|--*¨ التاكسي !! ¨*--|

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
السلام عليكم ورحمة الله وبركاته ..

مرحبا بالجميع ..


تحدثت عن مواضيع كثيره في المنتديات ..

حسيت بيني وبين نفسي ..

ان ما عندي شي جديد اتحدث عنه ..

أغلب المواضيع والافكار مكرره ..

بعضها منقوله ..

وبعضها تختلف الاساليب والفكره وحده ..

المهم ..

أحب أتحدث عن الواقع اللي فحياتنا ..


تذكرت وانا راده من مشوار عن سوالف :

" التاكسي " .. أو " التكسي " .. أو " سايق التكسي " ..


اللي ركب هالاختراع أكيد مر بموقف يقهر .. أو يضحك ..

واللي ما ركب هالاختراع اكيد مر بموقف مع التكسي أو سايق التكسي فالشارع ..


المهم .. جمعت سنوات الذكريات ويا التكاسي وبخبركم عن بعض المواقف ..

من سنين .. قبل ما لا تظهر هالتكاسي الموحده فكل امارة ..

لو تذكرون لكل تاكسي لون .. وشكل .. وريحة .. ( اسمحوا لي على كلمة الريحة ) ..


* قبل تلقى التكاسي فكل مكان وسكه .. من تأشر وقف لك .. الموتر حدث ولا حرج من

الريحة .. وشكل السايق ما يحتاي .. أكيد بيكون لابس زيه الرسمي لبلاده .. وساعات تلقى السيت ( الكرسي ) وصخ ..

ومنهم يشغل الرادو ( الراديو ) على الاغاني الهندية .. أو أخبار بلاده .. وانته ساكت تسمع اما انك فاهم أو فاتح حلجك ..

من توصل عطيته الخرده ( طبعاً أقل من الاسعار المبالغ فيها اليوم ) ..



اليووووووووووووووووووم ..


ما أدراك ما اليوم .. بخبركم :



* تلقى سايق التكسي ملان من لبسه .. وفار او جالب الكرفته ورا ظهره ماله بارض .

* بعض التكاسي نظافه فنظافه .. والبعض الآخر مادري شكل السايق حالف يتم الموتر وصخ المهم يكد وبس ..

* وهناك من التكاسي فيهن تلفزيونات ويحطون اعلانات عن بعض الافلام المعروضه

فالسينما وطبعاً شاهد وانته ساكت المشهد عادي او غير عادي ..


* وسالفه الطرب فحدث ولا حرج كل واحد يشغل الرادو او المسجل على حسب

جنسيته .. ومنهم يحترمون اللي يركب وياهم ويسدونه .


* بعضهم يوديك وهو ساكت ما يرمس .. والبعض ما يصدق اذا سألته سؤال ..

بيرمس لين ما توصل .


* بعضهم شايف نفسه ( شوماخر ) فالسواقه ولا يهمه حد فالطريج .. يلف على هذا .. يعفد

( ينقز ) على اي مطبه ( ويخض بطنك ) .. واذا شاف الاشاره بتصير حمرا يزيد السرعه .. ولا يرحم الرادار .


* بعض السواقين عصبيين .. وبعضهم يستخف دمه .. وبعضهم ما يصدقون يلقون حرمه

تتريا .. اذا كان يسوق فجهة اليسار فثانيه يلف عاليمين ولا عليه من الهرنات والبريكات المهم يشل هالحرمه .


* بعضهم من يشوفون عيوز بتموت من الوقفه والحر .. والله لو شو ما وقفوا لها .



المهم .. هذا اللي شفته منهم أذكر بعض المواقف وياهم .. يوم ما احصل حد يوديني اطلب تاكسي كون موتري فالوكاله :



+ مره سايره وياحد من عيالنا الوكاله أبا اييب موتري .. الأخ خذ الطريق الطويل .. وماشل عينه من المنظره .. وذبحني وهو مشغل أغاني " عبدالحليم " .

+ أذكر مره طلبت التكسي لاني بغيت اسير مكان معروف ما فيه مواقف فهالوقت .. الاخ وصل معصب لانه ضيع بيتنا .. وتم يسوق الموتر شرات الخبله .. ونشيت اتصلت بالشركه اشتكي عليه وهو يسمعني .. وحزتها تادب وخفف السرعه .

+ فمره وانا راده البيت طلبت تاكسي سألني انتي فلانه .. قلت له : هيه .. وتم يفسر معنى اسمي .. وان اسمي مشهور كثير فدولتهم .. ويوم شاف وحده من الاهل عند الباب سألني هذي أمج !!! ( مادري ليش يبا يعرف ؟؟ ) .

+ ومره اذكر سرت ويا ربيعتي اييب موتري من الوكاله .. تم راعي التكسي يتسمعنا شو نقول .. وشو رايكم تدخل فالسالفه .. وقامت ربيعتي وسكتته .


ولا تنسون أكيد اذا صاحب التكسي تسبب فحادث على طول بينزل وبيرد عليك انك الغلطان وهو ما سوى شي .. ومن يشوف الشرطه .. ينتفض .. ويخاف .. وأكيد من يعرف انه الغلطان تشوفه شرات الارنب ويستسمح منك .


أحيد كنت اسوق وطلع لي شرات الطهف جدامي ودعم موتري .. نزلت له قلت له : ما تشوف .

رد : انتي مافي شوف ( عميا ) ..

كنت جريبه من البيت مشيت كم خطوة خبرت الاهل على اللي قاله وكيف كان متعنتر .. حصل صفعه ماشي شراتها من الاهل .. تأسف .. ويوم بغيت اتصل بالشرطه مات وقال : حرام عليج بيعاقبوني فالشركه وبيخصمون من معاشي اذا عرفوا اني الغلطان .!!



دامك تعرف العقاب .. وشو ممكن يصير فيك ..

ليش كل هذا اللي نشوفه فالشارع ..

ليش ما يتأدبون ويحترمون النظام والركاب وقوانين السير ..


طبعاً .. أنا ما اتهم الكل ..

البعض ..


والسموحة ..


:patch_punnch:
 

منى الروووح

¬°•| عضو مثالي |•°¬
إنضم
15 يونيو 2008
المشاركات
1,252
الإقامة
دوحة البريمي وسط العز سكناتي
الصراحه تحصل هاااي وايد عند اصحاب التاكسي
ليش الكل يكره يومه يوم يركب تاكسي كله من ورا هالاسباب اللي ذكرتها
الصراحه اشوف الوافدين احسن من المقيمين للتاكسي
والله يهدي اللي خبرتنا عنهم
 

حشيمة القلب

<font color="#DA0202"><b> ¬°•| إدارية سابقة |•°¬<
إنضم
29 يوليو 2008
المشاركات
24,489
العمر
37
الإقامة
°• مِنْ رَحِمْ الحُزنْ أتيتْ .. وسأبقىْ ..! °•
امممممممممممممممم التاكسي


والله صار مره موقف لاخوي رايح بوظبي واختربت سيارته هناك وهو عنده اشغال خلص اشغاله وخله سيارته عشان اليم الثاني بيرجع وبيشلها بونج


المهم ركب التكسي عشان يرد البيت وراعي التكسي اقولج مره يسوق هذي السرعه يقول اخوي وربي قلت يومي وصل

واقوله خفف مب زين السرعه تبا تذبحنا ورانا عيال بلاك


قاله حتى انا عندي عيال واذا عن الموت كلنا بنموت وبعده يسرع اخوي مره امفول يبا يهزبه بس مسك اعصابه


وماشي يوم وصل اخوي العين ارتاح قاله وقف اهني خلاص تبا تذبحنا بعد قال عادي كلش نفرات موت مافي مشكل خخخخخخخ

قال اخوي اوكي كلش نفرات موت بس الله مايقول عق عمرك فالتهلكه لو مب عشان عيالك جان بلغت عليك الشرطه

ويالله توكل وعادي اهو راح وبعده يزر هههههههههه


واخوي ركب تكسي ثاني ووصل البريمي


اذا عن التكاسي ياما بنشوف الويل الحين يسرعون وعادي لو شافوا احد خاطف مايهمهم المهم يوصلون لو دعمو احد شوفي حالتهم


كيف ينرجمون بس مايحاسبون لا وبعد يدخلون بحياتج تقولين واحد من الربع ولا من الاهل




تسلمين حبيبتي ع الطرح يعطيج الف عافيه^^
 

غٌَ ـلآ بُنٍيً گـ عُ ــبُ

¬°•| םـشُرٍَفٍة سْابِقِهْ|•°¬
إنضم
6 يونيو 2008
المشاركات
5,921
العمر
36
الإقامة
му σωη ωσяℓD
اووووووووووووووووووووووو ع طاري التاكسي





الله يسلمكم مره طالعه ويا خالوه والله يسلمكم تم ايشوحبنا ويفرفرنا من بقعه لين بقعه والغميضه انه يقول اندل وهو ما يندل ويوم تم يسرع وتقوله خالوه خف ما يعيبه ويتم يتحرطم ما حسيت بخالوه الا وتكفخه ع عسانته وتميت اضحك عليه لانه انصدم وما توقع هالشئ منها

عاد الله والروائح اي عطور اي باريس غاليري اي اريج

اجود الروائح واحلاهن
 

أم أحمـد

¬°•| ~~سُوِيْرِهُ السَّعِيْدِيّ~~|•°¬
إنضم
21 أبريل 2008
المشاركات
17,995
الإقامة
في بيت الوالد
^____^


والله ضحكتوني الحمدلله انا ما صارلي جي مواقف



بس كم مره كنااا بندعم سبه تهورهم


اسميهم يحصلون مسبه ههههههههههه



احترامي


للجميع



سويرة
 

دوحة2009

¬°•| عضو مبتدى |•°¬
إنضم
8 نوفمبر 2008
المشاركات
25
الإقامة
دوحة الخلان
التكااسي مشكلة واكبر مشكلتهم السررررعة ويوم يعفدون جدامك وانته تسوق ..

اما عني ما صادفتني مشاكل الا لما كنت مساافرة وعايشة في الغربة .. والتكااسي عندهم حدث ولا حرج :patch_music1:

مرور سريع وموضوع حلو .....


تحياتي​
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
فراوله شقيه


اختيه ..


يا كثر اللي يسرعون ولا يهمهم ...

واذا ذبح له حد بتلقينه خلف القضبان يصيح يتريا حد يدفع عنه الديه ..

دامك تتروع ليش عليك كل هالحركات .. :patch_punnch:


الله يسلم الجميع ..



مودتي ..



:patch_lov:
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
غلا بني كعب


ههههههههههههههههههههههههه ..


وينج ؟؟


ليش ما وديتيني وياكم ؟؟

ابا اشووووف ..


والله اني يالسه اتخيل المنظر وشكلج وانتي تضحكين ..


اذكر مره حد من الاهل سوى نفس الحركه وقالت له : وقف هني ونزلني ..




تسلمي لي فديت روحج ..



:patch_lov:
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
سورينام



فديتج ..

خطورتهم اذا ركبتي التاكسي او ما ركبتي ..


محد يسلم من شرهم ..



الله يحفظج من كل مكروه ..



مودتي ...




:patch_music:
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
دوحة2009



شكلهم مب محصلين اي قانون يردعهم فالعالم ..

لا نسلم اذا ركبنا ..

ولا اذا تصادفنا فالشارع ..


الله يحفظ الجميع ..


مودتي ...




:patch_lov:
 

جاسوس x

¬°•| عضو مميز |•°¬
إنضم
22 نوفمبر 2008
المشاركات
277
الإقامة
العين - مزيد


الصراحه تحصل هاااي وايد عند اصحاب التاكسي
 

أبو سلطااان

مؤسس و رئيس الفريق التطويري
طاقم الإدارة
إنضم
8 يونيو 2008
المشاركات
5,874
العمر
112
الإقامة
?!?!
أشكرج أختي ع الموضوع ...
من المواقف لي حصلت لي السنه الماضيه موتري عطلان و بالجراج و كل ما أسير أطالعه
أضرب صيم و يمر عليه التكاسي بالعشرات و لا حد يوقف إلا مرتيين و بالمرتين شواب كبار بالعمر و مره سألت الشايب ليش التكاسي ما توقف ؟؟
ال ما يوقفون إلا للجريم و حكالي موقف صار له مع حرمه عيوز واقفه بالشمس أكثر من ساعه و تأشر ببيزاتها و لما سألها ليش تأشرين بالبيزات ؟؟ قالت لأنهم ما حد وقف يمكن يتحروني ما بدفع , رد عليها لا السالف مب سالفه دفع سالفه يوقفون للحريم الشباب فقط ....
ما أدري هي مصدر رزق أو أنها مصدر للمعصيه ؟؟؟؟؟؟؟؟؟؟؟؟؟
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
أبو سلطااان


يا مرحبا اخويه ..

الله المستعان ..

تدري نحن عندنا ما يوقفون للمواطنين اما الاجانب فيدحون البريك اول ما يشوفونهم ..

يعني ما عندهم سوالف حريم ورياييل ..

أهم شي عندهم الاجانب ..

وسالفه البيزات صدق ذكرتني ..

ساعات من تدفع يظهر الفاتوره وما يعطيك الباقي يقول : " مافي خرده " ..



تحيتي ..




:patch_music:
 
أعلى