الأعراس والفرحة المزعجة _

الموضوع في 'مركز أخبَار وقَضَايَا مُحـَافَظة البـُريمِي' بواسطة اليوبيل الماسي, بتاريخ ‏16 يناير 2009.

  1. مرحبا شباب وبنات ،،، اشحالكم عساكم بخير

    طبعاً بتكلم اليوم عن موقف صار معاي البارحة ، كان فيه عرس في مكان يعني في البريمي ، وهذا العرس كالعادة يكون فرحة بين أهل العريس وأهل العروس ويماعتهم وربعهم وطوايفهم ، لتقوية روابط العائلة والنسب وكل هالأمور نحن نعرفها ، ومب معترضين عليها لأنه الزواج تراه مصير الإنسان في النهاية وهو تراه سنة الحياة والإمتداد البشري منه ، يعني لو ما عرسو الناس ، بينقرضون البشر خخخخخخـ _

    المهم هب هو موضوعي هذا اللحينه الموضوع لي يكون في العرس ، وخاصتاً الأعراس لي فيها طرب وفرق وهالسوالف ، أنا لي خلاني إني اكتب هالموضوع مثل ما قلت الموقف لي صار معاي البارحة ، كان صوت عالي بالقو أغاني ومعلاية وما شابه ، وفي نفس منطقة ذاك العرس ، كان فيه بيت هناك فيه عزا ، يعني حتى ما حشموا البيت لي فيه العزا، ثاني شي اللحينه نحن معانا برد يعني إنسى سالفة المكيف بتشغل مكيف وبيهدأ الصوت ، يعني تخيوا لين الساعة 2 بعدهم يدقون معلاية ، انا عن نفسي ما قدرت ارقد إزعاج كان بالقو، شهالحالة_

    فما أدري شباب وبنات انتوا اشرايكم يعني في هالموضوع وهل إنكم ترضون إنه الطرب والمعلاية تستمر لين فوق منتصف الليل ولا لأ ، ثاني شي خلكم بنفس الموقف لي بقوله احينه ، مثلاً انتو معاكم عرس وجنبكم بيت فيه عزا بترضون تشغلون اغاني ولا لأ؟ _

    ياخي في حديث عن آخر الليل او الثلث الأخير من الليل وهو إنّ الله تعالى يمهل حتى إذا كان ثلث الليل الأخير ينزل إلى السماء الدنيا فيقول:
    هل من تائب فأتوب عليه ؟
    هل من مستغفر فأغفر له ؟
    هل من سائل فأعطيه ؟
    حتى يطلع الفجر " رواه البخاري ومسلم


    فأرجوا من جميع الأعضاء التفاعل في هذا الموضوع ، وياريت لو تكون هناك آذان صاغية _

    تقبلوا مروري _
     
  2. عالية متعالية

    عالية متعالية ¬°•| عضو مميز جدا |•°¬

    طبعا ان لو مكانهم مابرضى بالي يسونه ....

    وبعدين الواحد لما يكون عنده فرحه يفرح بالمعقول مش يسون حشره ...
    وبعدين المفروض ما يشغلون اغاني احتراما للجار الي متوفي عندهم ...

    مثل ما يقول المثل الدنيا دواره ...

    هاي وجه نظري ...

    وشكرا ع طرح الموضوع ...

    عساك دوم ع الزود ...
     
  3. طبيب الحب

    طبيب الحب ¬°•| عضو مميز |•°¬

    هو بصراااحه لازم ما يبطون لين الساعه2

    يعني ممب اكثر م الساعه12
     
  4. آل عزان

    آل عزان موقوف

    صح كلامك اخوي امس ما رمت ارقد

    والله لو ما سامعنهم روحي ما بقول جيه

    احلفلكم بالله اني امس ما رمت ارقد

    وانهم كانوا يحطوون قرآن وأناشيد

    وأغاني ودق معلايه .

    يا خي افرح عرس موت سافر سو اي شيء

    بس راعا الناس محد بيمنعك من الفرح

    هذا شيء راجع لك اما سالفة اني انا بفرح

    وما عليي من الناس بأذيهم هاي ما تستوي .

    ولكن هم ما يستحون ولا بحس ع دمي

    ولو ما قدر اي واحد قدر هالناس اللي عندهم عزا

    عنبوه ما عندهم ذمه وضمير .

    بس شو تقول

    ولكن والله لو كانوا فنفس الحاره وتامين للساعه 2

    وانا راسي مصطع نفس امس والله لجلب الفرح ترح

    ولجلب السعاده تعاسه .

    واللي ما يستحي منك لا تستحي منه

    والكلمه اللي تستحي منها بدها

    ولكن هالناس ما ردهم اصلهم

    حشا اللي فيه ادب واخلاق ومعنا

    ما يسوي هالخدمه .

    بس شو نقول

    سكان البريمي كثروا واهلها نقصوا

    الله يعين
     


  5. أنا يلي مستغرب منه هذا الفن البائت ( المعلايه )
    كيف ريال بطوله وشنبه يقوم يهز وسط الحضور
    وشو عزيمة العرب لو كانت على معلايه ..أمحق عزيمه


    شو هذي الثقافه الدخيله يلي صارت ...لا أدري ولكن غدا ستكون الثقافه الأم وبتتفرع منها كثير ثقافات مشابهه لها..والمصدر للأسف هي البريمي.


    أشاطرك العباره عزيزي آل عزان


    سكان البريمي كثروا واهلها نقصوا



    كل الود والتحايا على حرصك واهتمامك أخوي اليوبيل الماسي يعطيك الف عافيه.



    طبعا وكما تعلم الحنجره مبحوحه ..والعين بصيره واليد قصيره .



    عثاري





     
  6. آل عزان

    آل عزان موقوف

    مثلاً انتو معاكم عرس وجنبكم بيت فيه عزا بترضون تشغلون اغاني ولا لأ؟ _

    جوابي ع هالسؤال

    لو انا والله لأجل العرس وإذا مثلا توفى هالشخص من البيت اللي ينب بيتنا والمغرب كان او العشاء ويانا خبر وفاته لوقف الفرقه اللي يايبنها

    سواء كانت عياله ولا حربيه بنوقف هالفرقه وبنكمل العرس سكيتي .


    بس هالناس ما حشموا

    ومثل ما قالت اختي عاليه متعاليه الدنيا دواره .

    هذا رايي الشخصي
     
  7. كبـــــــريـاء

    كبـــــــريـاء ¬°•| مُشرفَة سَابِقِهْ |•°¬

    قضية جيده للمناقشة ،،

    في الحقيقة هالموضوع تم ترجمته في حلقة من حلقات حاير طاير ،،

    بداية خلونا نكون منطقيين : بيت فيه عزاء والبيت الثاني عرس ؟؟؟

    الكل يقول ليج ما ياجلون العرس احترام لناس اللى عندهم عزاء بس صعبه تغير موعد العرس !!!!!!!!!!!! موزعين بطاقات حاجزين الخ ،،،

    ومن غير المعقول ايضا ان نطالب منهم اطفاء الاغاني !!!!!!!! خاصة ف وقتنا الحالي اصبحت الاغاني شيء اساسي فالاعراس (سبحان الله ) ،،

    لكن الحل : ما نقدر نجبر او نفرض على الاخرين ارائنا لان مواقف مثل هذي يتحكم فيها ضمير الانسان فالمفروض ان اللى معرسين يخفوا ع صوت الاغاني ويكون فيه نوع من المراعاه ،، وايضا الاستسماح من الناس اللى وياهم عزاء بخصوص صوت الاغاني هنا بيكون فيه نوع من الاحترام لطرف الثاني ،،


    مجرد راي وكل الشكر لطارح الموضوع ،،

    تحياتي :

    كبــــــــــــرياء
     
  8. منى الروووح

    منى الروووح ¬°•| عضو مثالي |•°¬

    الصراحه موضوعك يبته ع الوتر الحساس
    يااخوي نحن ويا هالسالفه من يوم استويت
    نسكن حذال يران جيه
    لين اذان الفير مب لين الساعه 2

    بس "ان الله لا يغير ما بقوم حتى يغير مابأنفسهم"

    يعني لازم الواحد يحس بدمه
    ومدام عرس يفرحون بس الفرحه بقياس
    ربي يهديهم ويثبتهم ع دينهم
    والله يكون بعون اللي حذالهم
    معاناه من الخاطر


     
  9. تسلمين عالمرور وفعلاً مثل ما قلتي الدنيا دوارة ،،، يوم لك ويوم عليك _
     
  10. حتى لو لين س12 مثل ما قلت ،، نحن ما بنشوف على الكبار لكن فيه يهال وطبيعي يرقدون مرات حتى ع س10

    تسلم عالمرور _
     
  11. تسلم ع مرورك ،، وما بزيد على كلامك مثل ما قلت سكان البريمي كثروا واهلها نقصوا .
     
  12. تسلم على مرورك الكريم ،،، وكلامك هو عين العقل ما عليك زود _
     

  13. رأيك على العين والراس ، الحشمة وايد مهمة ومراعاة مشاعر الآخرين من الأخلاق النبيلة _

    تسلم ياخوي آل عزان على مشاركتك ومرورك الطيب_
     

  14. اختي كبرياء تسلمين على هالمشاركة الطيبة _

    اما بخصوص سالفة الحجوزات ،، اذا كانت في فندق او صالة افراح يسوون اغانيهم لين الصبح محد بيقول لهم لأ ، بس اذا المشكلة خيمة وفي نص الحارة ،،، لازم يكون نوع من الحشمة حق مشاعر الناس لي معاهم عزا _
     
  15. تسلمين على مرورج الكريم يا منى الروح _

    المشكلة ما قلنا حق الناس لا تفرحون ، الفرحة محد يقدر يوقفها هذا شي معروف _ بس لازم تكون لها نوع من التنظيم ومراعاة الآخرين وعدم الإزعاج _
     
  16. ♦L♦

    ♦L♦ <p><font color="#010000">زξـيم</font></p><p><font

    أنزين قلنا افراح وهذا لاكن يجب عليهم مراعاة الناس اللي حواليهم
    .
    وبعد المشكلة انه عدالهم عزاء مستوي وبعد يشغلون أغاني ومعلاية ×_×
    .
    شو هذي الأشياء الدخيلة على مجتمعنا
    .
    المفروض أصلا يراعون الناس مايصير جيه يسهرونهم على طول ومايقدرون ينامون
    .
    حته الناس مشغولين عندهم دوامات يريدون ينامون ×_×
    .
    الله يعافينا بس
    .
    مشكور أخوي على الموضوع
    .
    بارك الله فيك
     
  17. أم أحمـد

    أم أحمـد ¬°•| ~~سُوِيْرِهُ السَّعِيْدِيّ~~|•°¬

    بسم الله الرحمن الرحيم


    مااا شااء الله على الأخووان


    كلن برايه


    وانا اقوول هالسالفه وايد منتشره هالأياام


    وماا شااء الله على الناااس


    لازم أخر المنطقه يسمعوون ولا ما يكوون عرس


    يخي اسمع بروحك والي يبي يسمع بييكم لين عندكم


    مممممممم


    مااا شااء الله على النااس مب مقصرين


    الله يعطيهم العافيه


    هع هع هع


    تسلم اخويه على الطرح

    احترامي

    سويره
     
  18. ~آللهم آغفر لي ولوآلدي~

    ~آللهم آغفر لي ولوآلدي~ ¬°•| شيبت أنا قبل المشيب |•°¬

    ظاهرة منتشره بكثره اخوي مب بس في البريمي حتى عندنا

    رغم ان العرس يستوي في القاعات والفنادق وفوق هذا يشغلون في البيت والصوت مثل ما قلت يهز الفريج هز

    والاعظم انها اغاني والاغاني حرام يعني رضيت ولا ما رضيت تسمع تسمع

    طبعا أنا ضد هالشيء وافضل يكون العرس والربشه في الاماكن المخصصه لها بس وما لها لازمه الحشرة الي في البيت

    احتراما للجيران وضروفهم ...

    /
    \

    مع احترامي لاهل العرس بس ما يستحون مشغلين معلاية وبطيخه وصوته لاخر الدنيا وفيع عز

    يعني ما سوى اي احترام حق هالعائلة ولا قدرو حزنهم ... وربي المستعان

    صدق لي قالوا الجار قبل الدار

    /
    \

    يعطيك الف عافية أخوي على هالطرح المميز

    لا تحرمنا من يديدك

    دمت بود

    :):)
     
  19. حلوة مكحلة

    حلوة مكحلة ¬°•| lمشرفة سابقة|•°¬

    صح حتى أنا سمعت الحشرة
    وما قدرت أنا
    ولا قدرو الناس لي عندهم العزاء ولي معاهم اشغال

    وكانت أمي تقولي
    يمكن ما سوى عرس بحياتهم
    كذي يلستلي

    على الاقل يفرحوا هذا من حقهم لكن طبعا على حدود

    وتقبلوا مروري
     
  20. اخوي سوليد سنيك او الأفعى الصلبة _ تسلم على مرورك وفعلأ فيه هناكي ناس عندهم ارتباطات ودوامات هب فايجين حق السهرات الغنائية بس ما اقدر اقول غير الله يهديهم _
     

مشاركة هذه الصفحة