخل عبدالغفور إلى المكتب
والذبابه لازالت على ياقة قميصه ،، وتتثاقل به الخطوات
وبعد ما يدخل من الباب ،، تجول بناظره عبدالغفور
وتتوقف به النظرات على الحاكم
يرتدي حلّه انيقه ،، ويقرا كتاب قدامه على المكتب
إحترامي سيدي
أهلا عبدالجبار
عبدالغفور ياسيدي ،، عبدالغفور
ماهي الأخبار؟ سمعت أنكم إنتهيتم من تطوير سلاحنا الفاتك البتار
لقد قررت أن استخدمه الأسبوع القادم في معركتنا الباسله
ضد المعتدين الأشرار
ولقد أصدرت أوامري بأن يطلق عليه أسم ( الظفار )
مارأيك يا عبدالجبأر ؟
عبدالغفور يا سيدي ،، عبدالغفور
سيّان ياعبدالغفور ، مارأيك بما عرضت عليك من الأمور ؟
عفواً سيدي ، لكن تذكرون قبل شهرين
انا والعالم أحمد والعالم حسين ، تشرفنا بلقاءكم ورفعنا لمقامكم
بأن تطويره يحتاج إلى مدةٍ تقارب السنتين !!
قلت لي أحمد وحسين ؟ ما أخبارهما ؟
لا أدري يا سيدي ،، فأنا من يومها لم أرهما
أنا أعرف أخبارهما
يالهم من تعساء ،، سمعت أنهم ماتوا ،، هم وعائلاتهم
وأصدقاءهم في الصحراء
وأتضح من التحقيقات ، أنهم ماتوا في حادث سير
وتناثرت جثثهم في العراء
عبدالغفور ،، ما أخبار زوجتك والأبناء ؟؟
ويبتدي عرق عبدالغفور من جبهته يتصبب
تطير الذبابه ، من ياقة قميصه وتوقع على المكتب
عبدالغفور لم تجبني ؟
ما أخبار زوجتك والأبناء ؟
زوجتي مريضه ،، لم تزل سيدي مريضه
تزداد حالتها سواءً ولم يعد يجدي الدواء
وأحمد أبني في الجامعة ، وغداً خطوبة أبنتي شيماء
أما الصغار ،،،،
أسمع يا عبدالغفور
انا لا أريد أن اثور ، ولا أريد أن أغضب
وأريد هذا السلاح في مدة أقصاها شهرٌ على الأقرب
وليس هذا صعباً على عالمٍ مثلك
ولئن لم تنجز هذه المهمة الصعبه كما تسميها
فإن ماستلاقيه مني ،، سيكون أصعب
ومن سوء حظ عبدالغفور ،، تطير الذبابه من المكتب
إلى جبهة الحاكم !!
الزعيم المنصور
وبكل مابه من غضب ،، يصفق بيده جبهته
تطير الذبابه وتوقع على المكتب
يضرب المكتب بعنف بقبضته
وتطير وتوقع على الشباك اللي ورا عبدالغفور
ومع الضجه ،، يجي العميد من خارج المكتب
مع الحرس يركض
يلقى الرئيس غاضب وعبدالغفور مذعور
أمرك سيدي الرئيس !!
أقتلوا هذه الحشرة اللعينه ويأشر على الشباك اللي ورا عبدالغفور
ويستل العميد سكينه ،، ويغمدها في قلب العالم عبدالغفور
ويسقط عبدالغفور ،، جثه هامده
ودمه يضمخ ثيابه
ماهذا ايها الغبي ؟؟
لم أكن أعني عبدالغفور
إنما أعني الذبابه
أنا داخلٌ لإنام ،، الغوا اللقاء المقرر مع رابطة الأدباء
وأحضروا لي ما تبقى لدينا من علماء
واحضروا لي كارولين او لارا في أو كلاهما في المساء
وايقضوني في تمام الساعة الواحده
تطير الذبابه من الشباك ،، إلى جثة عبدالغفور الهامده
ويشيلها الحرّاس إلى البوابه
ويسلموها لصقر وللجندي ،، جثة العالم عبدالغفور
وعليها الذبابه !!
سيارة عسكرية قديمه ،، تمشي في قصر شامخ
وتتوغل ،، وتتوغل
وتمعن في توغلها إلى الخارج
في المقعد الخلفي لها ،، جثه لشايب وقور
وفي الأمام ،، صقر والجندي المخول بمرافقة عبدالغفور
وتوقف عند باب القصر ،، عند الحارس الأول
ومنها الجندي يترجل
ويقرب منه الحارس ،، وبصوت فضً جهور ،،
وبنفس الغباء الأولاني يبتدي يسأل
من أنت ،، ؟؟ من هذا الذي معك ؟؟
ومالذي تريد ؟
أنا الجندي الذي يعمل معك
وهذا صقر ،، أرسلني وأرسله سيادة العميد
ومعنا العالم عبدالغفور ،، عفواً جثة العالم عبدالغفور
هذا إذاً أنتما من جديد !! ياللصدفه
كنت أعلم أن هذا الجاهل سيلاقي حتفه
وفي وسط ماهو الحوار يدور ،، الذبابه تنتقل من جثة عبدالغفور
إلى طاقية الحارس ،، إلى أنفه
وتطير ،، وتلف وتدور وتوقف على راس كلب مسعور من كلاب الحراسه
وينفلت كلب الحراسه ،، تاركٍ قصر الرئاسه خلفه
وبعد مايقطع مسافه ،، يوقف الكلب في خرابه
وتنتقل منه الذبابه ،، وتوقع على فضلات
وعلى بعد ميل من القصر ،، جنب الخرابه بخطوات
متسوله ،، رثة ثياب ،، على الرصيف
معها أبنها ماسك رغيف
قدامهم طاقيةٍ عملات فيها معدنيه
وورقة متآكل طرفها من أوراق البنك نوت
والولد يركل برجله علبة عصيرٍ فارغه مكتوب عليها ،، توت
وتجي الذبابه وتوقع على الرصيف
ومن الرصيف ،، إلى الرغيف إلى الرصيف
جنب طاقية العملات والبنك نوت
ويجي الولد ماسك بيده علبة التوت
ويطوح بها بعيــد وبنعاله الرث القديم ،، يدعس على الذبابه
وتموت !!​

 

[آل يذوه]

بهو فندق

بهو فندق
..بهو فندق
..بلد غربي
..في فصل الصيف
..على ميعاد أو صدفة
..جمع أجناس مختلفة
..ولافيهم أحد وافق
..أحد ثاني
..على تعريف للمنطق
..بهو فندق.. فيه الناس مكتظة
..فخامة تكسي الجنبات
..نادل يحمل الطلبات
..على أواني من فضة
..هنا تجار يحكوا أسهم وسندات
..هنا سمسار
..هنا شاعر.. هنا بنيّات
..هنا فلكي
هنا صاحب سمو حركي
..هنا لاعب كرة بارع
..هنا فنان.. هنا متعهد السهرات
..هنا يحكوا عن الأوضة!.. هنا يحكوا عن الموضة
..!!هنا يحكوا عن السادات
..وبركنٍ ماهو للصفوة
..بجنب الباب
..كرسيين.. حوار يدور بين اثنين
..حيل أصحاب
..ملامحهم تودّي يمّ.. شرق أوسط
..وهيئتهم.. وحالتهم.. بسيطة أو بعد أبسط
شف سايح من اليابان.. يداعب آلة التصوير -
..يغازل آلة التصوير
سايح هذا يا غلبان ؟ -
..هذا السايح البارح
..كانت صورته تحكي
..في صدر الصفحة الأولى
..يقولوا خامس أغنى شخص في العالم
..وأظن أنّه .. وربي وحده العالم
..جمع هالمال والثروة
..من استيراد أو تصدير
..نسى الكاميرا على الكرسي
لا يا شيخ.. مثل هاذول.. ما ينسوا -
صدقني نسى الكاميرا على الكرسي -
..لا والله.. رجع خذها
ظنك وين هو رايح؟ -
..أكيد يزور له متحف
..سخيف
..!هوايته أسخف
..شفه.. مستني يمّ الباب
وش ينظر -
!أظنه ينتظر تكسي
..!ركب تكسي
..أقول عدنان: فاخر حيل هالفنجان
..خذ شايك قبل يبرد
أقول أحمد: هذاك هناك.. هو من هو..؟ -
..أي واحد -
..! هذاك اللي معه واجد -
..تخطرف إنت.. أو عميان
..هذاك فلان
..هذاك اللي كلامه منتهى الحكمة
..وجوده مثل غيث السحب
..هذاك اللي لأجله ترخص أيامك
..وتقضي النحب
هذاك اللي يهينك وانت تتلقى
..إهاناته بصدرٍ رحب
..هذاك اللي شعورك نحوه مبيّن
..مزيج من الولا والحب
..هذاك اللي إذا لا قدّر الله راح
..يغطي حزنك الدنيا
!!......وتهمس.. راح ابن الكلب
كذا يا أحمد..؟
شايفني أنا.. منافق
..أنا مسمح ولا أوافق
..تظن إني بقلب أسود
..كذا يا أحمد-
..لا تزعل.. أنا آسف.. أنا آسف
..ترى الدعوة سوالف
..شف هذا خفيّف دم
..يضحك هذا .. من هذا
..خفيّف دم
..! ويعطونه
يعطونه..؟ -
..يعطونه -
..ويرجع باكر لهذا.. يقطع ذاك
..يشرشح أصله وفصله.. بخفة دم
ويعطونه..؟.. -
..! يعطونه -
..ويرجع بالأخير.. ضاحك على هذا وعلى هذا
أقول أحمد: ظنك هو رصيده كم..؟! -
..دقيقة صمت.. فرضها جيّة النادل
..يشيل الشاي
..!ويقول إنّ العصير.. اللي يبونه لحظتين.. وجاي
..شف الشاعر -
..هذيك الحلوة تضحك له
أي واحد..؟ -
..شفه واقف.. يوقع دفتر لطفلة -
..تخيّل ياخي يقولوا
..بإنه يشتري شعره من الشاعر
..! اللي الشاعر المشهور يكتب له
..ياحظه.. وسيم مشهور
..ياليتي أكون مثله -
..قوم نتصور معه
قوم نتصور معه..؟! -
..ما باقي سوى هاذي
..نكبر راس هالمغرور
..خفيف أنت.. وغبي أحمد
..ودايم فيك هالعلة
..أقول عدنان -
..ترى صاير طويل لسان
..أحمد ياخي لا تزعل.. ترانا اخوان
تعوّذ بس من الشيطان..؟
..وأنا آسف.. وترى الدعوة سوالف
..فخمة حيل هالكيسان
..اشرب.. لا تزودها
..ترى يبيّن عليك تعبان
..شف مو هاذي صاحبتك
..هلا والله.. إلاّ والله صاحبتي
..تدري..؟ تموت هي فيني
..يا رجال.. خليني -
..خادعتك.. تراها والله خادعتك
..أقول أحمد: عشان انسرقت فلوسك-
..من زبيدة
..صرت تشوف كل وحدة
..هي زبيدة
..يا عدنان.. خادعتك -
..أنا قصدي لمصلحتك
..شفها تكلم الرجّال
..أي رجّال.. أخوها ذاك
..يا عدنان.. خادعتك
..أقولك ما تبي غيري
..يا عدنان.. طع شوري -
..مشاعرها.. وهم.. كذبة
..حمد .. احترم نفسك -
..افا عدنان.. تمد يدك علي -
..وهذي السبّة
..صفعه دوّت بركنٍ
..قريبٍ من هل الصفوة
..عراكٍ في بهو فندق
..جمع أجناس مختلفة
..مافيهم أحد وافق. أحد ثاني
..على تعريف للمنطق
خارج صالة الفندق.. شرطيين
..يقودوا بالحديد اثنين
ملامحهم تودّي. يمّ شرق أوسط
..وهيئتهم.. بسيطة أوبعد أبسط
..كانوا أصحاب
..في داخل
..بهو فندق .. بلد غربي
..في فصل الصيف



​

​

 

[آل يذوه]

أحمد محمد سلامه


أحمد محمد سلامه
في زمن وهمي من الأزمان
كان ياما وياما كان ..
سلطنة وسلطان ..
وف يوم من الأيام ..
يتصفح السلطان جريدة ..
موضوع يسترعي اهتمامه ..
أحمد محمد سلامة ..
فـرد من أفراد شـعبه ..
يائس وأوضاعه صعبه ..
في الصبح يشتغل بواب ..
في مدرسة أطفال ..
وفي الليل يشتغل شيّال ..
عنده ثلاث عيال
فيهم مرض نادرعضال ..
ماله علاج إلا فبلدان بعيدة ..
كلفته ما يحتملها وفاقته أصلاً شديدة ..
انسدت الدنيا أمامه ..
وارتأى أن الطريقة الوحيدة ..
لفتح أبواب الأمل ..
انه يوجه ندا .. عبر الجريدة ..
لاهل الكرم .. واهل الشهامة
تبرق .. في عين سلطان البلاد غمامة ..
ويهطل الدمع من عينه ..
يمسح الدمع بكفوفه ..
ويخلع العمامة ..
ويرفع للسما راسه ..
ويقول ..
ياربي الفرد الصمد ..
سترك وعفوك ..
ألهتنا عن الناس ..
أمور الحكم والسياسة ..
ينادي سلطان البلد :
يا حاجب ..
استدعي معالي وزير السلطنة الأول .. رعد ..
يجي رعد .. ويبدي ولاَءه واحترامه ..
ـ صاحب المجد والكرامة ..
سيدي السلطان أمرك ..
ـ أي كرامة يا رعد .. أي كرامة
والمواطن في البلد .. ضايع مقامه ..
اتركك عن هالحكي .. واسمعني زين
هذي مليونين خذها ..
وصلها لمحمد سلامة
أحمد محمد سلامة
خذ الجريدة .. تلقى التفاصيل في الجريدة
لكن اسمع يا رعد .. ما أبي يدري أحد
أحذرك .. لا صحافه .. ولا جرايد
هذي لوجه الله أبيها ..
ويعلم الله .. من وراها ..
ما أبي مدح وقصايد ..
أرتجي عفو الكريم ..
في يوم بالأهوال زايد ..
ـ سيدي السلطان خيرك .. في القديم وفي الجدايد
ربي يجزيك المثوبة .. ويعينك بوقت الشدايد
ـ يخرج رعد .. ويستدعي وزير المال والأحوال ..
مرسال ..
يجي مرسال .. أمرك معالي وزير السلطنه الأول ..
تعال يا مرسال .. فوراً وفي الحال
خذ المليون هذا ..
وسلموه .. للمواطن أحمد محمد سلامه .. من سيدي السلطان
خذ الجريدة .. تلقى التفاصيل في الجريدة
مرسال .. لابد هذا يتم الآن .. فوراً وفي الحال
وبأقصى درجات السرية والكتمان ..
هذي أوامر سيّدي السلطان ..
يخرج مرسال .. ويستدعي كبير الحراّس
فراس .. يجي فراس
أمرك يا وزير المال والأحوال ..
ـ فراس .. تعال
خذ هذي خمسمية ألف ..
سلموها .. للمواطن أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة
خذها الآن ..
فوراً وفي الحال سلمها .. وبأقصى درجات السرية والكتمان
هذي أوامر سيدنا السلطان ..
يخرج فراس .. ويستدعي النقيب ..
حبيب ..
يجي حبيب .. أمرك ياكبير الحراس
ـ حبيب تعال ..
خذ هذي المية ألف ..
سلموها للمواطن .. أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة ..
خذها الآن سلمها .. فوراً وفي الحال ..
وبأقصى درجات السرية والكتمان ..
هذي أوامر سيدنا السلطان ..
يخرج حبيب ..
ويستدعي مسئول المساكن
مازن ..
ـ مازن .. تعال .. خذ الخمسين ألف هذي
سلموها للمواطن .. أحمد محمد سلامة .. من سيدي السلطان
خذ الجريدة .. تلقى التفاصيل في الجريدة
خذها الآن سلمها ..
وفوراً وفي الحال ..
وبأقصى درجات السرية والكتمان ..
هذي أوامر سيدنا السلطان ..
يخرج مازن .. ويستدعي رئيس الحي ..
اللي ساكن فيه أحمد ..
عبد الحي ..
يجي عبد الحي ..
ـ عبد الحي تعال
خذ هالعشرين ألف
سلموها .. للمواطن أحمد سلامه
خذ الجريدة .. تلقى التفاصيل في الجريدة
خذها الآن .. وسلمها لأحمد سلامة
عبد الحي ..
أهم شي السرية والكتمان ..
هذي أوامر السلطان ..
يخرج عبد الحي ..
ويتوجه لمكتبه في الحي ..
ويستدعي مساعِدُه أمين ..
ـ تعال ياأمين .. تعال .. شوف الجريدة
وخذ الألف هذي ..
سلمها لأحمد سلامه
ساكن هناك .. عمارة في آخر الشارع
جنب مدرسة الكرامة ..
الدور الرابع .. شقة ستة
وديها الآن .. وقل له ..
هذي من سيدنا السلطان ..
واسمع ياأمين ..
احرص على السرية والكتمان ..
هذي أوامر السلطان
أمين واقف ورا باب شقة
أحمد محمد سلامة ..
يدق الباب ..
صوت من خلف الباب ..
ـ مين ؟ ..
ـ أنا أمين .. مساعد رئيس الحي ..
عبد الحي
يفتح الباب .. أهلين وسهلين ..
ـ هذا بيت أحمد سلامه
ـ نعم أنا أحمد سلامه
ـ أحمد محمد سلامة ؟ ..
ـ أحمد محمد سلامه ..
ـ ممكن إثبات
ـ طبعاً أكيد
ـ فعلاً أحمد محمد سلامة
سيدنا السلطان .. موضوعك استرعى اهتمامه
سيدنا بيسلم عليك
وحب يطمن عليك
وكلفنا ننقل لك رسالة :
سيدنا السلطان .. أدام الله أيامه
يتمنى للأطفال عندك ..
كل الشفا وكل السلامة
مبروك يا أحمد تستاهل ..
مع السلامة .. !
__________________​

 

[آل يذوه]

جميل محبط


ارفع حجر تلقى مُغني ... اكتب شطر تصير شاعر
اكسب صحافة .. تصير سيّد للثقافة
جميل هذا الوقت مُحبط





اكتب بما يرضي ضميرك .. تصير حاقد
اشتم بحدة .. تصير ناقد
نافق بشدة .. يصير مستقبلك واعد
جميل هذا الوقت مُحبط





اسرق رغيفين .. تصير المجرم السارق
اسرق ملايين .. تصير الماجد الحاذق
جميل هذا الوقت مُحبط





اشرب على وقت العشا .. كاسة نبيذ
واسمع لشوبان .. وارقص الفالس .. تصير متحضر
اطلق اللحية ورتل القرآن وصل الخمس .. تصير إرهابي
جميل هذا الوقت مُحبط





اجرح يهودي .. تقوم هالدنيا وتقعد
اهتك اعراض .. ثكّل يتامى .. شيل بيت وامحي مسجد ... تنوم هالدنيا وتسكت
جميل هذا الوقت مُحبط





عيش هالعمر الوسيع .. وبعد ماتحياه موت
عيشوا هالعمر الوسيع .. وموتوا
الوعد يوم الوعيد .. يوم تنسى الام الطفل الرضيع
عظيم ذاك الوقت .. منصف
__________________​

 

[آل يذوه]

أصدق ما كتبت


اصدق ما كتبت
انتي..تدرين من انتي

تدرين انك لي غديتي كل شي

وانك غديتي شمس ليلي وفي الهجير الفي

وانك اصدق ماكتبت

وانك احزاني وفرحي ..لاضحكت وانجرحت

وانك غديتي ياعذابي اغلى من حبي علي

قبل الحب يا ما كذبني القصيد

وبعد حبك صار يكتبني القصيد

هو يوصفك بسمة وطرف

وأنا اعشقك في كل حرف

منك شكالي..وصف حسنك اتعبه

وانا شكيتك ..وعشقي لحبك اعجبه

ومهما شكى ومهما وصف

انتي احلى ماكتبت..انتي اصدق ماكتبت

وانتي احساسي وجرحي..لاضحكت وانجرحت

وانك غديتي يا عذابي اغلى من حبي علي

.....!تدرين من انتي
__________________​

 

[آل يذوه]

أجهلك


أجهلك .. و لي سنين اتخيلك
اتمثلك في كل طيف .. والقاك في قسمات ضيف
كل المشاعر له تقول .. حنـّا هلك

أجهلك .. ولي سنين اتخيلك
القاك في بعض الوجيه .. ويمرني طيفك واجيه
يا باكر اللي اجهله .. ارقتني الأسئلة
وابطى العمر يستعجلك ..





أجهلك .. ولي سنين اتخيلك
بالعيوب وبالمزايا .. بالألم
لامن هجرتي يجتاحبي ضلوع وحنايا
اتخيل شكوكك وظنك .. اتخيل التقصير منك
حتى الجفا اتخيله .. وكيف انا باتحمله .. واتحملك





أجهلك .. ولي سنين اتخيلك
وجهك اللي قد حبسته داخلي في غمضة عيوني
واللي ياما قد رسمته .. من عبث طيشي وجنوني
وجهك اللي دوم يظهر لما ألقى نشوة الفكرة الجديدة داهمتني
لما القى انكساراتي قصيدة واكتبتني
وجهك اللي دوم يظهر في اعاصيري وسكوني
في الجبال الشاهقة في أجمل خيالي
في السفوح الخافقة بين نبضي وانفعالي
وجهك اللي قد نحته في عظامي والجوارح
وجهك اللي قد حفظته وبتفاصيل الملاح
بالنهار في بسمته .. بالضيا اللي في ورودة
بالعبوس في غضبته .. بالتضاريس وحدوده
من جنوحه في البها .. لين اقصى نقطة في كاسر جماله
للعذوبة .. من شروق النور في ضيه
للشعر في غروبه
من شطوط الكحل في عيونك لنحرك
من بياض الثلج في خدك لجمر ٍ قاد في ثغرك
وجهك اللي ما ابد يوم لمحته .. او عرفته
لي سنين اتخيله .. واتخيلك
ياللي كلي بك معرفة .. واجهلك
ما اصعبك .. كيف الاقيك
ما اسهلك .. لو الاقيك
ياللي دوم اتخيلك
مملكة حسن الزمن
وأنا الملك​

 

[آل يذوه]

الشارع الخلفي

في الشارع الخلفي

تلقى عمود النور

يامطفي

يا مطفي !

تلقى الأوادم خايفه , بالخيل وجعانه
تلقى الأجار المرتفع , والناس عجزانه
تلقى التعب , تلقى الزهق , تلقى المياه الطافحه
تلقى الحقايق غامضة مرّة , ومرّة واضحة

تلقى الرصيف
مثل الزمن , ماهو نظيف
تلقى الحكي مثل السكوت
تلقى الفقر والبهذله , في شكل بويات البيوت
تلقى الزمن معجون
بالحزن والكربون
تلقى الجراح اكوام
شايب , معوّق , منحني , أمّ وثلاث ايتام
تلقى السؤال اللّي كبر , واللّي غدى مخفي
فـ.. الشارع الخلفي !! . ​

 

[آل يذوه]

صدق أو لا تصدق


صدق أو لا تصدق
كل ما تباعدت المسافة بين الرغيف والجوع ،، تلقى الفرح أصدق
تصدق أو لا تصدق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق
صدق أو لا تصدق
كل ما انقفل درب انفتحت أبواب
صدق أو لا تصدق
لو فيه احد طيب ،، للطيبة أسباب
صدق أو لا تصدق
قليل من يعفي ويسامح ،، كثير وده ينتقم بس ينتظر له وقت سانح
صدق أو لا تصدق
القناعة كنز يفنى
ولو كل من ياخذ قنع أ وكل من ياكل شبع
كان الفرح غطى شوارعنا
صدق أو لا تصدق
كل النهايات البداية ،، وأحلى البدايات النهاية
وكلنا رغم القساوة الظاهرة ،، نبكي قدام المرايه
صدق أو لا تصدق
به مطول لحيته والثوب يلمس ركبته
وما قرا في الشهر آية
صدق ،، ان الشعر صدقه اعذبه
ودي احكي لك حكاية وقبلها ابغى لسؤالي اجوبة
المال هذا هو وسيلة والا غاية ؟!
لو ماهو غاية ،، ليه الحروب ؟
ليه الحسد يملا القلوب ؟؟
ليه السلام اللي تمناه الشعوب ؟
وليه الفقير المعدم الكادح ،، بهجته تملى الملاح
لامن لقى ذاك الثري يعطي هذيك المطرية مليون
وهذا الثري لامن سرى من حفلته ،، و وقفت سيارته عند الاشارة
وجاه شايب يطلبه ،، الهم عاثي في وقاره
دق باصابع متعبه ،، على الشباك
قال : انا ياسدي مديون وانت الكريم
يحكون عنك في الجرايد ،، وتقال في جودك قصائد
ويقال انك للأرامل واليتامى عون
ما ابغى منك الا حاجة ،، لبس الشتا لاجل العيال
الله يسددلك خطاك اعطني مما عطاك
واعتدل راعي الملايين الكثير في جلسته
وعقد حجاجه ثم قال :
ألا ما اثقلك واغباك ،، ليه يا اخي ما تشتغل
انت كسول ،، ومستغل
وطلّع من المحفظة فكّه ،، رماها وقفل الشباك
ابغى لسؤالي اجوبة
ليه البر والتقوى مليان في جرايدنا ؟!
وليه هموم هالشارع بعيدة عن قصايدنا ؟!
ليه الفساد ،، ليه الكساد ؟!
وليه الحروب ،، وليه الحسد مالي القلوب ؟!
وشهو الجواب ؟!
اتمنى انه مايكون المال هذا هو وسيلة ماهو غاية
هذي الكلمة النبيلة ،، اخترعها أغنيا
لاجل مسكينٍ شقى يرضى بقليلة
وصدق انت او لا تصدق
ماني الشخص المثالي
كل مافي الامر اني شاعرٍ ماهو يبالي
كان صار اللي اقوله علقمٍ او صار حالي
كل مافي الأمر اني استريح ،، لا مشابي مركبي عكس اتجاه الريح
وما ابرّي من الخطى نفسي
واللي اجاهر به مثل همسي
صدق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعرٍ مطرود من جنة خيالي
صدق اني ما قصدت اني اكون
صوت للي مايبون
صدق اني ماني الشخص المثالي
والا تدري لا تصدق​

​

 

[آل يذوه]

مردخاي


سمعتوا قصة مردخاي ؟!
من زمان ،، قالوا لاخوكم مردخاي
" مردخاي هذا زمانك جاي "
شفت هالأخوان ،، قاتلهم
خذ أرضهم ،، اهدم منازل بعضهم ،، وشردهم
غير معالم ارضهم
وأطمس ملامحهم ،، فرقهم وتصير سيّدهم
وامسك بتلمودك ودينك ،، وبعّثر مبادئهم
وبعد ماتزرع بذور الحقد فيما بينهم !! وتحصد مشاعرهم
قد ماتقدر حيّد اكبرهم
رد له كامل حقوقه
واعزف على اوتار فرقتهم
واضرب أغناهم ،، بـافقرهم
حاربهم ،، بهم
واشعل معاركهم
وبعد مايستنزفوا قوة بعض !
خذ مابقى منهم ،، وفاوضهم
فاوضهم على الفتات
واذا عطوك حق الفتات!!
رجع لهم ربعه ،، وسالمهم
هذي قصة مردخاي سيد الزمان الجاي
عاجبكم ؟!
__________________​