|--*¨ لاحـــظ تــصــور الــشــاشـــة ¨*--|

الموضوع في ',, البريمي لـِ مساحة حرة ,,' بواسطة رثام, بتاريخ ‏27 فبراير 2009.

  1. رثام

    رثام ¬°•| عضو فعّال |•°¬

    السلام عليكم ورحمة الله وبركاته ..


    عقب ما انتهيت من كتابه موضوع ..

    وخذت ( قسط ) من الراحة ..

    جابلت ( التلفزيون ) ..

    تميت أتنقل من قناة لقناة .. ( يالسه آكل أناناس أتعشى اللي فبالي بتذبحني ) ..


    شفت اختلاف في تصور كل برنامج ..

    أو كل مسلسل ..

    أو فيلم ..

    عسب يدخلون الصورة فعقولنا ( ونفهم ) ..



    لو تلاحظون :



    * المسلسلات الاسلامية :


    يصورون المسلمين بملابس بيضا .. والكفار بملابس سوده .. والحواجب غليظه وأصواتهم تخوف .. ( هذا فالافلام القديمه ) .


    أما حالياً فتلقى المسلمين بملابس ملونه بألوان غريبه وتلمع .. والكفار بعقود
    وسلاسل .



    * المسلسلات والافلام ( العصور السابقه ) :


    - العصر الحجري : لازم تلقاهم كشيش .. والقب ( العصا الحجري ) .. واللحيه الخايسه .. ولابسين ملابس ممزقه .. وبعض اللقطات الحرمه يجرها الريال من شعرها ( عنبو هب شعر ) .. وما يموتون يوم يضربون بعض بهالقب أو العصا .


    - الفراعنه : فحدث ولا حرج خط الجحال ( الكحل ) شي غريب .. وحركه اليد
    ( كلكم تعرفونها ) .. ولحيه الريال معقصه او مربوطه .. والحرمه قصتها غاويه .. وملابسهن كانهن عارضات ازياء .. والرياييل فقارى ما يعرفون يلبسون .


    - اوروبا القديمه : الفساتين المنفوشه ( الكلاسيكيه ) .. الايتيكيت .. الغنى الفاحش .. او الفقر والوصخ ( القذاره ) .. والسيطره .. والرياييل كاشخين فكل وقت .. حتى لو بيموت ما يحب يهتز .. ( خقاق ) .



    * المسلسلات الخليجية :

    قبل تلقى المسلسلات الخفيفه .. تموت من الضحك .. وما تشبع منهم ..

    اليوم كله نكد في نكد .. ضرب .. وصفعات .. وصراخ .. وصياح .. مكياج صارخ ( حتى وهي راقده ) .. فساتين وكنادير وتسريحات مبالغ فيها .. تصوير الشعب الخليجي في غنى فاحش ..

    أما كوميديا هالايام فغصب تضحك .



    * المسلسلات العربيه :


    دلع البنت ما ينهضم .. الاكشن يجيب القهر ( سيارة تصيح ويلات فالصحرا ) .. الحرمه أكثر شي تلقاها فالمطبخ تطبخ ..

    وايد يرمسون ويتخققون بالماركات والمواتر .. ووايد يذكرون الفلوس .



    * الافلام الاجنبيه :


    الاكشن مبالغ فيه .. البطل يتفادى الرصاص ويطير .. فالسياسه يظهرون عيوب رؤساءهم ويغسلونهم عقب ما ينعزل ..

    فالسحر ومصاصي الدماء ( الله يلوع جبودهم ) .. العرافه تارسه عمرها
    خواتم وحيل وسلاسل ( مادري كيف تتحرك ) .. يا حبهم يصورون الحرمه رخيصه عندهم .



    * الافلام الهنديه :


    هذيل ربعنا .. الافلام الجديمه البطل ينقز من الجبل وينزل وهو واقف ( خيبه ) .. الحصان يطير .. والسيارة تعفد .. البطل لو ينصاب بكل الرصاصات ما يموت ( قطو ) .. واذا مات البطل .. البطله حليلها لازم تموت .. يموتون عالرومانسيه .

    حديثاُ زاد عندهم التعري .. والرقص ( هذا لازم ) .. والكلمات الهندية اقل من الانجليزيه .. وتصويرهم فالاغلب خارج دولتهم ( مع العلم عندهم مناظر خلابه فبلادهم ) ..



    * المسلسلات المكسيكيه ( الكوريه والتركيه ) :


    عندهم الرومانسيه والحب شي رخيص .. والبطل فالمكيسيه لازم معضل .. والبطله غاويه وعارضه أزياء .. و( التركيه ) اسمحوا لي ما ادانيهم البطل مادري شو ممكن تقول عنه .. والكوريين وايد يهتمون بالعلاقات الاسريه ساعات من تشابه الاشكال لازم تتابع أكثر من حلقه عسب تميز وتحفظ اسماءهم .



    * الأغاني ( الفيديو كليب ) :


    قبل تلقى المطرب أو المطربه واقفين ومن النادر يتحركون ( فقارى ) يأدون اغنيتهم ويتوكلون بكل احترام .. ومن النادر تلقى حد يرقص ..

    وفيومنا .. ( الله المستعان ) شي من النادر تلقى تشاهده ويا العايله .. وكلكم شايفين وعندكم خبر ( ماروم اشرح ) .



    * الكرتون ( الرسوم المتحركه ) :


    يا حليلهم عيالنا .. قبل تلقى ( توم وجيري ) و ( عدنان ولينا ) و ( سالي ) و ( فلونه ) و ( سندي بل ) و ( جونقر ) و ( كابتن ماجد) المباراه تاخذ يومين ويركضون فالملعب من مرمى لمرمى لمده حلقه .............................. الخ .

    وتحولوا عيالنا لشياطين والسبب العنف اللي نلقاه فالكرتون .. افلام كرتونيه من النادر تلقاها تتحدث عن الطيبه والاخلاق أكثر شي ( قتل .. وحرق .. ومسدسات .......... الخ ) ... اسمحوا لي ما اذكر اسماء هالافلام .



    * برامج الحظ والجدل والعلاج الطبيعي :


    والله من اشكال مقدمين البرامج تلقاهم ( لصوص ) مخادعين .. قصوا عالناس بالوصفات .. عنبو شوفوا أشكالهم اللي تلقاه ( حفار قبور ) .. واللي تلقاه ( ساحر ) أو ( شرات المارد ) مادري كيف يثقون بهم .



    * برامج راسين بالحلال ( القنوات ) :


    معقوله كل هالناس يبون يعرسون .. اللي مب لاقي بنت الحلال .. واللي يبا يتزوج مسيار .. واللي توصف نفسها .. واللي يقول أنا غني ( يبا يسحر الي يموتن عالبيزه ) .



    يا ناس يا عالم ..

    وايد ..

    وكثير ..

    وتعبت وأنا اذكرهم ..


    واسمحوا لي اذا غلطت أو بالغت ..



    :patch_music:
     
  2. ولد شيوخ

    ولد شيوخ ¬°•| عضو مميز |•°¬

    كلامج كله صح 100% ومانقول غير ((الله يعين ويهدي))
    ومشكوره على الطرح الاكثر من رائع

    وربي يعطيج العافيه
     
  3. رثام

    رثام ¬°•| عضو فعّال |•°¬

    ولد شيوخ



    الله يعين الجميع ..

    تسلم اخويه ..



    :patch_music:
     
  4. صدق والله ان الله يعين ..

    تسلمين الغالية ع الطرح الجميل والمميز ..

    ولا تحرمينا من جديدك ..

    تقبلي تحياتي ..
     
  5. ليونيل ميسي

    ليونيل ميسي ¬°•| عضو مبتدى |•°¬

    والله اختي الكل صار يتابع الزين و مو زين بحجت التسلية !!!
    الله يعين اللي جاي .

    تسلمين على الطرح القيم ...
     
  6. تسلمين رثام ع الموضوع
     
  7. غٌَ ـلآ بُنٍيً گـ عُ ــبُ

    غٌَ ـلآ بُنٍيً گـ عُ ــبُ ¬°•| םـشُرٍَفٍة سْابِقِهْ|•°¬


    موضوعج يصير خير برد عليه بس سويلي زوم ع هالجمله وذكريني فيها لا شفتج
     
  8. غٌَ ـلآ بُنٍيً گـ عُ ــبُ

    غٌَ ـلآ بُنٍيً گـ عُ ــبُ ¬°•| םـشُرٍَفٍة سْابِقِهْ|•°¬


    وين تلقين حد واقف الكل يرقص حتى المغني عاد لا تعليق ع المودلز ولا ع المكياج واللبس


    خليها ع ربج ها قله ادب اشكره عيني عينك
     
  9. رثام

    رثام ¬°•| عضو فعّال |•°¬

    غريب الاحساس


    مرحبا ..

    سلمت وسلم غاليك اخويه ..



    تحيتي ..



    :)
     
  10. رثام

    رثام ¬°•| عضو فعّال |•°¬

    ليونيل ميسي


    المشكله ان الغث صار منتشر اكثر من الزين ..

    ولكن علينا الاختيار الصحيح ..


    كل الود ..



    :patch_music:
     
  11. رثام

    رثام ¬°•| عضو فعّال |•°¬

    شموخ البريمي


    ومن قال سالم حبيبتي ..


    مودتي ..



    :patch_music:
     
  12. رثام

    رثام ¬°•| عضو فعّال |•°¬

    غلا بني كعب



    هلااااااااااااااااااااااااااااا حبيبتي ..

    ان شا الله من اشوفج بذكرج :patch_swit:


    اما عن الاغاني ( الله يلوع جبودهم ) مادانيهم ..


    مودتي يا حلوة ..



    :patch_lov:
     

مشاركة هذه الصفحة