من اقاصيص الزمان ومن الذكريات الخالدة ،،

الموضوع في ',, البُريمِي لـ/ يوميات الأعضاء' بواسطة مخاوي الجروح, بتاريخ ‏10 سبتمبر 2015.

  1. مخاوي الجروح

    مخاوي الجروح ¬°•| عضو مثالي |•°¬

    السلام عليكم ،،
    شحالكم يا جماعة الخير ،،
    وش حال الربع قوم الادارة والشباب اليداد كلن بحالة ويا حي الله مليون ،،

    اليوم قررت اسوي مدونه لي مادري ربما تنجح ولا لا بس ان شاء الله وعلى امل اني التزم فيها ،،

    مادري ليش كل مره ارجع للمنتدى ايي هني ما حن فوادي على شي غير هالمكان ،،

    عموماً مدونتي البسيطة واتشرف بضيوف مدونتي كل صبح وكل ليل ومرحبا بالجميع وشكراا وايد ءءء !

    تابع يومياتي وما تنكسفش ءء
     
    آخر تعديل: ‏10 سبتمبر 2015
    أعجب بهذه المشاركة أم حمودي
  2. مخاوي الجروح

    مخاوي الجروح ¬°•| عضو مثالي |•°¬

    [​IMG]

    صبحكم الله بالنور والسرور ،،

    ماعرف كيف ابدي فالسالفه بس المهم ،، توني راقد بعد صلاة الفير وتوها غافية عيني وما اسمع الا بالباب يتبطل بذيج الطريقة الي تخليك تودر العرب فالحلم وتروح عنهم ،،
    وماشي والله منو طلع داش (ابوي ) ويزقر علي زقرة الغضب حميد حميد ،، وانا في دهمان ارد عليه ،، ها ابوي ،، وسألني شي عليك دوام ههههه وأنا ارد عليه هي ابوي مداوم مداوم ،،
    عاد ماشي يوم شافني استهبل حسيته ساير اييب المقشاع لكن الحمدلله رب العالمين عرفت اتصرف توه يبا يطلع قلت له ابوي شو مستوي رد عليه والغضب والحسرة تتطاير من عيونه قالي سيارتي خربانه والبوش يريضني ،،

    قلت له يعني ما مستوي شي ههههه قالي المبروكة ما اعرف شو فيها خربانه المهم وجان افزع ذيج الفزعه الي يوم فزعتها ابوي يشوفني جي قلت له افا عليك ابوي الحين نروح عند الناقات الحبوبات هههه ( طبعاً هالكلام في خاطري لاني لو قلت له صدق بتكفخ لين ما احب الدعنه )
    وماشي والله يوم توني البس كندورتي تذكرت شي

    تذكرت اني امس مغسل السيارة بكم والله بثلاث ريالات المهم حاولت اقنع نفسي ما عليه ان شاء الله معوض خير وماشي والله لين ما اقتنعت ،،

    وبدينا عاد نحمل الطعام حق العزبة وابوي يالس معصب على سيارته وينازعني انا ابوي ركز شوي انا شو ذنبي تنازعني هههه ،،

    ما علينا اصلا الشواب كلهم عصبيين فديتهم عشان ما يقولو والله نحن باردين هههه حتى فها الشي يبو محد يغلبهم ،،

    وماشي والله ركبنا ويلس يسألني انته الحين وين تشتغل طالعته قلت له ابوي انا ما اشتغل بس والله ما خليت مكان ما دورت فيه على شغل وارد مره ثانيه قلت له ابوي تصدق احس اني بشتغل قريب وهو يطالعني جي يرد علي يقولي عيل من الي عليه دوام اليوم قلت له والله ما انا هذا اخوي فلان عليه دوام ،،

    وييلس يحتشر علي ويحتشر ويحتشر ونازع شوي ووايد وشوي ووايد وانته تكذب علي وبغيت ارقع السالفة ماشي ،،

    وبعدين يات فكره في بالي وجان اقوله ابوي انا اقصد الدوام فالكلية ههههه انا علي دوام اليوم لكن مب ثقيل يعني مال نص ساعه قالي كيف هالدوام وحاولت ارقع لين ما استوا الترتيب هههه ونجحت الخطة

    المهم اول ما وصلنا صوب العزب ونزلت من الشارع حق القرقره وانا امشي حبه وربع عشان ما تتوصخ السياره وهو يطالعني يقولي حط ريلك ولد ( بذيج النبره الي تخليني اصير بن سليم مال العزب هههههه )
    وماشي والله وصلنا العزبة وضحينا البوش ورجعنا وهو ابوي يالس داق فكر فسيارته يقول انا ما اعرف شو فيها هالسياره شكلها زعلانه علي ،،

    وانا اضحك اقوله كيف زعلانه ابوي ،، رد علي قالي ما طاعت توصلني تبا تنام شكلها ،،
    رديت عليه قلت له ما عليه ابوي ان شاء الله ما فيها الا العافيه خخخخ الحين بنسير الصناعية بنشوف حد يعابل وكان الوقت الساعه ٦ ونص تقريبا ،،

    ولفينا ولفينا ندور حد ما حصلنا حد لقيناهم كلهم مبندين ،،

    خلاف ايس شيبوب قالي يالله غايته نرد البيت نشرب فنيان قهوة وخلاف بنرد لهم قلت له يالله غايته ،،

    اول ما وصلنا البيت وسرت انزل الاغراض ابوي سار بعده يحاول محاولة شرف ههه او محاولة اخيره يحاول يشغل السياره
    خلصت نزلت الاغراض انا وسرت اشوف شو السالفه ،،

    بطلت البونيت مال السياره واشوف هناك الكويل مبطل هههه ركبت الكويل وقلت حق ابوي اذا شغلت لك السياره بتدفع لي ثلاث ريالات مال الغسيل

    يطالعني يقولي اذا شغلتها بعطيك 5 ريال هههه المهم قلت له يالله الحين شغل شغل السياره واشتغلت الحمدلله ،،

    اطالع ابوي جي واقول في خاطري ( لا تدور زلتي وانت خابرني كفو ) هههه لو سمعني بتكفخ

    المهم لا حصلت خمسة ريالات ولا حصلت ثلاث ريالات ولا حتى ريال زين يوم ما كنت ههههه بل حصلت على عشرة ريالات وانا الحين مستانس شوي ما يايني رقاد من التفكير ما اعرف وين اقضي رحلتي ب العشرة ريالات

    وهذي يومي الصباحي واحين غاية الرقاد حياكم المداومين
     
    أعجب بهذه المشاركة أم حمودي
  3. عذبني فرقاك

    عذبني فرقاك ¬°•| عضو مبتدى |•°¬

    الله يعطيك العافيه اخوي مخاوي الجروح ويخليك لابوك الغالي
     

مشاركة هذه الصفحة